Laip Stori
Ol Gutpela Rot Mi Makim i Kamapim Ol Blesing
Stori bilong Paul Kushnir
LONG 1897 tupela bubu bilong mi i lusim Yukren na i kam long Kanada. Ol i sindaun long hap klostu long Yorkton, Saskatchewan. Ol i kam wantaim 4-pela pikinini—3-pela mangi na wanpela meri. Long 1923 dispela meri, Marinka, i kamap mama bilong mi. Mi namba 7 pikinini bilong em. Mipela i no holim planti samting bilong skin, tasol mipela i stap bel isi. Mipela i gat gutpela kaikai na klos, na gavman i helpim mipela long ol bikpela samting mipela i mas i gat. Ol neiba i save mekim gutpela pasin pren, narapela i save helpim narapela long mekim ol bikpela wok. Long taim bilong kol, klostu long pinis bilong yia 1925, wanpela Sumatin Bilong Baibel, em nem bilong ol Witnes Bilong Jehova long dispela taim, i kam lukim mipela. Dispela i kirapim mipela long wokim sampela disisen mi amamas yet long ol.
Tok i Tru Bilong Baibel i Kam Long Haus
Mama i kisim sampela buklet long ol Sumatin Bilong Baibel na i no longtaim na em i luksave olsem ol tok em i ritim em i tru. Em i kamap strong hariap long ol samting bilong spirit na kisim baptais long 1926. Taim Mama i kamap wanpela Sumatin Bilong Baibel, dispela i givim nupela tingting long mipela. Mipela i save singautim ol man i kam long haus na mekim gut long ol. Planti taim ol wasman raun, ol i kolim pilgrim, na ol arapela Sumatin Bilong Baibel, ol i kam stap wantaim mipela. Long 1928 wanpela wasman raun i soim mipela piksa “Eureka Drama.” Dispela piksa i wankain liklik long piksa “Photo-Drama of Creation.” Em i mekim wok long wanpela toi rokrok bilong mipela ol pikinini. Dispela rokrok i save pairap. Taim em i presim baten na rokrok i pairap, orait nau em taim bilong senisim piksa slait. Mipela ol pikinini i amamas tru long larim em i mekim wok long toi rokrok bilong mipela!
Planti taim, wanpela wasman raun, nem bilong em Emil Zarysky, i kam lukim mipela. Em i kam long haus ka bilong em. Sampela taim pikinini man bilong em i bikpela pinis i kam wantaim em. Em i strongim mipela ol pikinini long tingting long autim tok fultaim, olsem mekim wok painia. Planti painia tu i save stap long haus bilong mipela. Wanpela taim, Mama i givim wanpela siot long wanpela painia bilong em i ken werim taim Mama i stretim siot bilong em i bruk. Taim painia i lusim mipela i go, em i no tingim na em i kisim i go dispela siot Mama i givim em. Bihain em i salim i kam bek na i tok sori long em i no bin salim kwik. Em i tok: “Inap longpela taim mi no gat 10 sen bilong baim pos ofis.” Mipela i ting i gutpela em i bin holim dispela siot na em i no ken salim i kam bek! Mi gat laik long bihain mi tu i ken bihainim pasin bilong ol dispela painia em ol i save daunim laik bilong ol yet. Mi amamas tru long pasin bilong Mama long singautim ol lain i kam stap wantaim mipela, long wanem, dispela i bin mekim bikpela samting tru long laip bilong mipela na i bin strongim pasin bilong mipela long laikim tru bikpela lain brata i stap long olgeta hap.—1 Pita 4:8, 9.
