Ol Man i Askim . . .

Yu Ting Gehena Em Wanpela Ples Paia we Ol Man i Kisim Pen?

▪ Long ol stori bilong ol Gutnius, Jisas i givim tok lukaut long ol disaipel bilong em long abrusim kot bilong Gehena. Jisas i laik bai ol i mas tingim gut dispela tok lukaut. Tasol olsem wanem? Em i tok long wanpela bikpaia we ol man i kisim pen oltaim oltaim?—Matyu 5:22.

Pastaim yumi ken stori long dispela tok Gehena. Tok Grik Geʹen·na i wankain long tok Hibru geh Hin·nomʹ, mining bilong en “Ples Daun bilong Hinom,” o geh veneh-Hin·nomʹ, “ples daun bilong pikinini bilong Hinom.” (Josua 15:8; 2 King 23:10) Dispela ples, nau yumi save long en long nem Wadi er-Rababi, em i wanpela ples i daun tru na i no op tumas, na em i stap long hap saut na saut wes bilong Jerusalem.

Long taim bilong ol king bilong Juda long yia 800 B.C.E. samting, ol i bin yusim dispela ples bilong mekim lotu long ol giaman god na kukim ol pikinini olsem ofa long paia. (2 Stori 28:1-3; 33:1-6) Jeremaia i tok profet olsem dispela ples daun bai i kamap ples we ol Babilon bai kilim i dai ol Juda olsem strafe bilong God long ol pasin nogut ol i bin mekim.a—Jeremaia 7:30-33; 19:6, 7.

Saveman Juda David Kimhi (1160-1235 C.E. samting) i tok, bihain dispela ples daun i kamap ples pipia bilong taun Jerusalem. Paia i save lait oltaim long dispela ples bilong kukim ol rabis ol i tromoi long en. Wanem wanem samting ol i tromoi long dispela ples i pinis olgeta na kamap olsem sit bilong paia.

Planti man bilong tanim Baibel, ol i tanim nating dispela tok Geʹen·na olsem “hel.” (Matyu 5:22, BB) Bilong wanem? Long wanem, ol i tingim bilip bilong ol haiden olsem taim man nogut i dai em i kisim pen oltaim long ples paia na bungim dispela wantaim paia tru tru i save lait long ples daun ausait long Jerusalem. Tasol Jisas i no save tingim Gehena olsem wanpela ples bilong kisim pen.

Jisas i save olsem dispela tingting long kukim man long paia taim em i stap laip yet, dispela em i samting nogut tru long Papa bilong em long heven, Jehova. Long pasin bilong mekim wok long Gehena long taim bilong profet Jeremaia, God i tok: “Ol i bin wokim ol ples bilong lotu ol i kolim Tofet, long Ples Daun bilong Hinom. Na ol i kukim ol pikinini bilong ol yet long paia, olsem ofa long ol giaman god. Tasol mi no bin tokim ol long mekim dispela pasin. Na tu, mi no bin tingting long givim dispela kain lo long yupela.” (Jeremaia 7:31) Dispela tingting olsem God i save givim pen long ol man i dai, em i no stret wantaim ol gutpela pasin bilong God na ol tok Baibel i skulim ol man long en olsem ol man i dai pinis “ol i no inap save long wanpela samting.”—Saveman 9:4, 5, 10.

Jisas i mekim wok long dispela tok “Gehena” bilong makim olsem taim God i givim strafe long man, em bai pinis olgeta. Olsem na mining bilong “Gehena” i wankain long dispela tok “raunwara i gat bikpela paia,” em Buk Revelesen i stori long en. Tupela wantaim i makim pinis olgeta na i no gat kirap bek long en.—Luk 12:4, 5; Revelesen 20:14, 15.

[Futnot]