Amamas na Belgut Long Jehova
TAIM wanpela gutpela wok samting i pinis, em taim bilong amamas. Bung bilong makim olsem ol 48 sumatin bilong klas namba 106 bilong Wastaua Baibel Skul Bilong Gileat ol i winim skul em i bin kamap long Wastaua Edukesen Senta long Patesen, Nu Yok, em i wanpela bung bilong amamas.
Bilong kirapim bung, Theodore Jaracz, wanpela bilong Lain Bilong Bosim Ol Witnes, na em yet i winim klas namba 7 bilong Skul Gileat na em i siaman bilong program, em i kamapim tok bilong Song 32:11: “Yupela stretpela manmeri, yupela i mas belgut na amamas long olgeta gutpela samting Bikpela i mekim.” Taim em i stori long i gat wanem as na i stret olgeta i mas amamas long dispela bung, em i tok: “Yumi mekim olsem, long wanem, Jehova i mekim ol gutpela samting long rot bilong ol man i gat gutpela bel, long rot bilong ol sumatin bilong Gileat tu, olsem na yumi amamas long ol kain bung olsem.” Ol sumatin i bin stretim rot bilong kam long Skul Gileat na ol i bin wok strong bambai ol i ken inapim ol mak bilong mekim wok misineri, tasol Jehova i mekim na olgeta samting i kamap gutpela. (Sindaun 21:5; 27:1) Brata Jaracz i tok, dispela samting i as na yumi amamas long Jehova.
Ol man i kam long haus bung long Patesen em ol wanblut na ol pren em ol sumatin bilong 12-pela kantri ol i bin singautim ol long i kam long dispela bung bilong amamas. Taim 5,198 manmeri—na olgeta long Betel long Bruklin, Patesen, na Wolkil, em ol i lukim program long rot bilong televisen—ol i wet long harim ol tok bilong program, ol i amamas tru.
Stap Amamas Long Olgeta Taim
Taim brata Jaracz i pinisim tok bilong kirapim bung, em i singautim namba wan brata bilong ol 5-pela brata bilong mekim tok. Ol i bin redim ol gutpela tok bilong Baibel bilong strongim ol sumatin bilong Gileat, na ol narapela man i harim tok.
Namba wan brata i mekim tok em William Malenfant, em i bin winim klas namba 34 bilong Gileat, na nau em i wok olsem wanpela helpim bilong Komiti Bilong Wok Tisa bilong Lain Bilong Bosim Ol Witnes. Em i mekim wanpela askim i stret wantaim nem bilong tok bilong em, “ ‘Olgeta Samting’ i No Samting Nating!” em Saveman 1:2 i as bilong en. Dispela askim i olsem: “Olsem wanem? Solomon i tok olgeta samting yumi mekim i samting nating na i no gat as bilong en?” Bekim bilong dispela askim i olsem: “Nogat. Em i tok long ol samting ol man i mekim na ol i no tingim laik bilong God, em ol samting i no stret wantaim laik bilong God—ol dispela samting i olsem samting nating na i no gat as bilong en.” Tasol taim yumi lotuim trupela God, Jehova, na stadi long tok bilong em long Baibel, na skulim ol narapela long en; ol dispela samting i no samting nating i no gat as bilong en, nogat. God i no save lusim tingting long ol dispela kain wok ol wokboi bilong em i save mekim. (Hibru 6:10) Maski wanpela hevi i painim ol man em God i orait long ol, em bai ‘lukautim gut ol olsem ol gutpela samting bilong em.’ (1 Samuel 25:29) Man! Em wanpela gutpela tok tru, a? Taim ol man i lotuim Jehova ol i tingim ol dispela tok, dispela bai helpim ol long i stap amamas.
John Barr, em wanpela bilong Lain Bilong Bosim Ol Witnes, em i strongim bel bilong ol sumatin long tok bilong em, “Amamas Long Mekim Wok Misineri Bilong Yupela.” Em i kamapim olsem wok misineri em i wanpela wok God Jehova i save tingim tru. “Em i wanpela bikpela samting bilong pasin sori Jehova i bin mekim long ol manmeri bilong graun. Em i salim dispela wanpela Pikinini bilong em i kam long dispela graun. Jisas em i nambawan misineri i winim olgeta narapela misineri.” Ol dispela sumatin i winim skul, ol inap tingim ol senis Jisas i mas mekim bambai em i ken mekim gut wok bilong em hia long graun, na ol gutpela samting bilong wok misineri bilong Jisas i helpim yet ol man i bihainim ol tok bilong em. Brata Barr i tok, Jisas i bin amamas long mekim wok bilong God, na tu, em i laikim tumas ol manmeri bilong graun. (Sindaun 8:30, 31) Brata Barr i strongim ol sumatin i winim skul long i stap long wok bilong ol, na ol i no ken mekim olsem bilong sanap strong na karim ol hevi tasol, nogat; ol i mas amamas long mekim olsem. Em i tokim ol sumatin olsem: “Wetim Jehova i helpim yupela, bai em i no lusim yupela.”—Song 55:22.
