Wok i Go Bikpela Long Wanpela Naispela Ailan

OL MAN i go raun long Taiwan i kirap nogut tru long ol naispela diwai na grinpela gras samting i karamapim dispela ailan. Ol grinpela lip bilong rais em kaikai bilong en i redi pinis bilong kisim ol i wok long kamap yelo. Ol naispela bikbus i karamapim ol maunten. Maski long ol taun ol manmeri i pas pas tru, ol naispela diwai na gras long ol gaden na long ol maunten i givim bikpela amamas tru long ol man. Em ol dispela samting tasol i kirapim dispela namba wan man bilong hap bilong Wes i bin lukim ailan, long givim nem Ilha Formosa, o “Ailan Naispela.”

Tru tumas, Taiwan i wanpela naispela ailan, tasol em i liklik​—longpela bilong en em inap 390 kilomita tasol na hap i braitpela moa em olsem 160 kilomita. Ol bikpela maunten i karamapim klostu olgeta hap bilong ailan. Maunten Yü Shan (Morrison) em i go antap tru winim bikpela maunten Fuji long Japan na bikpela maunten Cook long Nu Silan. Kirap long ol ples maunten i go daun long nambis, i gat ol ples stret long nambis we ol manmeri bilong Taiwan ol i sindaun long en, long nau namba bilong ol i winim 22 milion.

Wanpela Narapela Kain Wok i Kamap Bikpela

I gat wanpela narapela kain wok i kamap bikpela long Taiwan​—planti Witnes Bilong Jehova ol i insait long ol wok lotu. Dispela samting i kamap ples klia long pasin bilong ol manmeri​—ol yangpela na lapun​—long givim bel long wok, taim ol i kirap long kisim save long trupela God, Jehova. Tru tumas, bel bilong yumi i kirap tru long lukim bikpela lain moa ol i givim bel long wok bilong helpim ol narapela long kisim save long Jehova na long ol samting em i tingting pinis long mekim.

Planti manmeri moa i kam insait long lain bilong Jehova, olsem na ol i mas skruim brens ofis i go bikpela. Long Disemba 1990, ol i baim hap graun bilong wokim bikpela brens ofis bilong ol Witnes Bilong Jehova. Olpela brens ofis long Taipei, em i liklik na i no inap long lukautim wok bilong 1,777 manmeri i save autim tok bilong Kingdom long Taiwan long dispela taim. Ol volantia bilong ol narapela kantri na ol asples em ol i gat kain kain krismas, ol i mekim gutpela wok tru inap sampela yia na ol naispela nupela haus bilong brens ofis long Hsinwu i sanap na i redi long ol i mekim wok long en long Ogas 1994. Long dispela taim, i gat 2,515 manmeri ol i insait long wok bilong autim gutnius bilong Baibel, em Tok Bilong God. Long nau, winim 10-pela yia i go pinis na dispela namba i go bikpela tru, winim 5,500, na long olgeta mun inap olsem 1,375 bilong dispela lain ol i insait long wok bilong autim tok bilong God fultaim. Samting i gutpela tru em ol yangpela man na meri, ol i olsem ‘wara i save kamap long olgeta nait’ na i save givim nupela strong.​—Song 110:3.

Planti Yangpela i Mekim Wok Bilong Jehova

Planti manmeri i save givim bel long autim gutnius, em ol yangpela. Sampela i stap long komiuniti skul. Olsem: Long wanpela taun long hap not bilong Taiwan, long namba wan taim ol Witnes i singautim tupela marit long kam long miting bilong Skul Tiokratik Bilong Autim Tok, em miting we ol Witnes Bilong Jehova i kisim skul bilong lainim ol narapela long ol tok i tru bilong Baibel. Tupela marit i kirap nogut tru long lukim wanpela liklik mangi, Weijun, i sanap long pletfom na ritim gut Baibel, winim planti bikpela man. Long ol narapela miting ol i go long en, ol i kirap nogut long ol liklik pikinini i no skul yet ol tu i kamapim ol gutpela bekim long ol miting. Ol i mekim gutpela tok long ol pikinini i bihainim gutpela pasin long Haus Kingdom.

