‘Marimari Bilong Yu i Winim Laip Bilong Mi’
Em stori bilong Calvin H. Holmes
Em Disemba 1930. Mi pinis long kisim susu long ol bulmakau na nau papa i kam bek long haus—em i bin go lukim wanpela man i sindaun klostu long mipela. Em i kamautim wanpela blupela buk long poket bilong em, na em i tok: “Em hia wanpela buk Wyman i bin givim long mi.” Nem bilong dispela buk em Deliverance, em Sosaiti Was Taua i bin wokim. Papa i no man bilong kaunim buk, tasol em i kaunim dispela buk i go inap biknait tru.
BIHAIN, Papa i kisim sampela buk moa em dispela Sosaiti i bin wokim—nem bilong sampela em Light na Reconciliation. Em i painim Baibel bilong Mama na long lait bilong lam kerasin em i kaunim ol buk i go inap biknait. Bikpela senis i kamap long Papa. Orait nau taim bilong kol i kamap, na taim mipela i sindaun arere long paiawut-stov, Papa i save toktok wantaim mipela—mi na mama na 3-pela susa bilong mi—inap planti planti aua.
Papa i tok, lain i wokim ol dispela buk em ol Sumatin Bilong Baibel na ol i bilip olsem yumi stap long “taim bilong las de.” (2 Timoti 3:1-5) Em i stori olsem, taim pasin bilong dispela graun i pinis, graun i no inap bagarap, tasol long rot bilong Kingdom bilong God, graun bai kamap wanpela paradais. (2 Pita 3:5-7, 13; KTH 21:3, 4) Dispela tok i kirapim tru tingting bilong mi.
Taim mitupela Papa i wok wantaim, em i toktok wantaim mi. Mi tingim bek wanpela de mitupela i wok long rausim skin long kon na Papa i tokim mi olsem nem bilong God em Jehova. (Song 83:18, NW) Olsem na long 1931, taim mi gat 14 krismas tasol, mi pasim tok long bel olsem mi laik mekim wok bilong Jehova na Kingdom bilong em. Long gaden apel i stap baksait long haus, mi beten long Jehova na tok promis olsem mi bai mekim wok bilong em i go inap oltaim oltaim. Longtaim bel bilong mi i kirap pinis long pilim pasin sori na marimari bilong gutpela God bilong yumi.—Song 63:3.
Mipela i sindaun long wanpela fam i stap 30 kilomita longwe long Sen Josep, Misuri, Yunaitet Stets, na 65 kilomita longwe long biktaun Kansas. Mama bilong Papa i bin karim em long wanpela liklik haus diwai em bubu man bilong Papa i bin sanapim long dispela fam long yia 1900 samting.
Mi Lain Long Mekim Wok Autim Tok
Long 1931 mipela famili i harim long redio wanpela pablik-tok, nem bilong en, “Kingdom, Em Rot Bilong Pinisim Ol Hevi Bilong Ol Man,” em Joseph Rutherford, presiden bilong Sosaiti Was Taua long dispela taim, i mekim long wanpela kibung long Kolambas, Ohaio. Bel bilong mi i pilim tru dispela tok mi harim, na mi amamas long helpim Papa long tilim wanpela buklet i kamapim dispela pablik-tok—mipela i tilim long ol man mipela i save long ol.
Long 1932 em namba wan taim mi go long wanpela miting bilong ol Witnes Bilong Jehova. Wanpela man i stap klostu long haus bilong mipela em i singautim mitupela Papa long go long Sen Josep na harim wanpela tok em George Draper bai mekim, em wanpela wasman bilong raun bilong ol Witnes Bilong Jehova. Mipela kamap namel tru long dispela tok, na mi sindaun baksait long J. D. Dreyer—bihain dispela man i mekim bikpela samting long i stap bilong mi.
