Wok Long Painim Ol Gutpela Pasin Long Olgeta Man
“God, yu ken tingim olgeta dispela pasin mi bin mekim na yu ken mekim gut long mi.”—NEHEMIA 13:31.
1. Olsem wanem Jehova i mekim gutpela pasin long olgeta man?
BIHAIN long ol de i gat planti klaut na ples i tudak, ol man i save amamas na belgut taim san i lait gen. Olsem tasol, taim san i lait strong na ples i drai inap longpela taim, orait liklik ren—o bikpela ren—i save givim nupela strong na mekim gut bel bilong ol man. Gutpela Man bilong wokim yumi, em Jehova, em i bin wokim dispela gutpela samting, olsem taim bilong ren, san na win samting. Jisas i bin kirapim ol man long tingim pasin bilong God long givim planti samting long ol na em i tok: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela. Olsem bai yupela i stap pikinini bilong Papa bilong yupela em i stap long heven. Em i save mekim san bilong en i kamap antap long ol man nogut na long ol gutpela man wantaim. Na em i save mekim ren i kam daun long ol stretpela man na long ol man bilong mekim pasin i no stret tu.” (Matyu 5:43-45) Yes, Jehova i save mekim gutpela pasin long olgeta man. Ol wokboi bilong em i mas wok strong long bihainim pasin bilong em na wok long painim ol gutpela pasin long ol narapela.
2. (a) I gat wanem as na Jehova i save mekim gutpela pasin? (b) Jehova i lukluk long wanem ol samting yumi mekim taim em i mekim gutpela pasin long yumi?
2 I gat wanem as na Jehova i save mekim gutpela pasin? Kirap long taim Adam i bin mekim sin, oltaim Jehova i wok long painim ol gutpela pasin long ol man. (Song 130:3, 4) Em i tingting pinis long helpim ol man i bihainim tok long kisim laip long Paradais. (Efesus 1:9, 10) Pasin marimari bilong em i mekim na em inap kisim bek yumi long sin long rot bilong Pikinini bilong promis. (Stat 3:15; Rom 5:12, 15) Taim yumi orait long rot God i bin stretim bilong givim ofa bilong baim bek ol man, dispela i opim rot long yumi inap kamap gutpela olgeta long bihain. Nau Jehova i wok long lukluk long yumi, na wanpela samting em i laik painim em pasin yumi mekim taim em i givim yumi planti samting. (1 Jon 3:16) Em i lukluk long olgeta samting yumi mekim bilong soim olsem yumi pilim gutpela pasin bilong em. Aposel Pol i tok: “God em i no man nogut, na bai em i lusim tingting long ol gutpela wok yupela i bin mekim. Nogat.”—Hibru 6:10.
3. Yumi mas tingim gut wanem askim?
3 Orait, olsem wanem yumi inap bihainim pasin bilong Jehova long wok long painim ol gutpela pasin long ol narapela? Yumi ken skelim ol bekim bilong dispela askim long 4-pela samting: (1) wok Kristen bilong autim tok, (2) famili, (3) kongrigesen, na (4) pasin bilong yumi long pas gut wantaim ol narapela.
Wok Bilong Autim Tok na Kamapim Ol Disaipel
4. Taim yumi insait long wok Kristen bilong autim tok, olsem wanem dispela i kamapim olsem yumi wok long painim ol gutpela pasin long ol narapela?
4 Bilong bekim askim bilong ol disaipel long mining bilong tok piksa bilong wit na gras nogut, Jisas i tok: “Gaden em i dispela graun.” Yumi ol disaipel bilong Krais long nau, yumi luksave long dispela tok i tru taim yumi mekim wok autim tok. (Matyu 13:36-38; 28:19, 20) Yumi tokaut long bilip bilong yumi taim yumi mekim wok autim tok. Long nau, planti man i save long wok ol Witnes Bilong Jehova i mekim long autim tok long ol haus na long ol rot, na dispela i kamapim klia olsem yumi bin givim bel tru long painim olgeta man i gat gutpela bel na ol i laik harim tok bilong Kingdom. Tru tumas, Jisas i bin tok: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man.”—Matyu 10:11; Aposel 17:17; 20:20.
5, 6. I gat wanem as na yumi wok yet long i go lukim ol man long haus bilong ol?