Papa i no kamap wanpela Sumatin Bilong Baibel, tasol em i no pasim mipela. Em i gat wanpela bikpela haus nating bilong putim ol samting, na long 1930 em i larim ol brata long mekim wok long dispela haus bilong kamapim kibung bilong wanpela de. Maski mi gat 7-pela krismas tasol, mi pilim tru amamas bilong dispela bung. Papa i dai long 1933. Orait nau Mama i stap wanpis wantaim 8-pela pikinini, tasol em i no slek long helpim mipela long bihainim lotu i tru. Em i kisim mi i go wantaim em long ol miting. Long tingting bilong mi long dispela taim, i olsem ol miting i longpela tru na mi gat laik long stap wantaim ol narapela pikinini, em papamama bilong ol i larim ol i pilai ausait. Tasol mi rispektim Mama, olsem na mi stap tasol long miting. Taim Mama i kukim kaikai, planti taim em i save kamapim tok bilong wanpela skripsa na bihain em i askim mi long dispela skripsa i stap we long Baibel. Long 1933, planti wit tru i kamap long gaden bilong mipela, na hap mani moa mipela i kisim long dispela, Mama i yusim bilong baim wanpela ka. Sampela neiba i sutim tok olsem em i westim dispela mani, tasol Mama i gat tingting olsem dispela ka bai helpim mipela long ol wok tiokratik bilong mipela. Na tru tumas, tingting bilong Mama i stret.
Ol Narapela i Helpim Mi Long Makim Ol Gutpela Rot
Taim man i wok long go bikpela, wanpela taim bai kamap we em i mas makim rot em i laik bihainim. Tupela biksusa bilong mi, Helen na Kay, i makim rot bilong mekim wok painia. Nem bilong wanpela yangpela painia i bin stap long haus bilong mipela, em John Jazewsky. Mama i askim John long stap liklik taim moa bilong helpim mipela long wok bilong fam. Bihain, John i maritim Kay, na tupela i mekim wok painia long wanpela hap klostu. Taim mi gat 12-pela krismas, ol i singautim mi long autim tok wantaim ol long taim bilong skul holide. Dispela i givim rot long mi long save gut long wok painia.
Bihain, mi na brata bilong mi John, inap long lukautim fam. Dispela i givim rot long Mama long mekim wok painia haptaim long Julai na Ogas. Mama i mekim wok long wanpela karis i gat tupela wil em wanpela lapun hos i pulim. Papa i bin givim nem Sol long dispela hos, long wanem, hos i save bikhet, tasol long Mama, dispela hos i save stap isi na i bihainim tok bilong em. Mitupela John i amamas tru long mekim wok long fam, tasol olgeta taim Mama i kam bek long haus na kamapim ol ekspiriens em i bin kisim long wok autim tok, laik bilong mipela long mekim wok painia i kamap strong moa, winim laik bilong lukautim fam. Long 1938, mi mekim bikpela wok moa long autim tok, na long Februeri 9, 1940, mi kisim baptais.
Bihain, ol i makim mi long kamap wanpela wokman long kongrigesen. Mi lukautim ol ripot samting bilong kongrigesen, na mi kisim bikpela amamas tru taim mi lukim wok i go bikpela. Mi gat wanpela teritori bilong mi yet bilong autim tok long en, longwe long haus olsem 10-pela mail. Long taim bilong kol, mi save wokabaut i go long dispela hap long olgeta wik na mi stap wantaim wanpela famili i gat laik long harim tok bilong Baibel. Inap wanpela o tupela nait mi save slip long haus bilong ol, long wanpela liklik rum antap. Wanpela taim mi toktok wantaim wanpela tisa bilong lotu Luteran, tasol mi no skelim gut ol tok mi mekim na em i tok em bai singautim polis i kam sapos mi autim tok yet long ol sipsip bilong em. Tasol dispela i mekim na mi strong moa yet long autim tok.
Long 1942, susa bilong mi Kay wantaim man bilong em, John, i stretim rot bilong go long wanpela kibung long Cleveland, Ohio, long Yunaitet Stets. Mi amamas tru long ol i singautim mi long go wantaim ol. Dispela kibung i bin mekim gutpela samting tru long mi. Em i strongim tingting bilong mi long ol samting mi laik mekim long bihain. Long dispela taim, Brata Nathan Knorr i lukautim wok bilong ol Witnes long olgeta hap, na taim em i singaut long 10,000 painia, wantu mi wokim disisen bilong kamap wanpela bilong ol!
