Yu Ting Spirit Bilong Yu i No Save Dai?

OLSEM WANEM? Yumi bilong i stap laip sampela yia tasol na bihain yumi dai na em tasol? O i gat wanpela samting em yumi no inap lukim i stap insait long bodi bilong yumi na taim yumi dai, dispela samting i lusim bodi na i stap laip yet?

Ol lotu bilong graun i kamapim kain kain bilip long laip bihain long taim yumi dai, planti bilong ol i wanbel long wanpela samting: Insait long man i gat wanpela samting i no save dai, na taim man i dai, dispela samting i stap laip yet. Planti man i bilip olsem dispela “samting” i save stap laip yet taim man i dai pinis, em i wanpela spirit. Yu gat wanem tingting long dispela samting? Spirit em i wanem samting? Yu ting i gat wanpela spirit i stap insait long bodi bilong man, na taim man i dai dispela spirit i save lusim bodi na i stap laip yet? Sapos olsem, wanem samting i save kamap long en?

“Bodi i No Gat Spirit Long En, Em i Dai Pinis”

Long Baibel, tok Hibru na Grik ol i tanim olsem “spirit,” i makim “pulim win.” Tasol dispela tok “spirit” i no makim pasin bilong pulim win tasol. Nogat. Baibel i tok: “Bodi i no gat spirit i stap long en, em i dai pinis.” (Jems 2:26) Olsem na spirit em i wanpela strong i helpim bodi long i stap laip.

Dispela strong i no olsem win yumi pulim, dispela i kamap ples klia taim yumi skelim man long taim em i no pulim win moa. Inap sotpela haptaim bihain long man i no pulim win moa, yu inap winim win i go insait long man na kirapim em long pulim win. Bilong wanem yu inap mekim olsem? Long wanem, strong bilong laip i stap yet insait long ol sel bilong bodi inap sotpela taim. Tasol taim dispela strong bilong laip i lusim ol sel bilong bodi, yu no inap kirapim dispela man na bai em i stap laip gen, nogat. Maski yu winim planti win i go insait long bodi, dispela i no inap kirapim ol sel i dai pinis. Olsem na spirit em i strong bilong laip i helpim ol sel na man i stap laip. Dispela strong bilong laip papamama i givim long pikinini taim pikinini i kamap nupela long bel bilong mama. Bilong dispela strong i ken i stap, pikinini i mas pulim win.​—Jop 34:​14, 15.

Olsem wanem? Olgeta man wan wan i gat wanpela spirit bilong ol yet? O olgeta man wan wan i gat wankain strong bilong laip? Baibel i kamapim klia bekim bilong ol dispela askim. Bilong soim olsem wankain spirit i stap long olgeta samting i gat laip, saveman King Solomon i tok: “Pinis bilong yumi man i wankain olsem ol abus. Ol abus i save dai, na yumi man tu i save dai. Man na abus i save pulim win, na dispela i as bilong laip bilong tupela wantaim. . . . God i bin kisim graun na wokim tupela, olsem na taim tupela i dai bai tupela i kamap olsem graun gen. Sampela man i ting spirit bilong man i go antap na spirit bilong ol abus i go daun long graun. Tasol husat inap save tru long dispela samting?” (Saveman 3:​19-​21) Em nau, ol animal na ol man i gat wankain spirit, olsem strong bilong laip.

Yumi ken tok piksa olsem dispela spirit insait long bodi i kain olsem pawa i save ran long wanpela masin. Pawa yumi no inap lukim, tasol em inap mekim kain kain wok, olsem: Em inap mekim fen, lait, redio, TV, na kompiuta i wok. Pawa i kirapim ol masin long mekim wok, tasol pawa yet i no kisim pasin bilong ol dispela masin. Nogat. Em i stap olsem wanpela strong tasol. Dispela i wankain long spirit, olsem strong bilong laip. Dispela strong bilong laip i stap insait long ol man na ol animal, tasol em i no kisim pasin bilong ol, nogat. Dispela strong bilong laip olsem spirit em i no gat pasin o tingting​—em i wanpela strong tasol. Spirit bilong ol man na ol animal i wankain. Olsem na taim man i dai, spirit bilong em i no lusim bodi na i stap laip yet ausait long bodi olsem i stap long wanpela ples spirit.

