Lain i Winim Skul i Helpim Ol Man Long Olgeta Hap

LONG 98,000 kongrigesen bilong ol Witnes Bilong Jehova long winim 200 kantri, God i wok long skulim ol manmeri bilong kain kain sindaun. Nambawan buk bilong skulim ol em Baibel. As bilong skulim ol em bilong helpim ol long kamap strong long ol samting bilong spirit long rot bilong kisim save long laik bilong God na long olsem wanem ol i ken bihainim dispela laik. Ol man i bihainim ol dispela tok ol i lainim, ol i kisim bikpela helpim. Na tu, ol i tokim ol narapela man long ol samting ol i lainim, na dispela i stret wantaim tok bilong Jisas Krais long ol i mas kamapim ol disaipel.​—Matyu 28:​19, 20.

Ol kongrigesen bilong ol Witnes Bilong Jehova i gat program bilong skulim ol man long olgeta wik, na ol i bin kamapim sampela narapela skul tu. Wanpela bilong ol em Ministerial Trening Skul. Dispela skul i kirap long Oktoba 1987 long Pittsburgh, Pennsylvania, long Amerika. Namba wan klas i gat 24 sumatin i save mekim tok Inglis. Kirap long dispela taim na i kam, ol i bin mekim dispela skul long 21 tok ples long 43 kantri. Ol singel elda na kongrigesen sevan bilong 90 samting kantri i bin go long dispela skul. Taim dispela skul bilong 8-pela wik i pinis, ol i makim ol sumatin i winim skul long mekim wok long ol hap i sot long ol elda samting, em long kantri bilong ol yet o long narapela kantri. Long pinis bilong 2005, inap olsem 22,000 brata Kristen i bin winim dispela skul. God i bin blesim hatwok ol i bin mekim long pasin daun bilong helpim wok bilong Kingdom na helpim ol narapela man.​—Sindaun 10:22; 1 Pita 5:5.

Stretim Rot Bilong Go Long Skul

Planti sumatin i mas toktok wantaim bos bilong kisim malolo long wok mani bilong ol bambai ol i ken go long Ministerial Trening Skul. Sampela taim dispela i kamapim hevi. Long Hawaii, tupela man Kristen em ol i bin singautim ol long i go long dispela skul, ol i mas toktok wantaim bos bilong kisim malolo long wok bilong ol olsem tisa. Ol i bilip long Jehova bai helpim ol, na ol i raitim pas bilong kisim malolo. Ol i stori long i gat wanem as na ol i laik go long dispela skul na olsem wanem dispela bai helpim ol. Tupela wantaim i kisim tok orait long malolo long wok.

Planti Witnes husat i bin askim bos long givim malolo long wok, bos i tok ol bai i no gat moa wok mani taim ol i kam bek long skul. Tasol ol brata i laik kisim skul long oganaisesen bilong Jehova, maski bos i pinisim ol long wok. Bihain, sampela bilong ol dispela brata i kisim pas long bos na bos i askim ol long kam bek long wok taim skul i pinis. Kain strongpela tingting bilong go long skul i kamapim klia dispela samting: Yu mas toktok wantaim bos o raitim pas bilong kisim malolo, beten askim Jehova long helpim yu, na larim em i stretim rot bilong yu.​—Song 37:5.

Jehova i “Skulim Ol”

Skul i stap inap 8-pela wik na ol sumatin i stadi gut long ol tok bilong Baibel. Ol i skul long olsem wanem lain bilong Jehova i stretim ol wok bilong mekim laik bilong God, na olsem wanem ol i ken mekim gutpela wok moa long Baibel long wok autim tok, long ol miting bilong kongrigesen, na long ol kibung.

Wanpela brata husat i winim pinis dispela skul, em i raitim pas long wanpela sumatin husat i no go yet long skul, na em i tok: “Tru tumas, yu bai kisim nambawan gutpela skul, winim olgeta skul yu bin kisim bipo. Bai yu lukim olsem dispela skripsa i tok long Jehova ‘bai skulim yumi’ em i gat bikpela insait moa bilong en. Dispela skul i stretim stretim na i stiaim bel na pasin bilong yumi na bai yumi ken bihainim gut moa pasin bilong Krais Jisas. Skul i gutpela tru, winim olgeta samting i bin painim yu bipo.”​—Aisaia 54:13.

Ol Man Bilong Autim Tok, Wasman, na Tisa

Ol brata i winim Ministerial Trening Skul i wok nau long 117 kantri. Ol i stap long ol ailan bilong solwara Atlantik, Karibian, Pasifik, na long planti kantri we i gat brens ofis bilong ol Witnes Bilong Jehova. Ol brens i salim ripot na i tok gutpela skul ol sumatin i bin kisim i kamap ples klia long wok bilong ol long autim tok, mekim ol visit bilong wasman, na skulim ol man. Skul i redim ol long mekim gutpela wok moa long Baibel long wok autim tok. (2 Timoti 2:15) Taim ol i bekim askim bilong ol man bilong haus, planti taim ol i mekim wok long buk Toktok Gut Wantaim Ol Man Long Baibela na ol i skulim ol narapela pablisa long mekim wankain pasin. Ol dispela brata i winim skul ol i givim bel long wok na dispela i save kirapim ol narapela tu, na wok bilong ol i save strongim ol kongrigesen.

