Askim

God i bin tokim ol Juda long ol i no ken kaikai bret “i gat yis” long taim bilong Pasova. Olsem na taim Jisas i kamapim bung bilong tingim indai bilong em, bilong wanem em i mekim wok long wain ol i bin wokim long grep i gat kain samting olsem yis long en?​—Kisim Bek 12:20; Luk 22:​7, 8, 14-​20.

Bung bilong Pasova, em i makim taim ol Israel i bin lusim Isip, em i bin kirap long 1513 B.C.E. Taim Jehova i tokim ol long pasin bilong mekim Pasova, em i tok: “Maski yupela i save stap we we, long ol dispela de yupela i no ken kaikai bret i gat yis. Yupela i mas kaikai bret i no gat yis tasol.” (Kisim Bek 12:​11, 20) Dispela tambu i tok tasol long kain bret ol i mas kaikai long Pasova. I no gat wanpela tok long wain.

Namba wan as bilong dispela tambu long yis em olsem: Ol Israel i mas lusim Isip hariap. Kisim Bek 12:34 i tok: “Ol Israel i kisim plaua ol i no bin tanim wantaim yis yet na ol i putim long dis. Na ol i karamapim dis long laplap na karim long sol na ol i go.” Orait taim ol tumbuna pikinini i kamap bihain na ol i mekim Pasova na kaikai bret i no gat yis, dispela bai kirapim ol long tingim gen dispela bikpela samting i bin kamap.

Bihain, planti Israel i kisim tingting olsem yis i makim sin o pasin nogut. Olsem: Aposel Pol i tok long wanpela man insait long kongrigesen Kristen i mekim pasin pamuk, na em i askim ol: “Ating yupela i no save olsem, liklik yis tasol i save mekim olgeta bret i solap?” Na em i tok moa: “Olsem na yupela i mas rausim olgeta olpela yis, bai yupela i ken i stap olsem nupela bret i no gat yis. . . . Ol i ofaim pinis Krais, na em i olsem sipsip yumi ofaim long Bikpela De Bilong Tingim De God I Larim Ol Israel I Stap Gut. . . . Yumi mas rausim olgeta sin na pasin nogut long laip bilong yumi, olsem ol man i save rausim olgeta olpela yis long haus bilong ol long taim ol i laik redi long dispela bikpela de. Na yumi mas bihainim pasin bilong klinpela bel na tok tru, na dispela pasin bai i stap olsem nupela bret i no gat yis.” (1 Korin 5:​6-8) Bret i no gat yis, em tasol inap makim bodi bilong Jisas i no gat sin long en.​—Hibru 7:26.

Pastaim ol Juda i no bin mekim wok long wain long taim bilong Pasova. Yumi ken ting ol i kirapim dispela pasin long taim ol i bin lusim kalabus long Babilon. Baibel i no gat sampela tok olsem dispela pasin i no stret, olsem na Jisas inap mekim wok long wain long kaikai bilong Pasova. Yumi save, samting i bin mekim wara bilong grep i kamap wain em i narapela kain long samting ol i putim long bret. Bilong mekim bret i solap ol i mas putim yis. Tasol i no gat wok long putim yis long wain ol i wokim long pikinini bilong diwai wain, olsem grep, long wanem, grep i gat kain samting olsem yis i stap pinis long skin bilong en na i mekim wara bilong grep i kamap wain. Long taim bilong Pasova, ol i no inap kisim wara nating bilong grep, long wanem, Pasova i save kamap sampela mun bihain long taim ol i kisim grep long gaden wain, na insait long ol dispela mun, wara bilong grep bai tanim i kamap wain.

Olsem na taim Jisas i mekim wok long wain olsem wanpela mak bilong Memorial, dispela i no pait wantaim tok bilong God i tambuim yis long taim bilong Pasova. Olgeta retpela wain ol i no bin putim suga o alkohol o narapela samting long en, em i gutpela bilong mekim wok long en olsem piksa bilong ‘blut bilong Krais, em i dia tumas.’​—1 Pita 1:19.