Ol i Gat Laik Long Mekim Wok
WANEM samting inap kirapim 48 manmeri marit ol i hap yangpela yet long lusim ol famili, pren, na ples bilong ol, na ol i go long ol narapela kantri na mekim wok misineri? Bilong wanem ol i amamas long i go long ol kain ples olsem Papua Niugini na Taiwan, na sampela kantri long Afrika na Latin-Amerika? Ating ol i amamas long raun tasol? Nogat. Pasin bilong laikim tru God na ol man i kirapim ol long i go.—Matyu 22:37-39.
Ol dispela manmeri ol i husat? Em klas namba 109 bilong Wastaua Baibel Skul Bilong Gileat, ol i winim pinis skul. Long Sarere, Septemba 9, 2000, i gat 5,198 ol i bung, sampela long Wastaua Edukesen Senta long Patesen, Nu Yok, na sampela moa ol i bung long ol narapela hap na harim ol tok long rot bilong telefon. Ol i harim ol gutpela tok bilong helpim ol sumatin i winim skul long mekim gut wok misineri bilong ol.
Siaman bilong program em Stephen Lett, em i insait long Komiti Bilong Wok Tisa bilong Lain Bilong Bosim Ol Witnes. As bilong ol tok em i mekim bilong kirapim bung em i kisim long Matyu 5:13, em i tok, “Yupela i olsem sol bilong graun.” Brata Lett i tok olsem, tok bilong Jisas em i stret long ol sumatin. Olsem: Sol em i save mekim kaikai i swit. Olsem na ol sumatin i kain olsem sol taim ol i mekim gut wok autim tok.
Tok Bilong Strongim Ol Taim Ol i Go
Orait nau Brata Lett i singautim sampela wokboi bilong Jehova em ol i bin mekim wok planti yia, long kam na mekim sampela sotpela tok i gat strong na Baibel i as bilong en. Namba wan brata bilong mekim tok em John Wischuk, em i wok long Dipatmen Bilong Raitim Tok. Het-tok bilong em, “Song i Sotpela Tru i Save Kirapim Pasin Bilong Tingim Wok Misineri,” na Song 117 em as bilong en. Long nau, i gat wok long autim tok bilong Jehova na Kingdom bilong em long olgeta hap long “olgeta lain pipel” na “olgeta kantri.” Em i tokim ol sumatin long truim tok bilong Song 117 na kirapim ol narapela long ‘Litimapim nem bilong Jehova.’
Bihain siaman i singautim Guy Pierce, em i wanpela bilong Lain Bilong Bosim Ol Witnes. Nem bilong tok em i mekim “No Ken Strong Tumas, Tasol Bihainim Stret Ol Lo.” Tok Bilong God em i strong na i no save senis. Long Lo 32:4, Baibel i kolim Jehova olsem strongpela ston, tasol em i no strong tumas long helpim wanpela lain tasol, nogat, em i kirapim ol man long raitim Baibel bilong helpim olgeta lain na tok ples. Brata i tokim ol sumatin long autim tok bilong Baibel, na larim tok bilong en i go daun long bel na tingting bilong ol manmeri. (2 Korin 4:2) Brata Pierce i tok: “Stap strong na bihainim ol lo, tasol no ken strong tumas long ol man. Long hap yu mekim wok misineri long en, pasin bilong ples bilong ol man i narapela kain long ples bilong yu, tasol no ken kisim tingting olsem ol dispela lain ol i samting nating.”
Karl Adams, em wanpela tisa bilong Skul Gileat na em i wok long hetkota klostu 53 yia pinis, em i mekim wanpela tok, nem bilong en i kirapim tingting bilong ol man, olsem: “Bai Yu Lusim Hia na Go We?” Tru, olgeta sumatin i kisim save pinis ol bai mekim wok long wanem hap na ol bai go long 20 narapela narapela kantri, tasol em i kamapim wanpela askim olsem: Taim yu kamap pinis long dispela kantri na yu lukim pinis, nau bai yu mekim wanem? Ol man bilong nau ol i no laik sindaun gut na stap long wanpela hap. Ol i laik raun lukim ol nupela hap na mekim ol nupela samting bilong inapim laik bilong ol yet. Tasol ol sumatin ol i kisim wanpela wok long Jehova bilong i go long wanpela hap em i laik bai ol i go long en bilong lukautim ol sipsip bilong em na ol i no ken tingim laik bilong ol yet tasol. Ol i no ken bihainim pasin bilong ol Israel bilong bipo ol i tingim ol yet tasol na Jehova i no inap mekim wok long ol bilong blesim olgeta man bilong graun. Ol i mas bihainim pasin bilong Jisas Krais, em oltaim em i save mekim ol samting Papa bilong em i laikim, na em i bihainim tok bilong Papa long olgeta samting i painim em.—Jon 8:29; 10:16.
“Tingim Tru Olgeta Tingting Hait Bilong God” em i nem bilong tok bilong Wallace Liverance, em kuskus bilong Skul Gileat. Planti taim Baibel i stori olsem Tok bilong God em i gutpela samting olsem mani, ol ston i dia tumas, gol na silva samting, na ol samting i gat bikpela pe bilong en na ol man i wok long painim. Sindaun 2:1-5 i soim yumi, bilong ‘kisim save bilong God’ yumi mas wok strong long painim dispela save olsem yumi wok long painim ‘silva o mani samting ol i bin haitim insait long graun.’ Brata bilong mekim tok i tokim ol sumatin long wok yet long painim ol tingting hait bilong God taim ol i mekim wok misineri bilong ol. Brata Liverance i tok: “Em i stret long mekim olsem, long wanem, dispela i save strongim bilip bilong yu long Jehova na em bai strongim yu long stap gut long wok bilong yu. Na tu dispela bai helpim yu long mekim toktok i save kamapim bilip bilong yu na mekim gutpela wok tisa taim yu lainim ol narapela long laik bilong God long bihain.”
