Mi Kisim Bikpela Amamas Long Mekim Wok Bilong Jehova
EM STORI BILONG GEORGE BRUMLEY
Mi bin skulim lain bilong Empera Haile Selase long redio, na wanpela yangpela plisman i tok em i save mi wanpela misineri bilong ol Witnes Bilong Jehova. Em i askim mi: “Yu inap lainim mi long tok bilong Baibel?”
GAVMAN i bin tambuim wok bilong ol Witnes long Itiopia, na sapos ol i save mi wanpela Witnes ol bai rausim mi. Mi tingting long yangpela plisman hia, em i laik save tru long Baibel, o em i laik trikim mi na kalabusim mi? Mi gat 3-pela pikinini mi mas mekim bikpela long ol, na mi pret, nogut ol i rausim mi long Itiopia na mi mas lusim ol pren na kantri mi save laikim tumas.
Mi wanpela Amerika, na ating yu laik save, bilong wanem mi wantaim meri pikinini i kam hia long dispela kantri long Not Afrika. Orait, mi ken stori long dispela.
Mi Go Bikpela Long Amerika
Long 1920 i go inap 1930 mi stap long skul, na papa i kisim sabskripsen long Wastaua na em i kisim sampela buk bilong Baibel (Studies in the Scriptures). Papa i amamas long kaunim ol dispela samting. Papa em man bilong tok pani tu. Em i gat wanpela bikpela buk em skin bilong en i olsem bilong Baibel, na long Sande papa i save singautim ol man i kam sindaun wantaim mipela, na em i kamautim dispela buk na i tok: “Nau Sande, na plis yu ken kaunim sampela tok na yumi harim.”
Man hia em i amamas long mekim dispela samting, olsem na em i kisim dispela buk, na em i opim, tasol ol pes i no gat rait i stap long en! Em pepa nating tasol! Em liklik trik bilong papa! Na nau papa i tok, ‘Ol pasto i no gat save long Baibel.’ Na nau em i kisim Baibel tru na em i kaunim tok bilong Stat 2:7 i stori long God i wokim man long graun na putim win bilong laip long em “na man i kisim laip.”
Nau papa i tokim em, “yumi ol man i no gat tewel, na dai em pe bilong sin, na taim man i dai pinis em i dai tru na i no gat tingting moa na em i no save moa long wanpela samting.” (Saveman 9:5, 10; Esekiel 18:4; Rom 6:23) Long dispela taim mi no save gut long kaunim buk, tasol mi bin amamas long lainim sampela tok i tru na tokim ol narapela man long en.
Mipela famili i save kisim ol Wastaua, na mipela i amamas long lainim ol samting bilong spirit na kisim strong. Bubu i stap wantaim mipela, na em i namba wan long famili bilong mipela long kirap autim gutpela tok bilong Kingdom long ol man. Mipela stap long taun Kabondel long Ilinoi, na i no gat kongrigesen long Kabondel, tasol sampela lapun meri i save bung na stadi long Wastaua, na mama i save kisim mipela 5-pela pikinini i go bung wantaim ol. Na mipela tu i kirap long autim tok long ol man.
Lusim Wok Redio na Go Kalabus
Long 1937 mi gat 17 krismas, na mi maritim wanpela meri, na mi wok mani long stretim ol redio. Meri i karim pikinini meri, em Pegi, na pikinini man, em Henk. Tasol marit bilong mipela i bagarap. Em asua bilong mi. Mi no bin bihainim pasin Kristen. Mi no bin mekim bikpela long tupela pikinini bilong mi, na mi bel hevi long dispela i kam inap long nau.
Namba 2 Pait i kamap, na ol ami i laik bai mi lainim ol man long ol samting bilong redio, tasol mi save Jehova i no orait long pait, olsem na mi kirap long beten long olgeta de. Sabskripsen bilong mi bilong Wastaua i pinis, na wanpela Witnes, em Lusil Hewet, em i save na em i kam lukim mi na bai mi ken kisim gen Wastaua. Peri Hewet em papa bilong Lusil, na planti long bikpela famili bilong ol i bin kamap Witnes bihain liklik long 1930 samting. Mi gat laik long Lusil, na mi maritim em long Disemba 1943.
Mi kisim baptais long 1944, na mitupela Lusil i kirap mekim wok painia. Bihain liklik gavman i singautim mi long go insait long ami, tasol mi no laik, olsem na ol i kalabusim mi inap 3-pela yia long haus kalabus long El Reno long Oklahoma. Mi amamas long karim pen long wok bilong Jehova. Taim mi kirap long olgeta moningtaim na mi lukim olsem mi stap kalabus, mi amamas na mi tenkyu long Jehova, long wanem, mi save bilong wanem mi stap kalabus. Taim pait i pinis ol man i winim 25 krismas ol i ken lusim ami, na ol i lusim mi long kalabus long Februeri 1946.