Bilong wanem ol dispela yangpela i tingting strong long kisim skul long Baibel long dispela kantri we klostu olgeta man i bilong lotu Buda na lotu Tau? Long wanem, ol papamama Kristen bilong ol i save bihainim ol stiatok bilong Baibel na pasin bilong pas gut wantaim Jehova i stap olsem as na famili i stap amamas wantaim. Papamama bilong Weijun i strong long mekim famili Baibel stadi na wok autim tok i kamap olsem samting bilong amamas long mekim. Olsem na bikpela brata na susa bilong dispela liklik mangi, ol i kisim baptais pinis. I no longtaim i go pinis taim Weijun i tok em i laik insait long wok bilong autim tok, mama bilong em i tok Weijun i tilim pinis planti nius long dispela mun, winim nius em famili olgeta i bin tilim. Em i save amamas long toktok wantaim ol man long tok i tru, bekim tok long ol miting, na toktok wantaim ol narapela long samting em i lainim.

Taim Ol i Kamap Bikpela

Ol dispela yangpela i stap olsem wanem taim ol i kamap bikpela? Planti i wok yet long kamapim olsem ol i laikim tru Jehova na wok bilong autim tok. Olsem: Huiping em i wanpela sumatin. Wanpela taim tisa bilong em i tok olsem ol manmeri bilong wanpela lotu ol i no save kisim blut, tasol em i no save ol i husat. Taim klas i pinis, dispela yangpela Kristen i stori long tisa olsem dispela lain em ol Witnes Bilong Jehova na em i kamapim as na ol i no save kisim blut.

Narapela tisa i soim wanpela vidio i stori long ol sik bilong pamuk. Dispela vidio i kolim 1 Korin 6:​9, tasol tisa i tok Baibel i no tambuim pasin sodom. Long dispela taim tu Huiping inap stori long tingting bilong God long pasin sodom.

Taim wanklas bilong em, Shuxia, i wok long raitim wanpela ripot long pait i save kamap insait long famili, Huiping i givim em Kirap! bilong Janueri-Mas 2002, het tok bilong en “I Gat Helpim Bilong Ol Meri Em Man i Paitim Ol,” na i tokim em olsem Baibel i as bilong ol tok em nius i kamapim long dispela samting. Bihain Shuxia i kamap wanpela pablisa i no baptais yet. Long nau, em na Huiping i save autim tok long ol narapela.

Planti yangpela long skul i pilim olsem sapos ol wanskul i save olsem ol i man bilong bihainim ol stiatok bilong Baibel, dispela i givim hatwok long ol. Moa yet long ol liklik taun. Bilip bilong Zhihao na wok autim tok bilong em i as na ol wanskul i putim hevi long em. Em i tok: “Mi bel hevi na dispela i mekim mi pret long bungim ol wanklas long taim mi autim tok. Sampela taim i gat 10-pela i save tok bilas long mi!” Wanpela taim tisa i makim Zhihao long givim wanpela tok i stori long lotu bilong em long ai bilong klas. Em i tok: “Mi kirapim stori wantaim tok bilong Buk Stat sapta 1, na bihain mi stori long ol kain askim olsem: Husat i wokim graun na olgeta samting i stap long en? Na ol man i kamap olsem wanem? Taim mi kirap long ritim Baibel, sampela i lap na tok mi kamapim wanpela stori nating i no gat as bilong en. Maski ol i mekim olsem, mi stori yet inap mi pinisim tok bilong mi. Bihain, rot i op na mi inap toktok wantaim sampela wanklas long ol wok na bilip bilong lotu bilong yumi. Long nau, taim ol i lukim mi autim tok, ol i no lap moa long mi!”

