Pasin Bilong Givim Bel i Bringim Ol Manmeri Long Skul Gileat
WASTAUA Baibel Skul Bilong Gileat i stap bilong skulim ol man na meri i dediket pinis long mekim wok misineri long ol narapela kantri. Husat inap i go long Skul Gileat? Ol man i save givim bel long wok bilong God. (Song 110:3) Dispela i kamap ples klia long Septemba 8, 2001, long gretiuesen bilong klas namba 111.
Sampela sumatin i bin lusim pinis famili, ol pren, na ples bilong ol bilong go mekim wok long ol hap ol i sot long ol man bilong autim tok. Long dispela rot ol i traim ol yet bilong save ol inap stretim ol samting bilong ol i ken sindaun long narapela kain ples o nogat. Olsem: Bilong autim gutnius bilong Kingdom bilong God, Richer na Nathalie i stretim ol samting bilong ol bilong go sindaun long Bolivia, Todd na Michelle long Ripablik Dominika, David na Monique long wanpela kantri long Esia. Sampela narapela sumatin i bin wok long Nikaragua, Ekwado, na Albenia.
Sampela i bin strongim Christy long lainim tok ples Spen long haiskul, na dispela i helpim em long redi bilong stap tupela yia long Ekwado paslain long em i marit. Sampela narapela sumatin i bin go long ol kongrigesen bilong narapela tok ples i stap long kantri bilong ol yet. Bilong winim narapela kain hevi, Saul na Priscilla i givim bel long wok strong long lain gut long tok Inglis paslain long ol i kam long skul.
Inap 20 wik ol i skul bilong kamap misineri na dispela hap taim i pinis hariap. De bilong gretiuesen i kamap na ol sumatin i stap wantaim ol pren na famili, na ol i putim yau long ol gutpela tok bilong helpim na strongim ol.
Siaman bilong program em Theodore Jaracz, em i bin winim klas namba 7 bilong Skul Gileat, na nau em i wanpela memba bilong Gavening Bodi Bilong Ol Witnes Bilong Jehova. Long kirap bilong program em i tokaut klia olsem oganaisesen bilong yumi i no bin lusim tingting long as na ol i skulim ol sumatin long Skul Gileat, em bilong ol i ken autim gutnius bilong Kingdom long olgeta hap. (Mak 13:10) Skul Gileat i redim ol sumatin bilong mekim bikpela wok autim tok winim bilong bipo, long ol hap ol i laik bai ol misineri i bin skul gut i wok long en. Brata Jaracz i tokim ol sumatin long bihainim ol gutpela tok ol i kisim long Skul Gileat taim ol i go na wok wantaim ol narapela misineri i wok nau long 19 kantri ol i makim ol dispela sumatin long i go long en.
Gutpela Tok Long Ol Nupela Misineri
Bihain long dispela, sampela tok moa i kamap. William Van De Wall, em memba bilong Komiti Bilong Brens bilong Yunaitet Stets, em i toktok long “Pasin Bilong Mekim Strong Wok Misineri—Em Mak Bilong Ol Kristen Tru.” Em i toktok long wok bilong ‘kamapim ol disaipel,’ em Matyu 28:19, 20 i tok long en, na em i tokim ol sumatin: “Bihainim pasin bilong Jisas, em i givim bel long mekim wok misineri bilong em.” Bilong helpim ol nupela misineri long givim bel long wok misineri, em i tokim ol: “Bihainim gutpela sediul; bihainim pasin bilong stadi gut, save long ol nupela samting bilong wok tiokratik; na oltaim tingting long i gat wanem as na yu mekim wok misineri.”
Bihain long dispela, wanpela memba bilong Gavening Bodi, em Guy Pierce, i mekim tok. Em i toktok long “Wok Yet Long Skulim ‘Stretpela Tingting’ Bilong Yu.” (Rom 12:1, NW ) Em i mekim gutpela tok bilong helpim ol nupela misineri, na em i strongim ol long mekim wok long samting God i bin givim long ol, em pasin bilong tingting gut. Em i tok: “Wok long tingim tingim ol samting Jehova i tokim yupela long en long rot bilong Tok bilong em. Dispela bai lukautim yupela.” (Sindaun 2:11) Brata Pierce i tokim ol tu long ol i no ken ting olsem tingting bilong ol tasol i stret, nogut dispela i pasim ol long bihainim “stretpela tingting.” Tru tumas, ol dispela gutpela tok bai helpim tru ol sumatin long mekim wok misineri.
Nau siaman i singautim wanpela tisa bilong Skul Gileat, em Lawrence Bowen, na em i toktok long “No Ken Tingting Long Ol Narapela Samting.” Em i tok, taim aposel Pol i mekim wok misineri long Korin, em i no ‘tingting long narapela samting, em i tingting tasol long Jisas Krais i bin i dai long diwai.’ (1 Korin 2:2) Pol i save olsem nambawan bikpela strong long heven na graun, em spirit holi, i strongim bikpela tok bilong Baibel olgeta: Long rot bilong dispela Pikinini em i bin tok promis long salim i kam, Jehova bai kamapim klia olsem i stret em i stap Nambawan Bos. (Stat 3:15) Em i kirapim dispela 48 sumatin long bihainim pasin bilong Pol na Timoti na mekim wok misineri bilong ol i kamap gutpela, na bihainim “gutpela tok.”—2 Timoti 1:13.
