Sampela Misineri Moa Bilong Bringim Ol Man i Kam
LONG planti hap, Septemba em taim bilong kisim ol kaikai long gaden, tasol long Septemba 8, 1991, wanpela bikpela samting i bin kamap long Haus Kibung bilong ol Witnes Bilong Jehova long Jesi Siti long Amerika, na dispela samting i winim wok bilong kisim ol kaikai long gaden. San i lait, na em taim bilong mekim bung bilong amamas long ol sumatin bilong Skul Gileat i winim skul. Ol brata sista i wok long nambawan ofis, na sampela moa em ofis i bin singautim ol, ol i bung. Inap 4,263 ol i bung, na telefon i bringim tok i go long 1,151 moa i stap long nambawan ofis long Bruklin na ol fam long Walkil na Pateson. Taim Sosaiti i salim ol misineri i go bilong autim tok long ol kantri, ol i painim planti man moa i gat pasin daun, na ol misineri i bringim ol i kam bilong lotuim Jehova. Orait, nau ol brata sista i bung na ol i tingim namba 91 klas bilong ol misineri bilong Gileat i winim skul, na ol i amamas wantaim na wetim ol tok i kirap.
Presiden bilong Skul Gileat, em Frederick W. Franz, em i kirapim miting na em i mekim gutpela beten ol man i pilim tru. Klostu em bai winim 98 krismas. Em i bin stap gut long wok bilong Jehova inap planti planti yia.
Albert D. Schroeder em i siaman bilong dispela bung. Em i bilong Lain Bilong Bosim Ol Witnes Bilong Jehova, na bipo em i kuskus na wanpela tisa bilong Skul Gileat. Em i kirapim ol tok, na em i stori long Buk Song 2:1, 2 na sampela tok profet moa, em truim bilong ol dispela tok i wok long kamap long nau, olsem ol kantri i kros na longlong nabaut. Tasol dispela samting i opim rot na bai ol misineri i ken go long ol nupela hap na autim tok long ol man.
George M. Couch i mekim namba wan tok. Em i bilong Komiti Bilong Betel. As tok bilong en i olsem: “Yupela i Mas Tingim Ol Blesing Bilong Yupela.” Em i tok, ol lapun na sikman i save tingim ol gutpela samting ol i bin kisim, na dispela tingting i helpim ol long karim ol hevi, olsem na ol dispela sumatin bilong Gileat tu i ken kirap long mekim olsem. Em i tok, ol tu i bin kisim ol gutpela samting, olsem blesing, tasol ol i no kisim nating, nogat—ol i bin mekim bikpela wok pastaim. Na i olsem tu long lapun Jekop, em i gat 97 krismas na em i pait wantaim ensel long nait inap planti aua, na nau em i kisim blesing. (Stat 32:24-32) Brata Couch i tokim ol sumatin, maski tingim ol hevi samting—beten na strongim bel na bai ol i ken stap bel isi, olsem bai ol i ken helpim ol narapela man.
John E. Barr bilong Lain Bilong Bosim Ol Witnes Bilong Jehova em i mekim narapela tok, nem bilong en, “Pasin Sori Mas Stap Namel Long Yupela.” Em i tok, ‘lain bilong Jisas ol i redi long i dai bilong helpim narapela narapela, orait, olsem wanem long yupela? Yupela i gat dispela kain pasin sori tu? Sapos yumi no sori olsem, yumi olsem samting nating.’ (1 Korin 13:3) Em i tok, sapos yumi mekim pasin sori long ol narapela man, dispela bai kamapim planti gutpela wok; wanpela i olsem: Ol man bai save, yumi lain tru bilong Jisas. Na Brata Barr i kolim sampela pasin yumi ken mekim bilong bihainim pasin sori, olsem givim biknem long ol wanwok misineri, na mekim gutpela tok long ol, na maski tok pait long ol liklik samting—bihainim tok bilong 1 Pita 4:8. Na em i tok, sapos em de bilong wanpela misineri i mas kukim kaikai bilong ol, em i mas amamas long mekim, na em i no ken ting dispela wok em i samting nating; long olgeta taim yumi mas mekim pasin sori long ol brata sista bilong yumi.—Rom 13:8.
