Ol i Dediketim Wastaua Edukesen Senta—Bung Bilong Litimapim Nem Bilong Jehova

KIRAP long bipo yet i kam inap nau, ol gutpela bung ol i hap bilong trupela lotu. Sampela bung bilong ol Israel bilong bipo i stap inap sampela de, na planti tausen manmeri i lotuim Jehova ol i go long ol dispela bung. Bung bilong dediketim tempel bilong Solomon i stap 7-pela de, na bihain long en ol i bung inap wanpela wik long bung ol i kolim Ol Bikpela De Bilong i Stap Long Haus Win. Dispela i opim rot na ol Israel i ken tingting long gutpela pasin Jehova i bin mekim long ol. Ol i go bek long haus na “ol i amamas tru, long wanem, ol i tingting long olgeta gutpela samting Bikpela i bin mekim long ol.”​—⁠1 King 8:​66.

Samting i kamap long Wastaua Edukesen Senta long Patesen, Nu Yok, Amerika, long Me 17-​22, 1999, i kirapim ol brata sista i kam long dispela bung long tingim ol bung bilong amamas bilong bipo. Long dispela wik planti samting i kamap bilong dediketim 28 haus, em ol i bilong helpim wok bilong skulim ol man long Baibel long olgeta hap. Ol i stretim rot bambai olgeta 5,400 brata sista i wok long hetkota long Bruklin, Wolkil, na Patesen, ol i ken raun na lukim gut olgeta haus samting bilong Patesen long dispela wik. Sampela bilong ol brata i kam long dispela bung, em ol 500 brata sista i bin insait long wok bilong sanapim dispela edukesen senta, na sampela brata bilong 23 brens-ofis bilong Sosaiti Was Taua, na sampela brata bilong ol kongrigesen i stap klostu​—⁠em olgeta inap olsem 8,100.

Ol Piksa Samting i Skulim Ol Man

Ol i soim ol piksa na video, na ol i putim ol sain na ol brata yet inap raun na lukim ol samting bambai ol i ken save long ol samting i kamap long edukesen senta. Long namba wan haus ol man i save kam insait long en, ol i laik lukim piksa i makim tempel bilong Jerusalem long taim Jisas i bin mekim wok bilong em long graun. Ol narapela piksa i stori long Wastaua Baibel Skul Bilong Gileat taim skul i nupela yet, na long ol bikpela kibung bilong bipo, na long ol miting bilong kongrigesen, na long ol Baibel-stadi bilong nau em ol i save mekim planti milion long olgeta wik, na long wok dipatmen bilong lo i mekim bambai ol Witnes i stap fri long mekim ol dispela samting, olsem Jisas i bin tokim ol long mekim.​—⁠Matyu 28:​19, 20.

Inap 1,700 manmeri inap sindaun gut long haus bung i stap klostu. Ol brata i raun long dispela wik bilong dediketim edukesen senta, ol inap lukim wanpela video inap 33 minit, nem bilong en, “Strong Bilong Man i No Kamapim​—⁠Spirit Bilong Mi i Kamapim!” Dispela video i soim olsem wanem Wastaua Edukesen Senta i kamap. Ol i toktok wantaim sampela brata na dispela i kamapim klia olsem Jehova i bin stiaim wok, na em i blesim hatwok bilong ol brata na ol i pinisim wok insait long 15 yia. Planti tausen i bin insait long wok bilong sanapim edukesen senta. Long 1994, inap 526 man i wok, em 350 bilong ol em ol volantia i wok oltaim, na 113 i kam wok long liklik hap taim, na 63 i slip long haus bilong ol na ol i go i kam na helpim wok. Planti narapela i givim mani bilong helpim dispela wok. Olgeta dispela brata i save olsem ol inap mekim dispela wok long strong bilong spirit bilong Jehova tasol.​—⁠Sekaraia 4:⁠6.

Ol brata i raun, ol inap lukim olsem namba wan wok ol i mekim long edukesen senta i bilong helpim wok bilong skulim ol man long Baibel. Ol piksa i stap long hap bilong i go insait long Skul Gileat long namba wan plua bilong haus skul, i kamapim stori bilong dispela skul. Kirap long taim namba wan klas i skul long 1943 long Saut Lansing, Nu Yok, Skul Gileat i bin skulim inap 7,000 sumatin bilong mekim wok misineri. Long namba tu plua bilong haus skul, ol i soim ol piksa bilong Skul Bilong Ol Komiti Bilong Brens na Skul Bilong Ol Wasman Bilong Raun, em dispela tupela skul i kamap long dispela haus. Kirap long taim skul bilong brens i kirap long Novemba 1995, dispela skul i bin skulim 360 brata bilong Komiti Bilong Brens bilong 106 kantri.

