Olsem Wanem? Yu Inap Laikim Moa Yet Ol Arapela?

SEN i save holim anka bilong sip i mas strong tru bilong em i ken pasim sip long drip nabaut. Tasol bilong mekim olsem, olgeta wan wan hap bilong sen i mas stap gut na strong. Sapos no gat, sen bai bruk.

Yumi ken tok olsem dispela tok piksa i makim kongrigesen Kristen. Bilong kongrigesen i ken i stap strong, olgeta wan wan Kristen i mas wanbel na pas gut wantaim. Wanem samting i save mekim na ol i pas gut wantaim? Pasin laikim. Em i nambawan samting i save kamapim pasin wanbel. Olsem na Jisas Krais i tokim ol disaipel: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” Pasin laikim ol Kristen tru i gat long ol wanbilip em i strongpela moa, winim tru pasin bilong pren na rispektim narapela. Ol i kamapim pasin bilong laikim tru ol arapela na redi long daunim laik bilong ol yet bilong helpim ol.​—Jon 13:​34, 35.

Tingim Tru Ol Wanbilip

Planti kongrigesen i gat ol man bilong narapela narapela skin, kantri, krismas, na tok ples samting. Olgeta wan wan i gat ol samting ol i laikim na ol i no laikim, ol samting ol i laik mekim na ol samting i pretim ol. Na tu, ol i gat ol hevi bilong ol yet bilong karim​—olsem sik o hevi bilong mani. Ol kain samting olsem inap bagarapim pasin wanbel. Olsem na wanem samting inap helpim yumi long laikim moa yet ol arapela na stap wanbel maski yumi no wankain olgeta? Sapos yumi pilim olsem olgeta wanbilip ol i gutpela samting tru, dispela bai helpim yumi long laikim ol moa yet.

Yumi ken mekim wanem bilong soim olsem yumi tingim tru ol narapela? Yumi ken tingim na pilim tingting bilong ol, givim ona long ol, luksave olsem ol i gutpela samting, na amamas long ol i lotuim God wantaim yumi. Dispela i mekim na yumi kirap laikim ol moa yet. Yumi ken skelim tok aposel Pol i bin raitim long ol Kristen long Korin, na dispela bai helpim yumi long luksave long ol samting yumi ken mekim bilong kamapim pasin laikim Kristen moa yet.

Ol Korin i “Pasim Bel”

Pol i bin raitim namba 1 pas i go long ol Korin long 55 C.E. na namba 2 pas em i raitim bihain tasol long dispela seim yia. Tok em i kamapim i soim olsem sampela long kongrigesen Korin i no tingim tru ol wanbilip bilong ol. Pol i stori long dispela samting olsem: “Yupela Korin, mipela i tokaut ples klia long yupela. Mipela i givim bel bilong mipela moa yet long yupela. Mipela i no pasim bel bilong mipela. Nogat. Mipela i laikim tumas yupela. Tasol yupela yet i pasim bel bilong yupela, na yumi no stap wanbel tru.” (2 Korin 6:​11, 12) Pol i laik tok wanem taim em i tok ol Korin i “pasim bel” bilong ol?

Em i laik tok olsem ol i no tingim tru em na givim bel long laikim em. Wanpela saveman bilong Baibel i ting ol Korin i no laikim tumas Pol, long wanem, “i gat ol samting i bin kamap na ol i saspek nating long Pol . . . na ol i bel hevi, long wanem, ol i pilim olsem Pol i no bin mekim stretpela pasin long ol.”

Harim gutpela tok Pol i givim ol, em i tok: “Nau mi tokim yupela olsem papa i tokim ol pikinini bilong en. Yupela i mas mekim wankain pasin olsem mipela i mekim long yupela. Yupela tu i mas givim bel bilong yupela olgeta long mipela.” (2 Korin 6:13) Pol i kirapim ol Korin long laikim moa yet ol wanbilip. Bilong mekim olsem ol i no ken tingting nogut long narapela na tingim tingim ol liklik popaia samting, nogat, ol i mas i gat tingting olsem ol gutpela samting bai kamap na ol i mas givim bel bilong ol long ol wanbilip.

Laikim Moa Yet Ol Wanbilip Long Nau

Bel bilong yumi i pilim amamas taim yumi lukim ol man em ol i lotu tru long God ol i wok strong long laikim moa yet ol wanbilip. Tru, bilong mekim olsem yumi mas mekim sampela samting. I no inap long yumi save tasol long samting yumi mas mekim, nogat. Bilong laikim moa yet ol wanbilip yumi mas bihainim pasin i narapela kain long ol man husat i no bihainim ol lo bilong Baibel. Ol kain man olsem i no save tingim tumas ol narapela. Ol i no tingim gut ol narapela, soim rispek long ol, na ol i mekim ol tok bilong sutim bel bilong ol narapela. Yumi no ken larim ol kain pasin olsem i stiaim tingting bilong yumi. Em bai nogut tru sapos yumi larim pasin bilong tingting nogut long narapela i pasim yumi long laikim ol wanbilip, olsem ol Korin i bin mekim. Dispela samting inap kamap sapos yumi hariap long tingim ol popaia bilong wanpela brata Kristen na yumi no tingim ol gutpela pasin bilong em. Na tu, dispela inap kamap sapos yumi pasim bel bilong yumi long narapela, long wanem, em i bilong narapela kantri o ples samting.

