Ol Skul Yumi Kisim Long Jehova

1. Jehova i ting olsem wanem long wok bilong skulim ol man?

¹ Jehova, Nambawan Bikpela Tisa, i laik bai yumi kisim skul long em. (Ais. 30:20) Taim em i wokim pinis namba wan Pikinini bilong em, em i kirap long skulim em. (Jon 8:28) Maski Adam i bikhet, dispela i no pasim Jehova long skulim ol man, nogat, em i stretim rot bilong yumi ol sinman inap kisim skul.​—⁠Ais. 48:​17, 18; 2 Tim. 3:​14, 15.

2. Wanem wok bilong skulim ol man i wok long kamap long nau?

² Long nau, winim olgeta taim bipo, Jehova i stiaim bikpela wok bilong skulim ol man. Olsem Aisaia i bin tok profet long en, planti milion manmeri bilong olgeta hap bilong graun i wok long i go long “dispela maunten, haus bilong Bikpela i sanap long en.” (Ais. 2:⁠2) Wanem as na ol i go long dispela hap? Bilong Jehova i ken skulim ol long ol pasin em i laik ol i mas bihainim! (Ais. 2:⁠3) Long sevis yia bilong 2010, ol Witnes Bilong Jehova i bin lusim olsem 1.6 bilion aua long autim tok na skulim ol manmeri long tok i tru bilong Baibel. Na long 105,000 samting kongrigesen long olgeta hap bilong graun ol i save kisim skul long ol tok bilong God long olgeta wik. Na tu, lain wokboi i gat savetingting ol i kamapim ol buk na nius Kristen long 500 samting tokples bilong skulim ol man.

3. Olsem wanem skul yu kisim long Jehova i helpim yu?

³ Helpim Tru Yumi: Tru tumas, skul yumi kisim long God i helpim tru yumi! Yumi kisim save olsem God i gat nem na em i save tingim tru yumi. (Sng. 83:​18, NW; 1 Pita 5:​6, 7) Yumi bin kisim bekim bilong ol askim yumi save tingting planti long en. Olsem: Bilong wanem ol man i save karim pen na hevi na i dai? Olsem wanem mi inap i stap amamas tru? Yumi stap bilong mekim wanem? Na tu, Jehova i givim yumi ol stretpela lo bilong helpim yumi na ‘olgeta samting yumi mekim bai i kamap gutpela.’​—⁠Jos. 1:⁠8.

4. Rot i op long sampela wokman bilong God inap insait long wanem ol skul? Bilong wanem yumi mas mekim olgeta samting bilong kisim skul bilong Jehova?

⁴ Na tu, Jehova i bin redim ol skul bilong helpim sampela wokman bilong em long mekim bikpela wok moa bilong em. Pes 8-11 i gat lista bilong ol dispela skul. Sapos sindaun bilong yumi i mekim na yumi no inap insait long wanpela bilong ol dispela skul, orait yumi mas mekim olgeta samting yumi inap mekim na bai skul em yumi inap insait long en i ken helpim yumi. Olsem wanem? Yumi strongim ol yangpela​—⁠em ol tisa long skul na ol narapela i save kirapim ol long kisim bikpela skul​—⁠long putim ol mak bilong spirit long winim na kisim nambawan bikpela skul, em skul bilong Jehova? Yumi mas mekim olgeta samting bilong kisim skul bilong Jehova, long wanem, dispela bai helpim yumi long i stap amamas long nau na long olgeta taim bihain.​—⁠Sng. 119:105; Jon 17:⁠3.

Sampela Skul Em Oganaisesen Bilong Jehova i Redim

Skul Bilong Rit na Rait

• Wok Bilong En: Bilong skulim ol manmeri long rit na rait, na bai ol yet inap ritim Baibel na mekim stadi bilong ol yet, na skulim ol narapela long tok i tru.

• Hamas Wik Samting: Sampela bai lain hariap na sampela bai lain isi isi.