Taim ol brata i raun, kwiktaim ol i save olsem ol inap lukim planti samting long edukesen senta, i no ol piksa tasol. Ol inap i go insait long narapela narapela dipatmen, na raun long ol ofis na long ol narapela hap ol brata i wok long en, na kisim gutpela save long wok ol i mekim. Wanpela gutpela samting bilong lukim em haus ol i wokim ol kaset na video long en. Ol i mekim wok long ol gutpela samting bilong helpim wok bilong skulim ol man long Baibel! Long rot bilong ol piksa na ol sotpela video, ol brata i raun ol i kisim save long pasin bilong putim nek bilong man long kaset na long pasin bilong wokim video. Ol i lain long samting bilong bikpela wok ol brata i mekim bilong kisim save long ol klos na ol narapela samting ol i mas mekim wok long en long ol piksa na video. Ol i lukim olsem wanem ol i stretim gut ol liklik liklik samting bilong hap ol i kisim piksa long en, na ol i no tromoi bikpela mani long dispela wok. Ol brata i raun ol i lukim olsem wanem ol i mekim wok long musik bilong helpim ol man long ting olsem, ol yet i stap long dispela video ol i lukim. Kirap long 1990 i kam inap nau, Sosaiti i bin wokim 10-pela video long 41 tok ples em ol i stori long narapela narapela tok bilong Baibel, na tu, i gat sampela video ol i mekim tok long han long tok bilong ol yaupas bilong Amerika.

Planti ol i go lukim dipatmen ol i save wasim ol foto long en, na dipatmen bilong wokim piksa, na dipatmen bilong skulim ol man long ol samting bilong kompyuta, na dipatmen bilong wok autim tok, em dispela dipatmen i save lukautim wok bilong 11,242 kongrigesen na 572 wasman bilong raun. Ol i lukim tu dipatmen bilong bekim pas bilong ol man, em long dispela dipatmen ol i save skelim 14,000 askim bilong ol man long olgeta yia. Ol i kirap nogut long lukim hatwok ol brata i mekim bilong bekim ol pas, na pasin bilong ol long tingim tru ol man em pas bilong ol i kamapim klia olsem ol i karim ol bikpela hevi.

Planti man i go lukim dipatmen bilong lukautim ol samting bilong wok bilong tanim tok. Ol i kirap nogut long harim olsem insait long 5-pela yia i go pinis, Sosaiti i bin tanim tok bilong ol buk na nius bilong Baibel long 102 tok ples moa. Planti Witnes Bilong Jehova (80 pesen) ol i no save ritim ol buk na nius bilong Sosaiti long tok Inglis, nogat, ol i save ritim long ol narapela tok ples. Bilong helpim ol dispela manmeri, winim 1,700 volantia i save tanim tok long 100 kantri. Ol i soim ol Wastaua long ol tok ples bilong Not na Sentral na Saut Amerika, Yurop, Esia, na Afrika. Ol man i raun ol inap lukim Baibel New World Translation long 31 tok ples em ol i bin wokim dispela Baibel long en. Ol i kisim save olsem ol buk samting bilong Was Taua i stap long 332 tok ples, na ol i bin wokim buklet God i Laik Yumi Mas Mekim Wanem? long 219 bilong ol dispela tok ples.

Ol brata i raun long dipatmen bilong lo, ol inap lukim planti narapela narapela samting dispela dipatmen i mas mekim long olgeta hap. Ol i lukim wanpela kot long video, na loya i Witnes em i toktok long ol samting bilong kisim blut. Ol i kisim save tu long wok ol i mekim bambai rot i op long ol Witnes i ken autim gutnius long ol haus na long rot samting. (Filipai 1:⁠7) Ol i stori long tok distrik kot i pasim, olsem distrik Oradel bilong taun Nu Jesi, Amerika, i mas senisim lo na bai ol Witnes Bilong Jehova i no gat wok long karim kat samting i tok orait long ol i ken mekim wok autim tok long haus bilong ol man long dispela hap.

Tasol ol brata i raun ol i no lukim dispela samting tasol, nogat. Ol i lukim ol samting bilong pasin bilong wokim haus long wanpela woksop (Precast Shop), na ol i raun long hap bilong klinim na putim marasin long wara, na haus bilong wokim paua, na planti narapela woksop. Em i wanpela gutpela samting tru long ol dispela brata inap raun na lukim ol samting.