Wok Painia
Mitupela Lusil i wok painia long taun Wagona long Oklahoma. Mipela raun long lek, no gat ka, na mipela go long olgeta haus long dispela taun na autim tok. Bihain mipela i go long Wewoka, na mi kisim wok long redio-stesin long mekim ol toktok. Mi mas wok inap 6-pela aua long de, na mekim wok painia tu, na i hatwok, tasol mi amamas long mekim wok bilong Jehova. Mipela baim wanpela olpela ka na go long kibung long Los Enjeles long 1947, na nau mipela i tingting long i go skul long Wastaua Baibel Skul Bilong Gileat na lain long mekim wok misineri.
Mipela save em i bikpela samting, na mipela i no laik pasim tok hariap tumas, long wanem, mipela i tingting planti long lusim Amerika. Na mi tingim yet ol pikinini bilong mi na mi laik kisim bek ol, tasol gavman i tingim pasin nogut bilong mi bilong bipo, na long mi bin kalabus, na ol i no larim mi i kisim ol pikinini. Olsem na mitupela i go long namba 12 klas bilong Gileat.
Mipela i pinis long Gileat long 1949, na ol i salim mipela i go helpim sampela kongrigesen long Tenesi. Mi stap wasman bilong raun inap 3-pela yia long Amerika, na presiden bilong Sosaiti Was Taua i salim pas na i tok long mipela i go long Itiopia na autim tok bilong Baibel na mekim wok tisa wantaim. Gavman bilong Itiopia i tok, ol misineri i mas mekim wok tisa tu. Olsem na long 1952 mipela i go long Itiopia.
Long Itiopia mipela i skulim ol pikinini long moningtaim, na long belo bek mipela i skulim ol manmeri long ol tok bilong Baibel. Planti tumas ol i kam long ol Baibel-stadi, na mipela mas wokim i go inap 3-pela o 4-pela aua. Sampela plisman tu i save kam, na sampela tisa na pasto bilong lotu tu. Sampela taim i gat 20 ol i sindaun harim Baibel-stadi! Planti ol i lusim lotu giaman bilong ol na ol i kirap long mekim wok bilong Jehova. Mipela i amamas, na long olgeta moningtaim, taim mipela i kirap pinis mipela beten na tok tenkyu gen long Jehova.
Hevi Bilong Tambu na Lukautim Ol Pikinini
Long 1954 meri bilong mi i kisim bel, na nau mipela i tingting: Bai mipela i stap long Itiopia, o bai mipela i go bek long Amerika? Sapos mipela i stap long Itiopia mi mas kisim wok bilong skin, olsem na mi kisim wok long redio-stesin bilong Empera Haile Selasi na mipela i stap long Itiopia.
Meri i karim pikinini meri long Septemba 8, 1954, na mipela putim nem Judit long em. Tupela yia bihain ol i pinisim mi long wok, maski mi bin wok long bikman empera. Tasol dipatmen bilong ol polis i givim wok long mi long skulim ol man long redio, na mi wok olsem inap 3-pela yia, na long dispela taim meri i karim tupela pikinini man, em Filip na Lesli.
Tasol Lotu Otodoks i wok long grisim gavman long rausim ol misineri bilong ol Witnes Bilong Jehova, olsem na mi bihainim tok bilong Sosaiti na long paspot mi no tok moa olsem mi wok misineri; nau mi tok mi mekim wok bilong skin. Gavman i tambuim wok bilong ol Witnes, na mipela ol Witnes i mas wok hait long autim tok na long mekim miting na stadi.
Ol polis i go long haus bilong ol Witnes bilong painim ol buk samting, tasol wanpela plisman em i Witnes, na oltaim em i toksave long mi long taim ol polis i raun, na mi haitim ol buk na ol i no kisim. Long Sande mipela ol Witnes i save go long sampela ples kaikai longwe liklik long taun na i gat ol tebol i stap, na mipela wokim stadi Wastaua.
Wanpela taim mi skulim ol man long wok bilong redio, na long dispela taim dispela yangpela man i bin kam askim mi long lainim em long Baibel. Mi ting em i no giaman, olsem na mi kirap long stadi wantaim em, olsem yumi stori pinis long en. Bihain em i kisim narapela i kam wantaim em, na bihain moa i gat narapela tu. Mi tokim ol long ol i no ken tokaut long dispela samting, na ol i no mekim.