David A. Olson i bilong Komiti Bilong Dipatmen Bilong Wok, na em i mekim wanpela tok, as bilong en i olsem: “Yu Bilip Strong o Nogat?” Em i tok, yumi mas bilip long Jehova na oganaisesen bilong em (Sindaun 14:6; Jeremaia 17:8), na yumi ken tingim strong na save bilong yumi tu; ol misineri i bin mekim wok bilong Jehova inap longtaim liklik, olsem na ol i gat hap strong na save ol i ken tingim; na Jehova na oganaisesen bilong em i bin givim wok na namba long ol tu; aposel Pol tu i gat ol dispela samting em i ken bilip long en. (1 Korin 16:13; Filipai 4:13) Tasol Brata Olson i tok, no ken hambak tumas long strong na save bilong yumi yet; mas tingim Rom 12:3; ol man bilong graun i save hambak long strong na save bilong ol; yumi mas i gat pasin daun, na nau ol man bai bilipim tok bilong yumi; ol i bin mekim olsem long Pol.—Filipai 1:12-14.
Lyman A. Swingle i bilong Lain Bilong Bosim Ol Witnes Bilong Jehova, na em i givim tok long ol sumatin olsem: “Yupela Ol Sumatin Bilong Gileat, Yupela Go Autim Tok na Bringim Ol Man i Kam!” Em i tok, nau em taim bilong lain bilong Gileat na ol narapela brata ol i ken go painim ol man na bringim ol i kam insait long tok i tru; nau ol dispela sumatin i ken bung wantaim ol narapela planti tausen sumatin bilong Gileat long mekim wok misineri, em sampela bilong namba wan na namba 2 na namba 3 klas bilong 1940 i go inap 1949! Brata Swingle i tok, long dispela taim bipo yumi no bin save, wok misineri bai stap inap 50 yia moa, o sampela ol gavman nogut olsem gavman Natsi na Fasis na sampela tambu bilong gavman bai pinis na rot i op na tok i tru i ken go insait long ol dispela hap. Yumi kirap nogut long ol dispela samting i bin kamap, tasol olsem wanem long bihain? Na bilong pinisim tok bilong em, Brata Swingle i tokim ol sumatin: “Yupela go long ples wok na autim tok!”
Nau tupela bikpela tisa bilong Skul Gileat i givim tok long dispela namba 91 klas, em laspela taim ol bai mekim olsem. Jack D. Redford i toktok long “Kisim Save.” Em i tok, ol i bin kisim save long Skul Gileat, tasol nau ol i mas lain long mekim wok long dispela save. Ol i no ken ting ol i save pinis long olgeta samting, nogat. Ol save ol i kisim bihain long skul, em dispela i bikpela samting. Ol i mas lain long i stap bel isi wantaim ol narapela man, na sapos ol i popaia ol i mas tokim poroman marit o wanwok misineri, o ol narapela brata sista, ‘Sori, mi yet mi asua.’ Na ol i no ken bilip kwik long ol samting ol i lukim namba wan taim; ol hevi i gat planti samting bilong en long skelim, na ol i mas save gut pastaim na bai ol i ken givim gutpela tok long ol man na bai ol i ken stretim hevi bilong ol. Na ol i no ken daunim ol brata long ples ol i go long en—ol dispela brata i save karim gut ol hevi bilong ol. (Sindaun 15:28; 16:23; Jems 1:19) Brata Redford i tokim ol, ol i mas lain yet, long wanem, hevi i no bungim yet ol na bai ol i ken save ol bai mekim wanem long taim bilong hevi.
Ulysses V. Glass em kuskus bilong Skul Gileat, na em i stori long Filipai 3:16. Em i tok, ol dispela sumatin i bin lainim planti samting taim ol i bin skul, tasol ol i mas stadi yet olsem Filipai 3:16 i tok. Ol i ken wok yet long kisim ol stretpela save, tasol ol i no inap save long olgeta samting. Em i tok piksa long hanwas em namba bilong en i save senis senis; em i tok, papa bilong hanwas i save long stretim taim na namba bilong en, tasol em i no save masin bilong hanwas i wok olsem wanem. I olsem tasol long misineri—em i kisim bikpela save long sampela ol samting, tasol em i no ken ting em i winim man i save pret long Jehova, long wanem, man i daun long Jehova na pret long em i winim man i gat bikpela save. (Sindaun 1:7) Jisas i tok, “ai” bilong yumi i mas “gutpela.” (Matyu 6:22) Sapos ai bilong spirit em i tudak, em bai nogutim yumi olsem ai tru bilong yumi sapos em i tudak. Sampela man i save tingim sampela samting tasol, na ol i no tingim ol narapela samting; tasol sampela man i tingim ol samting ol narapela i toktok long en, na ol i no tingim ol bikpela samting na as bilong ol hevi.