5 Taim yumi autim tok long ol man husat i no bin singautim yumi long kam toktok wantaim ol, yumi inap luksave long pasin ol i mekim long tok yumi autim. Sampela taim wanpela man long haus i laik harim tok, tasol narapela insait long haus i singaut na tok, “Mipela i no laik harim,” na dispela i pasim yumi long autim tok. Yumi sori tru olsem pasin bilong wanpela man long birua o i no laik harim tok i pasim rot bilong narapela long harim! Olsem na yumi ken mekim wanem na bai yumi wok yet long painim ol gutpela pasin long olgeta man?
6 Taim yumi go bek gen bilong autim tok long dispela haus, ating bai yumi gat rot long toktok stret wantaim dispela man i bin pasim yumi long pastaim. Sapos yumi tingim ol samting i bin kamap pastaim, dispela bai helpim yumi long redi gut. Ating dispela man i birua em i bin ting olsem i stret long em i pasim dispela narapela man long harim tok bilong Kingdom. Ating em i bin harim sampela tok giaman ol man i mekim long wok bilong yumi na dispela i kirapim em long kisim kain tingting olsem. Tasol dispela i no pasim yumi long wok yet long autim gutnius bilong Kingdom long dispela haus, na long gutpela pasin yumi traim long stretim ol tingting kranki. Yumi gat laik long helpim olgeta man long kisim stretpela save long God. Taim yumi mekim olsem, ating Jehova inap kirapim dispela man long i kam long em.—Jon 6:44; 1 Timoti 2:4.
7. Wanem samting inap helpim yumi long kisim tingting olsem ol man bai harim tok taim yumi toktok wantaim ol?
7 Long tok Jisas i bin givim long ol disaipel bilong em, em i stori tu long pasin birua bai kamap insait long famili. Em i tok: “Mi kam bilong mekim pasin birua i kamap. Man bai i birua long papa bilong en, na pikinini meri bai i birua long mama bilong en, na maritmeri bai i birua long mama bilong man bilong en.” Jisas i tok moa: “Ol famili bilong man yet bai i kamap birua bilong en.” (Matyu 10:35, 36) Tasol sindaun na tingting bilong ol man i save senis. Sik i kamap wantu tasol, wanblut i dai, ol bikpela bagarap samting, bel na tingting i bagarap, na planti narapela samting i save bosim pasin man i mekim taim yumi autim tok. Sapos yumi ting olsem i no gat gutpela samting inap kamap—olsem ol man i no inap harim tok yumi autim—yu ting dispela i makim olsem yumi wok long painim ol gutpela pasin long ol? Mobeta yumi amamas long go bek gen long haus bilong ol long narapela taim. Ating ol bai mekim narapela pasin. Sampela taim i no tok tasol yumi mekim, em pasin bilong yumi long mekim tok i save kirapim man long senisim tingting na harim tok. Pasin bilong beten strong long Jehova paslain long yumi kirap autim tok bai helpim yumi long kisim tingting olsem ol man bai harim tok, na bai yumi autim tok bilong Kingdom long pasin i kirapim tingting bilong man.—Kolosi 4:6; 1 Tesalonaika 5:17.
8. Wanem samting inap kamap taim ol Kristen i wok long painim ol gutpela pasin long ol wanblut i no bilip?
8 Long sampela kongrigesen, planti insait long wanpela famili ol i mekim wok bilong Jehova. Planti taim, pasin bilong ol bikpela manmeri long no ken les na pas gut wantaim ol narapela insait long famili na long marit, dispela i save kirapim ol yangpela insait long famili long senisim pasin bilong ol. Planti meri marit Kristen ol i bin bihainim tok bilong Pita na long dispela rot ol i bin helpim ol man bilong ol maski ol meri “i no mekim wanpela tok long ol.”—1 Pita 3:1, 2.
Insait Long Famili
9, 10. Jekop na Josep i mekim wanem na i olsem ol i wok long painim ol gutpela pasin long famili bilong ol?
9 Ol famili i save pas gut wantaim, olsem na insait long ol famili yumi ken wok long painim ol gutpela pasin long ol narapela. Tingim samting yumi inap lainim long pasin Jekop i bin mekim long ol pikinini bilong em. Long Buk Stat sapta 37, ves 3 na 4, Baibel i tokaut olsem Jekop i bin laikim tumas Josep. Ol brata bilong Josep i jeles long em, na ol i pasim tok long kilim em i dai. Tasol tingim pasin Jekop na Josep i mekim bihain. Tupela wantaim i wok long painim ol gutpela pasin long famili bilong ol.