• Ples Bilong Skul: Haus Kingdom.

• Husat Inap Insait: Olgeta pablisa na ol narapela husat i laik kisim save long Jehova.

• Rot Bilong Insait Long En: Sapos i gat planti i no save long rit na rait, ol elda bilong kongrigesen bai stretim rot bilong kamapim dispela skul, na ol bai toksave long ol long insait long en.

Skul Tiokratik Bilong Autim Tok

• Wok Bilong En: Bilong skulim ol pablisa long mekim gut wok autim tok na kamap gutpela tisa bilong gutnius.

• Hamas Wik Samting: Em i kamap long olgeta wik.

• Ples Bilong Skul: Haus Kingdom.

• Husat Inap Insait: Olgeta pablisa. Na tu, ol narapela husat i save kam oltaim long ol miting bilong kongrigesen na ol i wanbel long ol tok bilong Baibel, na sindaun bilong ol i stret wantaim ol stiatok em ol Kristen i mas bihainim.

• Rot Bilong Insait Long En: Toktok wantaim wasman bilong Skul Tiokratik Bilong Autim Tok.

Skul Bilong Lainim Narapela Tokples

• Wok Bilong En: Bilong skulim ol pablisa long autim tok long narapela tokples.

• Hamas Wik Samting: Fopela o faivpela mun. Ol i save mekim dispela skul long Sarere moning inap 1-pela o 2-pela aua.

• Ples Bilong Skul: Haus Kingdom.

• Husat Inap Insait: Ol pablisa husat i gat gutnem insait long kongrigesen na ol i laik autim tok long ol man bilong narapela tokples.

• Rot Bilong Insait Long En: Brens ofis i save stretim rot bilong kamapim dispela skul sapos i gat wok long mekim olsem.

Wok Bilong Sanapim Ol Haus Kingdom

• Wok Bilong En: Bilong wokim na stretim ol Haus Kingdom. Em i no wanpela skul, tasol long rot bilong dispela wok, ol lain husat i insait long en ol i kisim skul long mekim kain kain wok na bai ol i ken helpim wok bilong sanapim ol haus.

• Hamas Wik Samting: Inap long mak man i putim bilong insait long dispela wok.

• Ples Bilong Sanapim: Long wanem wanem ples insait long teritori em lain Komiti Bilong Wokim Ol Haus Kingdom i lukautim. Ol i save singautim sampela bilong ol long go long narapela kantri na helpim wok bilong sanapim ol haus samting we i bagarap long bikpela win na ren samting.

• Ol Mak Bilong Winim: Brata o sista husat i baptais pinis na ol elda i mas givim tok orait long ol. Ol inap insait long dispela wok maski ol i gat sampela save long wok o nogat.

• Rot Bilong Insait Long En: Kisim fom Kingdom Hall Volunteer Worker Questionnaire (S-82-E) long ol elda bilong kongrigesen na pulapim.

Skul Bilong Wok Painia

• Wok Bilong En: Bilong helpim ol painia long ‘inapim tru wok bilong God ol i mekim.’​—⁠2 Tim. 4:⁠5.

• Hamas Wik Samting: Tupela wik.

• Ples Bilong Skul: Brens ofis bai makim; planti taim em Haus Kingdom.

• Ol Mak Bilong Winim: Brata o sista i mas insait long wok painia oltaim winim wanpela yia.

• Rot Bilong Insait Long En: Ol painia husat i winim mak, em wasman sekit bai singautim ol.

Betel Entrans Skul

• Wok Bilong En: Dispela skul i bilong helpim ol nupela lain i kam long Betel long mekim gut wok bilong ol long Betel.

• Hamas Wik Samting: Inap 16 wik. Wanpela aua long olgeta wik.

• Ples Bilong Skul: Betel.

• Mak Bilong Winim: Lain husat i stap fultaim long Betel o ol i stap longpela taim (winim wanpela yia).

