Wanpela Jas i Larim Baibel i Skulim Em

KOT i makim taim long Sladjana, em wanpela Witnes Bilong Jehova long Kroesia, long kamap long wanpela kot bilong stretim sampela pepa bilong mani. Em i kamap long taim stret na sanap long ai bilong jas. Tasol man bilong mekim kot i bin kam leit. Sladjana i laik tru long autim tok bilong Baibel, olsem na taim olgeta man i wet i stap yet, em i strongim bel na toktok long jas.

Em i tok: “Bikman, yu save olsem klostu nau bai i no gat ol jas na haus kot hia long graun?”

Jas i kirap nogut, em i lukluk tasol long Sladjana na em i no mekim wanpela tok. Tasol nau kot i kirap. Taim kot i pinis na Sladjana i kirap sanap bilong sainim wanpela pepa, jas i tok isi long em na askim em: “Yu bilip tru long samting nau tasol yu bin tokim mi long en, olsem klostu nau bai i no gat ol jas na haus kot long graun?”

Sladjana i bekim tok: “Yes Bikman. Mi bilip tru long dispela tok!”

Jas i askim em: “I gat wanem as na yu tok olsem?”

Sladjana i tok: “Dispela samting i stap long Baibel.”

Jas i tok em i laik ritim dispela tok long Baibel, tasol em i no gat Baibel. Olsem na Sladjana i tok em bai givim Baibel long em. Ol Witnes i go lukim jas na givim wanpela Baibel long em, na ol i strongim em long stadi long Baibel long olgeta wik. Jas i orait long mekim olsem, na i no longtaim em i kamap wanpela Witnes Bilong Jehova.

Buk Song 2:10 i tok profet olsem: “Yupela ol king, yupela putim gut yau na stretim pasin bilong yupela. Yupela ol hetman bilong graun, yupela harim dispela tok na yupela lukaut.” Yumi save amamas tru taim ol kain man olsem i mekim pasin daun na larim Jehova i skulim ol, laka?

[Piksa long pes 32]

Sladjana na jas