Ol i Singautim Ol Man i Kam Lukim

“OL I save mekim wanem long dispela hap?” Planti husat i save ron long ka na abrusim traipela haus bilong ol Witnes Bilong Jehova long biktaun Mogale (Krugersdorp), klostu long Johannesburg, Saut Afrika, i save kamapim dispela askim. Olsem na ol Witnes i tingting long singautim ol man long kam lukim dispela haus brens, long Oktoba 12 na 13, 2007. I gat tupela as na ol i singautim ol man i kam​—bilong pinisim ol stori giaman ol man i kamapim na bilong soim ol man ol wok dispela brens ofis i mekim bilong helpim wok Jisas Krais i tok long mekim.​—Matyu 28:​19, 20.

Ol lain i wok long brens ofis i putim bikpela sain long geit bilong singautim ol man i kam, na ol i givim spesel invatesen long ol neiba bilong ol. Na ol i singautim ol bisnisman long kam wantaim famili bilong ol. Wanem samting i kamap? Winim 500 manmeri husat i no Witnes Bilong Jehova ol i go raun lukim dispela brens ofis.

Wanpela samting i pulim ai bilong ol em wanpela traipela masin (MAN Roland Lithoman web-offset press) em i save prinim 90,000 magasin insait long wanpela aua. Na narapela samting tu i mekim ol man i kirap nogut, em ples we ol i save putim ol buk na nius long ol boks na salim i go, winim 14 ton long olgeta wan wan de, na tu, ol i kirap nogut long lukim ples bilong wokim ol buk. Ol Witnes long ol wan wan dipatmen i putim ol samting ol man i ken lukim, ol i putim tu stori bilong masin bilong prinim buk, kirap long masin bilong Gutenberg i kam inap long ol masin bilong nau. Na ol i soim tu sampela samting brens i save mekim bilong lukautim win na graun samting. Kain olsem, i gat wanpela masin bilong rausim win nogut na smel nogut i save kamap long masin bilong draim pepa, na i gat wanpela samting i save bungim ol das bilong pepa na bai ol i tromoi bihain.

Wanpela niuspepa i stori long ol 700 volantia husat i stap long dispela haus brens na i tok, “ol i wokman bilong God na ol i bin dediketim laip bilong ol long Jehova.” Na niuspepa i mekim gutpela tok tu long ples bilong prinim ol buk na nius, olsem “olgeta samting i stap klin tru na i save ron long taim stret.” Wanpela man i no bin amamas long ol Witnes Bilong Jehova em i kam raun lukluk. Bihain em i raitim pas i tok olsem: “Mi laik tok amamas long yupela. I no olgeta taim wanpela inap long lukim kain wok olsem i ron gut.”

Planti long ol lain i kam raun i kamapim amamas bilong ol long dispela raun bilong ol long dispela haus na ol i kirap nogut long lukim olsem brens i gat ol buk na nius bilong Baibel long 151 tok ples na ol i save prinim ol buk bilong 18 kantri long saut na sentral Afrika. Ol brens ofis bilong ol Witnes Bilong Jehova long olgeta hap bilong graun i save op long ol pablik i ken kam lukim namel long wik. Olsem wanem? Yu inap painimaut taim bilong raun lukim brens ofis long hap bilong yu?

[Piksa long pes 14]

Ol man i kam raun lukim brens

[Piksa long pes 14]

Invatesen

[Ol Piksa long pes 15]

Saut Afrika brens long biktaun Mogale, Saut Afrika

[Piksa long pes 15]

Masin MAN Roland Lithoman web-offset press

[Piksa long pes 15]

Ples bilong wokim ol buk

[Piksa long pes 15]

Ples bilong putim ol buk na nius long boks na salim i go