Long 1958 Laik Bilong God Kibung Intenesenel i kamap long Yanki Stediam long Nu Yok na long Polo Graun. Long dispela taim Pegi na Henk i strongpela Witnes, na planti moa tu bilong bikpela famili bilong mi. Mi amamas tru long i stap long dispela kibung, na mi amamas long bungim tupela bikpela pikinini bilong mi. Na long laspela de bilong kibung mi amamas tu long lukim bikpela lain tru i bung, winim 250,000!
Na long yia bihain presiden bilong Sosaiti, em Netan H. No (Nathan H. Knorr), em i kam bilong lukim mipela long Itiopia. Em i givim gutpela tok long mipela long pasin bilong mekim wok bilong Jehova long hap i gat tambu i stap, olsem long Itiopia. Na em i laik save tu long famili bilong mipela, ol i stap strong long spirit o olsem wanem. Mi tokim em, nau mi lainim ol long pasin bilong beten. Mi askim em: “Yu laik harim Judit i beten?” Em i tok: “Mi laik harim.” Orait, Judit i beten, na Brata No i tokim em: “Judit, yu beten gut.” Na taim mipela i laik kaikai mi tokim Brata No long beten, na taim em i mekim pinis Judit i tok: “Brata No, yu beten gut!”
Mekim Bikpela Long Ol Long Amerika
Long 1959 mi pinis long mekim dispela wok bilong skin. Mipela i laik i stap yet, tasol gavman i tok nogat. Mi laik go long sampela narapela kantri i sot long ol brata i helpim ol, tasol i no inap. Olsem na mipela i go bek long Amerika. Mipela amamas long bung wantaim ol narapela long bikpela famili bilong mipela, na mi bungim tupela bikpela pikinini bilong mi. Ol narapela pikinini bilong mi i amamas tru long bungim tupela, na wantu narapela i laikim tru narapela. Mipela olgeta i pas gut wantaim.
Mipela sindaun long taun Wisita long Kansas, na mi kisim wok long redio-stesin na long mekim toksave long redio. Lusil i mekim ol wok bilong haus na long lukautim ol pikinini; ol i go long skul i stap klostu. Mi wokim stadi Wastaua wantaim famili long olgeta Mande long nait, na mi traim mekim long pasin ol i ken amamas long en. Long olgeta de mi save toktok gut wantaim ol pikinini na bai mi ken save long ol hevi i painim ol long skul.
Ol pikinini i mekim tok long Skul Bilong Wok Autim Tok, na dispela i lainim ol long mekim gutpela wok long taim ol i go long skul. Taim ol i liklik yet mipela i lainim ol long pasin bilong autim tok, na long tilim ol buk bilong Baibel long ol man, na ol i save kam wantaim mipela long ol Baibel-stadi.
Na mipela lainim ol long bihainim ol gutpela pasin. Ol i mas save, sampela taim ol i no ken kisim samting olsem narapela i kisim. Mipela tokim ol: “Sapos wanpela i kisim presen, na yu nogat, yu ting i stret sapos yu krai o toktok planti?” Mipela givim samting long olgeta wan wan, na mipela i no mekim gut long wanpela tasol na ol narapela nogat. Mipela save laikim tumas olgeta wantaim na mekim wankain pasin sori long olgeta wantaim.
Ol i no inap bihainim sampela pasin ol narapela pikinini i save bihainim, olsem na sampela taim ol i tok: “Bilong wanem mipela i no inap mekim olsem ol dispela narapela i save mekim?” Mi traim tokim ol, bilong wanem i no stret long ol i mekim dispela samting, tasol sampela taim ol i no amamas long harim tok, olsem na mi mas tok strong long ol olsem: “Ol dispela narapela pikinini i bilong narapela famili, tasol famili bilong yumi i stap narapela kain na yumi gat ol narapela lo yumi mas bihainim.”
Mekim Wok Long Peru
Tasol mitupela Lusil i tingting yet long wok misineri, na long 1972 rot i op na bai mipela i ken go long Peru long Saut Amerika. Em gutpela hap long mekim bikpela long ol pikinini. Ol inap bung wantaim ol misineri na painia salim na ol narapela brata sista i bin kam long Peru bilong mekim wok bilong Jehova, na ol pikinini i lukim ol dispela brata sista i amamas na givim bel long wok bilong Kingdom, na Filip i tok em i laik bihainim pasin bilong ol.
