Askim

Wanem insait bilong tok bilong Pol olsem meri em man bilong en i dai pinis em i mas “i stap meri bilong wanpela man tasol” bambai em i ken kisim helpim long kongrigesen Kristen?​—1 Timoti 5:9.

Aposel Pol i toktok long meri, man bilong en i dai pinis, olsem na dispela tok “i stap meri bilong wanpela man tasol” i toktok long taim man bilong em i stap laip yet. Olsem wanem? Dispela i makim olsem bipo dispela meri i marit wanpela taim tasol? O ating tok bilong Pol i gat narapela mining bilong en?a

Sampela i ting Pol i toktok long ol meri, man bilong ol i dai pinis, em ol i bin marit wanpela taim tasol. Tru, long planti lain, sapos meri em man bilong en i dai pinis em i stap wanpis na i no marit gen, ol i tingim em olsem gutpela meri tru. Tasol dispela kain tingting i pait wantaim tok bilong Pol long ol narapela ves bilong Baibel. Olsem: Em i tokim klia ol Kristen bilong Korin olsem, maski em i ting meri, man bilong em i dai pinis, em bai stap amamas moa sapos em i stap singel, tasol “sapos em i laik maritim wanpela man, orait em i ken maritim em. Tasol em i mas maritim man i bilip long Bikpela.” (1 Korin 7:​39, 40; Rom 7:​2, 3) Na long pas Pol i raitim long Timoti, em i tok: “Mi ting mobeta ol meri i yangpela liklik ol i mas marit gen.” (1 Timoti 5:14) Olsem na sapos meri, man bilong en i dai pinis, em i laik marit gen, ol i no ting em i mekim pasin i no stret.

Orait yumi mas ting olsem wanem long tok Pol i bin mekim long Timoti? Dispela tok “i stap meri bilong wanpela man tasol” em i kamap long dispela wanpela ves tasol. Dispela tok i kain olsem tok Pol i bin mekim sampela taim, olsem “man bilong wanpela meri tasol.” (1 Timoti 3:​2, 12; Taitus 1:6) Pol i kamapim dispela tok taim em i kolim sampela mak ol wasman Kristen na ol kongrigesen sevan i mas winim. Dispela i makim olsem, bilong winim mak bilong kisim wok insait long kongrigesen Kristen, sapos man i marit em i mas i stap gut long meri bilong em na i no gat asua liklik long mekim pasin pamuk samting.b Olsem na yumi ken ting dispela tok i stap long 1 Timoti 5:9 i toktok long wankain samting. Sapos meri, man bilong en i dai pinis, em i laik winim mak bilong kisim helpim long kongrigesen, orait taim man bilong em i bin i stap laip yet em i mas i stap gutpela meri bilong dispela man na i stap gut tru long em, na i no gat wanpela taim meri i bin mekim sampela pasin i no stret, olsem pamuk samting, nogat. Ol narapela mak Pol i kolim long lista bilong em ol i tok long dispela kain meri.​—1 Timoti 5:10.

[Ol Futnot]