Ol Nupela Memba Bilong Lain Bilong Bosim Ol Witnes
LONG Sarere, Oktoba 2, 1999, taim Miting Bilong Olgeta Yia bilong Sosaiti Was Taua Bilong Pensilvenia i pinis, ol i harim wanpela toksave em ol i kirap nogut long en. Ol manmeri i kam bung na ol manmeri i harim tok bilong dispela miting long rot bilong telefon, ol inap olsem 10,594 olgeta, ol i amamas long save i gat 4-pela nupela memba nau i kam insait long Lain Bilong Bosim Ol Witnes Bilong Jehova. Ol dispela nupela memba, ol i Kristen God i bin makim ol long spirit holi, nem bilong ol em Samuel F. Herd; M. Stephen Lett; Guy H. Pierce; na David H. Splane.
• Samuel Herd i kirap mekim wok painia long yia 1958, na kirap long 1965 i go inap long 1997, em i mekim wok wasman sekit na wok wasman distrik. Bihain, em wantaim meri bilong em, Gloria, ol i insait long famili Betel long Amerika, na Brata Herd i mekim wok insait long Dipatmen Bilong Wok Autim Tok. Na tu em i mekim wok olsem helpim long Komiti Bilong Wok Autim Tok.
• Stephen Lett i kirap mekim wok painia long Disemba 1966, na long 1967 i go inap long 1971, em i mekim wok long haus Betel long Amerika. Long Oktoba 1971, em i maritim meri bilong em, Susan, na ol i kirap insait long wok painia salim. Kirap long 1979 i kam inap long 1998, em i mekim wok wasman sekit. Long Epril 1998, em wantaim Susan, ol i insait long famili Betel long Amerika. Em i mekim wok insait long Dipatmen Bilong Wok Autim Tok na tu em i mekim wok olsem helpim long Komiti Bilong Wok Tisa.
• Guy Pierce i mekim bikpela long ol pikinini bilong em na bihain, long Epril 1982, em wantaim meri bilong em i kirap mekim wok painia. Em i mekim wok wasman sekit kirap long 1986 i go inap long 1997, na long dispela yia em na meri bilong em, Penny, ol i insait long famili Betel long Bruklin. Brata Pierce i mekim wok olsem helpim long Komiti Bilong Lukautim Ol Wokman.
• David Splane i kirap mekim wok painia long Septemba 1963. Em i winim namba 42 klas bilong Skul Gileat, na em i mekim wok misineri long Senegal, long hap bilong Afrika, na inap 19 yia em i mekim wok wasman sekit long Kanada. Kirap long 1990, em wantaim meri bilong em, Linda, ol i bin stap long Betel long Amerika, na Brata Splane i bin wok long Dipatmen Bilong Wok Autim Tok na Dipatmen Bilong Raitim Tok. Long 1998, em i mekim wok olsem helpim long Komiti Bilong Raitim Tok.
I gat dispela 4-pela nupela brata, na tu, i gat ol narapela brata i stap insait long Lain Bilong Bosim Ol Witnes long nau, olsem: C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, na D. Sydlik. Yumi olgeta i beten olsem Jehova bai i wok yet long blesim na strongim Lain Bilong Bosim Ol Witnes, em nau dispela lain i go bikpela, na ol i wok yet long lukautim na bosim ol wok bilong ol manmeri bilong God long olgeta hap bilong graun na givim ol samting bilong spirit long ol.