Ol Sumatin i Winim Skul Ol i Laik Kamap Misineri i Winim Wok
“EM WANPELA gutpela samting tru i bin painim mipela!” Will i tok olsem taim em i stori long skul em wantaim meri bilong em Patsy i bin kisim long namba 103 klas bilong Wastaua Baibel Skul Bilong Gileat, nau tasol i pinis. Zahid na Jeni i wanbel long tok bilong Will. Ol i tok: “Mipela i ting em i gutpela samting tru long mipela inap i stap long dispela skul.” Olgeta sumatin i bin mekim gutpela wok long dispela skul. Nau ol i amamas long kirap mekim wok bilong ol olsem misineri. Tasol pastaim, long program i kamap long bung bilong winim skul long Septemba 6, 1997, ol i kisim sampela gutpela tok bilong helpim ol long mekim gut wok misineri bilong ol long ol hap ol bai go long en.
Siaman bilong program em Theodore Jaracz, em wanpela bilong Lain Bilong Bosim Ol Witnes. Em i tokaut olsem lain bilong Betel, na sampela lain bilong 48 brens bilong Sosaiti Was Taua, na ol pren na famili bilong ol sumatin em ol i bilong Kanada, Yurop, Pueto Riko, Yunaitet Stets, ol i kam long dispela bung bilong strongim bel bilong ol sumatin na kamapim olsem ol i laikim ol tru. Brata Jaracz i bin lukim olsem ol misineri em ol lotu i holim nating nem Kristen ol i salim i go long ol narapela narapela kantri, planti ol i no stap gut long wok misineri bilong ol—ol i kirap painim rot bilong kisim bikpela skul moa, na sampela ol i bin go insait long wok politik. Tasol ol sumatin i bin winim Skul Gileat ol i narapela kain—ol i mekim wok ol i bin lain long mekim. Ol i skulim ol man long tok bilong Baibel.
Orait nau Robert Butler, em bilong ofis bilong Sosaiti long Bruklin, em i mekim wanpela tok, het-tok bilong en, “Wok Strong Bambai Olgeta Wok Bilong Yu i Kamap Gutpela.” Ol man bilong graun i save ting, sapos ol i kisim planti mani kago samting, dispela i makim olsem wok bilong ol i kamap gutpela. Tasol bikpela samting tru, em pasin bilong God long skelim wok bilong yumi, em i kamap gutpela o nogat. Yumi ken tingim wok bilong Jisas: I no olsem em i bin kamapim planti disaipel na dispela i makim olsem em i bin mekim gutpela wok, nogat; em i bin stap gut long wok bilong em na dispela yet i makim olsem em i bin mekim gutpela wok. Ol wok Jisas i bin mekim i givim biknem long Jehova, na em i no insait long wanpela pasin bilong dispela graun. (Jon 16:33; 17:4) Em ol samting olgeta Kristen inap mekim.
“Stap Olsem Wokboi Bilong Olgeta Man.” Robert Pevy i tok olsem long ol sumatin. Bipo em i bin mekim wok misineri long hap bilong Filipin. Aposel Pol em wanpela misineri i bin mekim gutpela wok. Em i bin mekim wanem na wok misineri bilong em i kamap gutpela? Em i kamap olsem wokboi bilong olgeta man. (1 Korin 9:19-23) Na brata bilong mekim dispela tok em i tok, “Sapos wanpela sumatin bilong Skul Gileat i gat dispela tingting, orait em i no ken ting wok misineri i olsem wanpela namba em i kisim, na bihain em bai kisim sampela wok i gat bikpela namba moa insait long oganaisesen. Taim misineri i go long wanpela hap bilong mekim dispela wok, em i gat wanpela tingting tasol—em i tingting long mekim wok bilong helpim ol man, long wanem, ol wokboi i save mekim ol wok olsem.”
Gerrit Lösch, em wanpela bilong Lain Bilong Bosim Ol Witnes, em i kisim tok bilong em long 2 Korin sapta 3 na 4, na em i tokim ol sumatin long “Stap Olsem Glas Bilong Lukim Pes na Kamapim Klia Biknem Bilong Jehova.” Em i kirapim gen tingting bilong ol sumatin olsem save yumi kisim long God i olsem wanpela lait, na taim Kristen i opim bel bilong em bilong kisim dispela lait, em i kamap olsem wanpela lait. Yumi save kamapim dispela lait taim yumi autim gutnius na bihainim gutpela pasin. Em i tok: “Sampela taim bai yu ting olsem yu no inap mekim gut dispela wok, tasol taim yu kisim dispela kain tingting, yu mas bilip na wetim Jehova i helpim yu bambai ‘dispela bikpela strong ol i lukim em i strong bilong God.’ ” (2 Korin 4:7) Brata Lösch i mekim wanpela tok olsem Pol i bin mekim long 2 Korin 4:1, na em i tokim ol sumatin: “Yupela i no ken lusim wok misineri bilong yupela. Wok long klinim gut dispela glas bilong lukim pes!”