• Rot Bilong Insait Long En: Ol brata o sista husat i stap long Betel na brens ofis i makim ol.

Skul Bilong Wok Kingdom

• Wok Bilong En: Bilong skulim ol elda na kongrigesen sevan long lukautim gut ol wok bilong ol insait long kongrigesen. (Apo. 20:28) Gavening Bodi yet i save makim wanem taim dispela skul bai kamap.

• Hamas Wik Samting: Insait long sampela yia nau ol i bin makim ol elda long skul 1-pela de na hap, na ol kongrigesen sevan wanpela de.

• Ples Bilong Skul: Haus Kingdom o Haus Kibung.

• Ol Mak Bilong Winim: Brata i mas holim wok elda o kongrigesen sevan.

• Rot Bilong Insait Long En: Sekit wasman bai singautim ol elda na kongrigesen sevan husat i winim mak long insait long dispela skul.

Skul Bilong Ol Elda Bilong Kongrigesena

• Wok Bilong En: Bilong helpim ol elda long mekim gut wok bilong ol insait long kongrigesen.

• Hamas Wik Samting: Faivpela de.

• Ples Bilong Skul: Brens ofis bai makim; planti taim em Haus Kingdom o Haus Kibung.

• Ol Mak Bilong Winim: Brata i mas holim wok elda.

• Rot Bilong Insait Long En: Brens ofis bai singautim ol elda em ol i winim ol mak.

Skul Bilong Ol Wasman Raun na Meri Bilong Olb

• Wok Bilong En: Bilong helpim ol wasman sekit na wasman distrik long mekim gut wok bilong ol long helpim ol kongrigesen, na long “wok hat long tokaut long tok bilong God na skulim ol man long en” na lukautim ol lain i stap long han bilong ol.​—⁠1 Tim. 5:17; 1 Pita 5:​2, 3.

• Hamas Wik Samting: Tupela mun.

• Ples Bilong Skul: Brens ofis bai makim.

• Ol Mak Bilong Winim: Brata i mas holim wok wasman sekit o wasman distrik.

• Rot Bilong Insait Long En: Brens ofis bai singautim ol wasman raun na meri bilong ol em ol i winim ol mak.

Baibel Skul Bilong Ol Singel Bratac

• Wok Bilong En: Bilong redim ol singel elda na ol singel kongrigesen sevan long mekim sampela wok moa insait long oganaisesen. Taim ol i pinis long skul, ol bai salim ol i go long ol ples insait long kantri bilong ol yet we i sot long ol pablisa bilong autim tok. Sampela bai kisim asainmen long go long narapela kantri sapos ol yet i toksave long brens ofis olsem ol i redi long mekim olsem.

• Hamas Wik Samting: Tupela mun.

• Ples Bilong Skul: Brens ofis bai makim; planti taim em Haus Kingdom o Haus Kibung.

• Ol Mak Bilong Winim: Ol singel brata em krismas bilong ol i namel long 23 na 62, na helt bilong ol i gutpela na ol i laik mekim wok bilong helpim ol bratasista na wok bilong Kingdom long ol hap we i sot long ol pablisa bilong autim tok. (Mak 10:​29, 30) Ol i mas mekim wok elda o kongrigesen sevan inap tupela yia pinis na ol i mekim yet dispela wok.

• Rot Bilong Insait Long En: Sapos dispela skul i kamap insait long kantri bilong yupela, ol bai mekim wanpela miting long taim bilong kibung sekit na ol brata husat i laik insait long dispela skul ol i ken i go long dispela miting. Sampela tok moa bilong dispela skul bai kamap long dispela miting.

Baibel Skul Bilong Ol Marit Kristend

• Wok Bilong En: Bilong skulim gut ol marit na bai Jehova na oganaisesen bilong em i ken yusim ol long mekim bikpela wok moa. Bihain long skul, planti bilong ol bai go bek long kantri bilong ol na mekim wok long ol hap i sot long ol man bilong autim tok. Ating wan wan tasol bai kisim asainmen long go long narapela kantri sapos ol yet i toksave long brens ofis olsem ol i redi long mekim olsem.

