Ol Sumatin Bilong Gileat—Ol i “Misineri Tru!”
“MISINERI em i wanem samting?” Wanpela nius i kamapim dispela askim klostu 40 yia i go pinis. Nius i bekim tok olsem: Ol misineri tru i gat wok bilong helpim ol man long kisim gutpela sindaun, na helpim ol bambai ol i gat rot long wokim bisnis. Tasol narapela kain bekim i kamap long Sande, Mas 5, 1995, long Haus Kibung Bilong Jesi Siti bilong ol Witnes Bilong Jehova. Wanpela bung i kamap bilong makim namba 98 klas bilong Wastaua Baibel Skul Bilong Gileat i winim skul—dispela skul i bin salim ol misineri i go long olgeta hap bilong graun!
Bihain long namba wan singsing na beten, Albert D. Schroeder bilong Lain Bilong Bosim Ol Witnes em i mekim gutpela tok amamas long olgeta 6,430 i kam bung. Bilong kirapim bung, Brata Schroeder i kamapim klia olsem wanem ol sumatin bilong Gileat i narapela kain long ol narapela lain i gat nem misineri. Em i tok: “Baibel em i nambawan buk ol i mekim wok long en long Skul Gileat.” Ol sumatin bilong Gileat i skul long pasin bilong lainim ol man long Tok Bilong God—i no bilong helpim ol man long painim gutpela sindaun long nau. Olsem na ol inap lukautim gut ol man long ol samting bilong spirit long ol dispela hap ol i go long en—ol narapela lain misineri i no bin skul olsem.
Ol man i mekim tok bihain long dispela, ol i stori long sampela narapela samting ol sumatin bilong Gileat i mekim bilong kamapim klia ol i misineri “tru.” Charles Molohan i mekim tok, “Mekim Wok Misineri na Wok Yet Long Kamapim Gutpela Kaikai.” Brata Molohan i kamapim tok bilong aposel Pol long Kolosi 1:9, 10, na em i kirapim tingting bilong ol sumatin olsem insait long 5-pela mun i go pinis, Skul Gileat i bin helpim ol long “save gut tru long laik bilong [God].” Dispela save bai helpim ol long kamapim gutpela kaikai long tupela rot, olsem: ol bai kamapim ol gutpela pasin em spirit holi i as bilong en, na helpim ol narapela long kisim ol tok i tru bilong Baibel.
Nau Daniel Sydlik bilong Lain Bilong Bosim Ol Witnes em i toktok long “No Ken Lusim Stretpela Pasin na Lusim Laip Bilong Yu.” Em i kamapim askim bilong Jisas: “Bai man i givim wanem pe bilong baim bek laip bilong en?” (Matyu 16:26) Brata Sydlik i tok: “Sampela man i tromoi laip bilong i stap oltaim bambai ol inap kisim gutpela sindaun long nau i no gat hatwok bilong en.” Tasol man i gat strongpela bilip, em i no ken lusim bilip bilong em taim hevi na traim i painim em, nogat. Tok bilong Jisas i makim olsem, man i mas redi long “givim” sampela samting, olsem lusim sampela samting bilong em yet, bambai em inap kisim laip bilong i stap oltaim. Em i strongim ol dispela nupela misineri long ol i mas givim bel olgeta long mekim wok bilong Jehova!
William Van de Wall bilong Komiti Bilong Dipatmen Bilong Mekim Wok em i mekim tok, “Aposel Pol—Em i Stap Gutpela Piksa Bilong Yumi Ken Bihainim.” Brata Van de Wall i tok: “Pol i go pas long mekim wok misineri long taim bilong ol aposel.” Em i stori long 4-pela samting Pol i stap gutpela piksa long en bilong ol misineri long nau i ken bihainim: (1) Pol i tingim na laikim tru ol manmeri, (2) em i mekim gut wok bilong autim tok, (3) em i mekim pasin daun; em i no laik litimapim nem bilong em yet, (4) em i bilip tru long Jehova.
Lyman A. Swingle bilong Lain Bilong Bosim Ol Witnes em i mekim tok, “Larim Jehova i Skelim Gut Yu Taim Yu Stap Long Nupela Ples Wok.” Brata Swingle i stori long teks bilong de, em Song 139:16, na em i tok, ol i nupela misineri, olsem na taim ol i kamap long nupela ples wok bilong ol, sampela hevi bai painim ol, tasol Jehova i save long rot bilong stretim ol dispela hevi. “Askim Jehova long helpim yu; toktok wantaim em taim yu gat hevi. Wok long kisim save long laik bilong em.”
John E. Barr bilong Lain Bilong Bosim Ol Witnes em i mekim tok, “Bilip Bilong Yupela i Save Kamap Strong Tru.” (2 Tesalonaika 1:3) Long Luk 17:1, Jisas i tok: “Ol kain kain samting bai i kamap bilong mekim ol manmeri i pundaun.” Sampela i bin pundaun long pasin ol wanwok misineri i mekim. Tasol Brata Barr i strongim ol misineri long ol i mas bilip na lusim tingting long rong ol narapela i mekim. Long dispela samting, ol disaipel bilong Jisas i tokim em: “Yu mas mekim bilip bilong mipela i kamap bikpela moa.” (Luk 17:2-5) Sampela taim, oganaisesen bilong yumi i mekim sampela senis bilong stretim rot bilong mekim wok, na dispela tu inap traim bilip bilong ol misineri. Brata Barr i kamapim askim olsem: “Bai yumi gat strongpela bilip bambai yumi inap bihainim ol dispela nupela rot bilong mekim wok, o bai ol dispela samting i kamap olsem wanpela bikpela maunten i pasim rot long yumi?”