Het-tok bilong laspela tok bilong dispela hap em, “Amamas Long Gutpela Wok Yu Kisim, Em Presen i Kam Long God.” Wallace Liverance, em kuskus bilong Skul Gileat, em i helpim ol sumatin long save olsem long pasin marimari bilong God ol i bin kisim ol gutpela wok, em i no samting God i mas givim long ol o pe ol i kisim. Brata Liverance i stori long pasin bilong aposel Pol: “Ol samting Pol i bin mekim i no as na Jehova i makim em bilong mekim wok aposel namel long ol narapela lain. Sapos em i bin makim em long dispela as, i olsem dispela wok em pe Pol i kisim o em samting God i mas givim long em. God i no givim dispela wok long Pol, long wanem, em i bin wok inap planti yia o em i gat bikpela save long mekim wok. Ating yumi man inap ting olsem i gutpela sapos God i bin makim Barnabas long mekim dispela wok. Save bilong man long mekim ol samting i no stiaim God long makim em, nogat; ating pasin bilong Apolos long mekim ol tok i gutpela tru, winim Pol. Pasin marimari bilong God i kirapim em long makim man long mekim wok.” (Efesus 3:7, 8) Brata Liverance i kirapim ol sumatin long mekim wok long presen bilong ol, o gutpela wok ol i kisim, bilong helpim ol narapela long kamap pren bilong God na bilong ol i ken kisim ‘presen God i save givim nating long yumi, em laip yumi kisim long wok bilong Jisas Krais, Bikpela bilong yumi.’—Rom 6:23.
Bihain long dispela, Mark Noumair, em narapela tisa bilong Skul Gileat, em i toktok wantaim sampela sumatin long “Pasin Bilong Redi Gut i Kamapim Ol Gutpela Samting.” (Sindaun 21:5) Ol ekspiriens i kamapim klia olsem taim man bilong autim tok i redi gut long mekim dispela wok, na redim gut bel bilong em, em bai tingim tru ol manmeri. Oltaim em i save long wanem ol tok em bai mekim. Em bai kamapim ol tok na mekim ol samting i helpim ol man long ol samting bilong spirit. Brata Noumair i tingim wok misineri em i bin mekim long Afrika, na em i tok: “Dispela em i rot bilong kamap gutpela misineri.”
Wok Misineri—Em Wok i Givim Amamas Long Man
Ralph Walls na Charles Woody i toktok wantaim sampela misineri i bin mekim dispela wok inap planti yia, em long dispela taim ol i skul long Wastaua Ediukesen Senta long Patterson. Ol toktok ol i mekim i kamapim klia olsem pasin bilong laikim tru ol manmeri i save kamapim amamas long wok misineri. Ol ekspiriens ol i kamapim i soim olsem wanem wok misineri i wanpela wok i givim amamas long man, na dispela i strongim bel bilong ol sumatin na famili na pren bilong ol.
John E. Barr, em i wanpela bilong Gavening Bodi, em i mekim bikpela tok bilong dispela de, nem bilong en “Singim Nupela Song Bilong Litimapim Nem Bilong Jehova.” (Aisaia 42:10) Brata Barr i kamapim olsem dispela tok “nupela song” i stap long Baibel New World Translation inap 9-pela taim. Em i askim olsem: “Dispela nupela song i stori long wanem samting?” Em i bekim: “Ol ves i stap klostu i kamapim klia olsem ol i singim nupela song, long wanem, ol nupela samting i kamap long wok bos bilong Jehova.” Em i tokim ol sumatin long bungim nek bilong ol na singim ol song bilong litimapim Kingdom bilong God i stap long han bilong King Mesaia, Krais Jisas. Brata Barr i tok, skul ol i kisim long Gileat i bin helpim ol long save gut moa long ol narapela narapela samting bilong dispela “nupela song,” winim save bilong ol long bipo. “Dispela skul i bin kamapim klia olsem yupela i mas ‘singim’ ol song bilong litimapim nem bilong Jehova wantaim ol brata na sista bilong yupela long ol hap yupela bai go long en. Oltaim yupela i mas kamapim pasin bilong stap wanbel wantaim ol narapela long ol hap yupela bai wok long en.”
Taim ol sumatin i kisim pinis setifiket bilong ol, mausman bilong ol i ritim wanpela pas bilong tok tenkyu long skul ol i bin kisim long Skul Gileat.
Olsem wanem? Yu inap mekim bikpela wok moa bilong God, na mekim wok i kamap gutpela moa? Sapos yu inap, orait wok strong long mekim ol samting ol dispela sumatin i bin mekim. Dispela i bin helpim ol long winim mak bilong mekim wok misineri long ol narapela kantri. Man i kisim bikpela amamas taim em i amamas long givim em yet bilong mekim wok bilong God.—Aisaia 6:8.
[Piksa long pes 25]
OL SAMTING BILONG OL SUMATIN
Hamas kantri ol i kam long en: 10
Hamas kantri ol bai go long en: 19
Hamas sumatin: 48
Krismas bilong ol, averes: 33.2
Hamas yia long tok i tru, averes: 16.8
Hamas yia long wok painia, averes: 12.6
[Piksa long pes 26]
Klas Namba 111 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.