Ol i Givim Ol Yet Bilong Mekim Wok
“OL MANMERI bilong yu bai [“amamas long,” NW ] i go wantaim yu na helpim yu.” (Song 110:3) Dispela tok i bikpela samting long 46 sumatin bilong klas namba 118 bilong Wastaua Baibel Skul Bilong Gileat. Ol i bin mekim wanem bilong redim ol yet bilong go long dispela skul i lainim ol misineri long helpim ol man bilong ol narapela kantri long ol samting bilong spirit? Mike na Stacie, ol i sumatin bilong klas namba 118, ol i tok: “Mipela i bin pasim tok long mipela i no laik bungim planti samting bilong skin, olsem na i no gat planti samting i pulim nabaut tingting bilong mipela na mipela inap lukluk i go stret long ol samting bilong spirit. Mipela i strong long gutpela wok bisnis bilong mipela i no ken daunim ol mak bilong spirit mipela i laik winim.” Olsem Mike na Stacie, ol arapela sumatin bilong dispela klas i amamas long givim ol yet long mekim wok na nau ol i autim tok bilong Kingdom long fopela bikpela hap bilong graun.
Long Sarere, Mas 12, 2005, inap 6,843 manmeri i amamas long harim gretiuesen program. Theodore Jaracz, wanpela bilong Gavening Bodi Bilong Ol Witnes Bilong Jehova, em i siaman bilong program. Em i tok welkam long ol visita i kam long 28 narapela narapela kantri, na bihain em i stori long olsem wanem pasin bilong skul long Baibel i helpim tru ol man. Brata Jaracz i kamapim tok bilong William Lyon Phelps, em wanpela tisa long Amerika, em i tok: “Ol man i save gut long ol tok bilong Baibel, yumi ken tok ol i olsem man i bin go long bikpela skul.” Tru, skul bilong graun inap helpim man, tasol pasin bilong skul long Baibel i helpim em moa yet. Em i helpim ol man long kisim save long God, em dispela save i bringim man long laip oltaim. (Jon 17:3) Brata Jaracz i tok amamas long ol sumatin i winim skul long ol i redi long mekim bikpela wok bilong skulim ol man long Baibel, em dispela wok i save kamap long winim 98,000 kongrigesen bilong ol Witnes Bilong Jehova long olgeta hap.
Ol Tok Bilong Strongim Bel Bilong Lain i Winim Skul
Bihain long siaman i kirapim program, William Samuelson i mekim wanpela tok em Song 52:8 i as bilong en, nem bilong tok “Rot Bilong Yu Long Stap Olsem Gutpela Diwai Oliv Long Haus Bilong God.” Em i tok olsem long Baibel diwai oliv i makim samting i karim planti gutpela kaikai na i naispela samting. (Jeremaia 11:16) Em i tok ol sumatin wantaim i kain olsem ol diwai oliv na i tok: “Long ai bilong Jehova yupela i olsem naispela samting taim yupela i stap gut long wok bilong yupela long autim tok bilong Kingdom long ol hap yupela bai mekim wok misineri long en.” Diwai oliv i mas i gat ol rop i go insait tru long graun bambai em i no ken i dai long taim bilong bikpela san, na olsem tasol ol sumatin i mas strongim ol yet long sait bilong spirit bambai ol i ken sanap strong taim ol man i les long harim tok, o i birua long ol, o taim sampela narapela traim i painim ol long ol hap ol bai mekim wok misineri long en.—Matyu 13:21; Kolosi 2:6, 7.
John E. Barr, em wanpela bilong tripela brata bilong Gavening Bodi i insait long program, em i mekim tok, nem bilong en “Yupela i Olsem Sol Bilong Graun.” (Matyu 5:13) Em i tok sol i save mekim na kaikai i no ken bagarap hariap, na olsem tasol wok bilong ol misineri long autim tok bilong Kingdom Bilong God bai helpim ol man i harim tok long abrusim bagarap na i banisim ol long ol samting i save bagarapim man long sait bilong spirit na stretpela pasin. Long gutpela pasin, Brata Barr i strongim ol sumatin i winim skul long “kamapim gutpela sindaun” wantaim ol narapela. (Mak 9:50) Em i tok, “kamapim ol pasin em holi spirit i as bilong en, na long olgeta taim pasin na toktok bilong yupela i mas gutpela tasol.”
“Stap Long Sip Long Hap Bilong Solwara i Daun Tru” em nem bilong tok Wallace Liverance i mekim, em wanpela tisa bilong Skul Gileat. Sip i raun long solwara i daun tru inap bihainim stretpela rot bilong en, na olsem tasol taim man i kliagut long “olgeta tingting hait bilong God”—em stretpela save long ol samting God i tingting pinis long mekim na olsem wanem em bai mekim—dispela inap helpim man long kamap strong long ol samting bilong spirit. (1 Korin 2:10) Tasol sapos yumi amamas long save tasol “long ol namba wan hap tru bilong tok bilong God,” dispela inap mekim na yumi no kamap strong na ‘bilip bilong yumi inap bagarap olgeta olsem sip i bruk long rip.’ (Hibru 5:12, 13; 1 Timoti 1:19) Bilong pinisim tok, Brata Liverance i tok: “Larim ‘ol gutpela pasin bilong God na tingting na save bilong en’ i strongim yupela long ol hap yupela bai mekim wok misineri long en.”—Rom 11:33.
