Wok Bilong God i Go Bikpela Long Yuganda

YUGANDA i stap namel long tupela han bilong wanpela bikpela ples daun (Great Rift Valley) bilong Is Afrika. Ekweta i brukim dispela kantri i luk naispela tru. Yuganda i gat ol maunten na wara, bikbus, na ol kain kain animal. Em i stap long wanpela traipela hap graun bilong Afrika i stap antap liklik, em i no hat tumas na em i gat ol liklik maunten i go i go inap planti handet kilomita.

Sampela hap bilong Yuganda i kol stret na sampela hap i hat stret, tasol planti kantri i no olsem. Long hap wes i gat ol bikpela maunten Moon na ol maunten Ruwenzori em ais i karamapim het bilong ol, na long is i gat hap we ren i no save pundaun tumas. Long ol ples daun bilong Yuganda i gat ol elefan, bafalo, na laion. Long ol maunten na bikbus i gat ol gorila, monki, na winim 1,000 narapela narapela kain pisin. Planti kantri bilong Afrika i gat hevi long hangre na ples i drai, tasol Yuganda i gat planti wara na raunwara, olsem raunwara Victoria, em namba tu bikpela raunwara long graun. Long hap not bilong raunwara Victoria i gat hap we dispela raunwara i bung wantaim wara Nail. Olsem na yumi no kirap nogut long ol man i tok dispela kantri em “pel bilong Afrika”!

“Pel” i Lait Long Nau

Tasol nambawan gutpela samting bilong Yuganda em ol manmeri bilong en. Ol i gat pasin pren, ol i save lukautim gut ol visita, na ol i bilong kain kain lain na ples. Ol man bilong Yuganda i save tok ol i Kristen, na ol i bilong planti narapela narapela lain i gat ol pasin, kastam, na bilas bilong ples bilong ol yet.

Long nau, planti man moa bilong Yuganda i wok long harim gutnius bilong Baibel i stori long taim we bel isi bai stap long olgeta hap bilong graun. (Song 37:11; KTH 21:4) Em i hatwok long kisim dispela gutnius i go long olgeta man long dispela kantri.

Long 1955, namba wan man bilong Yuganda i dediket na kisim baptais long raunwara Victoria na kamap wanpela Witnes Bilong Jehova. Dispela “lain i liklik tru” i kamap planti moa olsem wan tausen long 1992. Kirap long 1955 na i kam, lain bilong Jehova i wok long i go bikpela. Dispela i stret wantaim tok bilong God olsem: “Mi Bikpela, mi tok, ol dispela samting bai i kamap hariap long taim mi makim pinis.”​—Aisaia 60:22.

Winim Hevi Bilong Ol Tok Ples

Tok Inglis em bikpela tok ples long Yuganda na planti man i save yusim dispela tok ples, moa yet long ol skul, tasol em i no tok ples tru bilong planti man Yuganda. Olsem na bilong ol Witnes Bilong Jehova i ken autim tok long planti man moa, ol i mas tingim ol narapela bikpela tok ples. Dispela em i bikpela samting, long wanem, winim 80 pesen bilong 25 milion manmeri bilong dispela kantri, ol i sindaun long ol ples o liklik taun we ol manmeri i save yusim tok ples bilong ol yet taim ol i toktok wantaim ol man long olgeta de. Ol Witnes i mas wok strong tru bilong bungim ol dispela lain bilong kain kain tok ples na helpim ol long lotuim God.

Tasol maski i olsem, ol Witnes Bilong Jehova i bin traim long inapim dispela wok long rot bilong autim tok long ol manmeri long tok ples bilong ol yet na redim ol buk na nius bilong Baibel long kain kain tok ples. Long brens ofis long biktaun, Kampala, i gat lain bilong tanim tok long fopela tok ples: Acholi, Lhukonzo, Luganda, na Runyankore. Na tu, planti man i bin kam long ol kibung Kristen ol i mekim long kain kain tok ples long planti hap bilong Yuganda. Namba bilong ol dispela man i kam long kibung i dabol long namba bilong ol Witnes Bilong Jehova long Yuganda. Dispela i kamapim klia olsem wok bilong autim tok long kain kain tok ples i helpim wok bilong God i go bikpela hariap. Tasol i gat narapela samting tu i helpim dispela wok.

