Ol i Putim Skul Giliat i Go Long Narapela Hap

LONG Februeri 1, 1943, taim Nathan H. Knorr i stap presiden bilong Sosaiti Wastaua, em i mekim tok bilong opim wanpela nupela skul. Em i tokim ol 100 sumatin bilong namba wan klas bilong dispela skul, olsem: “I no wok bilong dispela skul long inapim yupela long kamap wokman bilong God. Yupela i wokman bilong God pinis, na yupela i bin mekim wok bilong God inap planti yia pinis. . . . Wok bilong dispela skul . . . em i bilong helpim yupela long kamap gutpela wokman moa.” Inap long nau Skul Giliat i wok yet long lainim ol wokman bilong God bambai ol inap i go mekim wok misineri long ol narapela kantri.

Long 1943, Skul Giliat i stap long hap bilong Finga Leks long Provins Nu Yok. Skul Giliat i stap long dispela hap inap 17 yia. Long yia 1961 ol i putim Skul i go long Bruklin. Bilong wanem ol i mekim olsem? Ol i save lainim ol sumatin bilong Skul Giliat long ol samting bilong helpim wok bilong oganaisesen. Ol i laik lainim ol sumatin long ol wok bilong ol brens-ofis, olsem ol namba tu ofis bilong Sosaiti, long olgeta hap, olsem na ol sumatin i mas wok wantaim ol brata long namba wan ofis long Bruklin bambai ol i ken kisim dispela save. Long dispela as ol i putim Skul Giliat i go long Bruklin na inap sampela yia ol i wok long givim skul long ol brata i wok long ol brens-ofis. Bihain ol i kirap gen long skulim ol brata sista long mekim wok misineri.

Inap 27 yia, kirap long 1961 i go inap long 1988, ol sumatin bilong Skul Giliat i stap wantaim ol brata sista long namba wan ofis long bruklin na ol i kisim skul. Ol inap bung wantaim ol brata bilong Lain Bilong Bosim Ol Witnes na ol narapela wokman bilong God i gat save pinis long mekim wok, na dispela i helpim ol. Em gutpela rot bilong lain long ol wok bilong wanpela brens-ofis bilong Sosaiti Wastaua, a? Ol sumatin i skul na kisim save, na long olgeta de ol i lukim ol brata sista long namba wan ofis i mekim wok bilong ol na dispela tu i lainim ol.

Skul Giliat i bin mekim wanem long helpim wok bilong autim tok long olgeta hap bilong graun? I gat 93 kodineta bilong ol komiti bilong ol brens-ofis na inap olsem 74 ol i bin i go long Skul Giliat. Olsem na yumi save, ol dispela brata i bin skul gut long mekim bikpela wok bilong lukautim lain bilong God long nau. Na planti wasman bilong raun, ol tu i bin i go long Skul Giliat. Tru tumas, ol samting ol sumatin bilong Skul Giliat i lain long en i bin helpim wok bilong oganaisesen.

Skul Giliat i Lusim Bruklin

Tasol bihain ol i tingting pinis long putim Skul Giliat i go long narapela hap gen. Olsem na long Septemba samting, long yia 1988 ol i pulimapim ol tebol sia samting bilong Skul Giliat na ol samting bilong ofis tu long 4-pela trak na kisim i go long Wastaua Fams, long Walkil, Nu Yok, em namba tri hap Skul Giliat i bin stap long en. Insait long tupela mun tasol ol wokman long Wastaua Fams i redim ol gutpela klasrum na rum buk na ofis bilong skul. Sampela i wok long san na long nait bilong redim ol samting bilong skul bambai klas bilong skul inap kirap long taim stret bilong en.

Na em nau, long Oktoba 17, 1988 namba 86 klas i kirap long taim stret bilong skul, na Skul Giliat i no lus liklik long mekim wok bilong en bilong ‘lainim ol man na meri long kamap gutpela wokman moa bilong God.’ Long Wastaua Fams dispela skul i stap long gutpela hap tru wankain long ples dispela skul i bin i stap long en pastaim, long hap bilong Finga Leks.

Namba 86 Klas i Winim Skul

Long Mas 5, 1989 ol brata sista i wok long namba wan ofis long Bruklin na long Wastaua Fams, olgeta ol i go bung long Haus Kibung long Jesi Siti bilong amamas wantaim ol sumatin bilong namba 86 klas i winim skul. Wanpela brata bilong Lain Bilong Bosim Ol Witnes, em Daniel Sydlik, em i mekim beten bilong kirapim dispela bung. Karl Klein bilong Lain Bilong Bosim Ol Witnes em i siaman bilong dispela bung. Taim em i mekim namba wan tok bilong dispela bung, em i stori long ol misineri bilong ol Witnes Bilong Jehova i narapela kain tru long ol misineri bilong ol misin ol i kolim Kristen. Wok bilong ol misineri bilong Skul Giliat i kamap gutpela long ol kantri kain olsem Japan. Long nau, long hap bilong Japan, i gat 131,000 manmeri ol i wok long autim tok!

