Ol i Winim Hatwok Bilong Bringim Gutnius Long Ol Man

TRAK bilong mipela i kamap klostu long ples bilong sekim ol ka samting, i gat olsem 60 man na meri na yangpela i holim gan na mekim dispela wok. Sampela i gat yunifom na sampela i putim ol klos bilong ol yet. Planti i holim ol gan otomatik. I luk olsem ol i wetim mitupela. I gat planti pait i wok long stap insait long kantri.

Mipela i bin raun inap 4-pela de na karim 10-pela ton ol buk na nius bilong Baibel. Mipela i tingting planti, bai ol i larim mipela i go o nogat. Ol bai singaut long mani? Mipela bai lusim hamas aua bilong toktok wantaim ol na mekim ol i bilip olsem wok bilong mipela i no samting bilong pait?

Wanpela man i holim gan na i sut nating i go antap bilong soim mipela olsem em i bos. Em i lukim ol mobail fon bilong mipela na tok strong long mipela i mas givim long em. Mipela i no givim kwik na em i mekim mak long han olsem em bai katim nek bilong mipela, olsem na mipela i save long samting bai kamap sapos mipela i no bihainim tok bilong em. Mipela givim ol fon long em.

Wantu wanpela meri i gat yunifom em i kisim gan na i kam long mipela. Em i “kuskus” bilong ol na em tu i laikim sampela samting. Em i tok ol i stap rabis na samting em i askim long en em mipela i mas givim bilong helpim ol. Orait nau narapela soldia i opim tang bensin long trak bilong mipela bambai em i ken pulimapim bensin long tin bilong em. Mipela i no orait long dispela, tasol em i no harim. Em i tok, bos i tokim em long mekim. Mipela i no inap mekim wanpela samting bilong pasim ol. Mipela i no laik long ol narapela i kisim wankain tingting.

Bihain ol i rausim samting i pasim rot na mipela i go. Mitupela i pulim win gen na bel bilong mipela i stap isi. Tru, mipela inap kisim bagarap, tasol mipela i lain pinis long ol samting ol i save mekim long ol ples bilong sekim ka. Namel long Epril 2002 na Janueri 2004, mipela i bin mekim 18 raun, kirap long taun Douala, long Kamarun, i go inap long Bangui, em biktaun bilong Ripablik Bilong Sentral Afrika. Dispela raun em inap 1,600 kilomita, na olgeta taim i gat ol samting nogut i save painim mipela.a

Joseph na Emmanuel em tupela draiva i save mekim dispela raun, ol i tok: “Ol dispela raun i bin skulim mipela long planti samting. Em i savepasin long mekim planti beten long tingting na i stap isi. Man bilong raitim song i tok: ‘Mi save bilip long God, olsem na mi no ken pret long wanpela samting. Bai ol man inap mekim wanem samting long mi? Nogat.’ Mipela i wok strong long kisim tu wankain tingting. Mipela i bilip olsem Jehova i save pinis long raun bilong mipela i bilong bringim tok long ol man long gutpela samting ol inap wetim i kamap bihain.”​—Song 56:11.

Bikpela Wok Bilong Bringim Tok Bilong God Long Ol Man

Planti man long dispela hap bilong Afrika ol i amamas long harim gutnius bilong Kingdom Bilong God. Ol buk na nius mipela save karim long trak em i bilong helpim ol long kisim save long tok bilong God. (Matyu 5:3; 24:14) Brens ofis bilong ol Witnes Bilong Jehova long taun Douala long Kamarun, i save salim ol buk na nius samting i go long 30,000 pablisa bilong Kingdom na ol man i laik harim tok bilong Baibel long ol hap bilong Kamarun na 4-pela kantri i stap klostu.

Ol dispela buk samting i bin raun pinis long longwe hap. Klostu olgeta em ol i bin prinim long Finlan, Inglan, Itali, Jemani, na Spen. Orait ol i putim long sip long Frans na salim. Long olgeta tupela tupela wik, traipela bokis olsem kontena i gat ol buk samting bilong Baibel i save kam kamap long Douala.