Bihain tupela tisa bilong Skul Gileat i kamapim strongpela tok. Jack Redford i kirapim ol sumatin long holimpas stretpela tingting. Em i stori long wanpela misineri i bin lusim wok bilong em, long wanem, ol narapela wanwok misineri i bin mekim liklik tok bilas long em. Tasol Baibel i tok strong olsem yumi no ken bel hevi long samting narapela i mekim long yumi. (Saveman 7:9) Em i tok: “Kisim stretpela tingting. Lusim tingting long ol rong na popaia ol narapela i stap klostu long yu ol i mekim.”
U. V. Glass, em kuskus bilong Skul Gileat, i kamapim askim: “ ‘Taim nogut i save painim yumi olgeta’—yu redi long karim ol hevi bilong en?” (Saveman 9:11) Brata Glass i tok, “I stap bilong yumi i save senis senis, na sampela taim bikpela hevi tru i painim yumi. Wantu sampela hevi olsem sik, skin i no stap strong moa, famili i gat hevi, i bin painim sampela misineri na ol i mas lusim ples wok bilong ol. Brata Glass i tok, “Maski wanem wanem samting nogut i painim yumi, Jehova i save long dispela na em i tingim yumi. Sapos yumi bilip olsem em bai helpim yumi, orait yumi ken save, bai yumi inap win!”
Laspela tok bilong moningtaim, em “Ol i Stap Narapela Kain Bilong Mekim Wok Misineri.” Theodore Jaracz bilong Lain Bilong Bosim Ol Witnes i stori long dispela askim yumi kaunim pinis long kirap bilong dispela stori, olsem: “Misineri em i wanem samting?” Bilong bekim dispela askim, em i kamapim tok bilong Aposel sapta 13 na 14 i stori long wok misineri bilong Pol tupela Barnabas. Wok bilong ol i no bilong helpim ol man i gat hevi long sindaun bilong ol, nogat; ol i wok long “autim gutnius.” (Aposel 13:32) Brata Jaracz i tok: “Wok Pol tupela Barnabas i mekim em i makim wok ol misineri tru i mas mekim. Ating yupela tu i ting olsem, a?” Orait, nau ol i singautim longtaim misineri Robert Tracy, em i bin mekim wok long Meksiko, long kamapim ol gutpela ekspiriens em i bin kisim taim em i autim gutnius.
Long pinis bilong program long moningtaim, Brata Schroeder i givim pepa setifiket bilong skul long ol 48 sumatin. Ol man i kam bung ol i amamas long harim nem bilong ol 21 kantri ol misineri bai go mekim wok long en, olsem: Babedos, Benin, Bolivia, Ekwado, Ekwatorial Gini, Estonia, Gini-Bisau, Honduras, Kosta Rika, Kot Diwa, Latvia, Marisas, Mosambik, Nikaragua, ol ailan Liwat, Paragwai, Peru, Ripablik Sentral Afrika, Senegal, Taiwan, na Veneswela.
Long belo ol i malolo, na bihain ol i bung gen na amamas long harim Robert P. Johnson bilong Dipatmen Bilong Mekim Wok i mekim Stadi Wastaua. Ol sumatin bilong klas namba 98 i bekim ol askim. Bihain ol brata bilong Skul Gileat i toktok wantaim ol sumatin. Ol i kamapim ol ekspiriens ol i bin kisim taim ol i autim tok, na ol i kamapim tingting bilong ol long nupela ples wok ol bai go long en, na dispela i strongim ol manmeri.
Inap 6 yia hap, Skul Gileat i bin stap long Walkil, Nu Yok, long hap Sosaiti Wastaua i gat faktori samting long en. Tasol long Epril 1995, ol i putim skul i go long wanpela nupela haus long Wastaua Edukesenel Senta, long taun Pateson, Nu Yok. Famili long Betel long Walkil ol i pilim olsem wanem long dispela senis? Long dispela bung ol i toktok wantaim sampela bilong ol. Tok ol i mekim i kamapim klia ol i pilim tru ol gutpela wok ol sumatin bilong Gileat i mekim. Tru tumas, ol dispela man na meri ol i misineri tru—ol i gat pasin daun, na ol i redi long lusim sampela samting bilong ol yet, na ol i tingim gut wok bilong helpim ol narapela.
Taim program i laik pinis, olgeta manmeri i kam bung ol i bilip strong olsem Skul Gileat bai mekim yet dispela wok ol i bin mekim inap 50 yia pinis—em wok bilong kamapim ol misineri tru!
[Blok long pes 18]
Ol Samting Bilong Ol Sumatin:
Hamas kantri ol i kam long en: 8
Hamas kantri ol bai go long en: 21
Hamas sumatin: 48
Krismas bilong ol, averes: 32.72
Hamas yia long tok i tru, averes: 15.48
Hamas yia long wok painia, averes: 10.91
[Piksa long pes 18]
Namba 98 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.