Bihain Donald Krebs i mekim wanpela tok, nem bilong en: “Ol Gutpela Wok Yupela i Mekim i Olsem Mak Bilong Yupela.” Em i tok, ol misineri bilong Skul Giliat i bin mekim bikpela wok bilong helpim lain bilong Jehova i go bikpela long olgeta hap bilong graun. Em i tok: ‘Ol gutpela wok misineri yupela i mekim bilong lainim ol man long ol tok bilong God long Baibel bai makim yupela i narapela kain. Mipela laik kirapim yupela long wok strong. Na bai Jehova i blesim bikpela wok yupela i mekim.’

Narapela brata bilong Lain Bilong Bosim Ol Witnes, em George Gangas, em i givim bel long mekim wanpela tok, nem bilong en: “Baibel Em i Nambawan Gutpela Buk Hia long Graun.” Em i givim tok long ol sumatin, olsem: “Oltaim yupela i mas wok long lainim ol tok bilong Baibel. Ol tok bilong Baibel i olsem ol gutpela bis bilong spirit i dia tumas . . . na ol i lait tru. Man i laikim tumas ol dispela gutpela samting em i laik lukim lukim long olgeta taim na em i save amamas long en.”

Richard Eldred i mekim wanpela tok, nem bilong en: “Yu Inap Helpim Ol Man long Senisim Pasin Bilong Ol.” Em i tok, ol dispela nupela misineri bai i go autim tok long ol man na ol inap helpim ol dispela man long kirap bihainim gutpela pasin. Sampela manmeri bilong bipo, olsem Devit, na Niemaia, na Debora, na Abigel, ol i bin helpim sampela man long kirap bihainim gutpela pasin. Ol i bin mekim olsem wanem? Ol i bin laikim tumas ol, na holimpas bilip na i no pret, na ol i bihainim pasin isi na gutpela pasin bilong God.

Brata Lyman Swingle, em bilong Lain Bilong Bosim Ol Witnes, em i tokim ol sumatin, “Yupela i Mas Tingim Ol Blesing Bilong Yupela.” Em i kolim sampela blesing ol i bin kisim, olsem inap 5-pela mun ol i bin skul na lainim lainim ol tok bilong Baibel, na bihain em i tokim ol: “Taim las de i kam klostu, ating yu mas hariap moa yet long mekim ol wok, na ating bai rot i gat planti hevi na i hatwok. Tasol yu no ken les long mekim wok, na yu no ken lusim dispela wok.”

Wanpela tisa bilong Skul Giliat, em Jack Redford, em i mekim wanpela tok, nem bilong en: “No Ken Larim Strong Bilong Yu i Kamap Samting Bilong Pundaunim Yu.” Wanpela tok bilong Solomon i as bilong dispela tok, em Solomon i tok, “Yu no ken ting yu stretpela man tumas, winim ol narapela.” (Eklisiastis 7: 16, 17, NW ) Brata Redford i tok, ol sumatin i mas was gut, nogut ol i mekim wok long strong bilong ol yet; ol i mas mekim long strong bilong Jehova. Em i tok, “Ol gutpela pasin, sapos yu strong tumas long mekim, dispela inap pundaunim yu.” Olsem: Ating wanpela man i strong long bihainim ol lo na mekim stret olgeta liklik liklik samting, tasol sapos em i strong tumas long mekim, ating bai em i no mekim pasin marimari o isi liklik. Olsem na Brata Redford i tokim ol sumatin: “Yumi olgeta yumi mas save long ol samting yumi no strong long en, na yumi mas save tu long ol samting yumi gat strong long mekim. Yupela mas bihainim stretpela pasin, tasol nogut yupela i ting yupela i stretpela man tumas, winim ol narapela. Yupela mas bilip na wet long Jehova. Yupela mas mekim wok long strong bilong Jehova.”