Long Janueri 1943, Henry, wanpela wasman raun, i kam lukim kongrigesen bilong mipela. Em i mekim wanpela gutpela tok i kirapim tru mipela. De bihain long em i mekim dispela tok, ples i kol nogut tru (-40°C), na strongpela win bilong not-wes i mekim na mi pilim kol moa yet. Long taim bilong bikpela kol, mipela i save stap long haus tasol, tasol Henry i gat bikpela laik long autim tok. Henry na sampela moa ol i kalap long wanpela karis em hos i pulim na ol i go long wanpela liklik ples longwe inap olsem 11 kilomita. Insait long dispela karis i gat wanpela aven. Mi no go wantaim ol, mi wanpela i go lukim wanpela famili i gat 5-pela pikinini man. Ol i orait long mi stadi long Baibel wantaim ol, na bihain ol i kirap bihainim tok i tru.
Autim Tok Taim i Gat Tambu
Long Wol Woa 2, ol i tambuim wok bilong Kingdom long Kanada. Mipela i mas haitim ol buk bilong Baibel, na i gat planti hap long fam we mipela inap haitim. Planti taim polis i kam painim ol buk, tasol ol i no painim. Taim mipela i autim tok, mipela i mekim wok long Baibel tasol. Mipela i save bung long ol liklik grup tasol, na ol i makim mi na brata bilong mi John long karim ol buk i go i kam, em wanpela wok mipela i mas mekim long pasin hait.
Long taim bilong dispela woa, kongrigesen bilong mipela i insait long wanpela wok bilong tilim buklet End of Nazism long olgeta hap long kantri. Mipela i mekim dispela wok long biknait tru. Taim mipela i wokabaut isi isi i go long ol haus na lusim wanpela buklet klostu long dua, mi guria nogut tru. Pret i kisim mi i winim ol narapela pret mi bin kisim! Bel bilong mi i stap isi taim mipela i tilim laspela buklet! Mipela i hariap i go bek long ka, sekim olsem mipela olgeta i stap, na kwiktaim draiv i go insait long tudak na go pinis.
Wok Painia, Kalabus, na Ol Kibung
Long Me 1, 1943, mi tok gutbai long Mama na mi go long namba wan ples bilong mi long mekim wok painia. Mi holim 20 dola long paus na wanpela liklik sutkes. Brata Tom Troop wantaim famili bilong em long Quill Lake, Saskatchewan, i mekim gutpela pasin na larim mi i stap long haus bilong ol. Long yia bihain, mi go long Weyburn, Saskatchewan. Long Disemba 24, 1944, taim mi sanap long rot na autim tok, polis i holim mi. Ol i putim mi long kalabus. Bihain ol i kisim mi i go long wanpela kalabus long Jasper, Alberta. I gat ol narapela Witnes tu long dispela kalabus. Kalabus i stap namel long ol gutpela maunten em Jehova i bin wokim, ol i kolim Canadian Rockies. Long kirap bilong 1945, ol bikman bilong kalabus i larim mipela i go long wanpela miting long Edmonton, Alberta. Brata Knorr i stori long wok bilong autim tok long olgeta hap. Mipela i gat bikpela laik long pinisim taim bilong mipela long kalabus na bai mipela inap insait gen long wok autim tok.
Taim ol i larim mi i lusim kalabus, mi kirap gen long mekim wok painia. Bihain liklik, ol i toksave olsem kibung “All Nations Expansion” bai kamap long Los Angeles, California. Wanpela brata long nupela painia asainmen bilong mi em i putim sampela fom long trak bilong em, inap long 20 pasindia. Long Ogas 1, 1947, mipela i kalap long trak na mekim wanpela raun olsem 7,200 kilomita. Dispela raun i kisim mipela i go long ol bikpela ples kunai, ol ples drai, na tupela gutpela nesenel pak ol i kolim Yellowstone na Yosemite. Mipela i raun inap 27 de—em wanpela gutpela raun tru!
Dispela kibung mipela i go long en, em wanpela gutpela kibung tru em mi no inap lusim tingting long en. Mi laik insait tru long wok bilong dispela kibung, olsem na long san mi mekim wok atendan, na long nait mi mekim wok sekiuriti. Mi go long wanpela miting bilong ol lain i gat laik long mekim wok misineri. Mi wokim aplikesen, tasol mi no ting ol bai singautim mi. Long 1948, mi volantia long mekim wok painia long wanpela provins bilong Kanada, em Quebec.—Aisaia 6:8.