Ol elda bilong kongrigesen i gat wok bilong “lukautim gut ol manmeri bilong God,” ol i helpim wok bilong lukautim ol narapela long ol samting bilong spirit. (1 Pita 5:​2, 3) Wanpela elda i tok long dispela wok olsem: “Mipela i tenkyu tru long brens ofis i salim ol dispela brata i bin skul gut bilong helpim mipela long mekim wok bilong lukautim ol manmeri bilong God.” Wanpela brens long hap bilong Is i tok: “Ol brata i winim skul i gat bikpela pasin sori. Ol i wok strong na kongrigesen i rispek tru long ol. Kongrigesen i save gut na i amamas tru long pasin bilong ol long stap daun, mekim gutpela pasin, na givim bel long wok. Ol i redi long daunim laik bilong ol yet na ol i amamas long go mekim wok long ol kongrigesen i sot long ol wasman.” (Filipai 2:4) Ol kain man olsem i givim nupela strong long ol wanbilip bilong ol na i stret yumi tok amamas long ol.​—1 Korin 16:18.

Na tu, ol tisa bilong Ministerial Trening Skul i helpim ol sumatin long mekim gut ol tok long ai bilong ol man. Taim ol sumatin i bihainim ol gutpela tok ol i kisim, i no longtaim na planti ol inap insait long program bilong ol kibung sekit na kibung distrik. Wanpela wasman sekit i tok, ol brata i winim skul ol i mekim “ol gutpela tok tru na kamapim tok long pasin ol man inap kliagut long en.”​—1 Timoti 4:13.

Long wanpela kantri long Afrika, wok bilong skulim ol man long ol miting bilong kongrigesen i kamap gutpela moa taim ol i wokim Ministerial Trening Skul long hap na salim ol brata i winim skul i go long ol kongrigesen. Ol elda i winim skul i helpim wok bilong autim tok, mekim visit bilong wasman, na skulim ol man, na long dispela rot ol i strongim ol kongrigesen long ol samting bilong spirit.​—Efesus 4:​8, 11, 12.

Lukautim Gut Kongrigesen

Long planti hap, ol i sot long ol elda na kongrigesen sevan. Sampela kongrigesen bai i no gat ol elda sapos ol i no bin salim wanpela brata i winim Ministerial Trening Skul i go long en. Olsem na ol i save salim planti brata long ol hap i sot long ol elda samting.

Planti brens i raitim ripot olsem ol dispela brata i “save gut long ol lo bilong oganaisesen,” “ol i tingim gut wok ol i mas mekim,” “helpim ol narapela long save gut na rispek long oganaisesen bilong Jehova,” na “helpim ol bratasista long kongrigesen bilong ol long kamapim gutpela pasin pren na i strongim ol long ol samting bilong spirit.” Dispela samting i save kamap, long wanem, ol brata i winim skul i bihainim tok bilong Baibel na ol i no ting save bilong ol yet inap helpim ol o save bilong ol yet i samting tru. (Sindaun 3:​5-7) Ol kain man olsem i kamapim planti gutpela samting bilong spirit insait long ol kongrigesen ol i wok long en.

Mekim Wok Long Ol Longwe Ples

Sampela brata i winim skul em ol i makim ol long mekim wok painia salim, ol i save helpim ol grup i stap longwe long kamap kongrigesen. Wanpela elda i stap long wanpela longwe hap long Guatemala i amamas long helpim ol dispela brata i save givim, na em i tok: “Inap 20 yia . . . mi bin tingting planti long olsem wanem mipela bai lukautim dispela traipela teritori. Planti taim mi beten long dispela samting. Ol brata i kam long Ministerial Trening Skul ol i lain gut long mekim ol tok na ol i save gut long ol lo bilong oganaisesen, na mi amamas long lukim olsem nau dispela hap i kisim gutpela helpim.”

Ol brata i winim skul i bin lain long mekim gut wok bilong ol long ol teritori we ol i mas wokabaut longwe long ol maunten bilong kamap long ol liklik ples. Kwiktaim ol i save kamapim na stretim wok bilong ol grup, maski bipo ol narapela pablisa i no inap mekim olsem. Olsem: Wanpela elda long Naija i laik kisim helpim long ol brata i winim dispela skul, long wanem, em i ting ol inap mekim gutpela wok tru long hap em i stap long en. Long ol longwe hap, em i isi moa long ol man singel i mekim wok painia salim na wasman sekit. Olsem aposel Pol, ol i mas karim ol hevi, olsem ol inap ‘lus long wara na bagarap long han bilong ol stilman, na bagarap long taim ol i stap long graun i no gat man,’ sindaun bilong ol i gat hatwok bilong en, na tu, ol i wari long ol kongrigesen ol i lukautim.​—2 Korin 11:​26-28.

