Painim Ol Gutpela Man Long Gini

INAP planti yia, ol man i bin redi long lusim laip bilong ol bilong painim ol gutpela samting na planti mani. Ol man i gat strongpela bel i bin go long Gini, long Wes Afrika, ol i bin painim tupela gutpela samting i narapela narapela kain​​—mani kago na ol gutpela man. Dispela kantri i gat planti daimon, gol, ain, na graun boksait (ol i save wokim aluminiam long en). Na inap olsem 9 milion manmeri i save sindaun long dispela kantri.

Maski lotu Kristen i no kamap strong tumas long dispela kantri, lotu i bikpela samting, na planti i tingim ol gutpela samting bilong en. Wanem dispela ol gutpela samting? Em ol wokboi bilong Jehova i stap gut long em, em Hagai 2:7 (NW) i tok long ol olsem “ol gutpela samting bilong olgeta lain.”

Ol Gutpela Man

Em i bikpela hatwok tru long digim graun i go insait tru bilong painim ol gutpela samting. Na olsem tasol, taim yumi mekim wok Kristen, yumi mas wok strong tru bilong painim ol gutpela man. Long 1951 samting, wok autim tok i kirap long sampela ples long Gini, tasol wok i no go kamap yet long biktaun Conakry, inap long 1961 samting. Nau i gat olsem 900 Witnes Bilong Jehova long 21 kongrigesen na ol grup long kantri olgeta.

Ol misineri i go insait long Gini long 1987 na wok wantaim dispela wanpela kongrigesen i stap long biktaun Conakry. Long nau i gat 20 samting misineri i stap long biktaun na long sampela narapela ples long Gini. Ol i givim bel long strongim ol kongrigesen na mekim wok autim tok wantaim ol brata asples.

Luc, husat i save stap long Conakry, i kisim amamas taim em i stadi long Baibel wantaim wanpela yangpela dokta, nem bilong em Albert. Albert i bin go long kain kain lotu bilong painim tok i tru, na em i insait long wok bilong ol spirit nogut. Em i putim wanpela ring long pinga em wanpela glasman i bin givim long em bilong ol gutpela samting i ken painim em. Em i bel hevi tru long em i no inap painim lotu i tru, na bihain Albert i tromoi dispela ring na i beten olsem: “God, sapos yu stap tru, orait opim rot long mi inap kisim save long yu na mekim wok bilong yu. Sapos nogat, orait mi bai bihainim tasol ol laik bilong mi yet.” Liklik taim bihain, Albert i go lukim bikpela susa long haus bilong em na em i harim wanpela Witnes Bilong Jehova i mekim stadi wantaim pikinini meri bilong susa bilong em. Bihain ol i stretim rot bilong Albert i stadi long Baibel wantaim Luc.

Long olgeta wan wan wik, Luc i save amamas long wokabaut inap 10-pela kilomita bilong stadi wantaim Albert. Maski Luc i bin skul liklik tasol, Albert, husat i bin pinisim skul yunivesiti, i pilim tru strongpela bilip bilong Luc long Baibel na pasin bilong em long bihainim tok bilong en. Albert i amamas tru long kisim save olsem pen na hevi ol man i karim i no asua bilong God, nogat, tasol Jehova i tingting pinis long pinisim tru olgeta pen na hevi na mekim graun i kamap Paradais. (Song 37:​9-​11) Albert i pilim tru ol tok i tru bilong Baibel wantaim gutpela pasin bilong ol bratasista long kongrigesen.

Tasol olsem daimon ol i kisim long graun em man i gat save i mas katim katim na bai em i lait gut, Albert i mas rausim ol pasin bilong dispela graun na bai ol samting long laip bilong em i stret wantaim ol stretpela lo bilong God. Em i lusim wok bilong ol spirit nogut, pasin bilong dring planti alkohol, na pilai laki. Albert i hatwok tru long lusim pasin bilong smok. Taim em i beten strong askim Jehova long helpim em, em i winim dispela hevi. Na 6-pela mun bihain, em i stretim marit bilong em. Meri bilong em i kirap stadi long Baibel. Nau tupela i stap olsem ol wokboi bilong Jehova i baptais pinis.

Martin em narapela gutpela samting olsem daimon. Em i kirap stadi long Baibel long Guéckédou, taim em i gat 15 krismas. Papamama bilong em i bilong lotu Katolik na ol i no amamas long em i save go long ol miting bilong ol Witnes Bilong Jehova. Ol i bagarapim ol buk na nius bilong Baibel bilong Martin, paitim em, na rausim em long haus. Taim kabon i stap aninit long bikpela presa tru em daimon i save kamap, na olsem tasol pasin birua i mekim na pasin bilong Martin long laikim tok i tru bilong Baibel i kamap strong. Bihain, papamama i isi liklik long em, na em i go bek long haus. Wanem samting i mekim na papamama i senisim tingting? Ol i luksave olsem pasin bilong Martin i narapela kain tru long pasin bilong ol brata na susa bilong em, em ol i bikhet na insait long pasin pamuk. Taim ol i luksave olsem nupela bilip bilong Martin i helpim em, papa i amamas long ol bratasista long kongrigesen i ken i kam long haus bilong ol. Mama bilong Martin i tok tenkyu planti taim long ol brata long wok ol i bin mekim bilong helpim pikinini man bilong em. Martin i kisim baptais taim em i gat 18 krismas, bihain em i go long Ministerial Trening Skul na nau em i mekim wok olsem wanpela painia salim.

