Nius i Kam Long Olgeta Hap

“Planti manmeri tru inap olsem 60 pesen bilong ol manmeri long graun olgeta ol i gat mobail fon . . . Dispela em i bikpela senis tru, long wanem, 6-pela yia i go pinis, inap 15 pesen tasol i bin i gat mobail fon.” ​​—⁠MACLEAN’S, KANADA.

“Namba bilong ol manmeri i stap long Amerika, em olsem 5 pesen tasol bilong ol manmeri long graun olgeta, tasol Amerika i gat olsem 25 pesen bilong ol kalabusman taim yu skelim wantaim namba bilong ol kalabusman long graun olgeta. Long Amerika, ol i save kalabusim 756 manmeri long olgeta 100,000 100, 000 manmeri, dispela namba i winim namba bilong ol kalabusman long graun olgeta inap 5-pela taim.​​—⁠THE ECONOMIST, BRITEN.

“Pasin bilong rit em i gutpela rot bilong malolo. . . . Maski yu rit inap 6-pela minit tasol, dispela inap daunim sik stress, inap olsem 66 pesen.”​​—⁠INDIA TODAY INTERNATIONAL, INDIA.

I Mas i Gat Ol Man Bilong Tanim Tok

Ol kot, ol lain bilong karimaut lo, ol haus sik, na ol oganaisesen bilong helpim ol man long Amerika, ol i mas i gat helpim bilong kliagut long tok ol man i mekim. I gat planti lain bilong tanim tok i helpim ol man long kliagut long tok narapela i mekim nau long dispela taim em nius Reuters i kolim olsem “taim we ol man bilong kain kain tokples i sindaun wantaim.” Wanpela kampani long California i gat 5,200 wokman bilong tanim tok em ol i save mekim 176 tokples​—⁠kain bikpela tokples olsem tok Saina, Rasia, na Spen, na tu, ol liklik tokples bilong sampela hap bilong Afrika na Meksiko. Ripot i tok, insait long sampela seken tasol, kain kampani olsem inap “skelim wanem tokples man i mekim” na makim wanpela man bilong tanim tok long helpim ol na bai “ol i ken toktok wantaim.”

Lusim Nating Ol Bot

Nius The New York Times i stori long samting i kamap long Amerika, olsem: “Hevi bilong mani i mekim na planti man i lusim nating ol bot bilong ol.” Ol papa bilong bot i sikirapim na rausim ol nem na ol rejista namba long ol bot, na ol i sinkim ol bot i go insait long solwara; sampela taim ol i mekim olsem bambai ol i ken kisim insurens mani bilong ol. I gat wanem as na ol i mekim olsem? Nius Times i tok: “Sampela . . . i gat wankain hevi olsem ol papa bilong haus em ol i no inap baim dinau bilong haus: ol i mas tromoi bikpela mani long bekim dinau long samting em veliu bilong en i go daun, na ol i no laik bekim dinau moa.” Dispela nius i kolim ol dispela bot olsem “ol toi em pe bilong ol i antap tumas bilong lukautim na ol i no laikim moa.” Nius i tok: “Ol papa bilong bot i no inap salim bot bilong ol, long wanem, i gat planti bot i stap pinis long sekenhen maket. Ol i no laik tromoi planti handet dola long olgeta mun bilong baim rent bilong pasis long putim bot na bilong lukautim bot. Na ol i no gat planti tausen dola bilong baim kampani bilong rausim bot.”

Gol i Kamap Long Narakain Rot

Nius Reuters long Japan i tok, long ples Nagano long hap not-wes bilong Tokyo, “ol i bin painim nupela rot bilong kisim gol​—⁠em long rot bilong ol doti wara bilong faktori samting.” Wok painimaut i soim olsem long taun Suwa, ol i kukim ol pipia i stap insait long ol dispela doti wara na sit bilong paia i kamap long en i gat gol em pe bilong en i antap moa long gol ol i kisim long ol bikpela gol main bilong Japan. Ol i ting olsem insait long wanpela yia, dispela taun inap kisim 15 milion yen, olsem 167,000 dola long ol dispela gol. Ripot i tok, ol i ting as na i gat dispela gutpela gol, long wanem, “planti faktori insait long dispela taun i bin yusim gol bilong wokim ol masin samting.”