Long Septemba 1933, mitupela Papa i go long wanpela kibung long biktaun Kansas na em namba wan taim mi go autim tok long ol man mi no save long ol. Papa i givim 3-pela buklet long mi na em i lainim mi long mekim tok olsem: “Mi wanpela Witnes Bilong Jehova i save autim gutpela tok bilong Kingdom bilong God. Ating long redio yu bin harim sampela tok Jas Rutherford i mekim. Winim 300 stesin i save kamapim ol tok bilong em long olgeta wik.” Orait nau mi soim wanpela buklet long ol. Mi go bek long fam, na long apinun, taim mi wok long kisim susu long ol bulmakau, mi ting dispela de em i wanpela bikpela de tru i bin kamap long i stap bilong mi.
Bihain, taim bilong kol i kamap na mipela i no inap raun tumas. Orait nau Brata Dreyer wantaim meri bilong em i kam lukim mipela na singautim mi i go long haus bilong ol long Sarere long apinun na slip long haus bilong ol. Mi wokabaut 10-pela kilomita i go long haus bilong famili Dreyer, na mi amamas mi bin hatwok olsem, long wanem, long de bihain mi inap go autim tok wantaim ol na go long Stadi Wastaua long Sen Josep. Kirap long dispela taim na i kam, mi bin insait long wok autim tok long klostu olgeta Sande. Ol samting Brata Dreyer i bin lainim mi long en em i bin helpim gut mi.
Long Septemba 2, 1935, long wanpela kibung i kamap long biktaun Kansas, mi kisim baptais long wara bilong makim olsem mi dediket pinis long Jehova.
Mi Kirap Mekim Wanpela Wok Bilong Holim Oltaim
Long kirap bilong yia 1936, mi raitim pepa bilong mekim wok painia, em wok bilong autim tok long olgeta de, na ol i putim nem bilong mi long wanpela lista bilong ol man i laik kisim wanpela poroman painia. Bihain liklik mi kisim wanpela pas long Edward Stead bilong Avada, Waioming. Em i tok em i stap long wilsia na i mas i gat man bilong helpim em na bai em inap mekim wok painia. Wantu mi tok mi orait long dispela na ol i makim mi long kamap painia long Epril 18, 1936.
Taim mi laik lusim famili bilong mi na go stap wantaim Brata Stead, Mama i toktok wantaim mi wanpela, na em i askim mi: “Pikinini, yu gat laik tru long mekim dispela samting?”
Mi bekim tok: “Sapos mi no mekim, i stap bilong mi bai i no gat as bilong en.” Mi save pinis olsem sori na marimari bilong Jehova em i bikpela samting, winim ol narapela samting.
Taim mi mekim wok painia wantaim Ted, em Brata Stead, mi kisim gutpela skul. Em i givim bel tru long mekim wok painia na pasin bilong em long autim tok bilong Kingdom em i gutpela. Tasol Ted i no inap mekim planti samting—em inap rait na toktok tasol; sik rumatoid atraitis i mekim na han lek bilong em i no wok gut. Mi save kirap long moningtaim tru na wasim na sevim em, na redim kaikai bilong moningtaim, na givim kaikai long em. Bihain mi putim klos long em na redim em bilong go autim tok. Long taim bilong san long dispela yia, mipela i mekim wok painia long Waioming na Montana, na kem long nait. Ted i slip insait long wanpela liklik haus ol i bin wokim antap long trak bilong em, na mi slip ausait long graun. Sampela mun bihain, mi go long hap bilong saut bilong mekim wok painia long Tenesi, Akansas, na Misisipi.
Long Septemba 1937, em namba wan taim mi go long wanpela bikpela kibung long Kolambas, Ohaio. Long dispela kibung ol i stretim wok bilong autim tok long rot bilong pikap. Mipela i kaunim olgeta wan wan taim mipela i mekim wok long pikap. Long wanpela mun, mipela mekim wok long pikap inap 500 taim na 800 manmeri i harim. Mi autim tok long planti taun long hap is bilong Tenesi, na Vejinia, na Wes Vejinia, na bihain ol i singautim mi long mekim wok painia salim i narapela kain; mi mekim wok wantaim wasman son, em nem ol i givim long ol brata i mekim wok olsem wasman bilong raun long dispela taim.
