Skul Tiokratik Bilong Autim Tok
Wok Bilong En: Bilong trenim ol pablisa long mekim gut wok autim tok na kamap gutpela tisa bilong gutnius.
Longpela Bilong En: Em kamap long olgeta wik.
Ples Bilong Skul: Haus Kingdom.
Husat Inap Insait: Olgeta husat i save go oltaim long miting na ol i wanbel long ol tok bilong Baibel, na sindaun bilong ol i stret wantaim ol stiatok em ol Kristen i mas bihainim.
Rot Bilong Insait Long En: Toktok wantaim wasman bilong Skul Tiokratik Bilong Autim Tok.
Sharon i gat sik ALS (amyotrophic lateral sclerosis) na i paralais, em i tok: “Skul Tiokratik Bilong Autim Tok i bin skulim mi long mekim wok painimaut na kamapim ol tok long pasin we man inap kliagut long en. Na mi bin lain tu long tingim ol samting bilong helpim ol arapela long pas gut wantaim Jehova na mi no tingim mi yet tasol.”
Arnie, husat i bin mekim wok wasman raun inap longpela taim, i tok: “Taim mi liklik, mi no inap toktok gut na mi hatwok long lukluk long pes bilong ol man. Dispela skul i strongim mi na mi pilim olsem mi inap mekim ol samting. Jehova i helpim mi na long rot bilong dispela trening, mi lain long pasin bilong pulim gut win na putim gut tingting long tok mi ritim. Mi amamas long wok mi inap mekim bilong litimapim nem bilong God long kongrigesen na long wok autim tok.”
Betel Entrans Skul
Wok Bilong En: Bilong helpim ol nupela man i kam long Betel long mekim gut wok.
Longpela Bilong En: Inap 16 wik. Na klas em 45 minit long olgeta wik.
Ples Bilong Skul: Betel.
Husat Inap Insait: Lain husat i stap fultaim long Betel o wanpela volantia bilong stap sotpela taim long Betel husat ol i orait long em i stap na mekim wok inap wanpela yia samting.
Rot Bilong Insait Long En: Brens ofis i makim olgeta nupela lain i kam long Betel long insait long en.
Demetrius, husat i bin go long dispela skul long 1980 samting, i tok: “Dispela kos i helpim mi long mekim gut moa stadi bilong mi yet na i redim mi long stap long Betel inap longpela taim. Ol tisa, ol lesen, na ol gutpela tok i bin helpim mi long kliagut olsem Jehova i save tingim mi na i laik bai mi mekim gut wok bilong mi long Betel.”
Kaitlyn i tok: “Skul i helpim mi long tingim nambawan bikpela samting—mi mas pas gut wantaim Jehova. Betel Entrans Skul i helpim mi long tingim moa Jehova, haus bilong em, na oganaisesen bilong em.”
Skul Bilong Wok Kingdom
Wok Bilong En: Bilong skulim ol wasman raun, ol elda, na sampela taim ol kongrigesen sevan long lukautim gut wok bilong ol insait long oganaisesen. (Apo. 20:28) Ol i save skelim ol samting i wok long kamap long nau, na wanem samting ol i mas mekim bilong helpim ol kongrigesen. Gavening Bodi yet i save makim wanem taim dispela skul bai kamap.
Longpela Bilong En: Insait long sampela yia nau ol bin makim ol wasman raun long skul tupela de na hap, ol elda wanpela de na hap, na ol kongrigesen sevan wanpela de.
Ples Bilong Skul: Haus Kingdom o Haus Kibung.
Husat Inap Insait: Brata i mas holim wok wasman raun, elda, o kongrigesen sevan.
Rot Bilong Insait Long En: Wasman sekit bai singautim ol elda na kongrigesen sevan long insait long dispela skul. Brens ofis bai singautim ol wasman raun.
“Dispela skul i kamapim planti save insait long sotpela taim, na em i helpim ol elda long amamas yet na ‘stap olsem man tru’ long wok bilong Jehova ol i mekim. Ol nupela na ol longtaim elda i kisim skul long pasin bilong mekim gut wok sepeding na bilong i stap wanbel tru na ‘holim wankain tingting na wankain laik.’”—Quinn (daunbilo).
“Trening i helpim mipela long kliagut moa long ol samting bilong bilip bilong yumi, tasol tu, mipela i kisim ol tok lukaut long ol hevi, na ol gutpela tok long pasin bilong lukautim gut ol sipsip. Jehova i mekim gutpela pasin tru na i helpim mipela.”—Michael.
Skul Bilong Wok Painia
Wok Bilong En: Bilong helpim ol painia long ‘inapim tru wok bilong God ol i mekim.’—2 Tim. 4:5.
Longpela Bilong En: Tupela wik.
Ples Bilong Skul: Brens ofis i makim; planti taim em long Haus Kingdom.
Husat Inap Insait: Brata na sista i mas insait long wok painia oltaim winim wanpela yia o sampela yia.
Rot Bilong Insait Long En: Ol painia husat i winim mak, em wasman sekit bai singautim ol.
