Amamas Long Musik−Wanem Kain Musik?

OL MAN bilong bipo i bin mekim pamuk na pasin sem i nogut tru, na ol i bin lotuim ol god giaman. Olsem na aposel Pol i raitim strongpela tok long ol Kristen long stretpela pasin ol i mas bihainim. Em i raitim pas long kongrigesen long Efesas na em i tok: “Olsem na mi laik mekim wanpela tok long yupela. Long nem bilong Bikpela mi tokaut strong. Yupela i no ken wokabaut moa long pasin bilong ol [lain man]. Ol i save tingting long samting nating tasol. Save bilong ol em i tudak. Ol i no gat save tru, na bel bilong ol i pas, olsem na ol i stap ausait long laip bilong God.”−Efesas 4:​17, 18.

Dispela tok i makim stret pasin i stap long nau tu, a? Na i makim ol musik na singsing bilong nau tu. Planti musik na singsing bilong nau i “stap ausait long laip bilong God”−ol i no wankain liklik long pasin bilong God. Ol tok bilong planti singsing i makim olsem ‘bel bilong ol man i pas’−ol i no gat pasin sori o pasin marimari.

Olsem na Pol i stori moa na em i tok: “Ol i no gat sem moa. Ol i go insait tru long pasin nogut, na bel bilong ol i kirap tru long mekim kain kain pasin doti.”−Efesas 4:⁠19.

Planti musik na tok bilong ol singsing bilong nau i kamapim klia dispela pasin bilong ol manmeri bilong nau, em “bel bilong ol i kirap tru long mekim kain kain pasin doti.” Ol dispela musik na singsing i bilong amamasim ol manmeri bilong nau em ol i insait tru long pasin pamuk, na pasin bilong pait na bagarapim man, na pasin bilong kisim ol drak, na pasin bilong painim ol amamas bilong skin. Tasol ol Kristen i mas ting olsem wanem long ol dispela pasin nogut? Pol i tok: “Yupela i no bin skul olsem long pasin bilong Krais. Mi ting yupela i harim pinis tok bilong Krais, na ol i skulim yupela pinis long tok tru i stap long Jisas.”−Efesas 4:​20, 21.

“Tingting Bilong Yupela i Mas Kamap Nupela”

Olsem wanem yumi ken bihainim dispela tok long ol musik na singsing yumi save harim? Olsem: Sapos yumi kisim “tingting bilong Krais” bai yumi sakim olgeta kain musik na singsing em i “samting bilong dispela graun tasol. Em i save kamap long olpela bel, na Seten em i papa bilong en.” Bai yumi no laik harim ol kain musik na singsing olsem.−1 Korin 2:16; Jems 3:⁠15.

Tasol ating yu laik save: ‘Olsem wanem mi ken senisim laik bilong mi long ol kain musik na singsing mi laik tumas long harim?’ Tok bilong Pol inap helpim yumi long save long bekim bilong dispela askim. Pol i tok: Bipo yupela i wokabaut long pasin bilong olpela man. Em i gat pasin bilong giaman na mangal nabaut, na dispela pasin em i laik bagarapim em. Olsem na yupela i mas rausim dispela olpela man. Tingting bilong yupela i mas kamap nupela.”−Efesas 4:​22, 23.

Em nau, Pol i tok: “Tingting bilong yupela i mas kamap nupela.” Yumi mas senisim tingting bilong yumi. Yumi mas senisim tingting bilong yumi long ol kain musik na singsing yumi save laikim. Na i no dispela tasol. Nogat. Yumi mas senisim tingting bilong yumi long planti narapela samting tu, na yumi mas lain long bihainim ol stretpela pasin na lo. Yumi mas kisim tingting bilong God na Krais. Olsem Pol i tok: “Sapos yupela i kaikai na dring o yupela i mekim narapela samting, yupela mas mekim dispela olgeta samting bilong litimapim nem bilong God.”−1 Korin 10:⁠31.

Planti musik na singsing bilong nau i no litimapim nem bilong God. Dispela kain musik na singsing i sakim olgeta stretpela lo ol Kristen i mas bihainim. Planti Kristen i bin dai long ol kalabus na banis kalabus nogut, long wanem ol i laik lusim ol dispela lo. Olsem na sapos yumi bin laikim sampela kain musik o singsing na nau yumi mas lusim bambai yumi ‘no ken laikim pasin long graun o ol samting bilong graun,’ orait yu ting dispela em i hatwok tumas? Nogat, a?−1 Jon 2:​15-17.

Wanem Kain Musik Em Gutpela Musik?

