Gutpela Wok Bilong Skul Gileat i Go Long Olgeta Hap

SKUL long dispela taim nau inap helpim yumi long sampela samting tasol. As bilong planti save ol i kisim long ol skul, em tingting bilong ol man tasol​—⁠tok i tru i no as bilong en, olsem na em i no inap helpim yumi long save long as tru bilong i stap bilong yumi. Tasol Skul Gileat i narapela kain. Taim namba 93 klas i winim skul, ol i mekim bung, na wanpela brata bilong Lain Bilong Bosim Ol Witnes, em Tiodor Jaras (Theodore Jaracz), em i tok, dispela skul i gat as bilong en. Olsem Song 119:160 i tok, “As bilong lo bilong [God] em i tok tru tasol.” Klostu olsem 6,000 ol i kam long dispela bung long Septemba 13, 1992, na ol i laik harim ol tok bai kamap.

Wanpela brata bilong Wastaua Fam, em Lon Siling (Schilling) i mekim namba wan tok long program, nem bilong en, “Wok Long Winim Strong Bilong Dispela Graun na Bos Bilong En.” Brata Siling i stori long tok bilong Kamapim Tok Hait 12:​11, na em i tok, dispela ves i makim 3-pela rot bilong winim pasin bilong dispela graun na bos bilong en, olsem: (1) long blut bilong Pikinini Sipsip, (2) long rot bilong autim tok, (3) redi long lusim sampela samting bilong yumi yet. Em i tokim ol sumatin, planti wokman bilong Jehova i bin mekim ol dispela samting, na ol i redi long i dai tu bilong i stap gut long Jehova na holimpas bilip.

Jon E. Bar (John E. Barr) bilong Lain Bilong Bosim Ol Witnes em i mekim wanpela tok, “Lukautim Gut Dispela Bilip Yu Holim.” Em i stori long tupela marit, em narapela i bilip long narapela, na em i tok, dispela pasin i save stap namel long Jehova na ol wokman bilong em, olsem narapela i bilip long narapela. Em i kamapim sampela tok bilong 2 Timoti 1:​12, 13, na em i tokim ol sumatin, ol i mas “tingim gut ol dispela gutpela tok” bilong Baibel, bambai ol i ken lukautim gut dispela bilip ol i holim. Em i tok, ol i mas makim hap taim long olgeta de na bai ol i ken stadi, na taim ol i bekim tok long miting ol i mas givim bel long mekim na bai tok bilong ol i gat strong na ol man i ken pilim.

Wiliam Van De Wal (William Van De Wall) bilong Komiti Bilong Dipatmen Bilong Lukautim Wok em i mekim wanpela tok, “Mekim Pasin Sori Long Ol Manmeri i Olsem Sipsip.” Em i askim ol sumatin, ol i laik bai dokta bilong ol i gat wanem kain pasin. Nau em i tok, ol i mas wok long kisim wankain pasin ol i laik bai dokta i mekim long ol, olsem pasin sori, na marimari, na pilim hevi bilong man.

Daniel Sidlik (Sydlik) bilong Lain Bilong Bosim Ol Witnes em i mekim wanpela tok, “God Inap Long Mekim Olgeta Samting.” Em i tokim ol sumatin, taim God i tokim Abraham na Sara olsem Sara bai karim pikinini man, maski tupela i lapun pinis, ol i lap, long wanem, ol i ting dispela samting i no inap kamap. Long tingting bilong ol man, ol i ting planti tok promis bilong God i no inap kamap tru. Tasol olsem ensel i tokim Abraham, “I no gat wanpela samting [Jehova] i no inap long mekim.” (Stat 18:14) Brata Sidlik i tokim ol sumatin long ol i mas bilip tru olsem God inap long mekim olgeta samting, na ol i no ken larim dispela bilip i dai long bel bilong ol, na ol i no ken surik, maski wanem ol hevi i painim ol.

Ol Tisa i Givim Tok Long Ol

Wanpela tisa bilong Skul Gileat, em Jak Retfot (Jack D. Redford), em i mekim wanpela tok, “Wok Long Kisim Gutpela Nem Long Ai Bilong God.” Samting i givim gutpela nem long yumi, em pasin bilong yumi. Brata i skelim ol nem olsem Adam, Nimrot, Jesebel, Sol, Judas, wantaim ol nem olsem Noa, Abraham, Rut, Pol, Timoti. Taim yumi harim wanpela nem olsem, yumi save tingim man i bin holim dispela nem, na pasin bilong em na ol samting em i bin mekim. Brata i askim ol sumatin, ol bai kisim wanem kain nem inap 10-pela yia o 100 yia o 1,000 yia bihain? Ol bai kisim nem olsem man bilong surik o toktok planti oltaim, o ol bai kisim nem olsem man bilong i stap gut long wok misineri? Em i tokim ol, ol i no ken tingting tasol long ol hevi bilong ol​—⁠ol i mas tingting long ol samting ol i ken mekim bilong stretim hevi.