Lily (han sut) i tok: “Skul i helpim mi long winim sampela hevi i painim mi long wok autim tok na long laip bilong mi. Pasin bilong mi long stadi, mekim wok tisa, na yusim Baibel i kamap gutpela moa. Mi inap helpim gut moa ol arapela, na sapotim ol elda, na helpim kongrigesen long i go bikpela.”
Brenda, husat i bin go long dispela skul tupela taim, i tok: “Skul i opim rot long mi ken putim olgeta tingting i go long ol wok lotu bilong mi, wok bilong skulim maus bilong bel, na bilong helpim ol arapela. Tru tumas, Jehova em i God bilong givim planti samting!”
Skul Bilong Ol Elda Bilong Kongrigesen
Wok Bilong En: Bilong helpim ol elda long mekim gut wok bilong ol insait long kongrigesen na kliagut moa long ol samting ol i mas mekim bilong lotuim Jehova.
Longpela Bilong En: Faivpela de.
Ples Bilong Skul: Brens ofis bai makim; planti taim em long Haus Kingdom o Haus Kibung.
Husat Inap Insait: Brata i mas holim wok elda.
Rot Bilong Insait Long En: Brens ofis bai singautim ol elda.
Ritim sampela tok ol elda long klas namba 92 long Amerika i bin mekim:
“Dispela skul i bin helpim mi tru, skul i helpim mi long skelim mi yet na long luksave long olsem wanem mi inap lukautim ol sipsip bilong Jehova.”
“Mi redi long strongim ol arapela long rot bilong kamapim gut ol bikpela poin bilong Baibel.”
“Dispela trening mi kisim bai helpim mi long laip olgeta.”
Skul Bilong Ol Wasman Raun na Meri Bilong Ol
Wok Bilong En: Bilong helpim ol wasman sekit na ol wasman distrik long mekim gut wok bilong helpim kongrigesen taim ol i “wok hat long tokaut long tok bilong God na skulim ol man long en.”—1 Tim. 5:17; 1 Pita 5:2, 3.
Longpela Bilong En: Tupela mun.
Ples Bilong Skul: Brens ofis bai makim.
Husat Inap Insait: Brata i mas holim wok wasman sekit o wasman distrik.
Rot Bilong Insait Long En: Brens ofis bai singautim ol wasman raun na meri bilong ol.
“Skul i strongim mipela long tingim tru wok bilong Jisas long bosim oganaisesen. Mipela i luksave olsem mipela i gat wok long strongim ol brata na strongim pasin wanbel insait long ol wan wan kongrigesen. Tru, ol wasman bilong raun i gat wok long givim ol edvais long ol brata na stretim ol long sampela taim, tasol nambawan wok bilong wasman em bilong helpim ol brata long luksave olsem Jehova i save laikim ol tumas.”—Joel, klas namba 1, 1999.
Baibel Skul Bilong Ol Singel Brata
Wok Bilong En: Bilong redim ol singel elda na ol singel kongrigesen sevan long lukautim sampela wok moa insait long oganaisesen bilong Jehova. Planti sumatin bai kisim asainmen insait long kantri bilong ol yet we ol i nidim sampela helpim. Sampela bai kisim asainmen long go long narapela kantri sapos ol yet i redi long mekim olsem. Sampela sumatin i kisim wok olsem painia salim inap sampela mun bilong kirapim wok autim tok long sampela longwe ples.
Longpela Bilong En: Tupela mun.
Ples Bilong Skul: Brens ofis bai makim; planti taim em long Haus Kingdom o Haus Kibung.
Husat Inap Insait: Ol singel brata i gat 23 i go inap 62 krismas na helt bilong ol i gutpela na ol i laik mekim wok long ol hap we ol i nidim helpim. (Mak 10:29, 30) Ol i mekim wok painia oltaim inap 2-pela yia pinis na ol i mekim wok elda o kongrigesen sevan inap 2-pela yia pinis.
Rot Bilong Insait Long En: Wanpela miting i kamap long taim bilong kibung sekit bai stori long dispela samting.
Rick husat i bin go long namba 23 klas long Amerika, i tok: “Mi givim bel tru long mekim dispela kos, na dispela i opim rot long spirit bilong Jehova i senisim sampela pasin bilong mi. Taim Jehova i givim wanpela asainmen long yu, em i save sapotim yu long dispela asainmen. Mi kisim save olsem sapos mi putim tingting bilong mi long bihainim laik bilong God na i no long laik bilong mi yet, orait em bai strongim mi.”
Andreas husat i stap long Jemani, i tok: “Mi save tingim oganaisesen bilong God i olsem wanpela mirakel bilong nau. Trening mi kisim i helpim mi long redi long wok mi bai mekim bihain. Na tu, planti eksampel long Baibel i lainim mi long wanpela bikpela tok i tru: Wok bilong helpim ol brata na wok bilong Jehova i save mekim man i stap amamas tru.”