Gileat na Bihain Long En
Long 1949, mi amamas tru long kisim pas i singautim mi long go long namba 14 klas bilong Wastaua Baibel Skul Bilong Gileat. Skul mi kisim i strongim bilip bilong mi na i helpim mi long go klostu moa long Jehova. John na Kay i bin grediuet long namba 11 klas na ol i mekim wok misineri long Noten Rodisia (nau Sambia). Brata bilong mi John i bin grediuet long Gileat long 1956. Em wantaim meri bilong em Frieda, i mekim wok long Brasil i go inap long taim em i dai, em 32 yia olgeta.
Taim mi grediuet long Februeri 1950, mi kisim tupela telegram i givim bikpela strong long mi. Wanpela i kam long Mama na wanpela i kam long famili Troop long Quill Lake. Long telegram bilong famili Troop i gat het tok “Sampela Tok Bilong Helpim Man i Winim Skul.” Telegram i tok: “Dispela em i wanpela bikpela de tru bilong yu. Em wanpela de yu bai tingim inap long olgeta taim bihain. Mipela i laik bai yu ken stap amamas na ol samting yu mekim i kamap gutpela.”
Mi kisim asainmen long go long biktaun Quebec, tasol pastaim mi stap long Kingdom Fam, long provins New York, we Skul Gileat i stap long dispela taim. Wanpela taim, Brata Knorr i askim mi long go long Beljam. Tasol tupela de bihain, em i askim mi long go long Netelan. Taim mi kisim pinis pas i tokaut long asainmen bilong mi, pas i toksave olsem mi bai “mekim wok bilong lukautim brens.” Mi kirap nogut tru.
Long Ogas 24, 1950, mi kalap long wanpela sip bilong i go long Netelan. Sip i raun inap 11-pela de, olsem na mi gat taim bilong ritim Baibel New World Translation of the Christian Greek Scriptures em nau tasol ol i kamapim. Mi kamap long Rotterdam long Septemba 5, 1950, na famili Betel i amamas long lukim mi. Maski Wol Woa 2 i bin bagarapim planti samting, ol brata i bin kirapim gen ol wok Kristen. Taim mi harim ol i stori long ol i bin stap gut long God maski ol birua i mekim nogut long ol, mi ting ol bai hatwok long mekim wok aninit long wanpela yangpela wasman i no gat bikpela save long lukautim brens. Tasol i no longtaim na mi luksave olsem i no gat as bilong dispela tingting bilong mi.
Tasol i gat wok long stretim sampela samting. Mi bin kamap long kantri taim ol i laik kamapim wanpela kibung na mi amamas tru long lukim planti tausen bratasista i kisim ples slip long hap bilong kibung yet. Long narapela kibung, mi tokaut olsem i gutpela sapos ol bratasista i kisim ples slip long haus bilong ol lain i no Witnes. Ol i ting olsem dispela em gutpela tingting, tasol i no stret long kantri bilong ol yet. Mipela i toktok wantaim, na bihain, mipela i pasim tok olsem sampela bai slip long ples kibung, na ol narapela bai slip long haus bilong ol lain i no Witnes. Mi amamas long tokim Brata Knorr long dispela samting taim em i kam long kibung. Tasol dispela amamas i pinis kwiktaim taim mi ritim wanpela ripot bilong dispela kibung long Wastaua i tok: “Mipela i ting olsem narapela taim ol brata bai bilip na stretim rot na bai ol lain i kam long kibung i ken stap long ol hap we ol i gat rot long autim tok, em long haus bilong ol man.” Tru tumas, “narapela taim” mipela i mekim olsem!
Long Julai 1961, ol i singautim tupela brata i wok long brens ofis bilong mipela, na ol brata i wok long ol narapela brens ofis tu, long i go long wanpela miting long London. Brata Knorr i tokaut olsem ol bai wokim Baibel New World Translation of the Holy Scriptures long sampela tok ples moa, na tok Netelan tu. Em wanpela gutpela tok tru! Tasol mipela i no save olsem dispela wok em bai bikpela wok tru. Tupela yia bihain, long 1963, mi amamas long insait long wanpela program long wanpela kibung long New York we ol i kamapim Baibel New World Translation of the Christian Greek Scriptures long tok Dats.
