Skul Gileat—Skulim Ol Man Long Kamap Misineri Inap 60 Yia Pinis
“MIPELA i stadi gut long Baibel, olsem na mipela i go klostu moa long Jehova na kisim sampela save moa long oganaisesen bilong em. Dispela i redim mipela long sindaun long narapela kantri na mekim wok.” Em tok wanpela sista i bin winim klas namba wan i mekim long skul em i bin kisim long Wastaua Baibel Skul Bilong Gileat. Inap 60 yia nau, kirap long taim ol i kamapim Skul Gileat, dispela skul i bin salim ol misineri i go long ol narapela kantri. Long Mas 8, 2003, gretiuesen bilong klas namba 114 i kamap long Wastaua Ediukesen Senta long Patterson, New York. Inap 6,404 manmeri i bung long bikpela haus bung na long sampela narapela hap we ol i harim ol tok long rot bilong TV, na ol i putim gut yau long program. Dispela program i gat ol tok, inteviu, na sampela ol i toktok wantaim.
Theodore Jaracz i siaman, em wanpela bilong lain Gavening Bodi. Kirap bilong tok bilong em i kamapim olsem ol manmeri i stap long odiens ol i kam long olgeta hap bilong graun. Sampela ol i kam long Esia, Karibian, Sentral na Saut Amerika, na Yurop. Brata Jaracz i toktok long 2 Timoti 4:5, na em i kamapim klia olsem nambawan bikpela wok bilong ol misineri i winim Skul Gileat i olsem: Ol i “mas mekim wok bilong autim gutnius long ol manmeri.” Ol misineri i autim tok i tru long rot bilong skulim ol man long Baibel.
Ol Sumatin i Kisim Laspela Tok Bilong Skulim Ol
John Larson i wanpela bilong Komiti Bilong Brens bilong Yunaitet Stets, na em i mekim namba wan tok bilong ol sotpela tok. Em i toktok long samting bilong strongim bilip, nem bilong tok “Sapos God i Helpim Yumi, Orait Husat Bai i Birua Long Yumi?” (Rom 8:31) Brata Larson i kamapim ol tok bilong Baibel i soim olsem ol sumatin inap bilip tru olsem strong bilong Jehova bai helpim ol long winim olgeta kain hevi inap painim ol long hap ol bai go long en. Brata Larson i stori long Rom 8:38, 39 na tokim ol sumatin olsem: “Tingting long strong God i mekim wok long en bilong helpim yupela, na tingim olsem i no gat wanpela samting inap mekim na Jehova bai lusim pasin bilong tingim tru yupela.”
Bihain long dispela, Guy Pierce bilong Gavening Bodi i mekim tok. Tim bilong tok bilong em “Ai Bilong Yupela i Mas Amamas!” (Luk 10:23) Em i tok olsem bilong i stap amamas tru, man i mas save long Jehova na save gut long laik bilong em bilong i stap oltaim, na tu, man i mas lukim truim bilong ol tok profet bilong Baibel. Maski ol sumatin i go long wanem wanem hap, ol inap i stap amamas tru taim ai bilong ol i amamas. Brata Pierce i kirapim ol sumatin long tingim tingim long bel gutpela pasin bilong Jehova, na long putim tingting na bel bilong ol long mekim laik bilong Em. (Song 77:12) Taim ol sumatin i holim stretpela tingting, ol inap winim olgeta kain hevi ol inap bungim.
Orait nau tupela tisa i bin lainim ol long olgeta de, ol i givim laspela tok bilong strongim ol sumatin. Lawrence Bowen i kamapim askim “Yu Laik Kisim Biknem?” na dispela em nem bilong tok bilong em. Planti man i ting biknem i olsem ol narapela i litimapim nem bilong ol, givim ona, o ol i gat namba. Tasol man bilong raitim song, Asap, em i kisim save olsem biknem tru i olsem man i gat wanpela gutpela samting i dia tumas—em i pas gut wantaim Jehova. (Song 73:24, 25) Brata i mekim tok i strongim ol sumatin i winim skul long holimpas pasin bilong pas gut wantaim Jehova long rot bilong stadi gut oltaim long Baibel. Ol ensel “i laikim tumas long kisim save” long olgeta samting Jehova i tingting pinis long mekim long rot bilong Krais. (1 Pita 1:12) Ol i laik kisim save long planti samting bilong Papa bilong ol na bai ol i ken kamapim biknem bilong em. Brata i mekim tok i tokim ol sumatin long givim biknem long Jehova long wok misineri bilong ol long rot bilong helpim ol narapela long painim dispela gutpela samting i dia tumas.
Kuskus bilong skul, Wallace Liverance, i mekim laspela tok bilong dispela hap bilong program, tim bilong tok em “Autim Tok Long Gutpela Tingting na Save Bilong God Long Wanpela Tok Hait.” (1 Korin 2:7) Wanem dispela gutpela tingting na save bilong God em aposel Pol i toktok long en taim em i mekim wok misineri? Em rot bilong Jehova long kamapim bel isi na pasin wanbel long heven na graun, em bai mekim wok long strong na gutpela tingting na save bilong em bilong kamapim dispela samting. Dispela gutpela tingting na save em ol samting bilong Jisas. Pol i no autim tok na kirapim ol man long mekim wok bilong helpim sindaun bilong ol man, nogat. Em i helpim ol long save olsem wanem God bai pinisim ol samting nogut sin bilong Adam i bin kamapim. (Efesus 3:8, 9) Brata i mekim tok i tokim ol man i harim tok: “Bihainim pasin bilong Pol long mekim wok bilong yupela. Em i ting wok misineri bilong em i rot bilong helpim ol man long save long olsem wanem Jehova bai mekim ol samting em i tingting pinis long mekim.”
