Wanpela Visit i Kirapim Man Long Senisim Tingting
TUPELA yangpela meri husat i Witnes Bilong Jehova i bin visitim wanpela man na em i raitim pas na i tok: “Mi no inap wet long tokim ol famili bilong mi long dispela 2-pela angelo God i bin salim i kam long mi.” Sampela wik paslain long dispela visit, meri bilong em i dai, em tupela i bin stap wantaim inap 45 yia olgeta. Bel bilong em i bagarap stret. Bikpela pikinini man na pikinini meri bilong em i bin mekim gut bel bilong em, tasol ol i save stap longwe. No gat wanpela pren o neiba i kam visitim em.
Dispela man i tokim 2-pela yangpela meri Witnes olsem: “Mi no inap beten na toktok wantaim God, mi pilim olsem em i no stap klostu moa long mi.” Ol i pilim tru bel hevi bilong dispela man na ol i lusim wantaim em wanpela liklik nius em Baibel i as bilong en, nem bilong en I Gat Gutpela Samting Bai Painim Ol Man i Dai Pinis? Em i ritim liklik nius long dispela nait stret na bel bilong em i stap isi.
Liklik taim bihain, dispela 2-pela Witnes Bilong Jehova i kam bek. Ol i tingim bek bel hevi bilong dispela man long namba wan taim ol i visitim em na ol i laik save em i stap olsem wanem. Dispela man i tok: “Mi kirap nogut tru, dispela 2-pela meri em mi no save liklik long ol, ol i tingim mi.” Ol tok bilong Baibel ol i bin autim i strongim em tru. Ol dispela meri i tok olsem ol bai kam bek. Dispela man i amamas tru, na dispela i kirapim em long raitim ol tok i stap antap long wanpela pas na em i salim long Haus Kingdom bilong ol Witnes Bilong Jehova i stap klostu.
Paslain long em i go long wanpela hap i stap klostu long pikinini man bilong em, dispela man i bin go long wanpela miting bilong ol Witnes Bilong Jehova na em i bin kaikai wantaim famili bilong wanpela bilong ol dispela yangpela meri. Em i tok: “Mi bai lusim dispela hap, tasol oltaim bai mi tingim dispela tupela yangpela na lotu bilong yupela long bel na long ol beten bilong mi. Tru tumas, nau mi save beten—planti taim. Mi bin senisim tru tingting bilong mi. Dispela tupela yangpela i bin mekim bikpela wok tru, na mi tenkyu long ol.”