Nupela Memba Bilong Gavening Bodi

LONG moning bilong Janueri 24, 2018, Betel famili long Amerika na Kanada i amamas long harim wanpela spesel toksave: Brata Kenneth Cook i kamap memba bilong Gavening Bodi Bilong Ol Witnes Bilong Jehova.

Brata Cook i bon na kamap bikpela long hap saut bilong Pennsylvania long Amerika. Paslain long em i grediuet long haiskul, em i kisim save long tok i tru long wanpela wanklas, na em i kisim baptais long Jun 7, 1980. Em i kirap mekim wok fultaim olsem painia long Septemba 1, 1982. Bihain long 2-pela yia, ol i invaitim em i go long Betel. Em i kirap wok long Betel long Wallkill, New York, long Oktoba 12, 1984.

Insait long 25 yia, Brata Cook i mekim wok long Printeri na Betel Ofis. Long 1996, em i maritim Jamie na tupela i wok long Betel long Wallkill. Long Disemba 2009, Brata na Sista Cook i go mekim wok long Wastaua Ediukesen Senta long Patterson, New York. Long dispela hap, Brata Cook i wok long Dipatmen Bilong Raitim Ol Pas. Long Epril 2016, Brata na Sista Cook i go long Wallkill na ol i stap sotpela haptaim tasol, na bihain ol i go long Brooklyn, New York. Faivpela mun bihain, ol i go i stap long hetkota long Warwick, New York. Long Janueri 2017, ol i makim Brata Cook long mekim wok olsem helpim bilong Komiti Bilong Raitim Tok.