Program i Tok Long Skul Yumi Kisim Long God

Program bilong dediketim edukesen senta i kamap long Trinde, Me 19, na i kirap long 4 klok long apinun. Inap 6,929 i bung, em ol brata sista i wok long hetkota, na ol brata Sosaiti i bin singautim ol, na 372 brata sista long brens bilong Kanada, em ol i harim dispela program long rot bilong telefon.

Ol brata i amamas long harim gutpela tok amamas bilong Milton G. Henschel, em presiden bilong Sosaiti Was Taua. Wanpela brata bilong Lain Bilong Bosim Ol Witnes na siaman bilong program, em Theodore Jaracz, em i singautim William Malenfant long mekim hap bilong em. Long tok bilong em “Ol Gutpela Samting Bilong Wok Bilong Wokim Haus,” em i toktok wantaim 3-pela brata i bin go pas long wok bilong kamapim na wokim Wastaua Edukesen Senta. Ol i tok, insait long ol yia ol i bin wokim edukesen senta, winim 8,700 brata sista i baim rot bilong ol yet na kam mekim wok. Dispela i kamapim klia olsem skul ol man i kisim long God i mekim na ol man i stap wanbel na ol i givim ol samting!

Orait nau ol i mekim wanpela tok i gat 4-pela hap, nem bilong en, “God i Skulim Ol Man Long Olgeta Hap.” Inap 4-pela brata bilong Lain Bilong Bosim Ol Witnes i mekim ol dispela tok. John E. Barr i tok, as bilong tok em God i skulim ol man long en i stap long Baibel, na Baibel i kirapim ol Kristen long ‘mekim planti kain gutpela wok. Na bai ol i save long God, na oltaim dispela save bai kamap bikpela moa.’ (Kolosi 1:​10) Daniel Sydlik i toktok long pasin bilong stretim wok bilong skulim ol man long tok bilong God. Het bilong kongrigesen Kristen, em Krais Jisas, i go pas na olgeta wan wan brata i stap long olgeta hap ol i kisim skul long God. (1 Korin 12:​12-​27) Laspela tupela tok bilong dispela hap, em Gerrit Lösch na Carey Barber i mekim, i stori long olsem wanem skul ol man i kisim long God i helpim ol wokman bilong em long painim ol man long olgeta hap, na skulim ol bambai ol tu i ken wokabaut long rot God i makim.​—⁠Aisaia 2:​1-4; 2 Korin 3:⁠5.

Bilong ol brata i ken save long ol skul i kamap long edukesen senta, ol i toktok wantaim ol tisa na ol narapela brata i insait long wok bilong ol dispela skul. Ol i soim olsem wanem ol dispela skul i helpim wok bilong skulim ol man long tok bilong God long olgeta hap. Ol i tok, long Skul Gileat ol i save stadi long olgeta wan wan buk bilong Baibel, na skelim ol wok samting bilong lain bilong Jehova bilong nau, na kisim save long ol samting bilong wok misineri. Skul bilong ol brata bilong Komiti Bilong Brens i skelim gut ol narapela narapela wok ol dispela brata i insait long en. Ol i kamapim Skul Bilong Ol Wasman Bilong Raun bilong strongim bel bilong ol, na tu, bilong skulim ol bambai ol i ken helpim ol kongrigesen long ol samting bilong spirit.

Bilong pinisim dispela gutpela program, Lloyd Barry bilong Lain Bilong Bosim Ol Witnes em i mekim tok bilong dediketim edukesen senta, nem bilong en, “Wok Wantaim Bikpela Man Bilong Wokim Olgeta Samting.” Em i tok, Man bilong wokim yumi, em Jehova, em i amamas long olgeta samting em i bin wokim, na em i singautim yumi long amamas wantaim em. (Aisaia 65:18) Em “i bin wokim olgeta samting,” olsem na em i mekim na dispela edukesen senta i kamap na yumi mas litimapim nem bilong em. (Hibru 3:⁠4) Taim em i kamapim ol dispela tok pinis, em i beten na dediketim Wastaua Edukesen Senta long Jehova, em Bikpela Man bilong wokim yumi.a

Tru tumas, ol brata sista i raun long Patesen long dispela wik bilong dediketim edukesen senta, bai ol i tingim dispela samting inap longpela taim. Gutpela sapos yu stretim rot na i go lukim Wastaua Edukesen Senta. Mipela i save taim yu raun na lukim dispela hap, em bai strongim yu long wok bilong yu long kisim sampela save moa long gutpela Man bilong wokim yumi, na long bihainim ol stretpela lo bilong em.

[Futnot]

[Ol Piksa long pes 10]

Haus bung i pulap na ol narapela i harim program long rum bilong kaikai

[Ol Piksa long pes 10]

Ol i amamas long raun na lukim ol samting