Ol Sumatin Bilong Tok Bilong God Ol i Winim Skul
OL WITNES BILONG JEHOVA i save bihainim pasin bilong ol Kristen bilong pastaim, olsem na long olgeta hap bilong graun ol i save go long ol haus na autim tok. Namba wan tok i kamap long bung bilong makim namba 102 klas bilong Wastaua Baibel Skul Bilong Gileat i winim skul, em i stori long dispela wok autim tok.
Long Mas 1, 1997, Albert Schroeder bilong Lain Bilong Bosim Ol Witnes Bilong Jehova em i kamapim sampela tok i stap long wanpela nius (Le Point) bilong Frans. Dispela nius i stori long Misin Katolik i gat tingting long go long ol haus long Itali na autim tok. Nius i tok: ‘[Ol misineri bilong Vatiken] i mas i gat samting bilong tilim taim ol i raun long ol hap ol Witnes Bilong Jehova i save raun long en, em ol i bin lain gut long pasin bilong go long ol haus na “tilim” gutnius, olsem na Vatiken i bin stretim rot bilong prinim wan milion buk bilong Gutnius Bilong Sen Mak.’
Ol 48 manmeri i bin winim dispela skul, ol i insait long dispela lain i bin bihainim pasin bilong Jisas long autim gut Tok Bilong God. Ol i bin lusim 8-pela kantri na kam long Wastaua Edukesen Senta long Patesen, Nu Yok. Taim ol i skul inap 5-pela mun ol i stadi long Baibel kirap long buk Stat i go inap long Kamapim Tok Hait. Na ol i skul long wok bilong oganaisesen bilong God long bipo i kam inap long nau, na ol samting ol i ken mekim bilong helpim ol taim ol i stap misineri, na ol pasin em spirit holi bilong God i kamapim. Ol dispela samting i bilong redim ol long mekim wok misineri long 17 kantri ol bai go long en. Inap 5,015 manmeri bilong planti kantri ol i kam bung na ol tu i amamas wantaim dispela lain i winim skul. Ol dispela sumatin bilong Skul Gileat i kisim wanem laspela tok bilong helpim ol?
Sampela Tok Bilong Strongim Ol Nupela Misineri
Taim siaman i mekim pinis tok bilong kirapim bung, Ralph Walls, wanpela helpim bilong Komiti Bilong Lukautim Ol Wokman bilong Lain Bilong Bosim Ol Witnes, em i mekim namba wan sotpela tok i kamapim sampela gutpela tok bilong helpim ol nupela misineri. Nem bilong dispela tok, em “No Ken Lusim Tingting Long Mekim Pasin Sori.” Em i tok, long 2 Timoti sapta 3, Baibel i tok profet olsem planti man bai lusim pasin bilong sori. Em i givim gutpela tok long ol dispela nupela misineri i stret wantaim 1 Korin 13:1-7 i stori long pasin sori, na em i tok: “Sampela taim yupela ol misineri bai winim ol aua yupela i mas kisim. Na ating yupela i gat planti save em Skul Gileat i bin lainim yupela long en. O yumi givim bel long wok sampela aua moa long wok bilong yumi long brens-ofis. Tasol maski yumi mekim bikpela wok olsem, na daunim sampela laik bilong skin, ol dispela wok bai lus nating sapos yumi lusim tingting long mekim pasin sori.”
Bihain long dispela tok, Carey Barber bilong Lain Bilong Bosim Ol Witnes em i stori long “Jehova i Go Pas Long Helpim Yumi Long Winim Pait.” Taim Namba Wan Pait i pinis, ol gutpela wokman bilong Jehova ol i liklik lain tasol, tasol bihain long dispela pait, Jehova i go pas long helpim ol long win tru long mekim wok autim tok bilong Kingdom, maski ol man i mekim nogut long ol. Long 1931, ol Sumatin Bilong Baibel, em nem bilong ol long bipo, ol i kisim nem olsem Witnes Bilong Jehova, na dispela samting i mekim ol pris pasto bilong ol misin i kros. Brata Barber i tok: “Ol misineri bilong klas namba 102 i bin lain long Skul Gileat ol i gat gutpela wok tru ol i ken mekim—ol inap mekim bikpela wok bilong helpim planti manmeri long kisim save long dispela nem holi.” Ol i insait long wanpela bikpela lain misineri, inap olsem 7,131, em ol i bin lain long Skul Gileat na helpim wok bilong autim tok bilong Baibel long kamap long planti kantri moa—long 1943 ol i autim tok long 54 kantri, na long nau, 233 kantri.
