Stap Fri Long Lotu Dispela i Makim Wanem Samting Long Yu?
Long Yunaitet Stets, ol i tok olgeta man i ken stap fri long lotu, tasol long ol yia bihain long 1940 planti taim ol bikpela lain i bung na mekim nogut long ol Witnes Bilong Jehova
PLANTI milion i bin pait long kisim dispela samting. Na sampela i bin dai long wanem ol i laik kisim. Em i wanpela nambawan samting tru bilong yumi ol man. Em wanem samting? Em pasin bilong i stap fri! Wanpela buk dikseneri (The World Book Encyclopedia) i tok, dispela tok ‘stap fri’ i makim olsem “man i ken makim wanem wanem rot em i laikim, na bihainim dispela rot.” Buk i tok moa: “Lo i tok, ol man i stap fri sapos kantri i no pasim ol tumas long rot bilong ol hatpela lo, na ol lo i no gat as, o i no stret. Na kantri i mas helpim ol man na bai ol i ken mekim ol samting i stret ol i ken mekim, olsem: Stap fri long bihainim laik bilong ol yet, o mekim wanem wok ol i laik mekim, o kisim wanem namba ol i laik kisim.”
Yumi inap ting olsem i no hatwok long bihainim dispela tok. Tasol i olsem ol man i no inap wanbel liklik long ol i ken stap fri inap long wanem mak. Olsem: Sampela i ting gavman i mas kamapim ol lo bilong lukautim pasin bilong lain bilong en long i stap fri. Tasol sampela i tok, ol dispela lo yet bai kalabusim ol man na ol dispela lo i mas tekewe na bai ol man i ken stap fri! Olsem na ol man i gat narapela narapela tingting long pasin bilong i stap fri.
Olsem Wanem Long Stap Fri Long Lotu?
Ating nambawan samting ol man i save tok pait strong long stap fri long en, em lotu. Stap fri long lotu i makim olsem, “man i ken bilip na bihainim wanem lotu em yet i makim.” Wanpela sata bilong Yunaitet Nesen (Universal Declaration of Human Rights) i tok, “olgeta man i mas stap fri long bihainim tingting, o bel, o lotu bilong em.” Dispela i makim tu olsem man i ken “senisim lotu o bilip bilong em,” na em i stap fri “long kamapim lotu o bilip bilong em long taim em i skulim narapela, na long bihainim lotu, na long mekim ol pasin bilong lotu.”—Article 18.
Olsem na i stret yumi ken ting, olgeta kantri i tingim tru lain bilong en ol i mas larim ol i stap fri olsem yumi stori pinis. Tasol sori tru, sampela taim ol i no mekim olsem. Wanpela buk i tok: “Lotu i save mekim sampela bikpela samting long bel bilong planti man. Sampela gavman i pas tru long wanpela lotu na ol i ting, nogut ol man bilong ol narapela lotu bai i no laik daun long wok bos bilong ol. Na ating gavman i ting olsem lotu bai daunim strong bilong gavman, long wanem, lotu inap tok, lo bilong God i namba wan na lo bilong gavman i namba tu.”—The World Book Encyclopedia.
Ol dispela samting i mekim na sampela gavman i tambuim sampela wok bilong lotu. Na wan wan gavman i tambuim olgeta lotu. Sampela gavman i tok ol man i ken stap fri long lotu, tasol ol i bosim strong olgeta wok bilong lotu.
Tingim samting i bin kamap inap planti yia long Meksiko. Lo Konstitusen i orait long man i ken stap fri long lotu, tasol em i tok: “Ol haus lotu i bilong Kantri, na Gavman i stap olsem maus bilong en, olsem na Gavman i mas makim wanem ol haus lotu ol man i ken mekim lotu long en.” Long 1991 ol i senisim Konstitusen na pinisim dispela lo. Tasol dispela samting i bin kamap long Meksiko i makim olsem long ol narapela narapela kantri, ol gavman i gat narapela narapela tingting long pasin bilong i stap fri long lotu.
Narapela Kain Pasin Bilong i Stap Fri
Olsem wanem? Long kantri bilong yu, ol man i stap fri long lotu? Sapos olsem, ol i stap fri olsem wanem? Yu inap lotuim God long pasin yu yet i makim, o ol i subim yu long insait long misin bilong gavman? Yu inap kaunim ol buk samting bilong lotu o tilim long ol narapela, o gavman i tambuim ol dispela kain buk? Yu inap toktok wantaim ol narapela long lotu bilong yu, o ol i ting dispela i pasim ol long bihainim lotu ol yet i laikim?
Wanem wanem kantri yu stap long en, ating dispela bai stiaim tingting bilong yu taim yu bekim dispela askim. Tasol i gat wanpela kain pasin bilong i stap fri long lotu na dispela i no save senis, maski yu stap long wanem wanem kantri. Taim Jisas i stap long Jerusalem long yia 32 C.E., em i tokim ol disaipel bilong em olsem: “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri.”—Jon 8:31, 32.
Dispela tok bilong Jisas i makim wanem samting? Ol Juda i harim tok bilong em, ol i laik kamap fri na bai ol i no ken i stap aninit moa long gavman bilong Rom. Tasol Jisas i no stori long kain pasin olsem bilong kamap fri. Nogat. Em i tokim ol disaipel long wanpela samting i winim tru dispela samting, na stori i kam bihain bai kamapim klia.