Gutpela Piksa Long Stretpela Pasin

NELMA em wanpela meri i mekim wok bilong katim na stailim gras long Cruzeiro do Sul, long Brasil. I no longtaim i go pinis na wanpela samting i kamap na i traim pasin bilong em long stap gut long God. Taim bikpela tait wara i bagarapim ples bilong em, wanpela kastama bilong Nelma i givim sampela klos long em. Taim em i wok long stretim klos, em i painim mani olsem 3,000 kina insait long ol poket bilong sampela trausis.

Dispela mani Nelma i painim em i olsem pe em i save kisim insait long 7-pela mun samting na em i nidim tru dispela mani. Haus bilong em yet i bagarap long dispela tait wara na planti samting bilong papa na ol bratasusa bilong em i lus. Em inap mekim wok long dispela mani bilong stretim gut haus bilong em yet na em bai i gat hap mani i stap yet bilong helpim ol wanblut bilong em. Tasol maus bilong bel bilong Nelma, em Baibel i skulim pinis, i no orait liklik long em i holim mani i stap.​—Hibru 13:18.

Long moningtaim bilong de bihain, em i go long wok paslain liklik long taim stret bilong wok na em i ringim dispela bisnismeri husat i bin givim klos long em. Nelma i tok tenkyu long ol klos em i bin givim, tasol em i tok tu olsem em bai i no inap holim i stap samting em i painim insait long ol klos. Meri i amamas tru long kisim mani. Em i bin putim dispela mani i stap bilong baim ol wokman. Dispela bisnismeri i tok: “Long nau, i no gat planti man i save bihainim stretpela pasin.”

Tru, sampela man i ting stretpela pasin i no kamapim wanpela gutpela samting. Tasol stretpela pasin em wanpela pasin i stap nambawan tru long tingting bilong ol man i wok strong long mekim gut bel bilong trupela God, em Jehova. (Efesus 4:​25, 28) Nelma i tok: “Mi bai i no inap slip long nait sapos mi no bin givim bek dispela mani.”