Sapos yumi bihainim ol lo bilong Baibel na yumi sakim ol kain musik na singsing nogut, orait yumi ken harim wanem kain musik na singsing? Yumi ken wok long harim sampela kain musik na singsing bipo yumi no save harim. Na ating bai yumi amamas moa long en, na bai yumi pilim em i gutpela bilong helpim yumi long bihainim stretpela pasin. Na ating bai yumi kirap laikim moa yet dispela kain musik na singsing, winim ol musik na singsing bipo yumi bin laikim. Wanpela man bilong wokim musik ol i kolim “rok” em i stori long em i bin senisim tingting na nau em i laikim gutpela musik na em i tok:

“Pastaim mi hatwok long lusim dispela kain musik ol i kolim ‘rok,’ tasol mi wok strong na bihain mi kirap laikim ol gutpela musik bilong nau na bilong bipo. Taim mi save ol dispela gutpela musik i olsem i gat as bilong en, na mi no laikim moa pasin nogut na tingting nogut planti musik na singsing bilong nau i kamapim, nau mi amamas long harim ol dispela kain musik bipo mi no save harim. Nau mi pilim olsem em i gutpela musik na mi save, bipo mi lus long harim dispela kain gutpela musik, long wanem mi bin laikim wanpela kain musik tasol.”

I gat kain kain musik bilong bipo, na musik bilong ol narapela narapela lain, na sampela musik bilong nau, em yumi inap amamas long harim na ol tok bilong singsing bilong en i no stori long ol pasin nogut, olsem pasin pamuk samting, na i no kamapim tingting nogut i narapela kain long ol lo bilong Baibel. Yumi mas harim ol kain musik na singsing i no inap givim tingting nogut long yumi, na yumi mas amamas long harim dispela tasol. Dispela kain musik na singsing ‘i stret, na i klin, na i naispela, na i gat gutpela nem, na em inap long yumi litimapim nem bilong en.’−Filipai 4:⁠8.

Tingting Bilong Kristen long Musik

Sampela ol i laik mekim singsing o lain long paitim gita samting na long dispela rot ol i amamas long gutpela musik. Sapos yu bung wantaim famili na sampela poroman na yu wanpela yu mekim singsing o paitim gita samting o yupela sampela i mekim wantaim, em gutpela rot bilong kisim bikpela amamas. Tasol yumi mas was gut na kisim stretpela tingting long dispela samting. Nogut Kristen i tingting tumas long mekim ol samting bilong painim amamas o em i lusim bikpela haptaim tumas long mekim. Sapos Kristen i givim bel tumas long musik, maski em i gutpela musik, dispela inap mekim nogut long em. Nogut Kristen i kamap man bilong ‘laikim tumas kain kain amamas bilong bodi, na em i no laikim God.’−2 Timoti 3:⁠4.

Taim yumi lotu long Jehova yumi save mekim singsing. Long Isrel bipo, Esap wantaim ol brata bilong em ol i bin mekim singsing na ol i tok: “Yupela ol manmeri, yupela mas tenkyu long Jehova; singaut long nem bilong em, na tokim olgeta lain manmeri long ol bikpela wok em i bin mekim! Mekim singsing long em na litimapim nem bilong em; tokaut long ol gutpela gutpela samting em i bin mekim.” Tru tumas, musik na singsing inap litimapim nem bilong God na amamasim em.−1 Kronikel 16:​8, 9, NW.

Ol singsing bilong Kingdom ol Witnes Bilong Jehova i save mekim long ol Haus Kingdom bilong ol, as bilong en em ol tok bilong Baibel, na ol sam, na beten, na tok bilong bilip. Yumi ken amamas long harim ol kain musik na singsing bilong lotu, a? Na taim yumi mekim ol dispela singsing, yumi mas givim bel long mekim na bai yumi kamapim bel bilong yumi olsem yumi amamas long en. Long ol miting Kristen yumi save harim ol dispela gutpela musik na singsing, tasol yumi ken harim long ol narapela taim tu na amamas long en, a?

Ol i bin putim musik bilong Ol Singsing Bilong Kingdom long ol kaset, na ol manmeri bilong paitim piano samting na wokim dispela musik, olgeta i Witnes Bilong Jehova. Sampela ol i man bilong wokim musik olsem wok mani bilong ol na ol i wok wantaim sampela ben i gat bikpela nem long wokim musik. Sampela ol i yangpela manmeri, olsem dispela yangpela man bipo em i save wokim dispela kain musik ol i kolim ‘rok’ na ol i save laikim kain kain gutpela musik. Ol i sakim ol kain musik na singsing i kamapim tingting bilong dispela graun na bilong Seten, tasol ol i no pilim olsem ol i lus long gutpela musik. Nogat. Ol i makim gutpela pasin yumi ken bihainim. Yumi tu yumi ken bihainim ol lo bilong Baibel na skelim gut ol musik na singsing yumi laik harim. Olsem bai yumi kisim gutpela amamas long ol musik na singsing yumi harim, maski em i musik bilong lotu o ol narapela musik.−Efesas 5:​18-20.

[Blok long pes 26]

‘Dispela kain musik ol i kolim “rok” em bilong kirapim bel tasol, na dispela kain laik i kamap long bel em nogut tasol; em i kirapim bel bilong ol yangpela na ol i tingting tasol long mekim maritpasin na ol i no bin lain liklik long bosim dispela laik bilong bel.’−Allan Bloom i tok olsem long buk The Closing of the American Mind.