‘Taim Ol i Olpela Pinis Ol i Karim Kaikai Yet’
PLANTI manmeri long ol kantri Mediterenian i save planim diwai det insait long banis bilong ol. Ol dispela diwai i luk nais tru na prut bilong ol i swit. Na tu, ol inap stap strong na karim kaikai winim wan handet yia.
King Solomon long Israel bilong bipo i tok skin bilong meri Sulam i naispela tru olsem diwai pam. (Solomon 7:7, NW) Buk Plants of the Bible i tok: “Tok Hibru i makim diwai det em ‘tàmâr.’ . . . Long ol Juda dispela diwai i kamap olsem mak bilong samting i naispela na i gat stail, na planti taim ol i givim dispela nem long ol meri.” Olsem: Susa bilong Solomon i gat naispela skin, na ol i givim nem Tamar long em. (2 Samuel 13:1) Long nau tu sampela papamama i save givim dispela nem long pikinini meri bilong ol.
Baibel i tok ol meri i gat naispela skin ol i olsem diwai pam, tasol Baibel i mekim dispela tok long ol narapela tu. Man bilong raitim song i tok: “Ol stretpela manmeri bai i kamap gutpela tru olsem diwai [“pam,” NW] i karim gutpela kaikai, na i kamap bikpela olsem ol diwai sida bilong Lebanon. Ol i olsem ol diwai ol i planim pinis long haus bilong Bikpela. Ol i save kamap gutpela tru insait long haus bilong God bilong yumi. Taim ol i olpela pinis, ol i save karim kaikai yet. Ol i stap strong, na ol i no save drai. Lip bilong ol i stap grin oltaim.”—Song 92:12-14.
Ol man i stap gut long God na mekim wok bilong em taim ol i lapun, ol i olsem naispela diwai pam. Baibel i tok: “Waitpela gras bilong man i gutpela samting tru taim em i bihainim stretpela pasin.” (Sindaun 16:31, NW) Maski strong bilong skin bilong ol i wok long pinis taim ol i lapun, long rot bilong stadi gut long Tok Bilong God, em Baibel, ol i ken stap strong long ol samting bilong lotu. (Song 1:1-3; Jeremaia 17:7, 8) Pasin bilong ol lapun long kamapim ol gutpela tok na stap olsem gutpela piksa i mekim na ol inap tru long strongim ol arapela na wok long mekim ol gutpela wok. (Taitus 2:2-5; Hibru 13:15, 16) Olsem diwai det, ol lapun inap stap strong na karim planti gutpela kaikai.