Zhihao i tok moa: “Papamama bilong mi ol i Witnes, olsem na mipela i save stori long teks bilong de long olgeta moning. Na tu, mipela i save stadi long Baibel na go long olgeta miting. Dispela em i as na mi inap long sakim tok bilas man i mekim taim mi laik stori long ol narapela long ol gutpela tok i tru bilong Baibel.”

Tingmei i skul long wanpela teknikel kolis bilong ol meri. Wanpela taim ol wanklas i singautim em long go wantaim ol long piknik wantaim ol mangi bilong narapela skul. Em i save olsem pasin pamuk i save kamap long kain bung olsem bilong skul na em i no laik go. Planti taim ol wanklas i singautim em long go wantaim ol, maski em i stori wantaim ol long ol gutpela tok i stap long buk Askim Bilong Ol Yangpela​—Ol Gutpela Bekim.a Ol meri i tok bilas long em olsem, em i bihainim yet pasin bilong bipo. Tasol savepasin bilong em long bihainim ol stiatok bilong Baibel i kamap ples klia taim wanpela wanklas i kisim bel na i rausim. Tingmei i tok: “Mi mekim ol samting olsem Jehova i stiaim mi, na dispela i mekim na bel bilong mi i no gat tok. Olsem na bel bilong mi i stap amamas na mi stap belgut tru.”

Winim Ol Hevi i Laik Pasim Wok Long Go Bikpela

Wanpela gutpela pren bilong Tingmei, em Ruiwen. Taim Ruiwen i liklik yet, em i pilim olsem pasin bilong go olgeta taim long ol miting na autim tok i save mekim em i skin dai nating. Tasol em i lukim olsem namel long ol lain insait long kongrigesen bilong em narapela i laikim tru narapela, tasol namel long ol wanklas bilong em ol i save giaman long prenim narapela, orait dispela i mekim na em i save em i mas senisim sampela samting long laip bilong em. Ruiwen i kirap autim tok long ol wanklas na i no longtaim na em i luksave long samting em i mas mekim. Em i kirap long mekim wok painia haptaim, na autim tok inap 50 aua long olgeta mun. Bihain em i kirap mekim wok painia oltaim na autim tok inap 70 aua long olgeta mun. Ruiwen i tok: “Mi hatwok long kamapim amamas bilong mi long Jehova. Em i no les kwik long mi. Maski mi bin mekim sampela pasin em i no amamas long en, em i laikim mi yet. Mama bilong mi na ol narapela long kongrigesen i kamapim wankain pasin laikim. Nau mi lukautim 5-pela Baibel stadi, na mi pilim olsem mi insait long wanpela gutpela wok tru.”

Long wanpela haiskul longwe long taun, tisa i makim tupela Witnes pikinini long sanap makim skul bilong ol na insait long wanpela resis bilong wanpela danis tumbuna. Taim ol i kisim save long as bilong dispela resis, tupela mangi i pilim olsem sapos ol i insait long en dispela bai bagarapim maus bilong bel bilong ol em ol bilip Kristen i skulim pinis. Ol i traim long kamapim tingting bilong ol long tisa na askim em long ol i no ken insait long dispela resis, tasol tisa i no orait long dispela. Em i tokim ol, ol i mas mekim, long wanem, em i makim ol pinis bilong go. Tupela pikinini Witnes i no laik brukim ol stiatok bilong Baibel, olsem na ol i go long Intenet long kompiuta na painim Web-sait bilong dipatmen bilong ediukesen na ol i salim pas i stori gut long as bilong dispela hevi bilong ol. Tupela yet i no kisim bekim bilong pas, tasol i no longtaim na skul i kisim pas i tokim ol long no ken subim wanpela pikinini long insait long kain resis olsem. Tupela mangi i amamas tru long lukim olsem skul ol i kisim long Baibel i stiaim maus bilong bel bilong ol, na tu, em i strongim ol long sanap strong long bihainim pasin i stret!

