Jehova i Skulim Yumi
1 Long nau Jehova i stiaim wok bilong skulim lain bilong em long 233 kantri. I no gat wanpela skul bilong dispela graun i gutpela olsem dispela skul. Nambawan Tisa bilong yumi, Jehova, em i skulim yumi olsem wanem yumi ken helpim yumi yet long nau, na em i skulim yumi tu bilong helpim yumi long kisim laip oltaim.—Ais 30:20; 48:17.
2 Ol Skul Bilong Jehova: Tingim ol skul i wok long helpim lain bilong Jehova long nau. Skul Bilong Wok Autim Tok, ol i mekim long olgeta wik long 87,000 samting kongrigesen, i lainim planti milion pablisa bilong Kingdom long kamap gutpela wokman bilong autim gutnius. Olsem wanem? Yu insait long en? Yu wanpela bilong ol planti tausen brata sista i bin go long Skul Bilong Wok Painia inap tupela wik? Aua bilong ol painia oltaim i go daun na ating dispela bai helpim planti moa long mekim wok painia na ol inap i go long dispela skul. Na Skul Bilong Lainim Wok Bilong Lukautim Kongrigesen em ol i save mekim inap 2-pela mun, nau ol i mekim long ol bikpela tok ples long olgeta hap bilong graun, em i helpim ol elda na wokman i singel long mekim ol bikpela wok moa bilong Jehova. Sampela taim ol elda na wokman i lain long ol bikpela samting long Skul Bilong Wok Kingdom.
3 Sosaiti i mekim wok long ol haus samting long Wastaua Edukesen Senta long Patesen, Nu Yok, bilong mekim 3-pela bikpela skul bilong helpim ol brata sista long save moa long ol samting bilong God. Insait long 5-pela mun Wastaua Baibel Skul Bilong Gileat i helpim na redim ol misineri bilong mekim wok misineri long ol narapela kantri. Ol brata bilong ol Komiti Bilong Brens long olgeta hap bilong graun ol i save go long wanpela skul inap 2-pela mun bilong lain long lukautim gut ol wok bilong ol brens-ofis. Long Me 1999, ol i kirapim wanpela nupela skul bilong ol wasman bilong raun na 48 sumatin bilong Amerika na Kanada ol i insait long en, ol i skul inap 2-pela mun. Olgeta wokman bilong Jehova i kisim ol gutpela samting long rot bilong ol dispela narapela narapela skul Jehova i givim long yumi.
4 Skul Bilong Mekim Wanem? Wanpela brata long Lain Bilong Bosim Ol Witnes i tok: ‘Program bilong dispela skul bilong yumi long nau, em i bilong helpim lain bilong Jehova long olgeta hap long kamap strong long ol samting olsem Sindaun 1:1-4 i kolim.’ Jehova i ken wok yet long givim yumi wan wan dispela gutpela save bilong ol man em i bin skulim ol.—Ais 50:4.