Tasol wokboi bilong God husat i laikim moa yet ol wanbilip i save tingim tru ol. Em i save ting olsem ol i gutpela samting tru na em i rispektim ol, na em i tingim tru ol samting ol i sot long en. Na taim i gat as tru na em i gat tok long wanbilip, em i laik tru long fogivim em na em i no inap bel nogut oltaim long wanbilip. Em i bilip olsem wanbilip i no laik long bagarapim bel bilong em. Pasin bilong givim bel bilong em long arapela i helpim em long kamapim pasin laikim em Jisas i bin stori long en, em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.”​—Jon 13:35.

Wok Long Kisim Sampela Nupela Pren

Pasin bilong givim bel bilong yumi long ol arapela i mekim na bai yumi no poromanim tasol ol pren em yumi save poromanim long olgeta taim, nogat. Bai yumi gat laik long poroman wantaim ol arapela long kongrigesen, em ol bratasista husat yumi no save pas tumas wantaim ol. Ol dispela bratasista i husat? Sampela i man o meri bilong sem o ol i no gat planti pren. Pastaim yumi inap ting olsem yumi wanbilip tasol, na i no gat planti narapela samting bilong toktok wantaim ol dispela lain long en. Tasol tingim: Long Baibel i gat stori bilong ol man husat i bin stap gutpela pren tru, maski i luk olsem i no gat ol samting bilong mekim ol i pas gut wantaim.

Olsem Rut na Naomi. Wanpela em lapun na narapela i yangpela, ol i bilong narapela narapela kantri na pasin bilong ples i narapela, na tok ples tu i narapela narapela. Tasol maski i olsem, ol i stap gutpela pren tru. Jonatan i go bikpela olsem wanpela prins, na Devit i go bikpela olsem wanpela wasman bilong sipsip. Krismas bilong Jonatan i bikpela moa, winim Devit, tasol pasin pren bilong tupela i strongpela moa, winim ol narapela em Baibel i stori long ol. Ol dispela lain i bin kisim amamas long pasin pren bilong ol na em i bin strongim ol long ol samting bilong lotu.​—Rut 1:16; 4:15; 1 Samuel 18:3; 2 Samuel 1:26.

Long nau tu pasin pren tru i save kamap namel long ol Kristen em ol i no wankrismas o sindaun bilong ol i no wankain liklik. Olsem: Regina em i wanpela mama singel na em i gat tupela pikinini i gat 15 krismas samting.a Laip bilong em i bisi stret na em i no gat planti taim long painim amamas. Tupela marit, em Harald na Ute, ol i ritaia pinis na ol i no gat pikinini. I luk olsem tupela famili hia i no gat planti samting ol i ken mekim wantaim. Tasol Harald na Ute i laik bihainim tok bilong Baibel long laikim moa yet ol arapela. Ol i singautim Regina na tupela pikinini bilong em long mekim planti samting wantaim ol. Ol i mekim wok autim tok wantaim na ol mekim ol samting bilong amamas wantaim.

Olsem wanem? Yumi inap givim bel bilong yumi long sampela bratasista moa? Wok long prenim sampela wanbilip em ol i gat narapela pasin bilong ples, ol i bilong narapela kantri, o krismas bilong ol i narapela narapela.

Tingim na Helpim Ol Narapela

Pasin bilong givim bel bilong yumi long ol narapela bai kirapim yumi long tingim na helpim ol narapela. Helpim ol olsem wanem? Lukluk long ol manmeri i stap insait long kongrigesen Kristen. Ol yangpela i mas i gat helpim long stiaim tingting bilong ol, ol lapun i mas kisim tok bilong strongim ol, ol lain i autim tok fultaim i mas kisim sampela tok amamas na helpim long wok ol i mekim, na ol wanbilip i bel hevi i stap i mas i gat man bilong putim yau long hevi bilong ol. Olgeta i mas i gat man bilong helpim ol. Yumi laik mekim ol samting yumi inap long mekim bilong helpim ol dispela lain.

Taim yumi laikim moa yet ol arapela bai yumi tingim tru ol wanbilip husat i gat hevi i narapela kain. Olsem wanem? Yu save long wanpela i gat sik long olgeta taim o wanpela bikpela traim i painim em long nau? Laikim ol moa yet na kamapim pasin bilong givim bel bilong yu long ol. Dispela bai helpim yu long kliagut long hevi bilong ol na sapotim ol.

I gat ol tok profet Baibel i kamapim long ol samting liklik taim em bai kamap. Taim ol dispela tok profet i wok long kamap tru, pasin bilong i stap wanbel insait long kongrigesen bai helpim tru yumi, winim mani kago, save bilong yumi long mekim wok, na ol wok samting yumi mekim pinis. (1 Pita 4:​7, 8) Yumi wan wan inap strongim pasin wanbel insait long kongrigesen bilong yumi taim yumi wok long laikim moa yet ol wanbilip. Yumi ken bilip olsem Jehova bai blesim yumi taim yumi bihainim tok bilong Pikinini bilong em, Jisas Krais, em i tok: “Lo bilong mi em i olsem. Yupela wan wan i mas laikim tru ol arapela, long wankain pasin olsem mi bin laikim yupela.”​—Jon 15:12.

[Futnot]

[Rait long pes 10]

Yumi tingim tru ol bratasista bilong yumi taim yumi tingim ol olsem ol i gutpela samting tru na yumi rispektim ol, na yumi tingim tru ol samting ol i sot long en