Narapela tisa, em man bilong raitim nem bilong ol sumatin, em Ulysses Glass, em i stori long tok bilong Jisas, em Jisas i tok: “Yupela kisim dispela diwai mi givim long yupela, na karim long sol bilong yupela.” (Matyu 11:​29, 30) Jisas i singautim ol disaipel bilong ‘karim dispela diwai wantaim em.’ Em i no laik putim hevi long ol. Nogat. Em i laik helpim ol man; em nambawan bikpela tingting bilong em. Em i mekim pasin daun. Em i no save les kwik long ol disaipel. Jisas i tok, ‘Lukim pasin bilong mi na bihainim.’ Ol misineri i mas kisim tingting bilong Krais. Brata Glass i tokim ol sumatin, ‘Yupela i gat gutpela pasin bilong givim samting long narapela man. Yupela i mas bihainim yet dispela pasin taim yu go long longwe ples bilong mekim wok misineri.’

Ol tok bilong moningtaim i laik pinis na Brata Carey Barber bilong Lain Bilong Bosim Ol Witnes i givim bel long mekim wanpela tok, nem bilong en: “Taim Bilong Kisim Kaikai, Em Las De Bilong Dispela Graun.” Em i stori long ol samting tok piksa bilong Jisas long wit na gras nogut i makim long nau. (Matyu, sapta 13) Pastaim God i bin bungim lain bilong Krais, em God i makim ol long spirit holi. Na bihain, kirap long yia 1935, em i “bungim” ol arapela sipsip. Skul Giliat i bin mekim bikpela wok long “bungim” ol disaipel bilong Krais.

Taim ol sumatin i kisim pinis pepa bilong makim ol i winim skul, bihain wanpela i kaunim wanpela gutpela pas ol i bin raitim bilong tok tenkyu long ol tisa na ol brata sista i wok long Betel, long wanem ol i bin lainim gut ol na mekim gut long ol. Hap tok bilong dispela pas i olsem: “Mipela i wanpela klas bilong Skul Giliat, tasol yupela i no bin tingim mipela i wanpela klas tasol. Nogat. Yupela i bin tingim mipela olgeta wan wan. Mipela i pilim tru dispela samting na mipela i laik bihainim gutpela pasin bilong yupela. Nau mipela i mas lusim yupela na mipela i bel hevi, long wanem bai mipela i no stap klostu moa long yupela, tasol mipela i amamas long wanem nau bai mipela i go long nupela ples wok bilong mipela.”

Long apinun, Brata Ralph Walls i bosim Stadi Wastaua na ol sumatin i bekim tok long stadi. Bihain ol sumatin i mekim sampela liklik pilai bilong makim sampela samting i bin painim ol taim ol i bin stap long Wastaua Fams na ol i bin i go long autim tok. Bihain Komiti Bilong Wok Tisa long Lain Bilong Bosim Ol Witnes ol i putim sampela liklik pilai i gat het-tok olsem: “Pasin Bilong Daun long Man i Gat Wok long Bosim Yu i Kamapim Pasin Wanbel.” Na ol i putim tu sampela piksa (slait) i makim amamas ol misineri long planti kantri i bin kisim taim ol i mekim wok bilong ol. Bilong pinisim dispela bung, presiden bilong Skul Giliat, em Frederick Franz i gat 95 krismas, em i mekim beten na em i givim bel long mekim.

Ol brata sista i kam bung ol i amamas long dispela bung na planti taim ol i paitim han. Dispela i kamapim long ples klia olsem ol i givim bel long helpim ol dispela sumatin i laik kamap misineri, na ol i pilim tru ol tok ol i harim. I gat 24 sumatin long namba 86 klas bilong Skul Giliat na yumi save, olgeta i tingting pinis long mekim wok long strong bilong Jehova taim ol i go bilong mekim wok misineri bilong ol.

[Blok long pes 23]

OL SAMTING BILONG OL SUMATIN:

Hamas marit: 24

Hamas sumatin: 24

Hamas kantri ol i kam long en: 6

Hamas kantri bai ol i go long en: 12

Krismas bilong ol, averes: 32.3

Hamas yia ol i bin baptais, averes: 14.1

Hamas yia ol i wok painia, averes: 9.1

[Piksa long pes25]

Namba 86 Klas bilong Wastaua Baibel Skul Bilong Giliat

Nem bilong ol brata sista i stap daunbilo. Namba 1 lain ol i sanap paslain, na namba 4 lain i sanap baksait tru. Taim yu kaunim nem bilong ol, lukim pes bilong ol i kirap long han kais na i go long han sut.

(1) Parrott, R.; Imig, E.; Benig, G.; Bengtsson, E.; Baart, W.; Ihander, K. (2) Lewis, J.; Hilario, L.; Lindmark, A.; Antoncich, C.; Agurs, C. (3) Bengtsson, R.; Parrott, J.; Benig, J.; Imig, J.; Baart, A.; Rissell, S. (4) Rissell, M.; Lewis, L.; Antoncich, M.; Hilario, R.; Agurs, H.; Lindmark, L.; Ihander, J.