“Wokabaut Long Nem Bilong Jehova Inap Oltaim Oltaim,” em nem bilong tok narapela brata long Lain Bilong Bosim Ol Witnes, Lloyd Barry, em i mekim. Bihain long em i winim klas namba 11 bilong Gileat, em i mekim wok misineri long Japan inap 25 yia samting. Brata Barry i stori long sampela ekspiriens bilong ol misineri bilong pastaim na long ol hevi ol i bin karim. Em i gat wanem gutpela tok bilong helpim ol sumatin? Em i tok: “Em i bikpela samting long yupela i mas stap strong yet long ol samting bilong spirit. Na tu, yupela i mas lain long tok ples na pasin bilong ol. Yupela i mas i gat pasin bilong lap na amamas. Na stap gut long wok, no ken les o slek long mekim wok.” Brata Barry i tokim ol sumatin olsem long ol kantri ol bai i go wok long en, planti manmeri i save wokabaut long nem bilong kain kain god, na em i kirapim ol long tingim tok bilong Maika: “Olgeta arapela lain pipel i lotu long ol giaman god bilong ol yet na bihainim ol, bai yumi . . . lotu long God, Bikpela bilong yumi oltaim oltaim, na bihainim em wanpela tasol.” (Maika 4:5) Gutpela pasin bilong ol brata sista i mekim wok misineri bipo, em i wanpela bikpela samting bilong kirapim olgeta wokboi bilong God long wokabaut yet long nem bilong Jehova na stap gut long wok bilong em.
Tisa bilong skul Gileat, Lawrence Bowen i mekim narapela tok long program. Nem bilong tok bilong em i kamapim dispela askim, “Bai Yu Kamap Wanem Kain Man?” Em i kamapim olsem, bilong man i ken stap gut long wok bilong God, em i mas bilip strong long Jehova. King Asa i bilip strong long Jehova na dispela i bin helpim lain bilong em long kilim i dai wan milion birua. Tasol profet Asaria i tokim em olsem ol i mas wok yet long bilip na wetim Jehova i helpim ol: “Sapos yupela i stap klostu long Bikpela, orait bai em i stap wantaim yupela.” (2 Stori 14:9-12; 15:1, 2) Insait bilong nem bilong God, Jehova, i olsem em inap kamap man bilong mekim ol samting em i mas mekim bilong kamapim laik bilong em—olsem Man bilong lukautim yumi, Man bilong was long yumi, o Man bilong givim strafe—na ol misineri i save wetim Jehova i helpim ol na ol i mekim ol wok i stret wantaim laik bilong em, wok misineri bilong ol bai kamap gutpela. (Kisim Bek 3:14) Bilong pinisim tok, brata Bowen i tok: “No ken lusim tingting olsem sapos laik bilong Jehova i kamap olsem laik bilong yupela, em bai helpim yupela long kamap man bilong mekim ol samting yupela i mas mekim bilong inapim wok bilong yupela.”
Wallace Liverance, bipo em i wanpela misineri na nau em i kuskus bilong skul, em i mekim laspela tok long dispela hap bilong program. Nem bilong tok bilong em “Larim Tok Bilong God i Wok Yet Insait Long Yupela,” i stori long ol tok na tok promis bilong God em oltaim i wok long kamap tru. (Hibru 4:12) Tok bilong God i save stiaim i stap bilong ol man i larim dispela tok i mekim olsem. (1 Tesalonaika 2:13) Olsem wanem dispela tok i ken wok yet long laip bilong yumi? Long rot bilong stadi gut long Baibel. Brata Liverance i tokim ol sumatin long bihainim pasin bilong stadi long Baibel ol i bin lainim long Gileat, olsem ol i mas ritim Tok Bilong God na tingim gut as bilong en na bihainim. Em i kamapim tok bilong Albert Schroeder, em wanpela bilong Lain Bilong Bosim Ol Witnes, na em i siaman bilong komiti i bin kirapim Skul Gileat inap 50 yia i go pinis: Em i tok: “Taim man i skelim ol tok i stap klostu, em inap kisim gut strongpela na stretpela kaikai bilong spirit em God i givim yumi long rot bilong Tok bilong em.” Dispela kain pasin bilong stadi long Baibel bai mekim na tok bilong God i wok yet insait long yumi.