10 Taim Josep i mekim wok olsem nambawan bos bilong bosim kaikai long taim bilong bikpela hangre long Isip, em i bin mekim gut long ol brata bilong em. Em i no tokaut kwik long em i husat, tasol em i stiaim ol samting bilong ol brata bilong em i ken stap gut, na ol i gat kaikai bilong bringim i go bek long lapun papa bilong ol. Yes, maski long pastaim ol i bin birua tru long em, nau Josep i mekim ol samting bilong helpim ol. (Stat 41:53–42:8; 45:23) Long wankain pasin, taim Jekop i laik i dai, em i mekim ol tok profet long ol blesing bai painim olgeta pikinini bilong em. Tru, sampela rong ol i mekim i pasim ol long kisim sampela gutpela wok samting, tasol olgeta i bin kisim hap graun. (Stat 49:3-28) Jekop i kamapim gutpela pasin bilong laikim tru ol pikinini bilong em inap oltaim.
11, 12. (a) Stori bilong wanem profet i kamapim klia olsem em i bikpela samting long yumi mas wok long painim ol gutpela pasin insait long famili? (b) Pasin bilong papa long tok piksa bilong Jisas long pikinini i bin lusim papa i skulim yumi long wanem samting?
11 Pasin bilong Jehova long i no les kwik long lain Israel em ol i no gat bilip, i givim sampela save moa long yumi long pasin bilong em long painim ol gutpela pasin long lain bilong em. Jehova i mekim wok long sindaun bilong famili bilong profet Hosea bilong kamapim klia pasin bilong em long laikim tru narapela inap oltaim. Gomer, em meri bilong Hosea, em i mekim pasin pamuk planti taim. Maski dispela samting i kamap, Jehova i tokim Hosea: “Yu go na laikim gen dispela meri bilong yu nau em i mekim pasin pamuk wantaim narapela man. Yu mas laikim em tru olsem mi laikim tumas ol manmeri bilong mi, ol Israel. Tru, ol i bin lusim mi na i go long ol giaman god, na ol i save kisim pikinini wain ol i bin mekim drai na ofaim long ol giaman god. Tasol maski, mi laikim ol Israel yet.” (Hosea 3:1) Bilong wanem em i mekim kain tok olsem? Jehova i save olsem sampela man namel long dispela lain i lusim em, ol bai pilim pasin isi bilong em na ol bai kam bek long em. Hosea i tok: “Dispela taim i pinis, orait bai ol Israel i kam bek long God, Bikpela na lotu long em wanpela tasol. Bai ol i bihainim wanpela tumbuna bilong King Devit. Na bai ol i aninit long tok bilong Bikpela na bai em i givim ol kain kain gutpela presen long ol.” (Hosea 3:5) Dispela em gutpela pasin tru yumi ken tingting long en taim sampela hevi i kamap insait long famili. Taim yu wok yet long painim ol gutpela pasin long ol narapela insait long famili, pasin bilong yu long i no les kwik bai stap olsem gutpela piksa ol narapela i ken bihainim.
12 Tok piksa bilong Jisas long pikinini i bin lusim papa i givim yumi sampela save moa long olsem wanem yumi inap wok long painim ol gutpela pasin long famili bilong yumi yet. Namba 2 pikinini i bin go bek long haus taim em i lusim pasin bilong mekim nabaut long mani samting bilong em. Papa i mekim pasin marimari long em. Papa i bin mekim wanem taim namba wan pikinini husat i no bin lusim famili liklik long wanpela taim, em i toktok planti? Papa i mekim dispela tok long em: “Pikinini, oltaim yu save stap wantaim mi. Na olgeta samting bilong mi em i bilong yu.” Dispela i no makim olsem papa i givim baksait long pikinini, nogat. Em i kamapim klia olsem papa i laikim tru pikinini. Em i tok moa olsem: “Nau yumi mas amamas, na bel bilong yumi i mas gutpela, long wanem, brata bilong yu i dai pinis, tasol nau em i kisim laip gen. Em i lus pinis, tasol nau yumi kisim em bek.” Yumi tu i ken wok yet long painim ol gutpela pasin long ol narapela.—Luk 15:11-32.
Insait Long Kongrigesen Kristen
13, 14. Long kongrigesen Kristen, wanem wanpela rot bilong bihainim lo bilong laikim ol narapela?