Karl Adams, em wanpela tisa bilong Skul Gileat, em i mekim wanpela tok olsem, “Jehova i Stap We?” Em i no wanpela askim olsem Jehova i save sindaun we tru, nogat; em i toktok long yumi mas pilim tingting bilong Jehova na ol samting em i mekim bilong soim rot long yumi. Brata i tok: “Taim sampela hevi i painim yumi, yumi inap lusim tingting long dispela samting, maski yumi bin stap longtaim long wok bilong Jehova.” (Jop 35:10) Olsem wanem long taim bilong yumi? Long 1942, lain bilong God i no klia gut long rot ol i mas bihainim. Ating wok bilong autim tok i laik pinis, o i gat sampela wok moa bilong mekim? Jehova i gat wanem laik long ol manmeri bilong em? Ol i wok long stadi long tok bilong Baibel, na nau ol i save long bekim bilong ol dispela askim. Brata Adams i tok: “Taim dispela yia i no pinis yet, ol i stretim ol samting bilong kamapim Wastaua Baibel Skul Bilong Gileat.” Jehova i bin blesim tru wok bilong ol misineri em dispela skul i bin salim ol i go.
Mark Noumair em i namba tu tisa bilong Skul Gileat long mekim tok. Em i mekim wanpela tok, “Bai Yu Mekim Wanem Wok Long Ol Samting Yu Kisim?” Em i laik kirapim ol sumatin olsem taim ol i kamap nupela yet long ples ol bai mekim wok misineri long en, ol i mas kirap bihainim ol tok ol i bin lainim long Skul Gileat. Em i tokim ol: “Wok strong long helpim ol man. Wok strong long kisim save long ol dispela lain na ol pasin na sindaun bilong ol. Tingting strong long kisim save long ol pasin bilong dispela ples, na stori bilong ol samting ol i bin mekim long bipo, na ol samting ol lain bilong dispela kantri i ting em samting bilong mekim ol i lap. Sapos yu lain hariap long tok ples bilong ol, dispela bai helpim yu na bai yu no hatwok long lain long nupela sindaun bilong yu.”
Ol Sumatin i Kisim Amamas Long Autim Tok
Ol dispela sumatin bilong Skul Gileat ol i givim bel tru long stadi, tasol i no dispela samting tasol ol i mekim. Ol i mas wok wantaim 11-pela kongrigesen. Long olgeta Sarere Sande ol i givim bel long autim tok wantaim kongrigesen ol i save go long en. Wallace Liverance em i wanpela tisa bilong Skul Gileat na em i singautim sampela long kamapim stori bilong dispela wok ol i bin mekim. Amamas bilong ol i kamap ples klia taim ol i stori long ol samting i bin kamap long wok autim tok ol i mekim long hap bilong ol stua, long ples ol i save putim ol ka, long hap i gat ol bisnis long en, long ol rot, na long ol haus. Sampela ol i bin painim rot bilong autim tok long ol man bilong narapela narapela tok ples, ol i save wok na sindaun long hap em kongrigesen i save autim tok long en. Ol sumatin bilong namba 103 klas ol i bin kirapim na mekim olsem 10-pela Baibel-stadi insait long dispela 5-pela mun ol i bin skul.
Ol Misineri Bilong Longtaim i Kamapim Stori Bilong Ol
Taim dispela gutpela hap bilong program i pinis, Patrick Lafranca na William Van de Wall i singautim 7-pela brata i insait long komiti bilong sampela brens na bai ol i ken stori long ol samting ol i bin lainim long wok misineri, na dispela inap helpim klas. Ol i tokim ol sumatin, ol i mas ting olsem ol i bin kisim wok misineri bilong ol long Jehova na ol i mas tingting strong long i stap long dispela wok na no ken lusim. Ol i toktok long ol gutpela samting em wok bilong ol misineri bilong Skul Gileat i bin kamapim long ol narapela kantri.