Narapela tisa bilong Skul Gileat i sindaun olsem em i stap long klas-rum na em i stori long olsem wanem Jehova i bin blesim wok autim tok ol sumatin i mekim insait long faipela mun i go pinis. Lawrence Bowen i stori long tok Pol i mekim long Aposel 20:20 i stori long wok autim tok em i bin mekim long Efesus na long pasin bilong em long autim tok long olgeta kain taim na ples. Ol samting i painim ol sumatin i kamapim olsem ol man i laikim tru God na ol narapela man long taim bilong yumi ol i kain olsem aposel Pol—ol i no save surik long autim tok i tru na larim strong bilong Tok bilong God i wok long bel na tingting bilong ol man. Jehova bai blesim samting i kamap long dispela wok.
Ol Man i Save Gut Ol i Tokaut
Long taim bilong skul ol sumatin bilong Gileat ol i kisim helpim long rot bilong bung na toktok wantaim sampela brata ol i wok long ol Komiti Bilong Brens bilong 23 kantri, ol tu ol i stap long Patesen Edukesen Senta bilong kisim sampela gutpela trening. Leon Weaver na Merton Campbell bilong Dipatmen Bilong Wok Autim Tok ol i toktok wantaim sampela brata bilong ol dispela Komiti Bilong Brens, sampela ol i bin winim pinis Skul Gileat. Dispela i strongim bel bilong ol sumatin na ol famili na pren bilong ol taim ol i harim stori bilong ol dispela misineri ol i bin mekim dispela wok inap planti yia.
Ol sumatin i kisim planti gutpela tok bilong helpim ol long lain long sindaun long wanpela kantri ol i no save gut long en, na sampela bilong ol dispela tok i olsem: “Wok long tingim ol gutpela samting. Sapos samting i kamap long yu em i narapela kain na yu no klia gut long en, yu no ken les. Wetim Jehova i helpim yu”; “lain long amamas long wanem ol samting i stap, na bilip olsem Jehova bai lukautim yu long ol samting bilong skin.” Sampela narapela tok ol i mekim em bilong helpim ol sumatin long holimpas amamas bilong ol long hap ol bai stap long en. Sampela tok i olsem: “No ken skelim hap yu bai mekim wok misineri long en wantaim as ples bilong yu”; “lain gut long mekim nupela tok ples bambai yu inap toktok gut wantaim ol man bilong dispela hap”; “kisim save long pasin na sindaun bilong ol man bilong dispela ples, long wanem, dispela bai helpim yu long stap gut long wok bilong yu.” Ol dispela tok i strongim tru ol dispela nupela misineri.
Bihain, taim ol i toktok pinis wantaim ol dispela brata, David Splane, bipo em i wok misineri na em i bin skul long klas namba 42 bilong Skul Gileat, na nau em i wanpela bilong Lain Bilong Bosim Ol Witnes, em i mekim wanpela tok nem bilong en “Bai Yupela i Stap Wanem Kain Man—Ol Sumatin o Ol Man i Bin Winim Skul?” Em i givim askim long klas i winim skul olsem: “Bai yupela i gat wanem tingting long yupela yet taim yupela go long hap yupela bai mekim wok misineri long en? Bai yupela holim tingting olsem yupela ol sumatin i winim skul na yupela i save long olgeta samting bilong mekim wok misineri o yupela bai i stap yet olsem sumatin na yupela i gat planti samting yet long lain long en?” Brata Splane i tok em i savepasin long holim tingting olsem ol i stap sumatin yet. Ol i mas kisim tingting olsem olgeta man ol i bungim long wok misineri bilong ol, ol dispela man inap lainim ol long sampela samting. (Filipai 2:3) Brata i tokim ol long wok gut wantaim ol misineri wanwok bilong ol, na brens-ofis, na kongrigesen ol i stap long en. Brata Splane i tok: “Yupela i winim pinis ol laspela eksem, tasol yupela i stap yet olsem ol sumatin. Kamapim long ples klia long olgeta man olsem yupela i stap bilong lain na kisim save.”
Bihain long dispela tok, ol sumatin i kisim setifiket bilong ol, na i gat toksave long ol bai i go long wanem wanem kantri bilong mekim wok misineri. Bel bilong ol sumatin i kirap taim wanpela sumatin, em mausman bilong klas, i tokaut long strongpela laik bilong ol sumatin long larim ol save ol i bin kisim long Baibel i kirapim ol long mekim moa yet wok bilong God.
Ating olgeta lain i bung ol i wanbel olsem ol gutpela tok ol sumatin i bin harim bai strongim ol long kamapim pasin bilong laikim tru God na ol narapela manmeri. Na tu, ol dispela tok i kirapim ol moa yet long helpim ol manmeri long ol samting bilong spirit long hap ol bai wok misineri long en.
[Blok long pes 25]
OL SAMTING BILONG OL SUMATIN
Hamas kantri ol i kam long en: 10
Hamas kantri ol bai go long en: 20
Hamas sumatin: 48
Krismas bilong ol, averes: 33.7
Hamas yia long tok i tru, averes: 16.2
Hamas yia long wok painia, averes: 12.5
[Piksa long pes 26]
Klas Namba 109 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Collins, E.; Miles, L .; Alvarado, A.; Lake, J. (2) Van Dusen, L .; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L .; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L .; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.