13 Yumi ol Kristen i laik bihainim lo bilong laikim ol narapela. (Jems 2:1-9) Tru, ating long kongrigesen i gat sampela em i stap bilong ol long ol samting bilong skin i narapela kain long yumi na yumi orait long ol. Tasol olsem wanem? Yumi holim yet tingting olsem ol man bilong wanpela lain, sindaun, o lotu ol i winim ol narapela lain? Sapos olsem, orait yumi ken mekim wanem bilong bihainim tok bilong Jems?
14 Taim yumi tok welkam long olgeta man i kam long ol miting Kristen, dispela i kamapim klia pasin bilong yumi long mekim gut long ol man. Taim yumi go pas long toktok wantaim ol nupela man i kam long Haus Kingdom, dispela bai mekim na ol i no pret na sem. Long namba wan taim ol i bin go long wanpela miting Kristen, sampela i bin tok: “Olgeta i bin mekim gutpela pasin pren. I olsem olgeta manmeri i save pinis long mi. Bel bilong mi i stap isi.”
15. Yumi ken mekim wanem bilong helpim ol yangpela long kongrigesen long tingim gut ol lapun?
15 Long sampela kongrigesen, ating sampela yangpela i save bung insait o ausait long Haus Kingdom taim miting i pinis, na ol i no laik bung wantaim ol manmeri i bikpela pinis. Yumi inap mekim wanem bilong daunim dispela pasin? Namba wan samting em ol papamama i mas skulim ol pikinini long haus, na redim ol long ol miting. (Sindaun 22:6) Papamama i ken givim ol wok bilong bungim ol buk na nius samting na bai olgeta i gat ol samting bilong bringim long miting. Ol papamama tasol inap kirapim ol pikinini long mekim sampela gutpela tok long ol lain long Haus Kingdom em ol i lapun o skin bilong ol i no strong. Sapos ol i gat gutpela tok bilong mekim long ol kain lain olsem, dispela bai mekim ol pikinini i amamas.
16, 17. Ol manmeri i bikpela pinis ol inap mekim wanem bilong painim ol gutpela pasin long ol yangpela long kongrigesen?
16 Ol brata sista i bikpela pinis ol i mas tingim gut ol yangpela long kongrigesen. (Filipai 2:4) Ating ol i ken go pas long toktok wantaim ol yangpela long pasin i strongim ol. Planti taim ol gutpela tok i save kamap long miting. Ating ol i ken askim ol yangpela olsem ol i bin amamas long miting o nogat? Olsem wanem? I gat sampela tok ol i bin amamas tru long en na ol inap bihainim? Ol yangpela i hap bilong kongrigesen, olsem na yumi mas tok amamas long ol taim ol i putim gut yau long miting na bekim tok o insait long sampela hap bilong miting. Pasin ol yangpela i mekim long bung wantaim ol bikpela manmeri long kongrigesen na mekim ol liklik wok long haus, dispela bai makim olsem ol inap mekim gut ol bikpela wok long i stap bilong ol long bihain.—Luk 16:10.
17 Long rot bilong orait long kisim wok, sampela yangpela i wok long kamap strong long samting bilong spirit na dispela i helpim ol long kisim sampela wok i bikpela moa. Taim ol i gat wok samting long mekim, dispela bai pasim ol long mekim ol pasin i no stret. (2 Timoti 2:22) Ol kain wok olsem bai “traim wok” bilong ol brata em ol i gat laik long mekim wok olsem kongrigesen sevent. (1 Timoti 3:10) Pasin bilong ol long redi long insait long ol miting na givim bel long wok autim tok, na pasin bilong ol long tingim gut olgeta insait long kongrigesen bai helpim ol elda long luksave long ol samting ol brata inap mekim taim ol i tingting long givim sampela wok moa long ol.