Ol bikpela winis i save apim kontena na putim long trak na em karim i go long brens ofis. Ol wokman long dipatmen bilong salim ol buk samting, ol i save skelim hamas hamas buk samting i mas i go long ol narapela narapela hap. I gat hatwok long salim ol dispela buk samting i go long ol ples i stap longwe tru. Tasol em i hap wok bilong bringim gutnius “i go inap long olgeta hap bilong graun.” (Aposel 1:8) Brens ofis i save tingim tru pasin bilong ol volantia i save lusim ol samting bilong ol yet bilong mekim dispela wok​—bilong raun long ol trak na bringim ol buk samting i go​—em ol inap painim bagarap long en. Long dispela rot planti buk na nius bilong Baibel i save go long planti milion manmeri long Sentral Afrika.

Wanpela Raun

Ol buk samting ol i save salim long Ekwatorial Gini, Gabon, Kamarun, Sat, na Ripablik Bilong Sentral Afrika, ol trak i save karim i go. Orait yumi ken raun wantaim wanpela trak na draiva na boskru bilong en. Piksaim long tingting olsem yu sindaun wantaim ol draiva na yu redi long raun inap 10-pela de samting long dispela raun.

I gat 6-pela draiva bilong mekim dispela raun. Ol i mas i gat strong, gutpela save, ol no ken les kwik, na ol i mas bilas gut. Ol i putim klos bilong ol Afrika o gutpela siot na nektai. Long bipo sampela ofisa bilong lukautim kastam i bin tok: “Lukim dispela klinpela trak na ol draiva i bilas gut, wankain olsem yumi save lukim long ol piksa i stap long ol buk bilong ol.” Na bikpela samting moa i winim bilas bilong ol draiva, em ol i orait long go long wanem wanem hap bilong mekim wok bilong helpim ol narapela.​—Song 110:3.

Tulait pinis na yumi lusim Douala long 6 klok moningtaim na bai yumi ken abrusim planti ka i ran long ol rot bilong dispela biktaun. Yumi kalapim wanpela bris klostu long brens ofis na yumi lusim taun, na i go long hap is bilong kamap long namba wan taun yumi laik go long en​—em Yaoundé, biktaun bilong Kamarun.

Olgeta 6-pela draiva bai tokim yu long hatwok bilong draivim trak i karim 10-pela ton buk. Inap 3-pela de yumi ran long gutpela rot i gat kolta na i no gat sampela hevi, tasol oltaim draiva i mas lukluk gut long rot na tingting i no ken raun. Orait wantu bikpela ren i pundaun. Kirap long dispela hap i no gat kolta moa long rot. Nau yumi hatwok long lukim gut rot, na rot i wel na yumi mas ran isi isi, long wanem, rot i nogut. Em i klostu tudak na em i taim bilong malolo na kisim sampela kaikai, na slip liklik. Ol dispela kain raun em olsem tasol!

Long bikmoning tru yumi i kirap gen long raun. Wanpela draiva i gat wok long lukluk gut long rot. Sapos yumi i go klostu tumas long baret arere long rot, kwiktaim em i toksave. Ol draiva i save pinis, sapos rot i wel na trak i go insait long baret, em bai bikpela hatwok tru inap sampela de bilong pulim trak i kam antap. Taim yumi i brukim boda i go insait long Ripablik Bilong Sentral Afrika, ol rot i olsem tasol. Inap 650 kilomita moa, yumi i ran long ol naispela hap tru bilong bus i gat ol grinpela gras na diwai na ol liklik maunten. Ol pikinini, ol lapun, ol mama i karim ol liklik pikinini long baksait, ol i amamas na tromoi han taim yumi i ran isi i go abrusim ples bilong ol. Pait insait long kantri i mekim na i no gat planti ka long rot, olsem na ol manmeri i kirap nogut long lukim yumi.

Sampela Gutpela Samting i Kamap

Wanpela draiva bilong yumi, em Janvier, em i tok, maski ol i gat bikpela wok, sampela taim ol i save pasim ka na malolo long sampela liklik ples na tilim ol nius bilong Baibel long ol asples. Em i tok: “Long Baboua, oltaim mipela i save toktok wantaim wanpela man i wok long haus sik em i gat bikpela laik long harim tok bilong Kingdom, na mipela save mekim sotpela Baibel stadi wantaim em. Wanpela taim mipela i soim em wantaim famili bilong em long vidio i stori long Noa. Sampela pren na neiba bilong ol i kam, na haus i pulap tru na ol i amamas long lukim piksa. Olgeta i bin harim stori bilong Noa, na nau ol inap lukim vidio na bihainim stori bilong em. Ol i tenkyu tru long lukim dispela vidio, na bel bilong mipela i pilim tru. Bilong soim tenkyu bilong ol, ol i wokim kaikai na ol i tokim mipela long slip long ples long dispela nait. Mipela i mas lusim ples hariap, long wanem, mipela i gat longpela rot yet bilong raun long en. Tasol mipela i amamas long mipela inap autim gutnius long dispela lain i gat pasin daun.”

