Jisas i Tok Wanem Long Hel?

Jisas i tok: “Sapos ai bilong yu em i pulim yu long mekim sin, orait yu mas kamautim na tromoi i go. Mobeta yu gat wanpela ai tasol na yu go insait long kingdom bilong God. Nogut yu gat tupela ai na ol i tromoi yu i go long hel. Long dispela ples ‘ol liklik snek i wok long kaikai bodi bilong ol, ol bai i no inap pinis. Na paia i wok long kukim bodi bilong ol, em tu bai i no inap pinis.’ ”​—MAK 9:​47, 48.

Long narapela taim, Jisas i stori long taim bilong kot we em bai tokim ol man nogut olsem: “Yupela manmeri bilong lus, yupela klia long mi na yupela go long paia i no save dai, em dispela paia ol i redim pinis bilong Satan wantaim ol ensel bilong en.” Na em i tok tu olsem ol dispela lain i “kisim pe nogut i save stap oltaim oltaim.”​—MATYU 25:​41, 46; King Jems Nupela Testamen.

LONG namba wan taim, taim yu lukim ol dispela tok bilong Jisas i stap antap, ating i luk olsem Jisas i helpim dispela bilip bilong helpaia. Tasol Jisas i no laik daunim tok bilong Baibel, em Baibel i tokaut klia olsem: “Ol man i dai pinis, ol i no inap save long wanpela samting.”​—Saveman 9:5.

Orait wanem mining bilong tok bilong Jisas long ol bai tromoi wanpela man “i go long hel”? Yu ting tok bilong Jisas long “paia i no save dai” em i wanpela paia tru o tok piksa tasol? Long wanem rot ol man nogut i kisim “pe nogut i save stap oltaim oltaim”? Orait bai yumi skelim ol dispela askim.

Taim Jisas i tok long ol i tromoi wanpela man “i go long hel,” dispela i makim wanem samting? Tok Grik ol i tanim olsem “hel” long Mak 9:47 i makim Geʹen·na. Dispela tok i kam long wanpela tok Hibru, em Geh Hin·nomʹ, insait bilong en i olsem “Ples Daun Bilong Hinom.” Dispela Ples Daun Bilong Hinom i stap ausait long banis bilong Jerusalem. Long taim bilong ol king bilong Israel, ol i save kilim ol pikinini olsem ofa long dispela hap​—em wanpela pasin nogut tru em God i no laikim. God i tok em bai bagarapim ol man i mekim dispela pasin bilong lotuim god giaman. Bihain ol bai kolim Ples Daun Bilong Hinom olsem “ples bilong kilim planti man i dai,” em hap we “planti bodi” bai stap nating long graun na ol i no planim. (Jeremaia 7:​30-​34) Dispela tok bilong Jehova i makim olsem Ples Daun Bilong Hinom bai kamap ples bilong tromoi bodi bilong ol man i dai pinis. Em i no tok em bai kamap ples bilong ol man i stap laip yet na kisim pen, nogat.

Long taim bilong Jisas, Ples Daun Bilong Hinom i stap olsem ples bilong tromoi pipia. Ol i save tromoi tu bodi bilong ol man nogut i dai pinis long dispela ples, na paia i save lait oltaim bilong kukim ol pipia na bodi bilong ol man i dai pinis.

Taim Jisas i stori long ol liklik snek i no inap pinis na paia i no inap pinis, em i kamapim tok bilong Aisaia 66:24. Aisaia i tok: “Ol bodi bilong ol lain i bin bikhet na sakim tok bilong mi [God], ol i dai pinis na slip nabaut long graun. Na ol liklik snek i wok long kaikai bodi bilong ol, bai ol i no inap pinis. Na paia i wok long kukim bodi bilong ol, em tu bai i no inap pinis.” Jisas na ol man i harim tok bilong em, ol i save olsem Aisaia i stori long samting ol i save mekim long bodi bilong ol man i dai pinis em ol i ting i no stret long planim gut ol long matmat.

