Bilip Bilong Em i Strongim Ol Narapela
TAIM mama i karim Silvia long Disemba 1992, i luk olsem em i wanpela liklik pikinini meri i gat strongpela skin. Tasol taim em i gat tupela krismas, ol dokta i tok Silvia i gat sik cystic fibrosis, em wanpela sik nogut tru ol dokta i no inap stretim. Sik i mekim na Silvia i hatwok long pulim win na em i gat sik long bel. Bilong karim hevi bilong sik, Silvia i mas kisim 36 tablet long olgeta de, pulim sampela kain win i gat marasin long en, na em i mas go long haus sik bilong mekim sampela eksasais samting. Waitlewa bilong em i wok inap 25 pesen tasol, olsem na em i mas karim raun wanpela botol oksijen, long taim em i lusim haus tu.
Mama bilong em, Teresa, i tok: “Mipela i kirap nogut long pasin bilong Silvia long karim hevi bilong sik bilong em. Em i save gut long Baibel, olsem na em i gat strongpela bilip. Dispela bilip i helpim em long karim bel hevi na sik bilong em. Long olgeta taim em i save tingim tok promis bilong Jehova long nupela taim bai kamap we God bai oraitim ol sik.” (KTH 21:4) Taim famili bilong em i bel hevi, gutpela smail bilong Silvia i save strongim ol. Em i save tokim papamama na brata bilong em: “Gutpela laip long nupela taim bai stretim ol pen na hevi yumi karim long nau.”
Long olgeta taim Silvia i save autim gutnius bilong Baibel long ol man, na ol man em i save toktok wantaim ol, ol i save lukim olsem pes bilong em i kamapim amamas bilong em. Ol manmeri long kongrigesen Kristen em i save go long en long Canary Islands, ol i save amamas long harim ol tok em i save mekim long ol miting. Na taim ol miting i pinis, Silvia i amamas long toktok wantaim ol brata na sista Kristen bilong em. Em i meri bilong toktok na amamas, na dispela i mekim na olgeta long kongrigesen i save laikim em tru.
Papa bilong em, Antonio, i tok: “Silvia i skulim mipela long wanpela bikpela samting. Maski yumi gat hevi, laip em wanpela presen i kam long God, na yumi mas tenkyu long en.” Olsem Silvia, olgeta wokman bilong God—ol yangpela na lapun—i wetim tru taim we ‘i no gat man i tok, “Mi gat sik.” ’—Aisaia 33:24.
[Piksa long pes 31]
Silvia i ritim wanpela ves bilong Baibel na mama i holim botol oksijen