Mark Noumair, em narapela tisa bilong Skul Gileat, em i mekim tok, nem bilong en “Bai Yu Mekim Ol Samting i Stret Wantaim Gutpela Samting Yu Bin Kisim?” Winim 60 yia, Wastaua Baibel Skul Bilong Gileat i bin kisim gutpela nem tru, long wanem, ol lain i winim dispela skul ol i bin mekim bikpela wok witnes. (Stat 31:48) Ol sumatin bilong klas namba 118 i kisim dispela gutpela samting bilong Skul Gileat. Brata Noumair i kirapim ol sumatin long bihainim pasin bilong ol Tekoa bilong taim bilong Nehemia na daunim ol yet na wok gut wantaim kongrigesen na ol arapela misineri. Em i tokim ol long sakim pasin bilong “ol hetman” i gat pasin antap em Nehemia i toktok long ol na ol i mas amamas long stap isi na mekim wok bilong ol.—Nehemia 3:5.
Ol Ekspiriens na Inteviu
Nem bilong narapela hap bilong program em “Tok Bilong God i Go Nabaut Long Olgeta Hap.” (Aposel 6:7) Tisa bilong Skul Gileat, Lawrence Bowen, i lukautim hap bilong program we sampela sumatin i mekim ol soim long ol samting i bin painim ol long wok autim tok ol i bin mekim long taim ol i skul. Ol ekspiriens i soim olsem ol sumatin i bin givim bel long autim tok bilong Baibel na Jehova i bin blesim hatwok bilong ol.
Richard Ashe i inteviuim sampela bilong famili Betel husat i save mekim sampela wok bilong skul. Ol tok ol i mekim i helpim odiens long save gut long helpim famili Betel i save givim long ol sumatin bilong Skul Gileat bambai skul i ken helpim ol tru. Bihain, Geoffrey Jackson i toktok wantaim sampela i bin winim Skul Gileat long bipo. Ol i stori long planti rot i op long ol misineri i ken litimapim nem bilong Jehova na givim ona long em. Wanpela brata i tok: “Ol manmeri i save lukluk long olgeta samting ol misineri i mekim. Ol i putim yau, ol i lukluk, na tingim ol dispela samting.” Olsem na brata i strongim ol sumatin long wok strong long stap olsem gutpela piksa long olgeta taim. Dispela gutpela tok bai helpim ol long bihain.
Stephen Lett, wanpela bilong Gavening Bodi, em i mekim laspela tok, nem bilong en “Go na Givim ‘Wara i Gat Laip.’ ” (Jon 7:38) Em i tok insait long 5-pela mun i go pinis, ol sumatin i bin kisim bikpela helpim long rot bilong kisim bikpela save long tok i tru bilong Baibel. Tasol ol dispela nupela misineri bai mekim wanem long dispela save ol i bin kisim? Brata Lett i tokim ol sumatin i winim skul long ol i mas tokim ol narapela man long save ol i bin kisim na bai dispela save i ken kamap ‘olsem hul wara insait long ol. Na dispela wara bai i kamap kamap oltaim na givim ol laip i stap gut oltaim oltaim.’ (Jon 4:14) Em i tok moa: “No ken lusim tingting long givim ona na litimapim nem bilong Jehova, em as bilong ‘wara bilong givim laip.’ Na no ken les kwik taim yu skulim ol man i bin lusim Bikpela Babilon em dispela lain i no gat wara bilong givim laip.” (Jeremaia 2:13) Brata Lett i pinisim tok long rot bilong strongim ol sumatin i winim skul long givim bel long mekim wankain singaut olsem spirit na meri bilong Pikinini Sipsip i save mekim: “ ‘Yu kam.’ Na wanem man nek bilong en i drai, em i mas kam. Man i laik dring, em i mas kam na kisim wara bilong givim laip.”—KTH 22:17.
Bilong pinisim program, Brata Jaracz i kamapim ol tok gude ol narapela i bin salim i kam long sampela kantri. Bihain long dispela, wanpela sumatin i winim skul i ritim wanpela pas bilong tok tenkyu.
Olsem wanem? Yu inap givim yu yet bilong mekim wok long hap i sot long ol man bilong autim tok? Sapos yu inap, orait putim ol mak bilong spirit yu laik winim, olsem ol dispela sumatin i winim skul i bin mekim. Kisim bikpela amamas em man i save kisim taim em i amamas long givim em yet long mekim wok bilong God—maski em i mekim wok misineri long narapela kantri o mekim wok bilong God klostu long ples bilong em.
[Blok long pes 13]
OL SAMTING BILONG OL SUMATIN
Hamas kantri ol i kam long en: 8
Hamas kantri ol bai go long en: 19
Hamas sumatin: 46
Krismas bilong ol, averes: 33.0
Hamas yia long tok i tru, averes: 16.5
Hamas yia long fultaim sevis, averes: 12.9
[Piksa long pes 15]
Klas Namba 118th Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.