Wanem Samting i Kamap Long Spirit Taim Man i Dai?

Jop 34:​14, 15 i tok, sapos God “i kisim bek spirit na win bilong em long olgeta samting i gat laip, orait olgeta samting bai i dai wantu tasol.” Tasol dispela i no makim olsem wanpela spirit i save lusim man na wokabaut i go long ples antap na kamap long God. Nogat. Tingim tok Jehova i bin mekim long rot bilong profet Malakai long ol Israel i no stap gut long em. Em i tok: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.” (Malakai 3:7) Taim Jehova i tok long “kisim bek” lain Israel, dispela i makim olsem em i orait gen long ol manmeri bilong em. Olsem na bilong Jehova i “kisim bek” lain Israel, i no olsem ol i mas lusim wanpela hap na i go stap long narapela hap. Nogat.

Olsem tasol taim man i dai ‘God i kisim bek spirit bilong em’ olsem taim strong bilong laip olsem spirit i lusim man, God husat i bin givim laip long man, em tasol inap givim bek dispela strong long em. Dispela i makim olsem God tasol inap givim laip gen long dispela man long bihain.

Olsem: Tingim tok Gutnius Luk i kamapim long i dai bilong Jisas. Em i tok: “Jisas i singaut strong moa olsem, ‘Papa, mi putim spirit bilong mi long han bilong yu.’ Em i tok olsem, na em i dai.” (Luk 23:46) Taim Jisas i dai na spirit olsem strong bilong laip i lusim em, long dispela taim Jisas i no go long heven. Nogat. Jisas i stap long matmat​—em i no stap laip​—i go inap long namba 3 de na em i kirap bek. (Saveman 9:​5, 10) Tasol taim Jisas i kirap bek pinis, i no wantu tasol em i go long heven. “Em i kisim laip gen na i kamap long ol aposel. . . . Inap long 40 de ol i lukim em” na bihain “em i go antap.” (Aposel 1:​3, 9) Long taim em i dai, Jisas i ‘putim spirit bilong em long han bilong Papa’ bilong em, em i bilip tru olsem Jehova bai givim laip gen long em.

Spirit Em Wanem Samting?

Baibel i tokaut klia long spirit em i wanem samting. Em i strong bilong laip em man i mas i gat na bai em i ken i stap laip. Man i mas pulim win na bai dispela strong bilong laip i helpim em long i stap. Olsem na i no gat wanpela samting i stap insait long man na taim em i dai dispela samting i stap laip yet.

Olsem na i gat wanpela rot tasol bilong ol man i dai pinis i ken kisim laip gen long bihain, em long rot bilong kirap bek. Baibel i tok promis olsem: “Yupela i no ken tingting planti long dispela tok bilong mi. Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Dispela tok promis long kirap bek​—na i no bilip bilong wanpela spirit i no save dai​—em i as tru bilong gutpela samting bai painim ol man i dai pinis.

Em i bikpela samting long kisim stretpela save long kirap bek na samting dispela bai mekim long ol man! Na tu, yumi mas save long God na Krais. (Jon 17:3) Ol Witnes Bilong Jehova long hap yu stap long en bai amamas long helpim yu long stadi long Baibel na bai yu ken kisim save moa long God, Pikinini Man bilong em, na ol tok promis bilong Em. Mipela i laik kirapim yu long toktok wantaim ol Witnes o yu ken raitim pas i go long lain i wokim dispela magasin.

[Ol Piksa long pes 4]

Olgeta i gat wankain spirit

[Kredit Lain]

Goat: CNPC​​—Centro Nacional de Pesquisa de Caprinos (Sobral, CE, Brasil)