Yu Ting Wanem Samting i Makim Olsem Man i Win Tru?

SAMPELA bisnisman bilong Wall Street i ting wanpela man, Jesse Livermore, em i gat save tru long mekim wok bisnis, winim olgeta narapela man. Olsem na em i kamap maniman tru. Ol klos bilong em i gat stail na bikpela pe tru, na em i sindaun long traipela haus i gat 29 rum, na em i save raun long blakpela ka (Rolls-Royce) i gat bikpela pe tru, na em i gat draiva bilong em.

Davida tu i bihainim wankain rot. Em i stap nambatu presiden na maneja bilong bikpela kampani, olsem na em i gat rot long kamap wanpela presiden bilong dispela kampani. I luk olsem em bai kamap maniman tru na kisim biknem. Tasol David i tingim gut ol samting na em i lusim dispela wok. David i tok: “Mi save bai mi no ken kisim gen wanpela wok i gat namba.” Orait yu ting David i popaia?

Planti man i bilip olsem, sapos yumi kisim bikpela mani, o ol man i laikim yumi, o yumi gat namba, yumi ken tok yumi win. Tasol ol man i gat planti mani ol inap pilim olsem i stap bilong ol i no gat as bilong en. Ating i wankain tu long Mista Livermore. Maski em i gat planti mani tru, i stap bilong em i gat planti hevi long en. Em i stap bel hevi, na ol marit bilong em i bruk, na em i no pas gut wantaim ol pikinini man bilong em. Bihain bikpela hap mani bilong em i lus, na wanpela taim em i sindaun long klab long wanpela hotel na em i bel hevi long bikpela mani bilong em i lus. Em i baim wanpela dring na em i kamautim notbuk bilong em na i raitim pas long meri bilong em bilong tok gutbai long em. Em i daunim pinis dring, na em i go long wanpela rum i tudak liklik na em i kilim i dai em yet.

Tru, i gat kain kain as na ol man i kilim i dai ol yet, tasol dispela stori i kamapim olsem tok bilong Baibel i tru, em i tok: “Ol man i laikim tumas long kisim planti mani samting, . . . ol i karim bikpela hevi moa.”​—1 Timoti 6:​9, 10.

Ol man i save ting bikpela mani, bikpela namba, o biknem i makim olsem ol i win tru, ating ol i gat tingting kranki, a? Yu ting ol samting yu bin mekim i makim olsem yu win tru? I gat wanem as na yu ting olsem? Yu skelim wantaim wanem samting na yu kisim dispela tingting? Wanem samting i stiaim tingting bilong yu long dispela? Stori i kamap bihain long dispela i skelim sampela gutpela tok i bin helpim planti milion manmeri na ol i win tru. Orait nau yumi ken toktok long olsem wanem yu yet inap win tru.

[Futnot]