Ol i Skul Long Gileat Long Bilip i Holi Tru
“OL SUMATIN bilong yumi i bin skul long bilip i holi tru.” Em namba wan tok i kamap long bung bilong makim namba 95 klas bilong Wastaua Baibel Skul Bilong Gileat i winim skul. Dispela bung i kamap long Sande, Septemba 12, 1993. I gat planti manmeri ol i kam bung, em Sosaiti i bin singautim ol i kam, na lain bilong Betel long Bruklin ol tu i kam. Ol inap olsem 4,614 olgeta. Ol i bung long Haus Kibung Bilong Jesi Siti, na Brata George Gangas i mekim namba wan beten bilong kirapim bung. Brata Gangas i bin wok long Betel inap 65 yia pinis, na nau em i gat 97 krismas. I no gat narapela long Lain Bilong Bosim Ol Witnes em i gat bikpela krismas olsem.
Albert Schroeder tu i bilong Lain Bilong Bosim Ol Witnes na em i siaman bilong dispela program. Em i tok: “Inap 5-pela mun, as bilong skul ol i kisim long Gileat, em bilip i holi tru.” Tasol wanem dispela ‘bilip i holi tru’? Em i tok, dispela tok i stap long Jut 20, na em i makim olgeta tok i tru bilong Baibel. Olsem na as bilong skul ol i kisim long Gileat em tok bilong Jehova long Baibel, em nambawan buk bilong skul.
Ol Sumatin i Kisim Sampela Tok Moa
Namba wan man bilong mekim tok em John Stuefloten bilong Komiti Bilong Wastaua Fam. Nem bilong tok, em “Larim Ol Man i Gat Gutpela Tingting Ol i Helpim Yu.” Baibel i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting.” (Sindaun 13:20) Long dispela skul, ol sumatin i bin lusim 900 aua samting long stadi long Baibel. Brata Stuefloten i askim ol sumatin: “Pasin na tok bilong Jehova bai stiaim yupela olsem wanem long bihain? Yupela bai go long 18 kantri i gat olsem 170 milion manmeri long en. Olsem na tok na pasin bilong yupela bai mekim wanem long ol?” Sapos ol nupela misineri i bihainim gutpela tingting olsem bilong Jehova, bai ol inap helpim ol narapela long kirap lotuim Jehova, em i As bilong olgeta gutpela tingting.
Nau Lloyd Barry bilong Lain Bilong Bosim Ol Witnes i mekim tok, “Stap Olsem Ol Man Bilong Ol Narapela Lain.” (1 Korin 9:22) Inap 45 yia bipo, Brata Barry yet em i wanpela sumatin bilong namba 11 klas bilong Gileat. Nau dispela namba 95 klas i amamas long kisim sampela tok long dispela brata i bin i stap misineri inap planti yia long narapela kantri. Em i tokim ol, ol i mas kirap kwik long kisim save long pasin bilong ol man bilong ol kantri ol bai wok long en, na ol i mas lain kwik long tok ples bilong ol dispela lain. Em i tok, gutpela rot bilong mekim olsem, em ol i mas bung na wok wantaim ol brata bilong dispela hap, na lain long ol pasin bilong ol na bihainim ol pasin bilong ol i stret long bihainim.
Nau Dean Songer bilong Komiti Bilong Faktori i mekim tok, “Yupela i No Kalabus Moa Long Wok.” Brata Songer i bin wok oltaim long wok bilong Jehova inap 35 yia pinis, na em i save tru long pasin bilong tingim mak bilong winim, na putim ai long dispela na givim bel long mekim wok bilong yumi, na no ken tingting long planti samting bilong skin. Na em i kamapim dispela tok long ol sumatin. Long ol Israel bipo, ol lain bilong singsing long haus lotu bilong Jehova ol i no kalabus long ol wok ol Livai i mas mekim. Olsem na ol inap givim bel long mekim dispela wok ol i bin kisim. (1 Stori 9:33) Olsem tasol ol misineri bilong Gileat i no kalabus moa long ol samting olsem ol wok bilong skin, olsem na ol inap tingting tasol long dispela bikpela wok ol i bin kisim. Bilong pinisim tok bilong em, Brata Songer i tok: “Putim tingting i go long ol wok yu mas mekim, na no ken tingim planti samting bilong skin. Nau yu gat wok bilong litimapim nem bilong Jehova long san na long nait.”
Daniel Sydlik bilong Lain Bilong Bosim Ol Witnes em i mekim wanpela tok, “Skulim Ol Narapela Long Rot Bilong i Stap Amamas Tru.” Em i tokim ol sumatin, ol i mas “skulim ol man long ol bikpela bilip bilong Baibel, na strongim bel na soim ol man long ol samting ol i mas mekim bambai pasin bilong ol i stret wantaim laik bilong God.” Gutpela tisa i mas kirapim tingting na bel bilong man. Em i tok: “Taim yu skulim man, yu mas wok long kirapim em long bihainim pasin Kristen, nogut yu skulim em tasol long ol lo.” Na bilong pinisim tok, em i tok: “Yes ol brata, skulim yupela yet na ol narapela tu long pasin bilong laikim tru ol man, long wanem, dispela pasin i save mekim yumi i stap wanbel.”—1 Korin 13:1-3; Kolosi 3:14.
