Wastaua Edukesen Senta i Salim Ol Misineri i Go
WASTAUA Baibel Skul Bilong Gileat i bin wokim planti klas long kain kain ples. Namel long 1943 na 1960, long Saut Lansing, Nu Yok, long Yunaitet Stets, i gat 35 klas i kamap, i gat ol sumatin bilong 95 kantri, na ol i lain long mekim wok misineri. Bihain ol i senisim ples bilong wokim skul na ol i mekim long nambawan ofis long Bruklin, Nu Yok, na ol i wokim dispela skul long en klostu 28 yia. Orait, kirap long 1988 i go inap long Mas samting bilong 1995, Skul Gileat i wokim ol klas long Wolkil, Nu Yok.
Insait long ol dispela yia, ol i kirap na wokim dispela skul long sampela hap moa. Ol i wokim 3-pela klas bilong dispela skul long Meksiko, na ol sumatin i skul inap 10-pela wik. Na 5-pela klas olsem i kamap long Jemani, na tupela long India. Kirap long 1987 i gat narapela skul i kamap, em Skul Bilong Lainim Wok Bilong Lukautim Kongrigesen, na dispela skul i wokim pinis ol klas long 34 kantri, na ol yangpela man i winim mak bilong go long dispela skul, ol i lain inap 8-pela wik. Tasol long namba 99 klas bilong Skul Gileat long nupela haus skul ol i kolim Wastaua Edukesen Senta long Patesen, Nu Yok, ol sumatin i skul inap 20 wik, na ol i stadi long olgeta tok bilong Baibel, na long stori bilong oganaisesen bilong ol Witnes Bilong Jehova long nau, na ol i kisim bikpela skul long pasin bilong mekim wok misineri long ol narapela kantri.
Long Septemba 2, dispela namba 99 klas i mekim bung bilong winim skul. Ol i wokim long Wastaua Edukesen Senta long wanpela nupela rum bilong mekim ol bikpela bung olsem, na program bilong en i go inap 3-pela aua. Planti man ol i bung na ol inapim olgeta sia. Na ol brata sista i stap long ol haus Betel long Patesen na Wolkil na Bruklin, ol i harim dispela program long rot bilong televisen. Dispela em i bikpela de tru bilong ol sumatin bilong dispela klas wantaim famili bilong ol na ol gutpela pren bilong ol na planti handet volantia em ol i bin wokim dispela nupela haus skul.
Carey Barber bilong Lain Bilong Bosim Ol Witnes em i mekim tok bilong kirapim bung, na em i toktok long dispela bikpela samting i kamap. Em i tok: ‘Long rot bilong dispela skul God i mekim bikpela wok tru long skulim ol man, na long olgeta taim bipo i no gat wanpela wok olsem i bin kamap long graun.’ Em i tok, nau yumi kamap klostu long pinis bilong dispela pait i stap namel long lain bilong meri na lain bilong snek. (Stat 3:15) Na em i tok, ol man i abrusim bagarap long bikpela pait bai kamap long taim bilong bikpela hevi klostu i laik kamap, em ol man i bin kisim stretpela save long Baibel na ol i bihainim tok bilong en.
Em i tokaut olsem: ‘Program bilong dispela skul bilong yumi long nau, em i bilong helpim lain bilong Jehova long olgeta hap long kamap strong long ol samting olsem Sindaun 1:1-4 i kolim—olsem gutpela tingting, na gutpela pasin, na kisim gut as bilong ol tok, na wokabaut olsem man i gat gutpela save, na bihainim ol gutpela na stretpela pasin, na mekim wankain stretpela pasin long olgeta man, na kisim gutpela save, olsem pasin bilong wokim gutpela tingting.’ Sapos yumi gat ol dispela gutpela pasin, olsem ol samting bilong mekim wok long en, dispela bai lukautim gut yumi!
Tok Bilong Helpim Ol Sumatin
Bihain long dispela tok bilong kirapim bung, i gat 5-pela sotpela tok bilong helpim dispela klas i bin winim skul. Harold Jackson, bipo em i wanpela tisa bilong Skul Gileat na nau em i wok long hetkota long Bruklin, em i tokim ol sumatin, “Holimpas Bel Isi God i Givim Long Yu.” Lloyd Barry, em i bin mekim wok misineri inap planti yia na nau em i insait long Lain Bilong Bosim Ol Witnes, em i mekim wanpela tok, “Mekim Wok Bilong Jehova Long Pasin Daun.” Em i tok, em i bikpela samting long ol sumatin i gat dispela pasin taim ol i go long ol nupela ples wok na ol i mas lain long nupela sindaun na long i stap wanbel wantaim ol wanwok misineri na ol kongrigesen ol bai wok wantaim ol, na ol manmeri bilong dispela hap.
