Wanpela Gaden we “Kaikai i Redi Pinis”

Long hap antap tru bilong Saut Amerika i gat wanpela poin ol i kolim Guajira Peninsula. Em i stap long hap not bilong Kolambia na hap not-wes bilong Veneswela. Long dispela ples drai, san i save hat nogut tru, olsem 43 digri, na i no gat planti ren. Tasol maski ples i hat nogut tru, ol manmeri i save bisi stret long wok gaden. I gat gutpela win i save kam olgeta taim na dispela i mekim na ol manmeri inap karim hevi bilong hatpela san na ol turis inap raun na amamas long ol gutpela nambis samting.

DISPELA ples em ples bilong ol Indian Wayu. I gat 305,000 Wayu, na 135,000 bilong ol i stap long Kolambia. Dispela lain i bin stap long dispela hap paslain tru long ol Spen i kam sindaun long en.

Nambawan bikpela wok bilong ol Wayu em bilong wokim gaden na lukautim ol meme. Na tu ol i save kisim pis, na wok bisnis wantaim ol lain i stap long boda. Ol meri i save lumim ol gutpela laplap i gat kala kala em ol turis i save amamas long baim.

Ol Wayu i gat gutpela bel na ol i gat nem olsem man bilong lukautim gut ol visita. Tasol ol Wayu tu i stap long taim bilong “planti hevi nogut tru.” (2 Timoti 3:1) Pasin bilong i stap rabis em wanpela bikpela hevi bilong ol, na dispela i save kamapim sampela hevi moa, olsem ol i no gat save long rit rait, sot long gutpela kaikai, no gat marasin, na long sampela hap, i gat pasin raskol.

Inap planti yia pinis, ol misin bilong Kristendom i bin salim ol misineri i kam sindaun namel long ol Wayu. Olsem na ol misin i save bosim planti skul​—ol boding-skul na ol skul bilong givim trening long ol tisa. Planti Wayu i bin kisim ol pasin bilong Kristendom, olsem pasin bilong lotuim ol imis na baptaisim ol bebi, tasol ol i no bin lusim ol bilip na ol pasin em stori bilong ol tumbuna i as bilong en.

Klostu olgeta Wayu i save pret long God na ol i save laikim ol tok bilong Baibel ol Witnes Bilong Jehova i skulim ol long en. Long 1980 samting, i gat 7-pela Witnes tasol bilong Wayu long Guajira, em 3-pela bilong ol i sindaun long biktaun Ríohacha. I gat 20 pablisa tu ol i no bilong lain Wayu ol i autim gutnius bilong Kingdom long dispela hap long tok Spen.

Ol i Harim Long Tok Ples Bilong Ol Yet

Planti Wayu long Ríohacha ol i no save tumas long tok Spen, ol i save liklik tasol. Ol i save mekim wok long tok ples bilong ol yet, em tok ples Wayunaiki. Pastaim wok bilong autim tok bilong Kingdom i no kamap gutpela tumas. I luk olsem ol Wayu i no laik toktok wantaim ol arijunas, em nem ol i givim long ol lain i no bilong Wayu. Taim ol Witnes i kam long haus bilong ol, planti Wayu i bekim tok long tok ples bilong ol yet, tok Spen, nogat. Olsem na ol Witnes i save lusim ol na go long narapela haus.

Tasol long pinis bilong 1994, brens ofis bilong ol Witnes Bilong Jehova i salim sampela painia, em ol lain i autim tok bilong Baibel fultaim, long Ríohacha Kongrigesen. Ol painia i askim wanpela Witnes bilong Wayu long lainim ol long tok ples Wayunaiki. Taim ol i lainim pinis sampela tok, ol i go autim tok long teritori na wantu ol i lukim bikpela senis. Maski ol inap kolim sampela sentens tasol long tok Wayunaiki, ol man bilong haus ol i kirap nogut na ol i amamas long putim yau, na taim ol i bekim tok, sampela taim ol i bekim long tok Spen!