Ol sumatin i skul inap 5-pela mun samting, na ol i laikim tru tupela tisa bilong ol. Jack Redford, bipo em tu i wanpela misineri, em i mekim tok pastaim, nem bilong en, “Samting Yu Bin Tingting Long Mekim Em i Stret.” Taim Pol i no kamap aposel Kristen yet, em i bin holim bikpela namba na biknem namel long lain Juda, na em i gat mani na gutpela sindaun. Tasol long Filipai 3:8 Pol i tok, ol dispela samting “i olsem pipia nating.” Em i givim bel tru long wok bilong autim tok, na dispela rot em i bin tingting long bihainim, em i stret tru. Planti man bilong graun i kamapim klia olsem mani kago i nambawan samting long tingting bilong ol, winim laip i stap oltaim. Tasol samting ol sumatin bilong Gileat i bin tingting long mekim, em i stret tru. Bilong pinisim tok, Jack Redford i tok: “Dispela graun bilong Satan i no inap givim wanpela samting long yu i gutpela olsem wok misineri. Lukautim gut dispela bikpela wok, na larim ol man bilong dispela graun i lukautim ol pipia bilong ol!”
Inap 32 yia pinis Ulysses Glass i stap tisa long Skul Gileat. Em i mekim tok, “God Tasol Inap Wokim Wanpela Diwai.” As bilong dispela tok em Song 1:3. Ol nupela nupela masin samting ol saveman i bin kamapim, ol i no inap winim wanpela diwai em God yet i bin wokim. Ol Kristen i kain olsem diwai, em Jehova yet i bin planim na givim wara long en. Brata Glass i tok, inap 5-pela mun pinis, ol sumatin i bin kisim wara bilong laip i stap long Baibel, olsem ol diwai long wanpela gaden o paradais bilong spirit. Tasol taim ol i mekim wok misineri ol i mas lukautim gut “rop” bilong ol, nogut dispela ol “rop” i bagarap na i no inap kisim wara moa. Tisa i tok, ol i mas ‘wok long kisim wara bilong laip i kam long Jehova, long wanem, God tasol inap wokim wanpela diwai.’
Carey Barber, em wanpela long Lain Bilong Bosim Ol Witnes, em i mekim laspela tok. Inap 70 yia pinis em i bin mekim wok bilong Jehova oltaim, olsem na em inap tru long mekim tok, “Givim Bel Olgeta Long Jehova.” Klostu olgeta man bilong graun i no bin givim bel olgeta long Jehova. (Lo 5:9) Tasol Brata Barber i kamapim klia olsem “yumi inap givim bel olgeta long God,” maski sin i stap long yumi. Na em i tok: “I no gat wanpela inap tok, ‘Satan yet i kirapim mi na mi mekim.’ ” Tasol sapos yumi no wok long sakim Satan, em inap daunim yumi. (Jems 4:7) Yumi mas wok strong long wok bilong Jehova—em i nambawan rot bilong sakim Satan wantaim lain bilong em long graun na givim bel olgeta long Jehova.
Ol i Kamap Misineri
Bilong pinisim program bilong moningtaim, ol i givim namba long olgeta 46 sumatin na ol i kamap misineri. Ol dispela 46 marit i kisim pepa i tokaut olsem ‘ol i lain pinis na ol inap tru long mekim wok bilong skulim ol man, na helpim ol man long i stap wanbel, na mekim wok bilong kamapim bel isi na stretpela pasin namel long olgeta lain man.’ Yumi save, namba 95 klas bilong Gileat bai wok strong long mekim dispela bikpela wok long dispela 18 kantri ol bai go long en, olsem ol kantri long Esia, Afrika, Yurop, Latin Amerika, na ol ailan Karibian.
Long belo bek Charles Woody bilong Komiti Bilong Dipatmen Bilong Lukautim Wok em i mekim sotpela Stadi Wastaua, na bihain ol sumatin i mekim wanpela program bilong ol yet, nem bilong en, “Skul Gileat i Redim Mipela Long Mekim Wok Tisa Olsem Misineri.” Bihain long en ol i mekim wanpela pilai bilong Baibel, em “Samting Mipela Inap Tingting Long Mekim.”
Taim dispela program i pinis, ol nupela misineri i redi long i go long olgeta hap bilong graun bilong kamapim ‘bilip i holi tru’ long ol man.
[Blok long pes 26]
Ol Samting Bilong Ol Sumatin
Hamas kantri ol i kam long en: 7
Hamas kantri ol bai go long en: 18
Hamas sumatin: 46
Hamas marit: 46
Krismas bilong ol, averes: 30.06
Hamas yia long tok i tru, averes: 12.92
Hamas yia long wok painia, averes: 9.4
[Piksa long pes 26]
Namba 95 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.