Karl Adams, em i save mekim sampela wok long Skul Gileat, em i mekim wanpela tok, “Bilip Bai Kirapim Yu Long Mekim Wanem?” Em i tokim ol sumatin, ol i no ken bihainim pasin bilong ol Israel, em ol i toktok planti long sindaun bilong ol long ples wesan nating na ol i laik tru long i go bek long Isip. Ol i mas bihainim pasin bilong Abraham, em i wetim Kingdom bilong God i stretim ol hevi, na em i no ting sapos em i go bek long Ur long hap bilong Kaldia ol hevi bilong em bai pinis, nogat. (Kisim Bek 16:2, 3; Hibru 11:10, 15, 16) Ulysses Glass, em wanpela tisa bilong skul, em i mekim tok, “Tingim Ol Blesing Yu Bin Kisim.” Bilong helpim ol sumatin, em i stori long ol samting i bin painim Asap, olsem i stap long Song 73. Na Albert Schroeder, em i insait long Komiti Bilong Wok Tisa long Lain Bilong Bosim Ol Witnes, em i toktok long “Jehova i Save Givim Ol Samting Long Yumi.” Bilong kamapim klia dispela samting, em i tokim ol long tingim Skul Gileat na ol samting dispela skul i mekim bilong inapim dispela bikpela wok bilong autim tok na kamapim ol disaipel.
Bihain ol i harim wanpela tok bilong presiden bilong Sosaiti Was Taua, Milton Henschel, em “Yumi Olsem Ol Hap Bilong Wanpela Bodi.” Em i kaunim na stori long planti tok bilong Rom sapta 12, na em i tok: “Yumi mas tingim gut wanpela samting olsem: Yumi stap olsem brata brata wantaim ol wanwok bilong yumi insait long kongrigesen.” Na em i tok: “Yumi mas tingim narapela narapela olsem ol i bilong Jehova, olsem na oltaim yumi mas redi long helpim ol—yumi no ken skelim skelim ol na toktok planti long ol liklik popaia o pasin kranki bilong ol. Taim yumi wok long helpim kongrigesen long i stap wanbel long spirit, yumi helpim yumi yet.” Em i tok, wanpela pasin bilong helpim ol narapela, em pasin bilong yumi long redim kaikai long haus misineri; yumi mas tingim sampela misineri ol i no inap kaikai wankain samting olsem ol narapela. Na taim yumi mekim wok autim tok wantaim sampela Kristen ol i stap rabis long ol samting bilong skin, yumi mas helpim ol—yumi no ken sutim sampela tok long ol. Na Brata Henschel i tok, sapos yumi man bilong helpim tru ol man, na yumi mekim gutpela tok bilong strongim narapela narapela, “Jehova bai laikim tru yumi.” Em gutpela tok tru bilong givim long ol dispela misineri ol bai wok long ol narapela kantri i narapela kain tru long kantri ol bai lusim!
Bilong Save Gut Long Dispela Klas
Ol dispela 48 sumatin bilong namba 99 klas, averes krismas bilong ol em 32, na ol i winim pinis 11-pela yia long wok painia.
Ol i toktok wantaim sampela sumatin long pletfom na bai ol manmeri i sindaun harim program ol i ken save long ol. Nikki Liebl bilong Amerika, na Simon Bolton bilong Inglan, ol i stori long sampela samting i bin traim bilip bilong ol olsem Jehova bai lukautim ol long ol samting bilong skin. Ol i putim wok painia olsem namba wan samting bilong ol, olsem na Jehova i bin lukautim ol.
Tok ples bilong Isabelle Kazan em tok Frans, na em i tok em i bin lainim tok ples Arap bambai em i ken autim tok long ol man long kantri bilong em ol i save mekim tok Arap. Taim em i kirap mekim olsem long 1987, i gat wanpela liklik grup long Paris i gat 4-pela brata tasol em ol i save mekim tok Arap, na em wantaim narapela sista em ol i wok long lainim dispela tok ples. (Ol i hatwok tru long lain. Ol i save lusim 8-pela aua long redim stadi Wastaua bilong ol long olgeta wik na bai ol inap bekim tok.) Olsem wanem? Gutpela samting i kamap long hatwok bilong ol? Tru tumas. Long nau i gat 5-pela sekit long Frans em i bilong ol Witnes i save mekim tok Arap. Narapela sumatin, em Miko Puro, em i stori olsem tok ples Frans em i bin lainim long skul i helpim em long autim tok long ol ranaweman bilong Afrika ol i sindaun long kantri bilong em, Finlan, na bai em inap mekim wok long dispela tok ples taim em i go mekim wok misineri long Benin. Bonny Bowes i stori long hatwok bilong em long lainim tok Frans bambai em i ken mekim gut wok bilong autim tok long hap bilong Kwibek, long Kanada. Na Bjarki Rasmussen bilong Denmak i kamapim sampela stori bilong wok autim tok em wantaim meri bilong em i bin mekim long ol ailan Fero. Em nau, ol dispela nupela misineri ol i gat save pinis long mekim wok painia.
Ol i makim ol dispela nupela misineri long i go long 19 kantri long Afrika, Sentral na Saut Amerika, Isten Yurop, Esia. Ol misineri bilong ol narapela klas i bin kamap bipo, ol i bin mekim wok long 200 kantri samting. Planti ol i mekim yet wok misineri long ol dispela hap. Nau ol dispela nupela misineri i bung wantaim ol long bringim tok bilong Kingdom i go long olgeta hap bilong graun.—Aposel 1:8.
[Ol Piksa long pes 25]
Em dispela klas long Wastaua Edukesen Senta
[Piksa long pes 26]
Namba 99 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.
[Ol Piksa long pes 27]
Ol i wok misineri yet long ples wok bilong ol: (han kais) Charles Leathco wantaim meri bilong em Fern, long Brasil, ol i bilong namba wan na namba sikis klas bilong Skul Gileat; (daunbilo) Martha Hess, long Japan, em i bilong namba seven klas bilong Skul Gileat