Mi raun long hap bilong Wes Vejinia na lukim ol kongrigesen na ol grup i stap longwe long kongrigesen—mi stap tupela i go inap 4-pela wik long ol kongrigesen wan wan—na mi go pas long mekim wok autim tok. Long Janueri 1941, ol i makim mi olsem wasman son. Long dispela taim, Mama na 3-pela sista bilong mi—Clara, Lois, na Ruth—ol i pasim tok long bel long mekim wok bilong Kingdom. Olsem na long taim bilong san long dispela yia, mipela famili olgeta i go wantaim long wanpela bikpela kibung i kamap long Sen Lui.
Kibung i pinis na bihain liklik ol wasman son i kisim tok olsem long Novemba 1941, wok son bai pinis. Long mun antap, Amerika i go insait long Namba 2 Pait. Ol i makim mi long mekim wok painia salim, olsem mekim wok bilong autim tok inap 175 aua long olgeta mun.
Sampela Bikpela Wok
Long Julai 1942, mi kisim wanpela pas i askim mi olsem mi redi long go long narapela kantri na mekim wok. Mi tok yes, na ol i singautim mi long go long Betel, em hetkota bilong ol Witnes Bilong Jehova, long Bruklin, Nu Yok. Ol i singautim 20 narapela brata singel tu long kam long dispela skul long dispela taim.
Nathan H. Knorr, presiden bilong Sosaiti Was Taua long dispela taim, em i tok planti brata sista i bin lusim wok autim tok na mipela bai skul long wok bilong strongim ol kongrigesen long ol samting bilong spirit. Em i tok: “Mipela no laik save tasol long ol hevi i stap long ol kongrigesen; mipela laik save tu long ol samting yupela i bin mekim bilong stretim ol dispela hevi.”
Taim mipela i stap long Betel, Fred Franz, em i kamap senis bilong Brata Knorr olsem presiden long 1977, em i mekim wanpela tok, na em i tok olsem: “Namba 2 Pait bai pinis, na wanpela bikpela wok bilong autim tok bai kamap. Yumi ken ting olsem planti milion manmeri bai kam insait long oganaisesen bilong Jehova!” Dispela tok i senisim tru tingting bilong mi. Taim ol i kolim ol hap mipela bai go mekim wok long en, mi kisim save olsem mi bai go lukim olgeta kongrigesen long distrik Tenesi na distrik Kentaki. Ol i save kolim mipela olsem wokman bilong ol brata, em bihain ol i kolim wasman sekit.
Long Oktoba 1, 1942, taim mi gat 25 krismas tasol, mi kirap long mekim wok bilong lukim ol kongrigesen. Long dispela taim bipo i gat wanpela rot tasol bilong kamap long sampela kongrigesen—wokabaut long lek o raun long hos. Sampela taim mi slip long rum wantaim famili i lukautim mi long ples slip.
Long Julai 1943, taim mi wok wantaim kongrigesen Grinvil long Tenesi, mi kisim wanpela pas i singautim mi long go long namba 2 klas bilong Wastaua Baibel Skul Bilong Gileat. Long Gileat mi skul long pasin bilong putim yau moa yet long ol “tok yumi harim pinis” na long pasin bilong “wok strong [oltaim] long mekim wok bilong Bikpela.” (Hibru 2:1; 1 Korin 15:58) Faipela mun bilong skul i pinis kwiktaim, na bung bilong winim skul i kamap long Janueri 31, 1944.