• Hamas Wik Samting: Tupela mun.

• Ples Bilong Skul: Ol i bin kirapim dispela skul long Wastaua Ediukesen Senta long Patterson, New York, long Amerika. Bihain, brens ofis bai makim wanem hap dispela skul bai kamap long en, planti taim em Haus Kibung o Haus Kingdom.

• Ol Mak Bilong Winim: Ol marit em krismas bilong ol i namel long 25 na 50, na ol i mas i gat gutpela helt na ol inap long i go long ol hap we i sot long ol pablisa bilong autim tok na ol i gat dispela tingting, “Mi stap! Salim mi.” (Ais. 6:​8, NW ) Na tu, ol i mas marit winim tupela yia na ol i mekim wok painia winim tupela yia.

• Rot Bilong Insait Long En: Sapos dispela skul i kamap insait long kantri bilong yupela, ol bai mekim wanpela miting long taim bilong spesel de kibung na ol marit husat i laik insait long dispela skul ol i ken i go long dispela miting. Sampela tok moa bilong dispela skul bai kamap long dispela miting.

Wastaua Baibel Skul Bilong Gileat

• Wok Bilong En: Bilong skulim ol painia na ol arapela fultaim sevan long mekim wok misineri.

• Hamas Wik Samting: Faivpela mun.

• Ples Bilong Skul: Wastaua Ediukesen Senta long Patterson, New York, long Amerika.

• Ol Mak Bilong Winim: Ol marit em ol i baptais inap 3-pela yia pinis na krismas bilong ol i namel long 21 na 38 ol i ken putim aplikesen bilong i go long dispela skul. Ol i mas save long tok Inglis, ol i marit winim tupela yia pinis, na tu, ol i mekim yet wok painia winim tupela yia. Ol i mas i gat gutpela helt. Ol i mekim wok painia long narapela kantri (na ol bratasista husat i mekim wok olsem misineri); ol wasman raun; ol lain long Betel; na ol lain i bin insait long Ministerial Trening Skul, em Baibel Skul Bilong Ol Singel Brata; na ol marit i bin insait long Baibel Skul Bilong Ol Marit Kristen, ol tu i ken putim aplikesen sapos ol inapim ol dispela mak.

• Rot Bilong Insait Long En: Long ol brens em ol i makim, bai i gat wanpela miting bilong dispela skul i kamap long taim bilong kibung distrik na ol lain i laik insait long dispela skul ol i ken go long en. Long dispela miting ol bai stori moa long dispela skul. Sapos dispela miting i no kamap long kibung distrik long kantri bilong yupela na yupela i laik putim aplikesen bilong dispela skul, orait yupela i ken salim pas long brens ofis bilong yupela na kisim sampela save moa long dispela skul.

Skul Bilong Ol Brens Komiti na Meri Bilong Ol

• Wok Bilong En: Bilong helpim ol brata husat i insait long Brens Komiti long lukautim gut ol wok bilong Betel, na lukautim ol wok bilong kongrigesen, na wok bilong ol sekit na distrik long teritori bilong ol, na tu, ol i lukautim wok bilong tanim tok, prinim, na dipatmen bilong kisim ol buk na nius, na ol i lukautim ol narapela dipatmen bilong Betel.​—⁠Luk 12:48b.

• Hamas Wik Samting: Tupela mun.

• Ples Bilong Skul: Wastaua Ediukesen Senta long Patterson, New York, long Amerika.

• Ol Mak Bilong Winim: Em i wanpela Brens Komiti o Kantri Komiti o brata ol i makim long mekim kain wok olsem tasol em i no go yet long dispela skul.

• Rot Bilong Insait Long En: Gavening Bodi bai singautim ol brata na ol meri bilong ol husat i winim mak bilong insait long dispela skul.

[Ol Futnot]