Tok Bilong God i Gat Laip
De Bilong Kot Bai i Olsem Wanem?
BAIBEL i no stori long De Bilong Kot olsem planti man i ting long en. Yumi no ken pret long dispela De. Lukim ol dispela piksa hia. Ol dispela piksa i makim sampela gutpela samting bai painim ol man long taim bilong De Bilong Kot.
Baibel i tok, God i makirn Krais Jisas bilong i stap Jas long taim bilong De Bilong Kot. (Aposel 17:31) Na yumi ken save, em bai skelim ol man long stretpela pasin. Kot Bilong em bai stret olgeta.—Aisaia 11:3-5.
Krais i no ken skelim ol man long ol samting nogut bipo ol i bin mekim, olsem planti man i ting. Ating taim ol i no i dai yet ol i no gat save long God, na Baibel i tok taim man i dai ol rong bilong em i tekewe na God i no tingim moa. Baibel i tok: “Man i dai pinis, em i no pas moa long sin.” (Rom 6:7, NT) Olsem na taim man i kirap bek God bai skelim em long ol samting em i mekim long taim bilong De Bilong Kot. God i no ken skelim em long samting em i bin mekim taim em i no i dai yet.
Olsem na dispela De Bilong Kot em i no wanpela de tru i gat 24 aua bilong en. Dispela De Bilong Kot em inap olsem 1,000 yia. Na long dispela taim bilong 1,000 yia bai Krais na ol wanwok bilong em i stap king na bosun ol manmeri God i bin kisim bek ol. (Revelesen 20:4, 6) Long dispela taim ol manmeri bai wok wantaim long mekim graun i kamap gutpela ples gen olsem paradais. Na bihain ol man i dai pinis bai ol i kirap bek.—Luk 23:43.
Taim ol dispela manmeri i kirap bek na bung gen wantaim famili bilong ol bai i gat bikpela amamas tru! Bai ol i amamas long i stap wanbel wantaim, na i no gat sik samting! Na bai ol i amamas long kisim save long laik bilong God! Long taim bilong dispela De Bilong Kot, olgeta manmeri bai kisim save long God Jehova, na bai ol inap bihainim tok bilong em na lotu long em.
Ol manmeri i mekim wok bilong Jehova long taim bilong dispela De Bilong Kot, bai ol inap kisim laip i stap oltaim. Tasol sampela bai bikhet na ol i no laik mekim wok bilong God. Bai ol i kirap mekim pasin nogut. Olsem Baibel i tok: “Maski ol i mekim gut long man nogut, em i no ken lain long mekim stretpela pasin. Long ples i gat stretpela pasin long en em bai mekim pasin i no stret.” (Aisaia 26:10) Ol man nogut i no laik senisim pasin bilong ol, ol bai bagarap. Ol stretpela man tasol i ken i stap na amamas long gutpela ples paradais i kamap long graun.