“Kaikai i Redi Pinis”

Aposel Pol i tok, wok Kristen bilong kamapim ol disaipel em i kain olsem wok bilong gaden, em wanpela wok ol Wayu i save gut long en. (1 Korin 3:​5-9) Tru tumas, “kaikai i redi pinis” long hap bilong ol Wayu.​​—Jon 4:​35.

Neil, em wanpela man Indian bilong Wayu i sindaun long Manaure. Taim mama i karim em, hap skin bilong em i bagarap. Neil i tok God i gat asua long dispela samting. Em i bel hevi tru na i laik kilim i dai em yet. Wanpela Witnes husat i save autim tok long ol haus taim em i go long ol narapela narapela taun bilong mekim wok bisnis, em i autim tok long Neil long Kingdom Bilong Jehova. Neil i gat 14 krismas tasol. Witnes i luksave olsem Neil i amamas long harim tok, olsem na em i kirapim Baibel stadi wantaim em. Neil i amamas long kisim save long gutpela pasin bilong Jehova, na em i luksave olsem God i no as bilong bikpela sik bilong em. Em i pilim tru tok promis bilong God long kamapim wanpela paradais long graun we i no gat sik moa!​​—Aisaia 33:24; Matyu 6:​9, 10.

Long dispela taim, famili bilong Neil i pait wantaim narapela famili. Bilong lukautim ol yet na bai ol i no kisim bagarap, ol wanblut bilong Neil i save mekim sampela pasin bilong ples. Neil i tok: “Pastaim mi pret long tokim famili bilong mi long nupela bilip bilong mi, na moa yet ol hetman bilong famili, em ol wanblut i gat bikpela rispek long ol.” Papamama bilong Neil i kros nogut tru taim ol i kisim save olsem em i no laik bihainim moa ol bilip em Baibel i no as bilong en na ol kastam ol spirit nogut i insait long en. Orait Neil i go sindaun long Ríohacha na bung wantaim kongrigesen long dispela hap. Bihain em i kisim baptais. Long 1993 ol i makim em long kamap wanpela kongrigesen sevan, na 3-pela yia bihain, em i kamap wanpela painia oltaim. Long 1997 ol i makim em long kamap wanpela elda long kongrigesen. Long yia 2000, em i kirap mekim bikpela wok moa, em i kamap wanpela painia salim.

Tingim tu Teresa, em wanpela asples bilong Wayu na em i kirap stadi long Baibel wantaim ol Witnes. Boipren bilong em Daniel i tok bilas long em na i paitim em wantaim 3-pela pikinini bilong ol. Maski bihain Daniel i orait long em tu i ken stadi long Baibel, planti taim em i save go dring spak wantaim ol pren bilong em i go inap 4-pela o 5-pela de. Dispela i mekim na famili bilong em i stap rabis. Teresa i wok yet long stadi na em i go long ol miting Kristen. Dispela i helpim Daniel long luksave olsem pasin bilong stadi long Baibel em i bikpela samting. Bihain wanpela pikinini bilong ol i pundaun insait long sospen i gat hat wara long en. Hat wara i kukim skin bilong em na em i dai. Teresa i bel hevi tru long pikinini man bilong em i dai, tasol i no dispela samting tasol i givim hevi long em. Ol pren na ol neiba bilong em ol i laik bai em i mas bihainim ol kastam bilong planim man i no stret wantaim ol tok bilong Baibel.

Long dispela taim bilong hevi, ol bratasista bilong ol kongrigesen i stap klostu ol i kam na strongim bel bilong ol. Bihain long fiuneral, kongrigesen bilong tok ples Wayu i wok yet long mekim gut bel bilong ol. Taim Daniel i lukim dispela pasin laikim Kristen, dispela i kirapim em long kisim sampela save moa long Baibel na pas gut wantaim God. Em i lusim pasin bilong dring na pasin bilong paitim Teresa. Daniel na Teresa i stretim marit bilong tupela, na Daniel i wok strong long lukautim famili bilong em long ol samting bilong skin. Tupela i kamap strong long ol samting bilong spirit na ol i kisim baptais long 2003. Tupela i lukautim sampela Baibel stadi. Teresa i autim tok gut long ol wanblut bilong em, olsem na nau ol i amamas long harim tok bilong ol Witnes taim ol i kam long haus bilong ol. Pikinini man bilong susa bilong Daniel em wanpela pablisa i no baptais, na 2-pela pikinini meri bilong brata na susa bilong Daniel ol i stadi long Baibel na ol i save kam long ol miting bilong kongrigesen. Tambu meri bilong Teresa​—em pikinini man bilong em tu i bin i dai long wanpela eksiden​—na famili bilong em, ol i tok ol i laik stadi long Baibel.