Kanada, na Bihain Beljam
Ol i salim sampela bilong mipela i go long Kanada, em nau tasol long dispela kantri gavman i bin pinisim tambu i bin stap long wok bilong ol Witnes Bilong Jehova. Ol i makim mi long mekim wok bilong raun, na mi mas raun inap longwe, long wanem, sampela kongrigesen i stap longwe longwe long ol narapela kongrigesen. Taim mi raun, mi amamas long harim stori bilong ol brata na sista na olsem wanem ol i bin mekim wok autim tok insait long dispela hap taim wok bilong ol i tambu long Kanada. (Aposel 5:29) Planti ol i stori long wanpela taim na insait long wanpela nait tasol ol i go long olgeta haus long Kanada na tilim wanpela buklet. Long Me 1945 mipela i amamas long kisim save olsem Namba 2 Pait long Yurop em i pinis!
Long taim bilong san, taim mi wok wantaim wanpela kongrigesen long liklik taun Osaj, Saskatsiwan, mi kisim pas long Brata Knorr, na pas i tok: “Mi laik givim wok long yu long go long Beljam. . . . I gat planti wok bilong mekim long dispela kantri. Pait i bin stap long dispela kantri, na yumi mas helpim ol brata bilong yumi, na i stret olsem wanpela brata bilong Amerika i go na helpim ol na mekim gut bel bilong ol.” Kwiktaim mi salim tok i go bek olsem mi bai mekim dispela wok.
Long Novemba 1945 mi stap long Betel long Bruklin na Charles Eicher, em wanpela lapun bilong Alsas, em i lainim mi long tok Frans. Na ol i lainim mi hariap long pasin bilong lukautim wok bilong brens-ofis. Taim mi no go yet long Yurop, mi go lukim famili na ol pren bilong mi inap sotpela taim long Sen Josep, Misuri.
Long Disemba 11, mi lusim Nu Yok long sip Queen Elizabeth, na 4-pela de bihain mi kamap long Sautampton, Inglan. Mi stap wanpela mun long brens-ofis long Inglan, na mi kisim sampela skul moa. Bihain long dispela, long Janueri 15, 1946, mi lusim Inglan na mi go long Osten, Beljam. Long Brasels, long ples bilong kisim tren, olgeta brata na sista i wok long Betel ol i kam bungim mi.
Bihain Long Pait, Bikpela Wok Moa
Ol i makim mi bilong lukautim wok bilong Kingdom long Beljam, tasol mi no save liklik long tok ples bilong ol. Sikspela mun bihain, mi save liklik long tok Frans inap long mi ken toktok wantaim ol man. Mi amamas tru long wok wantaim ol brata i bin redi long lusim laip bilong ol bilong mekim wok autim tok long taim lain Natsi i bin bosim Beljam inap 5-pela yia. Nau tasol sampela bilong ol i bin lusim ol banis kalabus nogut.
Ol brata i gat bikpela laik long stretim ol samting bilong mekim wok bilong autim tok na bilong givim kaikai long ol man i hangre long kisim tok i tru bilong Baibel. Olsem na ol i stretim rot bilong kamapim ol kibung na bilong ol wasman bilong raun i ken go lukim ol kongrigesen. Sampela brata i wok long hetkota long Bruklin—Nathan Knorr, Milton Henschel, Fred Franz, Grant Suiter, na John Booth—ol i kam na strongim bel bilong mipela. Long dispela taim bipo, mi mekim wok olsem wasman sekit, wasman distrik, na wasman bilong brens. Mi stap klostu 7-pela yia long Beljam, na long Disemba 6, 1952, mi marit long Emilia Vanopslaugh, em tu i wok long brens-ofis long Beljam.
Sampela mun bihain, long Epril 11, 1953, ol i singautim mi long kam long polis-tesin na ol i tokim mi olsem i stap bilong mi long Beljam inap bagarapim bel isi bilong kantri. Mi go long Laksambek na wet long apil bilong mi i kamap long Kaunsil Bilong Stet.