Ol Painia i Go Pas Long Wok

Ol kongrigesen i amamas long sapotim wok bilong autim tok long ol longwe ples. Long olgeta yia sampela i save go na stap inap tripela mun long ol dispela ples. (Aposel 16:9) Planti yangpela painia moa, o lain bilong autim tok fultaim, i save go pas long mekim dispela wok. Ol i save go long ol longwe ples, em long sampela bilong ol dispela ples ol man i no bin harim gutnius bipo.

Ol i makim tupela Witnes long mekim wok painia salim inap tripela mun long Bushenyi, em wanpela liklik taun long hap wes bilong Yuganda. Ol i bung wantaim wanpela Witnes tasol i stap long dispela hap na autim tok wantaim em na stretim rot bilong mekim ol miting Kristen. Insait long wanpela mun, dispela tupela painia i toktok wantaim 40 manmeri long Baibel long olgeta wik, na 17 bilong ol dispela man i kirap kam long ol miting bilong ol Witnes Bilong Jehova. Ol painia i tok: “Mipela i bin tilim buklet God i Laik Yumi Mas Mekim Wanem?a long ol man, na sampela de bihain sampela bilong ol dispela man i kam long haus wantaim ol pepa ol i bin raitim bekim bilong ol askim i stap long dispela buklet. Ol i laik save ol bekim bilong ol i stret o nogat.” Long nau i gat wanpela kongrigesen na Haus Kingdom long dispela taun.

Tupela painia i go long hap wes bilong Yuganda we ol Witnes i no bin autim gutnius bipo. Ol i tok: “Ol manmeri i hangre long tok i tru bilong Baibel. Insait long tripela mun mipela i stap long hap, mipela i bin kirapim na mekim 86 Baibel stadi.” I no longtaim na ol i kamapim wanpela grup bilong ol Witnes long dispela hap.

Ol Narapela i Wok Strong Long Autim Tok

Sampela bilong ol dispela painia i givim bel long wok, ol i bin mekim wok painia inap planti yia pinis. Paslain long Patrick i kamap wanpela Witnes Bilong Jehova, em i bin pilai musik insait long ben bilong ami bilong bikman bilong Yuganda, Idi Amin. Inap sikspela mun bihain long Patrick i kisim baptais long 1983, em i kirap autim tok fultaim. Long nau em i wanpela wasman raun, em i save visitim na strongim ol kongrigesen.

Margaret i kisim baptais long 1962. Maski em i gat 79 krismas samting na hevi i stap long hip bilong em i mekim na em i hatwok long wokabaut, em i save lusim 70 aua samting long olgeta mun long autim tok bilong Baibel long ol narapela man. Em i save putim ol buk na nius long wanpela fom ausait long haus bilong em, na em i kirap toktok wantaim ol man i wokabaut i go i kam na i gat laik long harim gutnius bilong nupela graun em bel isi i stap long en.

Simon em i wanpela fama long hap is bilong Yuganda, na em i bin wok long painim tok i tru inap 16 yia. Long 1995, em i painim sampela buk ol Witnes Bilong Jehova i wokim. Tok em i ritim i kirapim laik bilong em long save moa long Kingdom Bilong God na gutpela samting Jehova i tingting pinis long mekim long graun. I no gat wanpela Witnes i stap long Kamuli, em ples Simon i sindaun long en, olsem na Simon i raun inap 140 kilomita i go long Kampala bilong painim ol. Long nau i gat wanpela kongrigesen long ples bilong em.

“Mipela Bai Stap Olgeta”

Olsem long ol narapela hap bilong Afrika, planti man i ting lain lotu i mas i gat gutpela haus bilong mekim lotu long en. I luk olsem dispela i putim bikpela hevi tru long sampela kongrigesen bilong ol Witnes Bilong Jehova, long wanem, ol i no gat mani bilong wokim Haus Kingdom. Long pinis bilong 1999, ol i strongim wok bilong sanapim ol Haus Kingdom long olgeta hap bilong graun, na ol brata i tenkyu tru long dispela samting. Insait long faipela yia bihain long dispela, ol i bin sanapim 40 nupela Haus Kingdom long Yuganda. Long nau, klostu olgeta kongrigesen i gat gutpela Haus Kingdom bilong ol yet. Long rot bilong wok bilong sanapim ol haus Kingdom i olsem ol Witnes i tokim ol lain man bilong komiuniti olsem, “Mipela bai stap olgeta.” Dispela wok i bin helpim wok bilong God i go bikpela.