Painim Ol Gutpela Pasin Long Olgeta Man
18. Taim ol i mekim wok jas, ol elda i mas abrusim wanem pasin? Na bilong wanem ol i mas abrusim dispela pasin?
18 Sindaun 24:23 i tok: “Long taim ol man i kam long kot, i no stret sapos jas i helpim sampela na daunim sampela.” Bilong bihainim gutpela tingting na save bilong God, ol elda i mas abrusim pasin bilong tingim ol man bilong wanpela lain tasol taim ol i mekim wok jas long kongrigesen. Jems i tok: “Ol man i kisim kain gutpela tingting na save i kam long God, ol i save mekim ol pasin olsem. Namba wan, ol i save bihainim klinpela tingting. . . . Ol i save mekim wankain pasin tasol long olgeta man.” (Jems 3:17) Taim ol elda i mekim wok jas, ol i mas wok long painim ol gutpela pasin long ol narapela, tasol ol i mas was gut na no ken larim pasin bilong tingim ol pren o wanblut samting o samting ol i pilim long bel i stiaim wok ol i mekim. Asap, em man bilong raitim song, em i tok: “God i stap namba wan long bikpela miting long heven. Ol hetman [em ol man i mekim wok jas] i bung na God i tokaut long tingting bilong en. Em i tok olsem, ‘Yupela i save kot giaman na i no stretim tok. Na yupela i save grisim ol man nogut.’ ” (Song 82:1, 2) Olsem na taim ol elda Kristen i mas skelim samting bilong wanpela pren o wanblut, ol i sakim pasin bilong wantok sistem. Long dispela rot ol i helpim kongrigesen long i stap wanbel na spirit bilong Jehova inap mekim gut wok long kongrigesen.—1 Tesalonaika 5:23.
19. Long wanem ol rot yumi inap wok long painim ol gutpela pasin long ol narapela?
19 Taim yumi wok long painim ol gutpela pasin long ol brata na sista bilong yumi, yumi bihainim tingting bilong Pol long tok em i mekim long kongrigesen Tesalonaika. Em i tok: “Bikpela i mekim mipela i save gut olsem, yupela i mekim olgeta pasin mipela i tok long yupela i mas mekim. Na bihain tu yupela bai i mekim olsem tasol.” (2 Tesalonaika 3:4) Yumi bai amamas long lusim tingting long ol popaia bilong ol narapela taim yumi wok long painim ol gutpela pasin long ol. Yumi bai lukluk long ol samting i givim rot long yumi long mekim tok amamas long ol brata bilong yumi, na bai yumi abrusim pasin bilong tingting nogut. Pol i tok: “Man i mekim wok bilong wanpela man, em i mas bihainim gut tok bilong bikman bilong en.” (1 Korin 4:2) Pasin bilong ol elda na olgeta brata sista Kristen bilong yumi long bihainim gut tok, olsem stap gut long narapela, i save kirapim yumi long laikim ol moa yet. Yumi pas gut moa wantaim ol, na dispela i strongim pasin pren bilong Kristen. Yumi kisim wankain tingting olsem Pol i bin i gat long ol brata long taim bilong em. Ol i ‘wok wantaim yumi long kirapim kingdom bilong God’ na ol i ‘helpim yumi gut tru.’ (Kolosi 4:11) Long dispela rot yumi inap kamapim klia tingting bilong Jehova.
20. Wanem ol blesing bai painim ol man i wok long painim ol gutpela pasin long olgeta man?
20 Yumi tu i mekim wankain beten olsem Nehemia: “God, yu ken tingim olgeta dispela pasin mi bin mekim na yu ken mekim gut long mi.” (Nehemia 13:31) Yumi amamas tru olsem Jehova i save wok long painim ol gutpela pasin long ol man! (1 King 14:13) I gutpela yumi tu i bihainim wankain pasin long ol samting yumi mekim long ol narapela. Taim yumi mekim olsem, yumi inap wet long God i kisim bek yumi, na yumi inap kisim laip oltaim long nupela taim em klostu tru i laik kamap.—Song 130:3-8.
Bai Yu Bekim Olsem Wanem?
• I gat wanem as na Jehova i save mekim gutpela pasin long olgeta man?
• Olsem wanem yumi inap wok long painim ol gutpela pasin long ol narapela
• long wok autim tok bilong yumi?
• long famili bilong yumi?
• long kongrigesen?
• long pasin bilong yumi long pas gut wantaim ol narapela?
[Piksa long pes 18]
Maski long pastaim ol brata bilong em i bin birua tru long em, Josep i wok long painim ol gutpela pasin long ol
[Piksa long pes 19]
Pasin birua i no save pasim yumi long helpim olgeta man
[Piksa long pes 20]
Maski long pastaim ol i bin mekim ol pasin i no stret, Jekop i bin givim blesing long olgeta pikinini bilong em
[Piksa long pes 21]
Tok welkam long olgeta man long ol miting Kristen