Ol man em hap skin i bagarap, ol tu i amamas long tokim ol narapela long ol tok promis bilong Baibel em ol yet i bilip na wet long en. Mama i karim Minyu wantaim hap skin bilong em i dai pinis. Han bilong em i dai, olsem na em i save opim Baibel long tang bilong em na painim skripsa em i laik ritim. Taim em i mekim tok bilong em long Skul Tiokratik Bilong Autim Tok long Haus Kingdom, em save slip long wanpela bet, na sista i helpim bilong em i sindaun long fom i daunbilo liklik na holim maikrofon. Bel bilong yumi i pilim tru hatwok Minyu i mekim bilong redim tok bilong em, laka?

Taim Minyu i laik insait long wok autim tok bilong Kingdom, sampela sista long kongrigesen i lain long pasin bilong autim tok long telefon na bai ol i ken helpim em. Em i subim namba long tang bilong em na ol sista i helpim em long raitim nem samting bilong ol man em i toktok wantaim ol. Em i laikim tru dispela wok, olsem na em i kirap mekim wok painia haptaim, long rot bilong telefon em i save toktok wantaim ol man long Kingdom Bilong God inap 50 i go 60 aua long olgeta mun. Em i bin painim sampela man i laik harim tok na ol i kisim ol buk na nius bilong Baibel na em inap mekim gobek long ol. Nau em i mekim Baibel stadi wantaim tripela em i bin bungim ol long rot bilong em i autim tok long telefon.

Tru tumas, olsem wara bilong nait i save givim nupela strong long ol diwai samting, ol yangpela man​—na meri​—long 78 kongrigesen bilong ol Witnes Bilong Jehova long Taiwan, ol i amamas na givim bel long bringim gutpela tok bilong Kingdom i givim laip long man i go long planti milion manmeri i pas pas tru long dispela ailan. Em liklik hap truim tasol bilong dispela tok profet bilong Baibel i kamap long olgeta hap: “Taim yu laik pait long ol birua ol manmeri bilong yu bai i go wantaim yu na helpim yu.” Ol yangpela man na ol yangpela meri, ol i olsem ‘wara bilong nait i save kamap long gras, na gras i kisim nupela strong.’ (Song 110:3) Pasin bilong ol dispela yangpela i strongim ol lapun namel long yumi, na moa yet, ol i givim bikpela amamas tru long Papa bilong ol long heven, God Jehova!​—Sindaun 27:11.

[Futnot]

[Blok/Piksa long pes 10]

I MAS I GAT PLANTI HAUS KINGDOM MOA

Planti man moa long Taiwan i wok long kam insait long lain bilong Jehova, olsem na i mas i gat planti Haus Kingdom moa, tasol wok bilong kisim sampela Haus Kingdom moa i hatwok tru. Bilong wanem i hatwok? Long wanem, long ol taun i no gat ol gutpela hap graun bilong sanapim ol Haus Kingdom long en. Na tu, pe bilong graun i go antap moa, na lo bilong makim ol hap graun em i strong tru. Long ol biktaun, wanpela rot tasol em ol i mas baim wanpela spes bilong ofis na wokim i kamap Haus Kingdom. Tasol ol siling bilong planti ofis i daun moa, na pe bilong lukautim ol dispela hap long olgeta mun em bikpela tru, na ol sekiuriti i no larim olgeta man i go insait, o i gat ol narapela samting i mekim na i no gutpela bilong yusim olsem ol Haus Kingdom.

Tasol i no longtaim i go pinis, ol Witnes Bilong Jehova i bin wokim sampela nupela Haus Kingdom. Wok bilong painim ol hap graun bilong sanapim ol Haus Kingdom bai go yet, na ol Witnes i soim olsem ol i amamas long givim mani bilong mekim dispela wok, na tu, ol i wok long lainim kain kain save bilong sanapim haus.