Sampela Disisen na Ol Nupela Asainmen
Long Ogas 1961, mi maritim Leida Wamelink. Olgeta long famili bilong em i bin kisim tok i tru long 1942, long taim ol Natsi i save birua long ol Witnes. Leida i bin kirap mekim wok painia long 1950 na wok Betel long 1953. Long Betel na long kongrigesen em i save wok strong, olsem na mi save olsem em bai stap gutpela poroman bilong mi long wok autim tok.
Mipela i marit wanpela yia pinis na ol i singautim mi long i go long Brooklyn inap 10-pela mun bilong kisim sampela skul moa. Ol i no singautim ol meri long kam wantaim man bilong ol. Maski Leida i save sik, em i orait long mi go long dispela skul. Bihain, sik bilong Leida i go bikpela moa. Mipela i wok yet long mekim wok long Betel, tasol bihain mipela i wokim disisen olsem i gutpela moa sapos mipela i lusim Betel na mekim wok autim tok fultaim. Mipela i kirap mekim wok wasman raun. Bihain liklik, meri bilong mi i mas kisim operesen. Ol bratasista Kristen i helpim mipela gut tru, olsem na mipela inap karim dispela hevi na stap strong, na wanpela yia bihain, mipela inap insait long wok distrik.
Inap 7-pela yia mipela i amamas long mekim wok bilong raun. Orait nau wanpela samting i kamap na mipela i mas wokim bikpela disisen. Ol i singautim mi long kamap tisa bilong Skul Bilong Wok Kingdom long Betel. Mipela i orait long dispela, maski mipela i mas lusim wok bilong raun em mipela i bin amamas tru long mekim. I gat 47 klas bilong dispela skul em ol wan wan klas i bilong 2-pela wik, na dispela i givim rot long mi long helpim gut ol elda long ol samting bilong spirit.
Long taim mi mekim dispela wok tisa, mi wokim rot bilong i go lukim mama bilong mi long 1978. Tasol wantu, long Epril 29, 1977, mipela i kisim telegram i toksave olsem Mama i dai pinis. Mi bel hevi nogut tru long mi no inap harim gen gutpela nek bilong em o tok tenkyu gen long em long olgeta samting em i bin mekim bilong helpim mi.
Long pinis bilong dispela kos bilong Skul Bilong Wok Kingdom, ol i singautim mipela long insait long famili Betel. Inap 10-pela yia mi mekim wok olsem kodineta bilong Brens Komiti. Bihain, Gavening Bodi i makim wanpela nupela kodineta, em inap tru long mekim dispela wok. Mi amamas tru long dispela.
Mekim Wok Taim Mipela i Lapun
Nau mitupela Leida i gat 83 krismas. Mi bin amamas long mekim wok fultaim inap 60 yia, na 45 bilong ol dispela yia mi wok wantaim gutpela meri bilong mi. Em i bin sapotim mi gut long olgeta asainmen bilong mipela. Em i bin tingim dispela olsem samting i insait long wok bilong truim dediket em i bin mekim long Jehova. Nau long dispela taim, mipela i save mekim wok inap long skel bilong mipela, insait long Betel na long kongrigesen.—Aisaia 46:4.
Mipela i save amamas long tingim bek ol gutpela samting i bin painim mipela. Mipela i no bel hevi long mipela i bin mekim ol dispela wok bilong Jehova. Mipela i bilip olsem ol dispela rot mipela i bin makim long bihainim planti yia i go pinis, ol i stret tru. Mipela i tingting strong long mekim yet wok bilong Jehova long strong olgeta bilong mipela na givim biknem long em.
[Piksa long pes 13]
Mi wantaim Bill, bikbrata bilong mi, na Sol, hos bilong mipela
[Piksa long pes 15]
Long de mitupela i marit, Ogas 1961
[Piksa long pes 15]
Mi wantaim Leida long nau