Helpim Ol Yangpela

Baibel i tokim ol yangpela long ol i mas tingim Man Bilong Wokim ol. (Saveman 12:1) Ol brata i winim Ministerial Trening Skul i stap gutpela piksa long ol yangpela Kristen. Taim tupela brata i winim dispela skul i kamap long wanpela kongrigesen long Amerika, namba bilong ol aua ol bratasista i lusim long wok autim tok i dabol. Na tu, pastaim ol i gat 2-pela painia oltaim, olsem man bilong autim tok bilong Kingdom fultaim, na nau ol i gat 11-pela. Dispela samting i bin kamap long planti kongrigesen.

Ol brata i winim skul i kirapim ol yangpela man long tingting long go long Ministerial Trening Skul. Dispela i bin kirapim sampela husat i no kongrigesen sevan yet long wok strong long winim dispela mak. Brens ofis long Netelan i tok ol brata i winim Ministerial Trening Skul ol i “gutpela piksa long ol yangpela man husat i tingting long ol bai mekim wanem long laip bilong ol.”

Wok Wantaim Ol Kongrigesen Bilong Narapela Tok Ples

Long planti kantri, wok bilong autim gutnius long ol man long tok ples bilong ol yet i wok long kamap strong. Planti brata i winim Ministerial Trening Skul ol i save lainim narapela tok ples na mekim wok long ol hap we i gat planti man bilong ol narapela ples. Olsem: Long Beljam, ol i sot long ol man bilong autim tok bilong Kingdom long tok ples Albenia, Persia, na Rasia.

Ol kongrigesen bilong ol narapela tok ples long Amerika, Briten, Itali, Jemani, Meksiko, na long ol narapela kantri, ol i kisim bikpela helpim pinis long ol wasman raun, elda, na kongrigesen sevan husat i bin winim Ministerial Trening Skul. Brens long Korea i tok olsem “inap olsem 200 brata i winim skul i mekim bikpela wok long helpim ol kongrigesen na grup bilong ol narapela tok ples.”

Mekim Ol Narapela Wok Long Pasin Daun

Ol brata i winim Ministerial Trening Skul i wok long ol grup na kongrigesen bilong ol narapela tok ples, na tu, ol i mekim wok elda, kongrigesen sevan, na wasman raun. Sampela i go mekim wok long ol narapela kantri, ating ol i wok long Dipatmen Bilong Wok Autim Tok long wanpela brens ofis. Ol brata i gat save long wokim haus, ol inap insait long wok bilong sanapim ol Haus Kingdom.

Namba bilong ol kongrigesen na sekit long olgeta hap i wok long i go antap, olsem na oltaim i gat wok long kisim sampela wasman raun moa. Bilong inapim dispela wok, ol i makim sampela brata i winim Ministerial Trening Skul long kisim narapela skul inap 10-pela wik bilong lain long mekim wok wasman raun, na bihain ol i kamap helpim bilong wasman sekit o mekim dispela wok fultaim. Inap olsem 1,300 brata i winim skul i mekim wok wasman raun long 97 kantri. Long wanpela kantri long Afrika, inap 55 pesen bilong ol wasman raun i bin winim Ministerial Trening Skul. Long narapela kantri long Afrika, inap 70 pesen bilong ol wasman raun i bin winim dispela skul.

Long Amerika, Australia, hap bilong Is, Kanada, na Yurop, planti handet brata i winim dispela skul, na ol i salim ol long mekim sampela wok long ol narapela kantri. Long dispela rot, dispela skul i bin helpim ol man long olgeta hap.

Long rot bilong Pikinini bilong em, Jisas Krais, Jehova i bin kamapim ol man bilong autim tok, ol wasman, ol tisa, na ol narapela husat i helpim wok bilong Kingdom long dispela taim bilong las de. Olsem wanem? Namba bilong lain bilong God inap i go bikpela moa? Yes, em bai i go bikpela! Olsem na planti brata moa i dediket pinis i mas wok long winim mak bilong mekim ol bikpela wok. (Aisaia 60:22; 1 Timoti 3:​1, 13) Ministerial Trening Skul i opim rot long ol elda na kongrigesen sevan long ol i ken mekim bikpela wok moa, dispela bai helpim ol yet na ol narapela long olgeta hap.

[Futnot]

[Ol Piksa long pes 10]

Ministerial Trening Skul i helpim wok bilong Kingdom long olgeta hap

[Ol Piksa long pes 13]

Yu gat laik long go long Ministerial Trening Skul na helpim ol narapela?