Wanpela Man i Laikim Tru Laip na Ol Manmeri
DANIEL SYDLIK, em i bin stap longpela taim insait long lain Gavening Bodi Bilong Ol Witnes Bilong Jehova, na em i pinisim wok bilong em long graun long Tunde, Epril 18, 2006. Em i gat 87 krismas na em i bin insait long famili Betel long Brooklyn, New York, inap olsem 60 yia.
Brata Dan, em nem planti gutpela pren i bin kolim em long en, i kam long Betel long 1946. Paslain long dispela, em i bin mekim wok painia salim long California, na tu, long taim bilong Wol Woa 2 em i bin stap long kalabus, long wanem, em i no laik insait long woa. Ol ekspiriens bilong em long dispela taim i stap long laip stori bilong em long The Watchtower bilong Jun 1, 1985, aninit long het tok “How Priceless Your Friendship, O God!”
Brata Sydlik i save daunim em yet na i no hatwok long ol narapela i toktok wantaim em. Taim em i save mekim tok long ol bung bilong lotu long moningtaim bilong famili Betel, gutpela tingting na pasin bilong em long laikim tru laip i stap ples klia taim em i save kirapim tok bilong em olsem: “Em gutpela samting tru long i stap laip na mekim wok bilong dispela trupela God i gat laip.” Taim em i save mekim ol tok long ol kibung o miting samting, em i laik bai ol man i harim tok bilong em ol i holim wankain tingting. Tim bilong sampela tok em i bin mekim em olsem: “Ol Manmeri i Putim Jehova i Stap God Bilong Ol Em Ol i Ken Amamas,” “Kamapim Pasin Amamas Bilong Jehova,” “Larim Paia Bilong Holi Spirit Bilong God i Lait i Stap,” na “Gutpela Samting Tru Bai Kamap Bihain.”
Long 1970, Brata Sydlik i maritim Marina Hodson bilong Inglan. Em i save tok, Marina i olsem “wanpela helpim i kam long God.” Winim 35 yia tupela i mekim wok bilong Jehova wantaim.
Taim Brata Sydlik i mekim wok long Betel, em i mekim wok long kain kain dipatmen, olsem dipatmen bilong prinim ol buk na Dipatmen Bilong Raitim Tok. Em i mekim wok tu long redio stesin WBBR. Long Novemba 1974, ol i makim em long insait long lain Gavening Bodi na em i wok wantaim Komiti Bilong Lukautim Ol Wokman na Komiti Bilong Raitim Tok.
Pasin bilong Brata Sydlik long laikim tru narapela man i kamap ples klia taim em i mekim wok long Komiti Bilong Lukautim Ol Wokman winim 30 yia. Long strongpela nek bilong em, em i save strongim planti long putim tingting i go long ol gutpela wok yumi holim bilong mekim laik bilong Jehova. Planti taim em i kamapim klia olsem yumi no inap kisim amamas tru taim yumi mekim ol samting bilong amamasim skin, nogat, yumi inap i stap amamas tru taim yumi pas gut wantaim Jehova na kisim stretpela tingting long i stap bilong yumi.
Famili Betel i sori tru long Brata Sydlik i no stap moa wantaim ol, tasol pasin bilong em long stap olsem gutpela piksa long pasin bilong laikim tumas laip na ol manmeri bai i stiaim yet ol. Yumi save tru olsem em i insait long ol dispela lain em Kamapim Tok Hait 14:13 i tok long ol olsem: “ ‘Ol manmeri i bilip long Bikpela na ol i dai, ol i ken amamas.’ Na Holi Spirit em tu i tok, ‘Ol i ken amamas tru, long wanem, ol i lusim dispela hatwok ol i bin mekim, na ol i ken malolo. Na ol i no i go nating. Nogat. Gutpela pasin ol i bin mekim, em i go wantaim ol.’ ”