Ol Gutpela Man i Kam Long Ol Narapela Hap

Gini i save salim planti gutpela samting bilong en i go long ol narapela kantri, na sampela gutpela samting bilong en​—em ol gutpela man​—i save kam long ol narapela kantri. Planti manmeri i kam long ol narapela kantri bilong Afrika bilong painim wok mani. Na sampela i ranawe long ol pait nogut i stap longpela taim long hap bilong ol.

Ernestine, wanpela meri bilong Kamarun i kam i stap long Gini inap 12-pela yia i go pinis. Em i bin stadi wantaim ol Witnes Bilong Jehova na i go long ol miting inap planti yia, tasol em i no kisim baptais. Long 2003, taim em i lukim ol manmeri i kisim baptais long wanpela kibung sekit bilong ol Witnes Bilong Jehova, aiwara i pulap long ai bilong em. Bel i kotim em long pasin em i mekim na em i beten long Jehova olsem: “Nau mi gat 51 krismas na mi no bin mekim wanpela gutpela samting long yu. Mi laik mekim wok bilong yu.” Bihain, Ernestine i mekim ol samting bilong truim beten bilong em. Em i tokim man em i stap wantaim em, sapos ol i no stretim marit bai ol i no inap stap wantaim. Man i orait long dispela samting, na bihain aiwara bilong amamas i pundaun long pes bilong em taim em i kisim baptais long Novemba 2004.

Kirap long 1991 samting, Gini i orait long kisim planti tausen refiuji bilong Laibiria na Siera Leon, na sampela handet bilong ol em ol wokman bilong Jehova. Liklik taim bihain long ol i kam sindaun long refiuji kem, ol brata i kirap stretim rot bilong mekim ol miting, autim tok, na ol i sanapim wanpela Haus Kingdom. Sampela i bin kamap wokman bilong Jehova long ol refiuji kem. Isaac em wanpela bilong ol. Bihain long em i baptais, rot i op long em inap go bek long wok bilong em long wanpela bikpela kampani bilong Laibiria. Tasol em laik i stap bek long Lainé refiuji kem olsem wanpela painia oltaim. Em i tok: “Nau mi no gat wok long askim bos long larim mi i go long ol miting na kibung. Mi stap fri long mekim wok bilong Jehova.” Long Disemba 2003, ol i mekim wanpela kibung distrik long dispela refiuji kem i stap longwe. Long dispela kem i gat 150 Witnes namel long 30,000 manmeri. Inap 591 i amamas long kam long kibung, na 9-pela yaupas i kisim ol tok bilong kibung long rot bilong tok ples sain bilong ol yaupas. Inap 12-pela i kisim baptais. Ol brata i pilim tru bikpela hatwok bilong redim ol gutpela kaikai bilong spirit .

“Ol Gutpela Samting” i Senisim Pasin

I luk olsem ol man bilong painim gol na ol daimon inap winim olgeta kain hatwok bilong kisim ol dispela samting. Tasol yumi amamas long lukim olsem ol nupela man i wok strong long winim ol hevi bambai ol i ken mekim wok bilong Jehova. Tingim stori bilong Zainab.

Taim Zainab i gat 13 krismas, ol i subim em long mekim wok slev. Ol i kisim em long as ples bilong em long wanpela kantri bilong Wes Afrika na kisim em i go long Gini. Taim em i gat 20 krismas, em i harim sampela tok bilong Baibel. Em i amamas long bihainim ol tok em i lainim.

Zainab i hatwok long go long ol miting Kristen. Tasol em i laikim tru ol miting na i tingting strong long em i no ken lusim ol miting. (Hibru 10:​24, 25) Em i save haitim ol buk bilong em ausait na bai em i ken kisim ol taim em i go long ol miting. Planti taim, ol bos, em ol man em i wok slev long ol, ol i save paitim em nogut tru, long wanem, em i go long ol miting.

Bihain ol samting i senis na Zainab i kamap fri long wok slev bilong em. Wantu em i kirap go long olgeta miting na dispela i helpim em long kamap strong. Em i no laik kisim wanpela wok mani i gat bikpela pe, long wanem, dispela bai pasim em long go long ol miting bilong harim ol gutpela tok bilong Baibel. Em i insait long Skul Bilong Wok Autim Tok, kamap wanpela pablisa i no baptais, na bihain em i baptais long wara bilong makim olsem em i dediket pinis long Jehova. Bihain long baptais, em i mekim wok painia haptaim. Na 6-pela mun bihain, em kirap mekim wok painia oltaim.

Wanpela man i bin go long sampela miting, na bihain em i tok: “Taim mi stap long ol miting, mi no pilim olsem mi stap rabis.” Planti man i tingim mani kago bilong Gini, tasol ol man i laikim Jehova ol i wok strong long painim ol gutpela man. Em nau, “ol gutpela samting bilong olgeta lain” i kam long Jehova bilong mekim lotu i tru long nau!

[Blok long pes 8]

GINI-2005

Namba bilong ol Witnes: 883

Ol Baibel stadi: 1,710

Ol man i bung long Memorial: 3,255

[Ol Mep long pes 8]

(Bilong save ol dispela rait i stap we long pes, lukim buk o magasin)

GINI

Conakry

SIERA LEON

LAIBIRIA

[Piksa long pes 9]

Albert na Luc

[Piksa long pes 9]

Haus Kingdom long Conakry

[Piksa long pes 10]

Ernestine

[Piksa long pes 10]

Martin

[Piksa long pes 10]

Zainab

[Piksa Kredit Lain long pes 8]

USAID