Ripot Bilong Wok Bilong Kingdom
Long Kolombia Ol i Kamap Fri Long Ol Samting Bilong Lotu
KIRAP long taim ol soldia bilong Spen i bin kam long Saut Amerika, misin Katolik i bin bosim strong ol man long ol samting bilong lotu. Long Kolombia, inap longtaim pinis gavman i bin orait long misin Katolik i stap olsem namba wan lotu. Inap olsem 105 yia Vatiken wantaim gavman bilong Kolombia i bin insait long wanpela kontrak i tok olsem: Gavman bai lukautim misin na givim namba long en bilong bosim ol samting bilong skul na marit.
Long Disemba 1990, ol man bilong Kolombia i vot bilong makim wanpela lain bilong wokim nupela as lo bilong gavman, em ol i wokim pinis namel long yia 1991. Dispela as lo i senisim ol samting bilong lotu long Kolombia. Nau olgeta misin i wankain long ai bilong gavman na ol i no ken subim pikinini long kisim lotu long ol skul bilong gavman. Nau ol i laik stretim sampela hap bilong dispela kontrak na tingim ol senis i bin kamap long dispela as lo.
Ol man bai stap fri moa long ol samting bilong lotu, olsem na Misin Katolik bai i no gat bikpela strong olsem bipo, na ol man i gat gutpela bel bai ol i no hatwok moa long kisim save long Baibel na kamap fri tru long ol samting bilong lotu.
Ol 51,000 Witnes Bilong Jehova long Kolombia ol i wet long dispela taim bilong kamap fri, olsem na ol i bin stretim rot bambai ol inap helpim ol man i sot long ol samting bilong spirit. Nau ol i wokim nupela brens-ofis em i bikpela tru, winim bilong bipo, na i gat wanpela masin i wokim hariap ol buk samting long kala kala. Bilong painim ol sipsip bilong Jehova i lus, sampela Witnes i bin mekim wok painia salim inap liklik hap taim long ol liklik taun, na ol i bin lainim gut planti manmeri long ol tok bilong Baibel. Inap 47 nupela kongrigesen na grup i bin kamap long 63 taun, em ol wan wan taun i gat inap olsem 10,000 manmeri i stap long en.
Taim spirit bilong Jehova i wok long kirapim ol man i gat gutpela bel, planti yangpela tu i bilip. Buk Sampela Askim Bilong Ol Yangpela—Ol Gutpela Bekim i bin helpim gut ol dispela yangpela wantaim papamama bilong ol. Taim wanpela Witnes i go long ol haus na autim tok, em i bin bungim wanpela man em i kaunim pinis sampela hap bilong dispela buk, em narapela man i bin givim long em. Em i laikim tru ol gutpela tingting na save em buk i kamapim bilong stretim ol hevi bilong famili. Na em i laikim moa yet ol tok bilong sapta 4, “Bilong Wanem Papamama i Katim Marit?” Em i laik lusim meri bilong em, tasol dispela buk i bin helpim em long stretim dispela hevi. Nau em wantaim famili bilong em ol i stadi wantaim ol Witnes long Baibel na ol i save go long ol miting bilong kongrigesen. Ol i amamas tru long ol gutpela tingting na save em Jehova i kamapim long rot bilong Baibel na oganaisesen bilong em.
Dispela stori i kamapim klia olsem planti man long Kolombia i wok long kamap fri long ol samting bilong lotu, long wanem, ol Witnes Bilong Jehova i wok long helpim ol man i hangre long ol samting bilong spirit—ol i laik tru long kisim save long nupela taim, em klostu nau Jehova bai kamapim.—2 Pita 3:13.