Wanem samting i bin helpim ol dispela komiti bilong ol brens long mekim wok misineri inap planti planti yia na ol i stap amamas na kamapim gutpela samting long wok bilong ol? Ol i bin wok gut wantaim ol brata bilong dispela hap, na ol i bin lain na kisim sampela save long rot bilong ol dispela brata. Na taim ol i kam nupela long ples wok bilong ol, ol i kirap kwik long lainim tok ples bilong dispela hap. Ol i lain long senisim sampela pasin bilong mekim wok, na lain long ol pasin bilong dispela ples. Charles Eisenhower, em wanpela sumatin bilong namba wan klas bilong Skul Gileat na em i stap misineri inap 54 yia pinis, em i kamapim 5-pela samting ol misineri i bin mekim gut wok bilong ol ol i bin lainim: (1) Stadi long Baibel long olgeta taim, (2) lain long tok ples bilong dispela hap, (3) mekim wok bilong autim tok, (4) wok strong long kamapim pasin wanbel long haus misineri, (5) beten long Jehova long olgeta taim. Ol sumatin i pilim tru ol gutpela tok ol i kisim, na ol i pilim tu olsem ol dispela misineri bilong longtaim ol i kisim amamas long mekim wok bilong Jehova. Olsem Armando na Lupe i tok, “ol dispela brata i amamas taim ol i stori long i stap bilong ol.”
Bihain long dispela i gat wanpela tok tasol i stap. Albert Schroeder, em wanpela bilong Lain Bilong Bosim Ol Witnes, em i mekim tok, “Ol i Lukautim Gut Tok Bilong God na Dispela i Kamapim Long Ples Klia Ol Gutpela Tok i Tru.” Baibel em i nambawan buk ol sumatin bilong Skul Gileat i lain long en, olsem na tingting bilong ol sumatin i kirap tru long harim ol tok em bai mekim. Brata Schroeder i tok, taim ol i bin kirap long tanim tok bilong Baibel New World Translation of the Holy Scriptures inap 50 yia i go pinis, ol lain God i bin makim long spirit holi em ol i insait long komiti bilong tanim Baibel New World Translation, ol i no mekim ol samting bambai ol man i ken orait long ol, nogat; ol i larim spirit holi i stiaim ol. (Jeremaia 17:5-8) Tasol nau long dispela taim sampela saveman ol i lukim olsem Baibel New World Translation em i wanpela gutpela Baibel tru. Wanpela saveman bilong Baibel i salim pas long Sosaiti na em i tok: ‘Mi inap luksave long wanpela gutpela buk tru, na komiti bilong yupela em ol i bin tanim Baibel New World Translation, ol i bin mekim gut tru wok bilong ol.’
Bihain long dispela tok, ol sumatin i kisim pepa bilong makim olsem ol i winim skul, na ol brata i tokaut olsem ol sumatin bai i go long wanem ol kantri. Em bikpela taim bilong ol sumatin na bel bilong ol i pilim tru. Wanpela sumatin i kaunim pas bilong klas bilong tok tenkyu long skul ol i bin kisim, na aiwara i kamap long ai bilong planti sumatin. Sampela ol i bin wok inap planti yia long stretim rot bilong mekim wok misineri. Sampela ol i bin lusim kongrigesen bilong ol na ol i go long wanpela kongrigesen i save mekim tok Inglis bambai ol i ken lain gut long dispela tok ples, long wanem, ol i save skul bai kamap long tok Inglis. Na sampela ol i bin go long wanpela hap i no gat planti painia long en, olsem long kantri bilong ol yet o long narapela kantri. Na sampela ol i bin kaunim stori bilong ol misineri, na ol i wok long painim ol tok bilong givim sampela save long ol long dispela wok, na ol i lukim wanpela video bilong Sosaiti (To the Ends of the Earth) inap planti taim.
Will na Patsy, em yumi bin kamapim nem bilong tupela long kirap bilong dispela stori, ol i amamas tru long pasin bilong ol brata sista long mekim gut long ol sumatin. Tupela i tok: “Ol manmeri mipela i no save long ol, ol i kam holimpas mipela na kisim piksa bilong mipela. Wanpela bilong Lain Bilong Bosim Ol Witnes em i kam sekanim mipela na em i tok: ‘Mipela i amamas tru long yupela!’ ” Tru tumas, ol i laikim tru ol sumatin bilong dispela namba 103 klas. Ol i bin lain gut na ol i kamap olsem sumatin i bin winim skul. Orait nau dispela skul ol i bin kisim em bai helpim ol long kamap olsem misineri i winim wok.
[Blok long pes 22]
Ol Samting Bilong Ol Sumatin
Hamas kantri ol i kam long en: 9
Hamas kantri ol bai go long en: 18
Hamas sumatin: 48
Hamas ol i marit: 48
Krismas bilong ol, averes: 33
Hamas yia long tok i tru, averes: 16
Hamas yia long wok painia, averes: 12
[Piksa long pes 23]
Namba 103 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.
[Piksa long pes 24]
Mipela bai go long wanem hap?