Ol Ekspiriens na Toktok Wantaim Sampela
Bihain long ol brata i mekim ol tok, ol manmeri i kam bung ol i amamas long harim sampela gutpela ekspiriens bilong ol sumatin. Mark Noumair, bipo em i wanpela misineri na nau em tisa bilong Gileat, em i lukautim hap em sampela sumatin i stori na mekim soim long olsem wanem ol i bin wok strong long autim tok long kain kain man. Sampela i bin skelim gut sindaun na toktok bilong ol man, na ol i tingim tru ol man na long dispela rot ol i bin kirapim na mekim ol Baibel-stadi. Olsem na ol sumatin i bin ‘was gut long pasin bilong ol yet na long wok ol i mekim bilong skulim ol manmeri,’ na ol i gat bikpela laik tru long helpim ol narapela long abrusim bagarap.—1 Timoti 4:16.
Ol brata i kamapim planti gutpela tok bilong helpim ol sumatin. Na sampela strongpela brata i skul long skul bilong ol komiti bilong brens long Wastaua Edukesen Senta, ol i bin stori long amamas bilong wok misineri. Brata Samuel Herd na Robert Johnson bilong hetkota, ol i givim ol askim long ol brata bilong brens-ofis bilong Sosaiti long Bolivia, Simbabwe, Nikaragua, Ripablik Sentral Afrika, Ripablik Dominika, Papua Niugini, na Kamarun.
Bihain long dispela, Gerrit Lösch, em i bin winim klas namba 41 bilong Gileat na nau em i wanpela bilong Lain Bilong Bosim Ol Witnes, em i mekim laspela tok, nem bilong en “Yu Wanpela Man ‘God i Laikim?’ ” Brata Lösch i tokim ol sumatin olsem, Jisas em i Pikinini bilong God na em i gutpela olgeta, tasol ol manmeri i no tingim em i olsem wanpela gutpela man, na ol “i bin givim baksait long em na rabisim em na ol i no laikim em tru.” (Aisaia 53:3) Olsem na yumi no kirap nogut olsem, long nau long planti hap bilong graun, ol man i no laikim ol misineri. Tasol taim Daniel i stap long Babilon, long rot bilong wanpela ensel God i tokim Daniel inap 3-pela taim olsem em i laikim em tumas. (Daniel 9:23; 10:11, 19) Wanem samting i mekim na God i laikim tumas Daniel? Em i no brukim liklik wanpela lo bilong Baibel taim em i wok long lain long sindaun na pasin bilong ol Babilon. Em i bihainim stretpela pasin long olgeta samting, na maski em i gat namba em i no mekim ol samting bilong helpim em yet, na em i givim bel long stadi long Tok Bilong God. (Daniel 1:8, 9; 6:4; 9:2) Na tu, em i save beten oltaim long Jehova na taim wok bilong em i kamap gutpela em i redi long litimapim nem bilong God. (Daniel 2:20) Taim ol wokboi bilong God i bihainim pasin bilong Daniel, ol i ken kamap gutpela man, ating ol i no gutpela long ai bilong ol manmeri bilong graun, tasol ol i gutpela long ai bilong God Jehova.
Bilong pinisim dispela gutpela program, siaman i kaunim sampela telegram na gude ol brata bin i salim i kam long olgeta hap bilong graun. Nau, olgeta sumatin i kisim pepa i makim olsem ol i winim skul, na ol i tokaut long ol kantri ol bai i go long en. Bihain long dispela wanpela sumatin i ritim wanpela pas i go long Lain Bilong Bosim Ol Witnes na famili bilong Betel bilong tok tenkyu long skul ol i bin kisim insait long faipela mun.
Taim program i pinis, ol manmeri i go bek na ol i ‘amamas na tenkyu long God.’—Nehemia 12:27.
[Blok long pes 27]
Ol Samting Bilong Ol Sumatin
Hamas kantri ol i kam long en: 10
Hamas kantri ol bai go long en: 19
Hamas sumatin: 48
Hamas ol i marit: 48
Krismas bilong ol, averes: 33
Hamas yia long tok i tru, averes: 16
Hamas yia long wok painia, averes: 13
[Piksa long pes 25]
Namba 106 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain na namba 8 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.