Orait nau Lloyd Barry i mekim wanpela tok, em tu i bilong Lain Bilong Bosim Ol Witnes na em i bin winim namba 11 klas bilong Skul Gileat na mekim wok misineri long Japan inap 25 yia. Tok bilong em, “Stap Strong Long Mekim Ol Dispela Samting,” i strongim bel bilong ol sumatin. Em i tokim ol, “Sapos yupela i sanap strong na karim ol hevi, dispela bai givim bikpela amamas long yupela.” Pasin bilong karim hevi na mekim yet wok misineri o sampela narapela wok insait long oganaisesen bilong God, dispela bai kamapim wanem ol gutpela pe? “Nambawan bikpela samting em i olsem: Taim yumi sanap strong na karim ol hevi, dispela i mekim Jehova i belgut tru . . . Taim traim i painim yupela na yupela i holimpas bilip na stap gut long God, yupela bai belgut tru . . . Tingting long mekim wok misineri olsem wanpela wok bilong holim oltaim . . . Bai yupela i kisim gutpela pe—yupela i ken bel gut olsem ‘[yupela] bin mekim gutpela wok tru.’ ” (Matyu 25:21; Sindaun 27:11) Bilong pinisim tok bilong em, Brata Barry i tok em i laik tru bai ol dispela nupela misineri i ken i “stap strong long mekim ol dispela samting”; ol i mas tingting strong olsem wok misineri bai i stap olsem namba wan samting bilong ol.—1 Timoti 4:16.
“Bai Yu Lukim Wanem Samting?” Karl Adams i kamapim dispela askim, em i bin mekim wok tisa long planti klas bilong Skul Gileat. Em i tok, ol samting ol nupela misineri bai lukim long nupela ples wok bilong ol, i no ol samting ol i lukim long ai tru tasol bilong ol, nogat; em ol samting ol i lukim tu long ai bilong tingting. (Efesus 1:18) Samting ol Israel bilong lukstil i lukim long Graun Bilong Promis i kamapim klia dispela samting. Olgeta 12-pela man bilong lukstil ol i lukim wankain samting long ai tru bilong ol, tasol inap tupela tasol i lukim Graun Bilong Promis wankain olsem God i save lukim. Ol misineri tu ol inap kisim narapela narapela tingting long ol samting ol i lukim. Long sampela kantri ol bai go mekim wok long en, ol bai lukim ol man i stap rabis, na ol man i gat pen na hevi, na ol man i no gat wanpela gutpela samting bilong wetim i kamap. Tasol ol i no ken larim ol dispela hevi i mekim na ol i lusim ples wok bilong ol, nogat. Brata Adams i stori long wanpela misineri bilong wanpela klas i bin kamap bipo em i bin tok: “Ol dispela hevi mi lukim em i helpim mi long save olsem mi mas i stap long dispela hap. Ol dispela manmeri i no gat wanpela gutpela samting bilong tingim na wetim i kamap bihain. Mi laik helpim ol.” Bilong pinisim tok bilong em, Brata Adams i kirapim ol nupela misineri long ol i mas tingim ol kantri ol i go wok long en olsem wanpela hap Jehova i gat tingting long mekim i kamap Paradais, em bai kamap long olgeta hap bilong graun. Na ol i mas tingim ol manmeri long ol dispela kantri i olsem ol manmeri i gat rot long kam insait long lain bilong nupela taim.
Wallace Liverance, em i mekim laspela tok bilong dispela hap bilong program, em i bin mekim wok misineri inap sampela yia taim em i no kamap tisa yet bilong Skul Gileat. Em i toktok long “Tingim Gutpela Wok Bilong God na Mekim Savepasin.” Taim yumi bihainim gutpela tingting long mekim ol samting, i olsem yumi bihainim savepasin. Em samting King Sol bilong Israel i no bin mekim.—1 Samuel 13:9-13; 15:1-22.