Baibel Skul Bilong Ol Marit Kristen
Wok Bilong En: Bilong skulim gut ol marit na bai Jehova na oganaisesen bilong em i ken yusim ol long mekim bikpela wok moa. Bihain long skul, planti bilong ol bai stap yet long kantri bilong ol na mekim wok we ol i nidim sampela helpim. Ating sampela bai kisim asainmen long narapela kantri sapos ol yet i redi long mekim olsem. Sampela sumatin i kisim wok olsem painia salim inap sampela mun bilong kirapim wok autim tok long sampela longwe ples.
Longpela Bilong En: Tupela mun.
Ples Bilong Skul: Ol i mekim dispela skul long Amerika, na kirap long Septemba 2012, ol bai mekim long sampela narapela kantri, planti taim em long Haus Kingdom o Haus Kibung.
Husat Inap Insait: Ol marit em krismas bilong ol i namel long 25 na 50, na ol i mas i gat gutpela helt na ol inap long i go long ol hap we i mas i gat helpim, na ol i gat tingting olsem, “Mi stap! Salim mi.” (Ais. 6:8, NW ) Na tu, ol i mas marit winim tupela yia na ol i mekim wok painia i stap winim tupela yia. Brata i mas i stap wanpela elda o kongrigesen sevan inap tupela yia.
Rot Bilong Insait Long En: Wanpela miting i kamap long taim bilong Kibung distrik bai stori long dispela samting. Sapos i no gat miting long ol kibung distrik long kantri yu stap long en na yu laik insait long dispela skul, orait raitim pas long brens ofis bilong yu bilong kisim sampela save moa.
“Etpela wik bilong dispela skul i senisim tru laip bilong mitupela na i givim sans long ol marit husat i laik mekim bikpela wok moa! Mitupela i strong long holim yet pasin bilong skelim gut sindaun bilong mitupela na bai mitupela i yusim gut taim.—Eric na Corina (daunbilo), klas namba 1, 2011.
Wastaua Baibel Skul Bilong Gileat
Wok Bilong En: Bilong skulim ol painia na ol arapela fultaim sevan long mekim wok misineri long ol hap i gat planti man, na bilong mekim wok wasman raun, o bilong wok long Betel. As bilong dispela, em bilong strongim wok autim tok, ol kongrigesen, na wok bilong brens ofis.
Longpela Bilong En: Faivpela mun.
Ples Bilong Skul: Wastaua Ediukesen Senta long Patterson, New York, long Amerika.
Husat Inap Insait: Ol marit husat i insait pinis long spesel fultaim sevis—olsem, ol misineri husat i no go yet long dispela skul, ol painia salim, ol wasman raun, o ol marit i wok long Betel. Tupela i mas wok wantaim insait long spesel fultaim sevis inap 3-pela yia pinis. Ol i mas rit, rait, na mekim gut tok Inglis.
Rot Bilong Insait Long En: Brens Komiti long kantri ol i stap long en bai singautim ol long putim aplikesen.
Lade na Monique bilong Amerika i stap nau long Afrika. Lade i tok: “Skul Gileat i bin redim mitupela long i go long wanem wanem hap ol i laik makim mitupela long i go long en, na redi long wok strong, na wok wantaim ol gutpela brata bilong yumi.”
Monique i tok: “Mi wok long bihainim ol Tok Bilong God mi lainim, na long dispela rot mi kisim bikpela amamas long asainmen bilong mi. Mi pilim olsem dispela amamas mi kisim i kamapim klia olsem Jehova i laikim mi.”
Skul Bilong Ol Memba Bilong Brens Komiti na Meri Bilong Ol
Wok Bilong En: Bilong helpim ol brata husat i insait long Brens Komiti long lukautim gut ol wok bilong Betel, na lukautim ol wok bilong kongrigesen, na wok bilong ol sekit na distrik. Na tu, ol i kisim save long wok bilong tanim tok, prinim, na salim ol litresa.
Longpela Bilong En: Tupela mun.
Ples Bilong Skul: Wastaua Ediukesen Senta long Patterson, New York, long Amerika.
Husat Inap Insait: Brata i insait long Brens Komiti o Kantri Komiti o brata ol i makim long mekim kain wok olsem.
Rot Bilong Insait Long En: Gavening Bodi bai singautim ol brata na ol meri bilong ol long insait long dispela skul.
Lowell na Cara, ol i bilong namba 25 klas, na ol i mekim wok long Naijiria. Lowell i tok: “Mi kisim save olsem maski mi bisi tumas o ol i givim mi wanem wok, bikpela samting em mipela i mas bihainim pasin Jehova i makim na bai em i ken amamas long mipela. Skul i kamapim tu olsem em i bikpela samting long mipela i mas bihainim wankain pasin laikim em Jehova i save soim long ol wokboi bilong en.”
Cara i tok: “Wanpela tok mi skelim long bel i olsem, sapos mi no inap kamapim klia wanpela poin we i isi long man i kliagut long en, orait mi mas stadi gut paslain long mi traim long skulim ol arapela long en.”