Wanpela liklik kongrigesen long hap not bilong Yuganda i bin mekim miting bilong ol aninit long ol diwai mango i gat planti lip. Taim ol i kisim wanpela hap graun, wok i ron hariap. Ol brata i mekim wok konstraksen i wok wantaim ol Witnes bilong dispela ples, na ol i stat long sanapim Haus Kingdom. Wanpela man bipo em i wanpela bikman bilong politik em i kirap nogut long wok bilong ol Witnes. Em i tokim ol long yusim ples em i save putim ka long en bilong ol i ken mekim ol miting i go inap long taim Haus Kingdom i redi. Na em i kirap stadi long Baibel wantaim wanpela konstraksen volantia. Nau em i wanpela pablisa i baptais pinis na i givim bel long wok, em i amamas long lotuim Jehova long dispela naispela nupela Haus Kingdom!

Ol i sanapim Haus Kingdom long hap saut-is bilong Yuganda, na wanpela man bilong wokim ol haus brik i pilim tru pasin pren, pasin laikim, na pasin bilong wok gut wantaim i stap namel long ol brata. Dispela i kirapim em long volantia long helpim wok. Taim wok i laik pinis, em i wok inap wanpela nait olgeta bambai Haus Kingdom i redi bilong ol brata i ken dediketim long de bihain. Em i tok: “Yupela tasol i save laikim tru narapela narapela​—yupela i no toktok tasol long dispela samting.”

Lain Inap Go Bikpela Moa, Maski i Gat Hevi

Ol i autim tok long ol nupela teritori long Yuganda, olsem na namba bilong ol Witnes i wok long i go bikpela na planti man i laik harim tok i save bung wantaim ol kongrigesen. Tasol ol i tingting planti long bikpela lain refiuji i bin kam insait long Yuganda. Pait insait long ol kantri i stap klostu i bin bagarapim sindaun bilong lain bilong Jehova tu. Ol Witnes i stap long ol refiuji kem i bin soim olsem ol i bilip tru long Jehova. Wanpela man em bipo em i bikman bilong wanpela kantri i stap klostu i bin insait long pasin bilong birua long ol Witnes taim gavman i tambuim wok bilong ol. Man ya i tok olsem bipo em i gat gutpela sindaun. Taim em i stadi long Baibel long wanpela refiuji kem na kamap wanpela Witnes pinis, em i tok: “Mani kago na bikpela namba long dispela graun i no gat as tru bilong en. Tru, nau mi stap rabis na mi sik, tasol laip bilong mi i gutpela moa, winim bilong bipo. Mi save long Jehova, na mi amamas tru long mi ken beten. Mi bilip na wet long gutpela taim bai kamap bihain, na mi save i gat wanem as na yumi mas karim ol hevi long nau. Olsem na mi stap bel isi, bipo mi no bin stap bel isi olsem.”

Ol man i save tok olsem sapos long nait yu putim stik insait long graun bilong Yuganda i gat gutpela gris, orait long moningtaim dispela stik i putim pinis ol rop. Wok bilong God i go bikpela long dispela kantri na dispela i soim olsem ol man i redi long kisim tok bilong God. Yumi tok tenkyu long God Jehova long em i bin givim haptaim bambai sampela manmeri moa long Yuganda i ken kisim save long Kingdom bilong em. Jisas i tok Kingdom i olsem “bis i gutpela tru,” na planti manmeri moa bilong Yuganda i wok long pilim dispela samting.​—Matyu 13:​45, 46.

[Futnot]

[Ol Mep long pes 8]

(Bilong save ol dispela rait i stap we long pes, lukim buk o magasin)

SUDAN

YUGANDA

Wara Nail

Kamuli

Tororo

Kampala

Bushenyi

Raunwara Victoria

KENYA

TANSANIA

RUANDA

[Piksa long pes 9]

Tripela bilong planti painia i save wok strong

[Piksa long pes 10]

Patrick

[Piksa long pes 10]

Margaret

[Piksa long pes 10]

Simon

[Piksa long pes 10]

Kibung distrik long Tororo

[Piksa Kredit Lain long pes 8]

Background: © Uganda Tourist Board