Olsem na Jisas i tok piksa long Ples Daun Bilong Hinom, o Gehena, bilong makim man i dai na pinis olgeta na i no gat rot bilong em long kirap bek. Em i kamapim klia dispela samting taim em i tok God inap “bagarapim spirit na bodi tu long hel [tok Grik, “Gehena”].” (Matyu 10:28) Jisas i tok piksa long Gehena bilong makim man i dai na pinis olgeta, na i no bilong makim olsem man i kisim pen inap oltaim oltaim, nogat.

Dispela “paia i no save dai” em Jisas i tok lukaut long en, em i paia tru o tok piksa tasol? Tingim, dispela “paia i no save dai” em Jisas i stori long en long Matyu 25:​41, em paia ol i redim pinis “bilong Satan wantaim ol ensel bilong en.” Yu ting paia tru inap kukim ol ensel? O Jisas i tok piksa tasol long “paia”? Long dispela tok bilong Jisas, em i stori tu long “ol sipsip” na “ol meme,” tasol ol i no sipsip na meme tru tru, nogat. Ol i makim tupela kain lain. (Matyu 25:​32, 33) Dispela paia i no save dai em Jisas i toktok long en na i kukim ol man nogut, em i tok piksa tasol.

Olsem wanem ol man nogut i “kisim pe nogut i save stap oltaim oltaim”? Planti Baibel i kolim dispela tok “pe nogut” long Matyu 25:​46, tasol insait bilong dispela tok Grik koʹla·sin, i olsem “katim na rausim han bilong diwai samting.” Olsem na ol man i olsem sipsip ol i kisim laip oltaim oltaim, na ol man i olsem meme na ol i no tanim bel, ol i kisim “pe nogut i save stap oltaim oltaim,” dispela pe em olsem God i katim na rausim laip bilong ol.

Yu Gat Wanem Tingting?

Jisas i no tok ol man i gat wanpela spirit i no save dai, nogat. Tasol planti taim em i tok ol man i dai pinis, ol bai kirap bek. (Luk 14:​13, 14; Jon 5:​25-​29; 11:25) Sapos Jisas i bilip olsem ol man i gat wanpela spirit i no save dai, orait bilong wanem Jisas i tok ol man i dai pinis ol bai kirap bek?

Jisas i no skulim ol man olsem God bai givim pen long ol man nogut i go inap oltaim oltaim, nogat. Jisas i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) Tok bilong Jisas i makim olsem ol man i no bilip long em, ol bai dai. Tasol sapos tok bilong em i makim olsem ol man nogut bai stap oltaim oltaim na kisim pen long helpaia, ating em bai tokaut stret long dispela, a?

Baibel i no as bilong dispela bilip olsem hel em i ples bilong kisim pen. Dispela bilip em i wanpela bilip haiden, em ol man i giaman na i tok em i wanpela bilip Kristen. (Lukim blok “Sotpela Stori Bilong Hel,” long pes 6.) God i no save givim pen long ol man inap oltaim oltaim long hel, nogat tru. Orait taim yu kisim save long hel em i wanem samting tru, dispela inap givim wanem tingting long yu long God?

[Blok long pes 6]

SOTPELA STORI BILONG HEL

OL BILIP HAIDEN I AS BILONG EN: Ol lain Isip bilong bipo i bilip long hel. Wanpela buk (The Book Ȧm-Ṭuat) bilong yia 1375 B.C.E., i stori long ol man em ol bai “tromoi ol i go daun long paia; na . . . ol i no inap lusim dispela ples, na . . . paia bai kukim ol.” Plutarch em wanpela saveman bilong Grik (46-​120 C.E. samting) i stori long ol man i go daun long wanpela ples i stap insait long graun olsem: “[Ol] i krai nogut tru taim ol i kisim bikpela pen na kain kain strafe.”