Brata Theodore Jaracz bilong Lain Bilong Bosim Ol Witnes Bilong Jehova em i mekim laspela tok, nem bilong en, “Save Gut Long Oganaisesen Bilong Jehova, na Wok Wantaim Dispela Oganaisesen.” Brata Jaracz i tok, i gat planti oganaisesen na sosaiti long graun, na ol i gat ol sata na lo na wok bilong ol, tasol i gat wanpela i stap na as bilong en i no bilong dispela graun. Olsem wanem yumi ken save, wanem oganaisesen i bilong Jehova? Baibel i kolim ol mak bilong en na bai yumi ken save. Baibel i tok, ol wok bilong Jehova long heven i gat gutpela lo bilong en. (Buk Song 103:20, 21; Aisaia 40:26) Oganaisesen bilong Jehova long graun tu i bihainim gutpela lo, na em i no insait long ol wok bilong graun, na em i bihainim stret ol tok bilong Baibel, na i no gat pasin nogut i stap long en, na pasin sori i stap namel long lain bilong en. Brata Jaracz i tokim ol dispela sumatin bilong Gileat long ol i mas lainim ol man long Baibel na bai ol i ken save wanem oganaisesen i bilong Jehova. Na em i tokaut long wanpela gutpela samting: Skul Gileat bai go bikpela, na namba 93 klas bai i gat 50 sumatin! Na bai i gat Namba 2 Skul Gileat i kamap long Jemani long wankain taim. Ol man i paitim strong han taim ol i harim dispela tok.
Ol dispela 24 sumatin i winim skul na ol i kisim pepa diploma bilong ol. Bihain liklik ol bai bruk na i go nabaut long 12-pela kantri. Ol i givim bikpela tenkyu long Lain Bilong Bosim Ol Witnes Bilong Jehova na long famili bilong Betel. Bihain long kaikai Brata Charles J. Rice bilong Komiti Bilong Ol Fam Bilong Wastaua em i bosim sotpela Stadi Wastaua. Bihain moa ol sumatin i mekim pilai bilong makim sampela ol samting i bin painim ol long wok autim tok insait long dispela 5-pela mun ol i bin skul long Walkil long Nu Yok. Bihain moa sampela pablisa i wokim wanpela pilai, nem bilong en, Ol Yangpela Bilong Nau Ol i Tingim God. Dispela pilai i kamapim ol samting i laik pundaunim yangpela painia, tasol em i tingim ol samting em i bin lainim, na em i stap strong.
Brata George Gangas bilong Lain Bilong Bosim Ol Witnes Bilong Jehova em i gat 95 krismas, na bilong pinisim bung bilong ol em i mekim gutpela beten long Jehova. Taim ol man i laik i go ol i amamas, na ol i tingting long givim bel moa long wok bilong autim tok na painim ol man na bringim ol i kam.
[Blok long pes 22]
Ol Samting Bilong Ol Sumatin
Hamas kantri ol i kam long en: 6
Hamas kantri bai ol i go long en: 12
Hamas sumatin: 24
Hamas marit: 12
Krismas bilong ol, averes: 33.4
Hamas yia ol i stap insait long tok i tru, averes: 16.13
Hamas yia ol i wok painia, averes: 11.3
[Piksa long pes 23]
Namba 91 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba 1 lain ol i sanap paslain, na namba 4 lain i sanap baksait tru. Taim yu kaunim nem bilong ol, lukim pes bilong ol i kirap long han kais na i go long han sut.
(1) McDowell, A.; Youngquist, L.; Skokan, B.; Wargnier, N.; Miller, Y.; Muñoz, M. (2) Bales, M.; Perez, D.; Attick, E.; Vainikainen, A.; Mostberg, K. (3) DePriest, D.; DePriest, T.; Perez, R.; Wargnier, J.; Muñoz, J.; Miller, J. (4) McDowell, S.; Bales, D.; Skokan, M.; Attick, C.; Youngquist, W.; Vainikainen, J.; Mostberg, S.