Narapela draiva, em Israel, em i stori long ol samting i bin painim ol taim ol i raun i go long Bangui, em ples nau yumi laik go long en. Em i tok: “Taim mipela i wok long kamap klostu long Bangui, i gat planti rotblok moa. Tasol gutpela tru, planti soldia i mekim pasin pren long mipela na ol i tingim yet trak bilong mipela long ol narapela raun bipo. Ol i tokim mipela long sindaun wantaim ol, na ol i amamas long kisim sampela buk bilong Baibel. Ol buk i bikpela samting long ol, olsem na ol i raitim nem bilong ol long en, de ol i kisim, na nem bilong man i givim buk long ol. Sampela wanblut bilong ol soldia ol i Witnes, na long dispela as tu ol soldia i mekim gut long mipela.”

Joseph, em draiva bilong longtaim, em i stori long wanpela samting bilong ol dispela raun em i save tingim tru​—em taim ol i go kamap long taun ol i laik go long en. Em i tingim wanpela raun na em i tok: “Taim mipela i kamap klostu pinis long Bangui inap olsem 4-pela kilomita, mipela i ring bilong toksave long ol brata olsem liklik taim bai mipela i kamap. Ol i kam bungim mipela na bringim mipela i go insait long taun na helpim mipela long stretim ol pepa bilong gavman. Taim mipela i kamap pinis long brens ofis, olgeta bratasista i ran i kam ausait bilong sekanim mipela na holimpas mipela. Ol kongrigesen i stap klostu ol i kam helpim mipela, na insait long sampela aua tasol mipela i rausim planti handet katon Baibel, buk, buklet, na ol nius i stap long trak, na putim gut insait long bakstua bilong ol buk samting.”

Joseph i tok moa: “Sampela taim ol brata i save givim ol klos, su, na ol samting bilong ol pikinini na mipela karim i go long Ripablik Demokratik Bilong Kongo. Mipela i amamas tru long lukim pes bilong ol brata ol i amamas na tenkyu long ol samting ol i kisim!”

Mipela i malolo inap wanpela de na nau mipela i redim trak bilong mipela na go bek long rot mipela i bin kam long en. Sampela hevi bai bungim mipela long rot, tasol mipela i tingim bikpela amamas mipela i bin kisim bilong helpim ol brata na mipela i no tingim tumas wanem hevi bai kamap.

Ol longwe rot, bikpela ren, ol rot nogut, taia i slek, ensin i bagarap, ol dispela samting i save givim hatwok long ol draiva. Na olgeta taim ol bikhetlain soldia i givim hatwok tru long ol. Tasol i no gat wanpela samting inap long mekim ol dispela draiva i belgut olsem wok bilong bringim gutnius bilong Kingdom i go long ol longwe ples bilong Afrika, na long lukim ol gutpela samting dispela gutnius i mekim long i stap bilong ol manmeri ol i kisim dispela tok.

Olsem: Dispela wok i mekim na wanpela man i stap long wanpela longwe ples long Ripablik Bilong Sentral Afrika, nau em i save ritim Baibel em ol i bin tanim long ol tok bilong nau. Meri bilong em i save stadi long ol nupela nupela Wastaua, na ol pikinini bilong ol i stadi long buk Kisim Skul Long Bikpela Tisa.b Dispela famili wantaim planti lain moa long ol dispela hap bilong bus ol i save kisim tok bilong God wankain olsem ol brata Kristen bilong ol long planti bikpela taun. Tru tumas, em wanpela samting bilong amamas tru long en!

[Ol Futnot]

[Ol Mep/Piksa long pes 9]

(Bilong save ol dispela rait i stap we long pes, lukim buk o magasin)

KAMARUN

Douala

RIPABLIK BILONG SENTRAL AFRIKA

Bangui

[Piksa long pes 9]

Joseph

[Piksa long pes 9]

Emmanuel

[Piksa long pes 10]

Brens ofis bilong Ripablik Bilong Sentral Afrika, long Bangui

[Piksa long pes 10]

Ol i rausim ol katon buk samting long trak long Bangui