Narapela tisa, em Yulises Glas (Ulysses V. Glass) i mekim wanpela tok, “Yu Lukautim Gut Bilip Bilong Yu?” Em i tok, strongpela bilip i kain olsem kompas​—⁠oltaim nil bilong en i makim stretpela rot bilong bihainim. I gat kompas insait long sampela ka, na wanpela strong i stap long graun (magnetic field), dispela i mekim na kompas i wok gut. Na i gat ol narapela strong tu long ka, na ol inap paulim wok bilong kompas sapos man i no mekim wanpela samting bilong pasim. Na i olsem tu long ol pasin bilong dispela graun​—⁠sapos yumi no was gut, ol inap pulim yumi nabaut na paulim yumi na yumi surik, o ol inap mekim na bilip bilong yumi i no strong moa. Brata Glas i tokim ol sumatin long was gut long ol dispela pasin bilong graun. Em i tok, em i amamas long pasin bilong ol, ol i save tingim gut ol narapela man.

Laspela tok long program bilong moningtaim, em “Holimpas Strongpela Tingting Long Mekim Wok Misineri” em Albet Sroda (Albert D. Schroeder) i mekim, em bilong Lain Bilong Bosim Ol Witnes. Em i tokim ol sumatin, em i amamas long ol i gat wankain strongpela tingting long mekim wok misineri olsem namba wan klas long yia 1943, taim em i stap kuskus bilong dispela skul. Em i tok, em i lukim ol i save toktok gut wantaim ol man, na ol i man bilong autim tok, na ol i laik bai spirit bilong God i stiaim ol. Na em i tok, ol i mas wok yet long kamapim strong dispela pasin na tingting bilong ol, na oltaim ol i mas mekim wok long Baibel New World Translation taim ol yet i stadi. Bilong pinisim tok, em i stori long olgeta wan wan ves bilong Song 24 bilong strongim dispela tok.

Orait, nau em taim bilong ol sumatin i mas kisim pepa bilong makim olsem ol i winim skul. Taim ol i givim pepa long ol wan wan sumatin, ol i kolim ples sumatin bai go long en bilong mekim wok misineri, na ol man i sindaun ol i amamas na paitim han.

Long belo bek Kalvin Saik (Calvin Chyke) bilong Komiti Bilong Haus Faktori em i lukautim Stadi Wastaua. Bihain ol sumatin i mekim ol soim na stori long ol samting i painim ol taim ol i bin autim tok long dispela 5-pela mun ol i bin skul. Na ol i wokim ol piksa slait bilong ol kantri ol bai go long en. Na tupela marit i lapun liklik, em ol i wok misineri inap planti yia, ol i stori long ol samting i bin painim ol long taim ol i mekim wok misineri, na ol i kamapim sampela gutpela tingting ol i bin kisim insait long dispela taim. Bilong pinisim bung i gat wanpela pilai, nem bilong en, No Ken Larim Ol i Giamanim Yu na No Ken Tok Bilas Long God.

Ol man i harim dispela program ol i pilim tru ol gutpela samting i kamap taim man i skul long tok i tru bilong God; na wok dispela kain skul i mekim bai helpim yet planti man long olgeta hap. Taim ol dispela 48 misineri i go long ples wok bilong ol, ol brata sista bai beten long God i ken strongim ol bambai ol i ken helpim gut lain bilong God long ol kantri ol bai go long en.

[Blok long pes 19]

Ol Samting Bilong Ol Sumatin

Hamas kantri ol i kam long en: 7

Hamas kantri ol bai go long en: 18

Hamas sumatin: 48

Hamas marit: 48

Krismas bilong ol, averes: 32.8

Hamas yia long tok i tru, averes: 15.3

Hamas yia ol i wok painia, averes: 10.4

[Blok long pes 20]

KLAS BILONG NARAPELA HAP BILONG SKUL GILEAT

Long Jun 21, 1992, i gat 24 nupela misineri i winim skul bilong namba 4 klas bilong narapela hap bilong Skul Gileat i kamap long Seltes/Taunus, long Jemani. Long dispela klas i gat 22 marit na tupela sista singel, ol i kam long 7-pela kantri, na krismas bilong ol i 32 (averes), na ol i bin baptais inap 14 yia (averes), na ol i wok painia inap 8.5 yia (averes). Inap olsem 2,000 manmeri ol i kam long dispela bung bilong winim skul.

Brata Jaras i kirapim program na em i mekim wanpela tok long Sindaun 11:​24, i tok: “Sampela man i save amamas long givim . . . samting bilong ol long helpim ol arapela man, tasol ol yet i save kisim . . . moa yet long wok bilong ol.” Em i tok, nau ol sumatin bai go nabaut na helpim ol man, na planti gutpela samting bai kamap long wok bilong ol.

Sampela moa i mekim ol tok, olsem kodineta bilong Komiti Bilong Brens long Jemani (Richard Kelsey), na wanpela bilong Dipatmen Bilong Lukautim Wok (Wolfgang Gruppe), na tupela bilong Komiti Bilong Brens (Werner Rudtke na Edmund Anstadt), na tupela tisa (Dietrich Förster na Lothar Kaemmer). Albet Sroda, em bilong Lain Bilong Bosim Ol Witnes, em i mekim wanpela gutpela tok, “Wok Yet Long Painim Ol Gutpela Gutpela Samting Bilong Spirit.” Bihain long en ol i givim pepa long ol sumatin, i makim kantri ol bai go long en, em 11-pela kantri long Afrika na Sentral Amerika na Isten Yurop. Bihain wanpela sumatin i kaunim pas bilong ol sumatin i tok tenkyu long Lain Bilong Bosim Ol Witnes.

[Piksa long pes 18]

Namba 93 Klas Bilong Wastaua Baibel Skul Bilong Gileat

Nem bilong ol brata sista i stap daunbilo. Namba 1 lain i sanap paslain, na namba 4 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.

(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.