Bihain long dispela, Mark Noumair, narapela tisa bilong Skul Gileat, em i lukautim hap bilong toktok gut wantaim sampela sumatin bilong dispela klas. Tim bilong dispela tok, “Pasin Bilong Stadi Long Baibel i Kamapim Ol Wokman i Givim Bel,” i stori long tok bilong Pol i stap long Rom 10:10. Ol sumatin i kamapim planti ekspiriens ol i bin kisim long wok autim tok ol i mekim long taim ol i skul. Ol ekspiriens bilong ol i soim olsem taim yumi stadi na tingim tingim Tok Bilong God, ol gutpela samting bilong God Jehova na Kingdom bilong em bai pulap tru long bel bilong yumi na bai yumi autim ol dispela samting long ol narapela. Taim ol i stap inap 5-pela mun long Wastaua Ediukesen Senta, ol sumatin i kirapim inap olsem 30 Baibel-stadi wantaim ol man i laik harim tok, em ol dispela man i bilong teritori bilong ol kongrigesen i stap klostu na ol kongrigesen i save autim tok planti taim long en.
Ol Strongpela Kristen i Givim Gutpela Tok
Taim ol i skul, ol sumatin i kisim gutpela helpim long rot bilong bung wantaim famili Betel bilong Yunaitet Stets. Tupela brata bilong dispela brens, Robert Ciranko na Robert P. Johnson, ol i toktok wantaim sampela brata i bin stap gut long wok bilong Jehova inap planti yia pinis, olsem sampela wasman bilong raun em long dispela taim ol i kisim skul long Wastaua Ediukesen Senta. Ol brata ol i toktok wantaim ol, olgeta i bin winim Skul Gileat na ol i bin mekim wok misineri. Taim ol sumatin na famili na pren bilong ol i harim ol tok i gat gutpela tingting na save em ol dispela brata i strong long ol samting bilong spirit i mekim, dispela i strongim bel bilong ol.
Ol i givim dispela gutpela tok: “Givim bel long wok autim tok na wok bilong kongrigesen.” “No ken tingting tumas long yupela yet. Tingting strong long i gat wanem as na yupela i mekim wok misineri, na ting olsem ples yupela i wok long en em ples bilong yupela.” Ol narapela gutpela tok i kamapim klia olsem wanem Skul Gileat i helpim wokman long mekim gutpela wok, maski em i wok long wanem wanem hap. Sampela tok i olsem: “Mipela i lain long wok gut wantaim ol narapela.” “Skul i helpim mipela long amamas long i stap long hap we ol man i gat narapela kain pasin long pasin bilong mipela.” “Skul i lainim mipela long kisim nupela tingting long pasin bilong mekim wok long Baibel.”
John E. Barr i bin stap longpela taim insait long lain Gavening Bodi, na em i mekim bikpela tok bilong program. Tim bilong tok em i kisim long Baibel i olsem: “Ol Manmeri Long Olgeta Hap Bilong Graun i Harim Pinis Nek Bilong Ol.” (Rom 10:18) Em i kamapim wanpela askim olsem: Lain bilong God i bin mekim dispela bikpela wok long nau? Yes, ol i mekim! Long 1881, nius Wastaua i askim ol man i ritim dispela nius olsem: “Yu save autim tok?” Brata i mekim tok i kirapim olgeta long odiens long tingim bikpela singaut i bin kamap long 1922 long kibung long Cedar Point, Ohio, Amerika: “Autim tok long King na Kingdom bilong em!” Insait long ol yia i kamap bihain, pasin bilong ol wokman bilong God long givim bel i kirapim ol long autim ol gutpela tok i tru bilong Kingdom long olgeta lain man. Long rot bilong ol nius na maus bilong ol man, ol tok bilong gutnius i bin go long olgeta hap bilong graun—olgeta dispela tok i litimapim nem bilong Jehova. Bilong pinisim tok, Brata Barr i kirapim ol sumatin i winim skul long tingim ol gutpela samting ol i bin kisim, em i tok: “Long olgeta de taim yupela i beten long Jehova long ol hap yupela bai mekim wok misineri long en, tok tenkyu long em long yupela i ken insait long wok bilong truim dispela tok, ‘Ol manmeri long olgeta hap bilong graun i harim pinis nek bilong ol.’ ”
Bihain long dispela tok, ol i ritim ol gude ol narapela i salim i kam, na siaman i givim pepa diploma long olgeta sumatin i winim skul. Ol sumatin i amamas na bel hevi tu long lusim gutpela skul, na wanpela sumatin i ritim pas klas i raitim long Gavening Bodi na famili Betel. Long dispela pas ol sumatin i kamapim olsem ol i tingting strong long litimapim nem bilong Jehova long “nau na bihain tu.”—Song 115:18.
Mipela i beten long ol dispela sumatin i winim skul inap i stap gut long nupela ples bilong ol, na helpim tru wok bilong autim tok i go bikpela long olgeta hap, wankain olsem ol lain i bin go paslain long ol i bin mekim inap 60 yia pinis.
[Blok long pes 23]
OL SAMTING BILONG OL SUMATIN
Hamas kantri ol i kam long en: 12
Hamas kantri ol bai go long en: 16
Hamas sumatin: 48
Krismas bilong ol, averes: 34.4
Hamas yia long tok i tru, averes: 17.6
Hamas yia long fultaim sevis, averes: 13.5
[Piksa long pes 24]
Klas Namba 114 Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.