Lain i Winim Skul Gileat i Go Bungim Kaikai Bilong Gaden!
“PLANTI kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Matyu 9:37, 38) Ol dispela tok i bikpela samting long ol sumatin i winim klas namba 116 bilong Wastaua Baibel Skul Bilong Gileat, em ol i redi long i go long ol hap ol bai mekim wok misineri long en.
Long Sarere, Mas 13, 2004, inap 6,684 manmeri i bung bilong harim gretiuesen program long Wastaua Ediukesen Senta long Patterson, New York, na long ol hap we ol inap harim program long rot bilong TV. Long dispela gretiuesen, klas i kisim ol gutpela tok bilong strongim ol. Ol dispela gutpela tok inap helpim yumi olgeta taim yumi wok strong long bungim kaikai bilong gaden spirit.
Long kirap bilong program, Theodore Jaracz, em i wanpela memba bilong Gavening Bodi na em i bin winim klas namba 7 bilong Skul Gileat, em i kamapim klia ol tok bilong Jisas: “Go mekim olgeta lain manmeri i kamap disaipel bilong mi.” (Matyu 28:19, 20) Dispela tok i stret, long wanem, ol sumatin i winim skul ol bai i go na mekim wok long 20 narapela narapela kantri! Em i tokim ol sumatin olsem tok bilong Baibel i bin redim ol gut long wok strong long bungim kaikai bilong gaden spirit.—Matyu 5:16.
Rot Bilong Bungim Planti Kaikai Bilong Gaden
Namba wan brata i mekim tok em Robert Wallen. Em i bin wok wantaim Skul Gileat inap planti yia. Em i mekim tok “Pasin Sori i Nambawan,” na em i tokim ol sumatin: “Pasin sori em i wanpela tok ples ol yaupas inap harim na ol aipas inap lukim.” Jisas i pilim hevi bilong ol arapela na i laik helpim ol. (Matyu 9:36) Ol sumatin bai i gat planti rot bilong mekim wankain pasin—taim ol i autim tok, insait long kongrigesen, long haus misineri, na insait long marit bilong ol. Brata i tokim ol: “Larim pasin sori i kamap ples klia long laip bilong yupela taim yupela i mekim wok bilong helpim ol arapela. Yupela i mas mekim nambawan gutpela pasin taim yupela i stap wantaim ol arapela long haus misineri. Olsem na tingting strong long kisim pasin bilong sori.”—Kolosi 3:12.
Bihain long dispela, Gerrit Lösch, em i memba bilong Gavening Bodi na em i bin winim klas namba 41 bilong Skul Gileat, em i mekim tok “Ol Man Bilong Autim Tok Long God i Kisim Bek Man.” (Aisaia 52:7, NW ) Bilong ol man inap abrusim bagarap taim God i bagarapim pasin nogut bilong nau, pastaim ol i mas kisim stretpela save long Tok Bilong God, autim bilip bilong ol, na kisim baptais. (Rom 10:10; 2 Timoti 3:15; 1 Pita 3:21) Tasol nambawan as bilong autim tok long God bai kisim bek ol man, em bilong litimapim nem bilong God na i no bilong ol man i ken abrusim bagarap. Olsem na Brata Lösch i tokim ol dispela misineri: “Kisim tok bilong Kingdom i go long olgeta hap bilong graun, na wok strong long autim tok long God bai kisim bek ol man, em olgeta dispela samting i litimapim nem bilong Jehova.”—Rom 10:18.
Wanpela tisa bilong Skul Gileat, Lawrence Bowen, i kamapim dispela askim “Olsem Wanem Yu Save Kamapim Lait Bilong Spirit?” Em i kolim tok bilong Jisas long Matyu 6:22 na i kirapim ol sumatin long mekim ai bilong ol i stap “gutpela” bilong ol i ken “kamapim lait bilong spirit i litimapim nem bilong Jehova na i helpim ol man.” Taim Jisas i kirap mekim wok bilong em, em i stap olsem gutpela piksa long dispela samting na em i tingting tasol long mekim laik bilong God. Pasin bilong skelim long bel ol gutpela samting Papa bilong em i bin lainim em long en long heven i helpim Jisas long sanap strong taim Satan i traim em long ples drai nating. (Matyu 3:16; 4:1-11) Jisas i kamapim olsem em i bilip olgeta long Jehova taim em i mekim wok God i bin givim em long mekim. Na olsem tasol, bilong karim ol hevi ol bai bungim, ol misineri i mas wok yet long stadi gut long Baibel na bilip olgeta long Jehova.
Mark Noumair, em wanpela tisa bilong Skul Gileat na em i bin winim klas namba 77 bilong dispela skul, em i mekim laspela tok bilong dispela hap. Em i mekim tok “Mipela i Stap Long Han Bilong Yu.” (Josua 9:25) Em i kirapim ol sumatin long bihainim pasin bilong lain Gibeon bilong bipo. Maski Gibeon em i “bikpela taun . . . na olgeta man i strongpela man bilong pait,” ol Gibeon i no laik kisim biknem o ting ol samting i mas kamap olsem ol i laikim. (Josua 10:2) Ol i amamas long “katim paiawut na karim wara” olsem ol wokboi bilong ol Livai bilong helpim lotu bilong Jehova. (Josua 9:27) Ol sumatin i winim dispela klas i bin tokim Bikpela Josua, em Jisas Krais, “Mipela i stap long han bilong yu.” Nau ol sumatin bai go long ol arapela kantri long mekim wok, ol i mas redi long mekim olgeta kain wok Bikpela Josua i givim long ol.