Kaikai Bilong Spirit Long Tok Wayunaiki

Long 1998 ol i wokim buklet Stap Amamas Oltaim Long Graun!a long tok Wayunaiki. Dispela buklet i helpim gut wok bilong autim tok na mekim ol Baibel stadi long hap bilong ol Wayu. Long 2003 ol i stretim rot bilong givim trening long sampela brata na bai ol i ken tanim tok bilong ol buklet bilong ol Witnes Bilong Jehova i go long tok Wayunaiki. Ol brata bilong tanim tok i stap long Ríohacha, ol i wok strong long tanim tok na nau i gat sampela buklet moa long dispela tok ples, na dispela i bin strongim na kamapim sampela disaipel moa i save mekim tok Wayunaiki.

Kirap long 2001 na i kam, ol i bin tanim sampela hap bilong program bilong kibung distrik i go long tok Wayunaiki. Taim ol Baibel sumatin i harim program long tok ples bilong ol yet, dispela i save strongim ol long ol samting bilong spirit. Ol i wetim taim na ol Baibel drama bai kamap long tok Wayunaiki.

Planti Man i Stadi

Taun Uribia i stap long hap not-is bilong Ríohacha inap olsem 100 kilomita. Uribia Wayu Kongrigesen i gat 16 pablisa, em planti bilong ol i wok strong long autim tok long ol Indian i save sindaun long ol hap bilong bus. Wanpela elda bilong kongrigesen i stori olsem: “Mipela i go long wanpela kompaun i gat 12-pela haus. Windo bilong ol haus i liklik tru. Long fran bilong ol wan wan haus i gat wanpela haus win ol i bin wokim long yotojolo, em wanpela kain diwai. Ol lain bilong haus na ol visita inap hait aninit long dispela haus win long taim bilong bikpela san. Mipela i amamas long lukim olsem i gat planti man i laik harim tok, olsem na mipela i stretim rot bilong kam bek na kirapim ol Baibel stadi. Taim mipela i kam bek, mipela i luksave olsem planti bilong ol i no save long rit rait. Ol i tok i gat wanpela haus bilong skul i stap nating, long wanem, mani i sot. Man i bosim dispela haus i orait long mipela i ken mekim wok long wanpela klasrum bilong lainim ol man long rit rait, na mekim ol Baibel stadi. Sikspela Wayu i lain pinis long rit rait na ol i wok long kamap strong long ol samting bilong spirit. Ol i pilim tru ol tok ol i lainim, olsem na mipela i tingting long mekim sampela miting long dispela hap.”

Sampela Witnes bilong ol narapela lain i bin lain long mekim tok Wayunaiki, na ol Wayu i amamas tru long dispela gutpela helpim. Nau long Guajira Peninsula, i gat 8-pela kongrigesen na 2-pela grup i save yusim dispela tok ples.

Blesing bilong Jehova long dispela wok i stap ples klia. Planti gutpela samting moa inap kamap long wok bilong autim gutnius namel long ol Wayu. Ol man husat i save ol i sot long ol samting bilong spirit, ol i wok long kamap disaipel Kristen. Mipela i laik bai Jehova i ken salim sampela wokman moa i kam autim tok long dispela gaden we “kaikai i redi pinis.”​​—Matyu 9:​37, 38.

[Ol Futnot]

[Ol Mep long pes 16]

(Bilong save ol dispela rait i stap we long pes, lukim buk o magasin)

VENESWELA

KOLAMBIA

LA GUAJIRA

Manaure

Ríohacha

Uribia

[Piksa Kredit Lain long pes 16]

Wayuu camp below: Victor Englebert