‘Givim Bel Olgeta’
1 Yumi olgeta wan wan i gat wok long mekim pasin laikim i go bikpela insait long lain brata Kristen. (1 Pi. 1:22; 2:17) Dispela pasin inap kamap taim yumi ‘givim bel olgeta’ long ol arapela. (2 Ko. 6:12, 13) Bilong wanem em i bikpela samting long yumi mas save gut long ol brata na sista bilong yumi?
2 Pasin Pren Bai Kamap Strong Moa: Taim yumi kisim save gut long ol wanbilip bilong yumi, yumi bai tingim tru pasin bilong ol long bilip, sanap strong na ol narapela gutpela pasin bilong ol. Yumi no tingim ol popaia ol i mekim, na pasin pren namel long yumi i kamap strong moa. Taim yumi save gut long ol arapela, yumi inap long strongim ol na mekim gut bel bilong ol. (1 Te. 5:11) Yumi inap “helpim gut” ol arapela long sakim ol tingting nogut bilong dispela graun bilong Satan. (Kl. 4:11) Yumi stap long dispela taim nogut bilong las de, na yumi amamas tru long yumi gat ol gutpela pren i stap insait long lain bilong Jehova!—Snd. 18:24.
3 Ol gutpela pren namel long ol lain i lotuim Jehova ol inap strongim na mekim gut long yumi taim hevi i painim yumi. (Snd. 17:17, NW ) Wanpela Kristen i ting em i no inap mekim wanpela gutpela wok, na dispela i bagarapim bel bilong em. Em i tok: “Ol pren bilong mi i laik helpim mi long daunim dispela tingting kranki, na ol i save givim sampela gutpela tok long mi olsem mi no samting nating tasol.” Ol kain pren olsem ol i gutpela presen i kam long Jehova.—Snd. 27:9.
4 Kamapim Klia Olsem Yu Tingim Ol Arapela: Olsem wanem yumi ken givim bel olgeta long ol wanbilip bilong yumi? Yumi ken tok gude na wok strong moa long toktok gut wantaim ol. Narapela rot bilong yu ken givim bel olgeta long ol arapela em yu ken singautim ol long kam kaikai wantaim yu. Wanem laspela taim yu bin singautim wanpela long kongrigesen long i kam kaikai wantaim yu o dring ti wantaim yu? (Lu. 14:12-14) O yu ken stretim rot bilong wok wantaim ol long autim tok. (Lu. 10:1) Taim yumi go pas long kisim save gut long ol brata bilong yumi, yumi strongim pasin wanbel insait long kongrigesen.—Kl. 3:14.
5 Olsem wanem? Yumi save makim ol wanblut na ol wantok em ol i no save lotuim Jehova long i stap pren bilong yumi? Jisas i tokaut klia olsem ol ‘brata, susa, na mama’ tru bilong yumi em ol lain i lotuim Jehova, ol i famili bilong yumi long spirit. (Mt. 12:46-50) Yumi gat wanpela Papa, olsem na yumi olgeta i bilong wanpela famili. Yu inap long kisim ol pren insait long dispela “famili tru” bilong yumi? Yu inap wok strong long kisim save gut long olgeta brata na sista, na ol bratasista ol i bilong narapela provins o tok ples tu? Sapos yu mekim olsem bai yu kisim ol blesing.
6 Taim yumi givim bel olgeta long ol arapela, yumi strongim narapela narapela na kamapim pasin wanbel insait long kongrigesen. Na tu, Jehova yet bai blesim yumi long pasin bilong yumi long laikim ol brata bilong yumi. (Sng. 41:1, 2; Hi. 6:10) I gutpela yu putim mak long kisim save gut long ol narapela long dispela “famili tru” bilong yu.
[Askim Bilong Stadi]
1. Yumi olgeta i gat wanem wok?
2. Bilong wanem em i bikpela samting long yumi mas kamap pren bilong ol wanbilip bilong yumi?
3. Olsem wanem yumi inap helpim gut ol arapela?
4. Olsem wanem yumi ken kisim save gut long ol arapela insait long kongrigesen?
5. Husat ol i wantok na famili tru bilong yumi? Olsem wanem yumi ken kamap pren bilong ol arapela insait long kongrigesen?
6. Wanem sampela gutpela samting inap kamap taim yumi givim bel olgeta long ol brata bilong yumi?