SAMPELA LAIN BILONG LOTU JUDA I KISIM BILIP BILONG HEL: Saveman Josifas (37-​100 C.E. samting) i tok olsem ol Esin, em wanpela lain Juda, ol i bilip olsem “spirit bilong ol man i no save dai, em i save stap oltaim oltaim.” Dispela saveman i tok moa: “Dispela i wankain long tingting bilong ol Grik . . . Ol i ting olsem spirit bilong ol man nogut i save go stap kalabus long wanpela ples i tudak i pulap long kain kain samting bilong givim strafe.”

OL LOTU “KRISTEN” I KISIM BILIP BILONG HEL: Buk Apocalypse of Peter (ol i raitim 100 yia samting bihain long Krais) i tok long ol man nogut olsem: “I gat paia i no save dai i wetim ol i stap.” Em i tok tu olsem: “Ezrael, ensel bilong belhat, em i kisim ol man na meri em hap bodi bilong ol i paia na i tromoi ol i go insait long ples tudak, em hel; na wanpela spirit bilong belhat i givim strafe long ol.” Wanpela man bilong raitim buk, em Tiofilus bilong Antiok (em tu i stap bihain long taim bilong Krais), em i kamapim tok bilong Sibyl, em wanpela profet meri bilong Grik, em i bin stori long ol strafe em ol man nogut bai kisim: “Paia bai kam na long olgeta de paia bai kukim yupela.” Dispela em wanpela bilong ol tok em Tiofilus i tok em i “tru na i stret na i gutpela bilong helpim ol man.”

NAMEL LONG YIA 500 NA 1600, BILIP BILONG HELPAIA I STAP OLSEM AS NA MAN I MEKIM NOGUT TRU LONG NARAPELA: Mary Namba 1, em kwin bilong Inglan (1553-​1558), em i orait long ol i kukim 300 manmeri bilong lotu Talatala long paia. Em i bin tok: “Ol lain i lusim bilip, spirit bilong ol bai go long hel na paia bai kukim oltaim, olsem na i stret long mi ken bihainim pasin bilong God na kukim dispela lain long paia taim ol i stap laip yet long graun.”

NUPELA MINING BILONG HEL: Long nau, sampela lotu i bin senisim bilip bilong ol long hel. Long 1995, wanpela lain bilong Sios Bilong Inglan i tok: “Hel i no makim strafe bilong kisim pen oltaim oltaim, nogat. Em i makim olsem man i birua olgeta long God, bihain em bai pinis olgeta na em i no ken i stap moa.”

[Blok/Piksa long pes 7]

“BIKPELA HUL I GAT HATPELA PAIA” EM WANEM SAMTING?

Kamapim Tok Hait 20:10 i tok olsem ol bai tromoi Satan i go daun long “bikpela hul i gat hatpela paia” na em “bai i karim pen long san na long nait inap oltaim oltaim.” Sapos Satan bai kisim pen inap oltaim oltaim, orait God i mas larim em i stap laip, a? Tasol Baibel i tok olsem Jisas bai “bagarapim Satan.” (Hibru 2:14) Dispela bikpela hul i gat paia em tok piksa na i makim “namba 2 dai.” (KTH 21:8) Dispela namba 2 dai i no makim dispela dai em ol man i kisim long rot bilong sin bilong Adam​—em dispela dai man inap lusim long rot bilong kirap bek, nogat. (1 Korin 15:​21, 22) Baibel i no tok ol man i stap long “bikpela hul i gat hatpela paia long en” ol inap lusim dispela ples na i go, olsem na “namba 2 dai” i mas makim narapela kain dai. Em i makim dai i no gat kirap bek bilong en.

Olsem wanem ol man i stap long bikpela hul i gat paia ol i karim pen oltaim oltaim? Sampela taim, dispela tok “givim pen” inap makim pasin bilong “kalabusim” man. Wanpela taim Jisas i bungim ol spirit nogut, na ol i singaut olsem: ‘Ating yu kam long hia paslain long taim stret bilong givim pen long mipela, a?’ (Matyu 8:​29, KJNT) Olsem na taim Baibel i tok olgeta husat i stap long dispela “hul” ol bai kisim “pen,” dispela i makim olsem ol bai stap kalabus inap oltaim oltaim long “namba 2 dai.”