Long Februeri 1954 Kaunsil Bilong Stet Bilong Beljam ol tu i tok i stap bilong mi long Beljam inap bagarapim bel isi bilong kantri. Ol i tok, kirap long taim mi kam long Beljam, lain Witnes i go bikpela tru—long 1946 i gat 804 Witnes na long 1953 i gat 3,304—olsem na bel isi bilong kantri inap bagarap, long wanem, planti yangpela Witnes i save bihainim pasin Kristen na klia long ol samting bilong pait. Olsem na mitupela Emilia i kisim wok long Swiselan na mekim wok sekit long wanpela hap ol manmeri i save mekim tok Frans.
Skul Bilong Wok Kingdom—em wanpela skul bilong givim sampela skul moa long ol elda Kristen—em i kamap long 1959 long Saut Lansing, Nu Yok. Ol i singautim mi long go long dispela skul bilong lain long pasin bilong mekim wok tisa long kain skul olsem long Yurop. Taim mi stap long Amerika, mi go lukim famili bilong mi long Sen Josep, Misuri. Em laspela taim mi lukim mama bilong mi. Em i dai long Janueri 1962; Papa i bin dai long Jun 1955.
Skul Bilong Wok Kingdom long Paris, Frans, i kirap long Mas 1961, na Emilia i kam wantaim mi. Ol wasman distrik na wasman sekit na wasman bilong kongrigesen na ol painia salim, long Frans, Beljam, na Swiselan, ol i kam long dispela skul. Inap 14 mun mi lukautim 12-pela klas—ol wan wan klas i bilong 4-pela 4-pela wik. Orait nau, long Epril 1962, mipela i kisim save olsem Emilia i gat bel.
Nupela Wok na Sindaun
Mipela i go bek long Jeniva, Swiselan—mipela holim pepa bilong sindaun oltaim long dispela kantri. Tasol i no gat planti haus, olsem na i hatwok long painim ples slip. Na i hatwok tu long painim wok mani. Bihain mi kisim wok long wanpela bikpela stua i stap namel long Jeniva.
Inap 26 yia mi bin mekim wok bilong Jehova long olgeta de, olsem na taim dispela senis i kamap long sindaun bilong mi, mi hatwok tru. Insait long 22 yia mi wok long dispela stua na helpim Emilia long mekim bikpela long tupela pikinini meri bilong mipela, em Lois na Eunice, mipela famili i save putim ol samting bilong Kingdom i go pas. (Matyu 6:33) Taim mi pinis long mekim wok mani long 1985, mi kamap helpim bilong wasman sekit.
Emilia i gat sik, tasol em i save mekim wok autim tok inap long skel bilong em. Lois i bin mekim wok painia inap 10 yia. Mitupela Lois i amamas tru long go long wanpela gutpela kibung intenesenel long Mosko long 1993! Bihain liklik, Lois i go limlimbur long Senegal, Afrika, na em i lusim laip bilong em taim em i subim solwara. Pasin sori bilong ol brata bilong mipela long Afrika, na ol misineri tu, i mekim gut bel bilong mi taim mi go long Senegal bilong lukautim wok bilong planim em. Mi gat bikpela laik long lukim Lois long taim ol man i kirap bek long i dai!—Jon 5:28, 29.
Mi tenkyu tru olsem inap 40 yia mi gat wanpela gutpela poroman i bin stap gut long mi na helpim mi. Tru tumas, sori na marimari bilong Jehova em i gutpela tumas na mi amamas long i stap laip maski ol hevi i bin painim mi. Bel bilong mi i kirap long tokaut long gutpela pasin bilong God bilong mipela, Jehova, na mi tingim man bilong raitim Song em i tok: “Laip bilong dispela graun i gutpela tasol marimari bilong yu i nambawan tru. Olsem na mi litimapim nem bilong yu.”—Song 63:3.
[Piksa long pes 26]
Mipela i go pas long mekim wok autim tok long rot bilong pikap
[Piksa long pes 26]
Papamama bilong mi long 1936
[Piksa long pes 26]
Autim tok long rot long Beljam long 1948