Ol Ekspiriens na Inteviu
“Kamapim Klia Ol Tok Bilong Baibel” em nem bilong tok Wallace Liverance i mekim wantaim sampela sumatin. Em i bin winim klas namba 61 bilong Skul Gileat na em i wanpela tisa bilong dispela skul. Ol i stori na mekim soim long sampela ekspiriens ol i bin kisim long wok autim tok long taim bilong skul. Em i klia olsem pasin bilong ol long stadi strong long Baibel inap 5-pela mun i bin kirapim bel bilong ol long autim long ol arapela man ol samting ol i bin lain long en. (Luk 24:32) Insait long 5-pela mun ol i bin skul, wanpela sumatin i bin autim tok long brata tru bilong em long ol samting em i bin lainim. Dispela i kirapim brata bilong em long painim kongrigesen long hap bilong em na kirap stadi long Baibel. Nau em i winim pinis mak bilong kamap pablisa i no baptais.
Bihain long ol dispela ekspiriens, Richard Ashe na John Gibbard i toktok wantaim sampela brata i bin stap gut long wok bilong Jehova inap planti yia pinis. Sampela em ol wasman bilong raun husat i wok long kisim spesel skul long Wastaua Ediukesen Senta. Ol i bin winim Skul Gileat long bipo. Wanpela i tingim tok Brata Knorr i bin mekim long taim bilong skul: “Long Gileat yupela bai stadi planti. Tasol sapos yupela kamap hambakman taim skul i pinis, mipela i no bin mekim gut wok bilong mipela. Mipela i laik bai yupela i kamap ol man i gat pasin laikim.” Ol wasman bilong raun i tokim dispela klas long tingim ol man, long mekim wankain pasin long ol arapela olsem Krais i bin mekim, na long pasin daun mekim wanem wanem wok ol i kisim. Sapos ol i bihainim dispela tok, em bai helpim ol nupela misineri long mekim gutpela wok long hap ol bai go long en.
Go Bungim Kaikai Bilong Gaden!
Odiens i harim tok bilong Stephen Lett, em wanpela memba bilong Gavening Bodi. Em i mekim bikpela tok bilong dispela program, nem bilong en “Go Bungim Kaikai Bilong Gaden!” (Matyu 9:38) Haptaim bilong kisim kaikai bilong gaden tru tru i no longpela tumas. Olsem na ol man bilong bungim kaikai i mas wok strong. Dispela i bikpela samting moa long dispela taim bilong las de! Long taim bilong bungim kaikai bilong gaden spirit, yumi mas helpim ol man na bai ol i no ken bagarap. (Matyu 13:39) Brata Lett i kirapim ol sumatin long “wok strong oltaim” na ‘larim holi spirit i kirapim ol’ na long “mekim wok bilong Bikpela” long dispela wok bilong bungim kaikai i no inap kamap gen. (Rom 12:11) Brata Lett i kamapim tok bilong Jisas: “Yupela i mas lukluk nabaut na lukim gut ol gaden. Ol kaikai i redi pinis.” (Jon 4:35) Em i strongim ol sumatin long kamapim pasin bilong ol long givim bel long bungim kaikai bilong gaden long rot bilong wok strong long painim ol man long wanem taim o long wanem hap ol inap painim ol, na long rot bilong autim tok long kain kain taim na ples. Taim yumi traim long opim rot, dispela inap helpim yumi long autim gut tok. Jehova em i God bilong wok strong, na em i laik bai yumi olgeta i bihainim pasin bilong em na wok strong long bungim kaikai bilong gaden spirit.—2 King 19:31; Jon 5:17.
Bilong pinisim program, siaman, Brata Jaracz, em i ritim ol gude i kam long planti brens ofis na em i givim setifiket long ol sumatin. Wanpela sumatin i ritim pas klas i raitim bilong tok tenkyu long skul ol i bin kisim. Tru tumas, gretiuesen program bilong klas namba 116 i strongim olgeta long dispela bung long wok strong moa long bungim kaikai bilong gaden.
[Blok long pes 25]
OL SAMTING BILONG OL SUMATIN
Hamas kantri ol i kam long en: 6
Hamas kantri ol bai go long en: 20
Hamas sumatin: 46
Krismas bilong ol, averes: 34.2
Hamas yia long tok i tru, averes: 17.2
Hamas yia long fultaim sevis, averes: 13.9
[Piksa long pes 26]
Klas Namba 116 Bilong Wastaua Baibel Skul Bilong Gileat
Nem bilong ol bratasista i stap daunbilo. Namba wan lain i sanap paslain, na namba 8 lain i sanap baksait tru. Taim yu ritim nem bilong ol na lukim pes bilong ol, kirap long han kais na i go long han sut.
(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.