Bilong bihainim savepasin, ol misineri i mas lainim skin na tingting bilong ol long ol nupela samting—olsem nupela sindaun, na ol i mas lainim wanpela nupela tok ples, na kisim save long ol manmeri i stap long dispela hap. Ol samting ol misineri i mekim bilong daunim ol hevi, em inap strongim ol long ol samting bilong spirit wankain olsem Josua na Kalep i bin kisim strong long taim ol i daunim ol birua na kisim hap graun God i bin makim bilong ol.
Toktok Wantaim Sampela
Long namba tu hap bilong program, ol i toktok wantaim sampela. Harold Jackson i toktok wantaim Ulysses Glass, em kuskus bilong Skul Gileat na inap planti yia em i bin stap tisa long dispela Skul, na nau em i gat 85 krismas. Planti misineri i stap yet long wok ples bilong ol i tingim yet ol gutpela wok em i bin mekim bilong lainim na skulim ol. Mark Noumair i bin stap misineri long Afrika inap planti yia na nau em i stap tisa long Skul Gileat. Em i toktok wantaim sampela sumatin long wok bilong ol long autim tok insait long dispela 5-pela mun ol i bin skul. Stori bilong ol i kamapim klia olsem long hap klostu long Skul i gat planti man i amamas long harim Tok Bilong God.
Robert Ciranko na Charles Molohan i toktok wantaim sampela man i gat save em ol i stap long narapela skul long dispela ples, em skul bilong lainim ol brata bilong Komiti Bilong Brens. Ol i tokim ol sumatin i winim skul olsem ol i mas mekim pasin daun na helpim kongrigesen long i stap wanbel. Ol i tok i gutpela sapos ol sumatin i winim skul ol i no ken ting ol i save pinis long ol samting bai kamap long wok misineri bilong ol; ol i mas redi tasol long wanem wanem samting bai painim ol. Sapos ol i mekim olsem, dispela bai helpim ol dispela nupela misineri long inapim wok bilong ol olsem tisa bilong Tok Bilong God.
Las tru, Theodore Jaracz bilong Lain Bilong Bosim Ol Witnes em i toktok long “Wanem Samting i Pulim Husat?” Em i tok, taim yumi ol Kristen i bihainim ol pasin em spirit holi i kamapim, dispela i helpim gut ol narapela. Em i tok, “Ol misineri em oganaisesen bilong Jehova i bin salim ol i go, ol i bin kirapim ol manmeri long bihainim gutpela pasin na ol pasin bilong spirit.” Orait nau em i kamapim tok bilong sampela man em gutpela pasin bilong ol misineri i bin kirapim ol long mekim wok bilong God. Bilong pinisim tok bilong em, em i tok: “Gutpela sapos yupela i wok yet long holimpas gutpela nem em lain bilong Jehova i kisim pinis, na wok yet long go long ol haus long nupela wok ples bilong yupela bilong painim ol man i gat gutpela bel . . . Na tu, yupela i mas bihainim stretpela klinpela pasin na bai yupela inap sakim ol tingting nogut bilong dispela graun na kirapim ol narapela long litimapim nem bilong Jehova na givim biknem long em.”
Bilong pinisim program, siaman i kaunim sampela tok ol brata bilong ol hap i stap klostu na longwe ol i bin salim i kam bilong tok gude, na bihain em i givim pepa setifiket bilong Skul long ol sumatin na em i kolim nem bilong ol kantri ol misineri bai go mekim wok long en. Bihain wanpela sumatin i bin winim skul em i kaunim wanpela tokaut em klas i bin kamapim bilong tok tenkyu long ol gutpela tok ol i bin skul long en. Tru tumas, program bilong dispela bung bilong makim namba 102 klas i winim Skul Gileat em i helpim olgeta man i kam bung long tingting strong olsem ol i mas wok yet i go long autim Tok Bilong God.
[Piksa long pes 31]
Namba 102 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.