Bihain sampela pren bilong mipela bilong bipo long Kansas ol i harim tok long gutpela wok mipela i mekim long Peru, olsem na ol tu i kam i stap wantaim mipela. Haus bilong mi i kamap olsem haus misineri. Mi givim wok long ol wan wan long mekim ol wok bilong haus, olsem na olgeta i gat taim bilong i go na mekim wok autim tok. Long olgeta moningtaim mipela i save stori long hap tok bilong Baibel olsem teks bilong de. Mipela olgeta i stap amamas tasol, na taim mi kirap long moningtaim mi tingting long dispela hap mi stap long en na wok mi mekim long dispela hap, na nau mi beten na tok tenkyu long Jehova.
Bihain Judit i marit, na em wantaim man bilong em tupela i go bek long Amerika. Filip i wok painia salim inap 3-pela yia, na nau em i go wok long Betel long Bruklin long Nu Yok. Lesli tu i go bek long Amerika. Ol i sori long lusim mipela, tasol ol i tok, pasin bilong mekim bikpela long ol long Peru i bin helpim gut ol.
Ol samting bilong wok mani i go nogut, na mipela save mipela tu i mas lusim Peru. Mipela go bek long Wikita long 1978, na mipela lukim lain Witnes i stap na ol i save mekim tok Spen. Ol i laik bai mipela i stap na helpim ol, na mipela i amamas long mekim olsem. Kongrigesen i kamap, na mipela i laikim tru ol dispela brata sista.
Ekwado i Pulim Mipela
Sik olsem strok i bin bagarapim mi liklik, tasol mitupela Lusil i gat tingting yet long i go long narapela hap na mekim wok bilong Jehova. Long 1984 wanpela wasman bilong raun i tok, long Ekwado ol i sot long ol elda, na maski mi gat sik na mi gat 65 krismas na mi no inap mekim bikpela wok tumas long autim tok, mi inap helpim ol brata long Ekwado.
Wasman i tok olsem, na nau mitupela i gat bikpela tingting long i go long Ekwado. Orait, mi baim pinis liklik bisnis bilong mi i go long ol narapela man, na mi mekim olsem tu long haus bilong mipela, na maski mitupela i no yangpela moa, mipela i kisim bikpela amamas long i go long narapela kantri na mekim wok bilong Jehova, olsem wok misineri.
Mipela i go sindaun long taun Kwito, na mipela i kisim bikpela amamas long autim tok long dispela hap. Long olgeta de i gat gutpela samting i bin kamap. Tasol long 1987 sik kensa i kisim mi, na ol i tok, dokta i mas katim mi kwik. Olsem na mipela go bek long Wikita, na ol i stretim dispela sik, na nau mipela i go bek gen long Kwito. Tasol tupela yia bihain mi kisim gen sik, olsem na mipela i go bek long Amerika na mipela i sindaun long Not Karolaina, na mipela i stap yet olsem inap nau.
Amamas Long Ol Gutpela Samting
Bai mi stap liklik taim, o nogat, mi no save. Ol dokta i katim mi gen long 1989. Tasol mi mekim yet wok elda, na mi stadi wantaim sampela man i save kam long haus bilong mi. Inap planti yia mitupela i bin autim tok long ol man na stadi wantaim ol na helpim planti handet man long painim tok i tru. Mitupela i tingim dispela samting na dispela tingting i givim bikpela amamas long mipela na i stap long bel bilong mipela na i no inap tekewe long mipela. Mitupela i stap amamas tasol.
Na mi amamas tu long ol pikinini. Ol i insait long wok bilong Jehova. Inap 30 yia Pegi na man bilong em, em Pol Moski, ol i mekim wok bilong raun long Amerika. Filip na Judit i bin mekim wok long Betel long Bruklin long Nu Yok. Henk na Lesli wantaim ol poroman marit bilong ol i insait long wok bilong Jehova, na 4-pela brata susa bilong mi wantaim famili bilong ol, na 80 wanblut moa, olgeta i mekim wok bilong Jehova. Lusil i bin stap gutpela meri bilong mi inap 50 yia pinis, na nau inap sampela yia sik i bagarapim skin bilong mi, tasol Lusil i bin lukautim gut mi.
Tru tumas, mi bin painim planti amamas long mekim wok bilong Jehova, na mi laik mekim olsem long dispela graun inap oltaim oltaim. Mi save tingim tok bilong Song 59:16 i tok: “Long moningtaim long olgeta de bai mi singsing bikpela . . . long wanem, . . . yu bin lukautim mi gut na yu stap olsem banis bilong mi.”
[Piksa long pes 23]
Em Jos Bramli wantaim Empera Haile Selase
[Piksa long pes 25]
Em Jos Bramli na meri bilong em, Lusil